دي قصيدة من شعر أبو النجوم وعايز رايكم فيها [B]بيان هام

هنا شقلبان محطة إذاعة حلاوة زمان من القاهرة ومن كردفان وسائر بلاد العرب
واليابان ومن فنزويلا وأيضا إيران
ومن أي دار أو بلد مستباحة
بفعل السياحة مع الأمريكان
هنا شقلبان
محطة إذاعة حلاوة زمان
نقدم اليكم بكل اللغات مراسح وسيما وجميع الفنون
صحافه ومنابر وتليفويونات وخطبا ف جوامع
وجبنه وزيتون
ونفزح ونركب جميع الموجات
ونبحث ونفهم فى كل الشئون وديما نلعلع في كل الحالات
ولا حد سامع ولا يحزنون
وتمسع ما تسمع دا ما يهمناش لان أحنا أصلا
بناكل بلاش فخليك فى نفسك
وما نخليناش نسلط عليك القلم واللسان
هنا شقلبان
محطة إذاعة حلاوة زمان يسر الإذاعة وما يسركوش
بهذه المناسبه وما بندعيكوش
نقدم إليكم ولا تقرفوش
شحاتة المعسل بدون الرتوش شهبندر سماسرة بلاد العمار
معمر جراسن للعب القمار وخارب مزارع
وتاجر خضار وعقبال أملتك أمير الجيوش
ما تقدرش تنكر تقول ما اعرفوش
ما تقدرش أيضا تقول ما اسمعوش
شحاتة المعسل حبيب القلوب
يزيل البقع والهموم والكرب
يا نفس يا فين يبلغ حبوب
ويفضل يهلفط ولا تفهموش
وتفهم ما تفهم دا ما يهمناش
لان أنت فاهم وعامل طناش
ح تنكر وتحلف ح أقول لك بلاش
ح تتعب دماغنا وتتعب كمان
هنا شقلبان
محطة إذاعة حلاوة زمان
لان المخبى ظهر واستبان وكل المسائل
بدت للعيان وطلعت حكاوي ونزلت كمان
عن التهريبيه وعن كيت وكان
وعن محسوبية وعن العبان ظهر في المدينة
كأنه الطوفان وغرق مراكب وسوح غيطان
وبعض المراكب ح تغرق كمان
وأزمة مساكن وأزمة أمان
وعالم بياكل في عالم جعان
وريحه مؤامرة في جو المكان
مخطط خيانة مع الأمريكان لدبح العشيرة
وحرق الجيران وفيه ناس بترغي
ولازم بيان كما ابلغونا جميع الودان
لهذا وذاكا ... وتكلم كمان
نقدم إليكم
عروسه وحصان شحاتة المعسل
وهذا البيان
هنا شقلبان
محطة إذاعة حلاوة زمان
بسم الله سلام عليكم
وسلمون وموز وأما المسائل فنجف ولوز
فيا إخوتي ويا أخوات إليكم بياني كما هو آت
جميع المسائل تمام التمام وكل الكلام دا
مجرد كلام فصبرا جميلا ولا تقلقوش وشغل الضغاين
أنا ما اقبلوش ما فيش أي حاجه
على الطلاق والعتاق بالتلاتة
ما فيه أي حاجه
وقدر كمان أن فيه أي حاجه
ما فيش أي حاجه
ما لوش أي لازمه الكلام واللجاجة
وعيب أن عيل يسوق السماجة ويعمل ديباجه
أنا بطبعي ضد السماسرة الكبار بحكم المنافسة
وحكم الجوار لكن مش ف طبعي أني اعمل فضيحة
لو احد زميلي هبش كام صفيحه ما كل الزمايل
بتهبش صفايح وكل اللي جاي مش زي اللي رايح فيا أيها الشعب
صهين تفعلص مساء التنفس مساء الرويح
اخويا الأمير بزرميط الإيراني
بعت لي السنة دي عزمني ودعاني
أنا قبلت طبعا ورحنا العزومة وكانت وليمه
ما تحصلش تانى
دا إيه المحمر وإيه المكمر وإيه المشمر وإيه الصواني
أنا دماغي تعبت ولفت صراحة
من الفخفخة واهنا الأصفهاني
هناك يعنى مثلا إذا شربت طافية تمز بكوارع
وبسطرمة ضأني ما شفتش هناك
ناس بتحقد عليهم ولا ناس بتشتم فلان الفلاني
لأنه اشتري عزبتين من شطارته وحكمه إدارته وطلع مباني
وبعد الوليمة استلمنا الهدايا
مفضض ومدهب وقز وقيشانى
وطبعا اخويا الأمير قال لي حاجه
ح أقوالها لكو طبعا إذا الوقت ناسب
ح تطلع لي عيل بدون أي حاجه ويعمل لي فلحس ويقعد يحاسب
دا حقد اشتراكي أنا ما اقبلوش ولو هو ابني أنا ما اعتقوش
كلام عن سماسرة كلام عن دعارة حاجات مش صحيحة
جمل مستعارة وعايزين يخلوا البلد أردغانه
وعايزين اسيب البلد من زمان وأنا مش ح اسلم
واسيب الأمان ولا بالبوليس والنيابة كمان
فيا أيها الشعب كمل جميلك
وصبرا
وإذ لم حتيجى المصاري وتأكل وتشرب
تبع ما يأتيك وتغرق في بحر العبيد والجواري
وترسم حياتك حسب مرائياتك وتملا الحواري
فساقي وقصاري تسبح بحمدك وتشكر جميلك
وفضل الزبالة وطفح المجاري
ختاما سلاما وأخر كلاما
ضرورا يسود الهدوء والوئاما
فماذا وإلا ح اطربقها واللا
اهرب فلوسي وأسافر قواما
سلام عليكم وسلمون وموز
بصفتى رئيسا
وابا
وجوز
خلصت القصيدة بس في قصيدة تانية وبرضة عاوز رايكم فيها
[B]صرخة جيفارا
جيفارا مات
جيفارا مات
اخر خبر فى الراديوهات
وفى الكنايس
والجوامع
وفى الحواري
والشوارع
وع القهاوي وع البارات
جيفارا مات
واتمد حبل الدردشه
والتعليقات
مات المناضل المثال
ياميت خسارة على الرجال
مات الجدع فوق مدفعة جوه الغابات
جسد نضالة بمصرعه
ومن سكات
لا طبالين يفرقعوا
ولا اعلانات
ما رايكم دام عزكم
ياانتيكات
يا غرقانين فى المأكولات
والملبوسات
يا دافيانين
ومولعين الدفايات
يا محفلطين يا ملمعين
ياجيمسنات
يا بتوع نضال اخر زمن
فى العوامات
ما رايكم دام عزكم
جيفارا مات
لاطنطنة
ولا شنشنه
ولا اعلامات واستعلامات
**
عينى عليه ساعه القضا
من غير رفاقه تودعه
يطلع انينه للفضا
يزعق
ولا مين يسمعه
يمكن صرخ من الالم
من لسعه النار ف الحشا
يمكن ضحك
او ابتسم
او ارتعش
او انتشى
يمكن لفظ اخر نفس
كلمه وادع
لجل الجياع
يمكن وصيه
للى حاضنين القضيه
فى الصراع
صور كتير
ملو الخيال
والف مليون احتمال
لكن اكيد
اكيد اكيد
ولاجدال
جيفارا مات
موتة رجال
ياشغالين ومحرومين
يا مسلسلين رجلين وراس
خلاص خلاص
مالكوش خلاص
غير بالبنادق والرصاص
دا منطق العصر السعيد
عصر الزنوج والامريكان
الكلمه للنار والحديد
والعدل اخرس او جبان
صرخه جيفار يا عبيد
في اى موطن او مكان
مافيش بديل
مافيش مناص
يا تجهزوا جيش الخلاص
يا تقولوا على العالم خلاص
دي قصيدة من روائع ابو النجوم وعلى فكرة ده راي ناس كتير :loveya: