الموضوع بالنسبة لي عامل زي مانكون كلنا في لجنة إمتحان والإمتحان صعب وفيه أسئلة معقدة شوية وجماعة من الناس قالوا المسيح هو الحل رحنا نشوف الحل بتاعهم لم نقتنع به شوية ومجموعة أخري راحت قالت الإسلام هو الحل رحنا نشوف الحل بتاعهم برضه لم نقتنع وقلنا نحاول نشوف إحنا حل بنفسنا

شوية وفريق الصليب مسك في فريق الهلال وهاتك ياحروب صليبية وجهاد وطبعا بعد ما زنقونا الإتنين في كورنر وهاتك يادبح وتقتيل فينا لمجرد عدم إقتناعنا بحلولهم

تمر الأيام ويتغير الحال -وسبحان مغير الأحوال- وتصبح لنا اليد العليا وزنقناهم في الكورنر بس كل الي بنحاول نعمله إن إحنا نكتف إيديهم ورجليهم علشان لا يؤذوا نفسهم أو أي أحد أخر ونحاول إحنا نركز ونشوف حل

عندما ظهر فيروس الإيدز خرج علينا قادة الفريقين بشماتة الجهلة ليقولوا لنا إن ذلك غضب من الله بسبب إنحرافكم طبعا ولا عبرناهم ومشينا كالعادة لوحدنا نحاول نشوف حل للمصيبة الجديدة وفعلا بدأت تظهر حلول لكن الأروع من كده إنه أثناء بحثنا حدثت طفرات هائلة في علم الفيروسات والمناعة ومضادات الفيروسات هما نفسهم بييجوا لحد عندنا علشان يستفيدوا منها وده طبعا بعد يئسهم من إنتظار جودو الذي لا يجيب دعوة المضطر

لو قعدنا نولول زيهم قدام كل مشكلة كان زمان البشرية لغاية دلوقتي راكبة بهايم

يقوم زلزال في مصر يبقي غضب من ربنا
طيارات تخش في مبني التجارة العالمي يبقي ربنا رفع حمايته عن أمريكا بسبب المثليين
تسونامي يموت الألاف يبقي ربنا منفسن من جنوب شرق أسيا

ياجماعة إذا كنتم حاسين بالعجز وأنكم غير قادرين علي حل أي مشكلة فعلي الأقل لاتكونوا عقبة في طريقنا

عمركم شفتم واحد ملحد أتنرفز لأنكم أنتقدتم داروين
مش عاجبكم داروين --أوكي هاتوا نظرية أحسن من بتاعته وأثبتوها

عمركم سمعتم إن الملحدين عملوا مظاهرة عندما أرتد أنتوني فلو ولا مصطفي محمود علي عقبيهم
وطالبوا بإرجاعهم لحظيرة الإلحاد

عمركم شفتم الملحدين طالعين في مظاهرة بيطالبوا بمنع فيلم ولا رواية

ياجماعة أرحمونا وأطلعوا من دماغنا لأن بصراحة عنفكم لن يولد سوي عنف مضاد وبالتأكيد ستكونوا أنتم الخاسرين