و الله يا صديقي يا كومبيوترجي ... اول سنة بالغربة كنت اسال حالي هيدا السؤال كل ساعة مش كل يوم ... بس بعدين بطلت فارقة معي ... لني صرت اسأل حالي السؤال بالعكس ... ليش حتى ما نتغرب ؟

يمكن لكل مجتمع و لكل بلد خصوصياتو و لكل شخص ظروفو و بالتالي يمكن يختلف الجواب من شخص لأخر .. بس الكل بيدور حول فلك واحد

المشكلة برأيي اولا مادية بحتة .. انا شخصيا كنت عايش مرتاح ببلدي و مش ناقصني شي .. بس لما صرت فكر بالمستقبل صرت حس انو لح ينقصني كتير و اذا بضل بهيدي الحالة مش لح يكون عندي مستقبل ببلد المادة و الفلوس فيه محصورة بيد او تحت رحمة مجموعة من الانتهازيين و اغنياء الحرب و السياسيين الفاسدين عم يتحكموا بالعالم و الشعب المغلوب على امرو .. و الواحد مشان يأمن مستقبل على الأقل يكون كريم مش لح يمشي حالو بهيك وضع مادي ..
يعني مثلا انا لح كون مستقر اما ببيروت او بالشام كوني انتمي لهاتين المدينتين .. مثلا متخيل شو معنى الواحد يقدر يشتري بيت ببيروت او بالشام ؟ هلأ ممكن الواحد يقدر يشتري بيت صغير على القد بالضواحي او بمناطق ( يطلق عليها شعبية اعتباطا ) .. بس هل هو هيدا البيت يلي بدك ياه ؟؟ و هيدا الشي بيقودنا للسبب التاني
و يلي هو الشخص بذاتو ؟ انا بفكر و بحلم بمستقبل خاص فيي و عم اسعى لحققو و ما عندي اي استعداد اتنازل عن اي فكرة بدي كونها بالمستقبل .. لأنني ببساطة بستحق المستقبل يلي عم اصنعو .. بس المشكلة انو بسبيل اصنع حلمي كان لازم اتغرب لأنو بكل اسف بلدي غير قادر لأسباب عدة و متعددة و معروفة بمعظمها على انو يكون حجرة اساس ابني عليها .. فكان لازم اتغرب على امل العودة حامل صخرتي بايدي و ابني عليها حلمي ..
بلدي لسبب او لأخر عم يرفض يتقدم .. عم يرفض ينفتح .. بعد ما كان بطليعة البلدان صار أخرها .. انا شخص بدي اتقدم بدي اتطور بدي انفتح على العالم ... العالم عم يمشي حوالينا و نحنا قاعدين .. على الأقل لازم نمشي معو .. اذا بلدي ما بدو يمشي او ممنوع من المشي .. انا بطلع لوحدي و بمشي ..
بمجال عملي التقنيات يلي عم استخدمها بالغربة لسى ما فكروا يطبقوها ببلدي .. يعني لازم كون متخلف مشان ضل ببلدي و مش عم افهم شي مشان ما اتغرب ؟

كومبيوترجي .. الغربة مش انك تطلع برات بلدك .. الغربة انك تكون ببلدك و حاسس حالك مش منتمي الو ...
يعني بالنسبة الي المشية بسوق الحمدية بأخر الليل او بحارات باب توما و المطر عم تنزل او اقعد بالصنايع و اشرب فنجان قهوة او وقف مع الشباب بساحة ساسين .. او اتعشى بالميدان مع رفقاتي و نضل للصبح .. او أو أو .... عندي كل هالأشيا بتسوى الدنيا و ما فيها .. بس بالأخير بعد خمس سنين من هلأ وين بدي كون ؟؟ شو بدو يصير معي ؟؟

خسرت اشيا كتيرة بغربتي .. خسرت روحاتي على المسرح يلي كنت مدمن عليها .. خسرت حفلات الموسيقا و الجاز يلي كانت مقدسة عندي .. خسرت شوفة رفقاتي كل يوم .. خسرت ضم رفيقتي و نحنا عم نتمشى تحت المطر .. خسرت الليل ببلدي .. خسرت فنجان القهوة الصبح مع امي على الفيرندا قدام الجنينة .. خسرت فوت على المطبخ المسا مع ابي و نساوي العشا انا وياه ... خسرت كلمة صباح الخير من اختي .... خسرت جزء من روحي و جزء من كياني
بس شو العمل .. اخسر جزء هلأ او اخسر اجزاء بعدين .
واقع و بدنا نعيشو ..

كلنا مرينا و يمكن لسانا عم نمر بصراع القلب و العقل .. هيدا الصراع الأزلي القاسي و المرير .. بس لازم بالأخير تحسم امورك .. انا خترت العقل على امل اني لح ارجع للقلب و العاطفة لما بحس انو صار الوقت او اجى الظرف ..

و شي أخير .. الاساسيات مش هي بس الضرورية .. الكماليات ضرورية كمان .. و هيدي مش نظرة سطحية .. يعني متل الطبخ .. بدون بهار مش طيب

لح قلك خلاصة اقتنعت فيها بعد سنين غربتي .. لو عندك طموح و عم تسعى لتبني حلمك فلح تتغرب لأنو لا ببلدك ولا ببلدي لح نقدر نحقق شي بلدي ما عادت الي سرقوها مني .. لو كنت مش طموح و مش فارقة معك شو لح تكون الحقيقة بمستقبلك فرجاع لبدك ولا تعزب حالك ولا تعزب قلبك ..

:redrose: