اقتباس:خِتان ابن موسى  
24 ولَمَّا كانَ في الطَّريقِ في المَبيت، لَقِيَه الرَّبُّ فطَلَبَ قَتلَه. 25 فأَخَذَت صِفُّورةُ صَوَّانةً وقَطَعَت قُلفَةَ اَبنِها ومَسَّت بِها رِجلَى موسى وقالت: (( إِنَّكَ لي عَريسُ دَم )). 26 فانصَرَفَ عَنه. كانَت قد قالَت: عَريسُ دم، مِن أَجْلِ الخِتان.

هذه الفقرة هي من سفر الخروج الإصحاح4

بصراحة حاولت أفهمها فلم أستطع

الفقرة السابقة عليها عبارة عن إجتماع بين الرب وموسي بيخططوا فيه للمستقبل وإزاي هيتصرفوا مع فرعون والرب علمه كام حركة يعملهم للشهرة وكانت الأمور بينهم زي العسل وميت فل وأربعتاشر ومفيش أي حاجة وحشة لا سمح الله حصلت بينهم

فجأة الرب بعد شوية شاف موسي فعايز يقتله فالست صقورة الله يعمر بيتها مسكت حمامة الوادإبن موسي وراحت جايبة طوبة وراحت قايمة باللازم معاه وراحت مملسة علي رجلين موسي بالجلدة المقطوعة وقالتله إنك لي عريس دم راح ربنا قصر الشر وقفل مطوته وراح لحال سبيله

طبعا هتقولولي أنت يانيوترال لاتحترم المقدسات وأسلوبك ساخر
طب بذمتكم أعمل إيه مع نص زي ده
أحاول أفهمه تاني

موسي والرب كانوا زي العسل مع بعض ومفيش بينهم أي مشاكل ـــ تمام
فجأة الرب عايز يموت موسي:o
طيب مادام عايز يموته ماكان موته بما إنه مطلق القدرة ومن غير مايقابله ولا مثلا لما شافه تاني شكله معجبوش فكبرت في دماغه
وبعدين إيه التغير المفاجئ في المزاج ده - يعني من شوية عمالين يتسايروا مع بعض وبعدها بشوية عايز يجيب أجله - مش حاجة غريبة برضه:what:

اللي قدرت أفهمه -ومش عارف فهمي صح ولا غلط - إن صقورة الله يعمر بيتها فهمت إن الرب منفسن بسبب إن الواد مش مطاهر فراحت قايمة باللازم وتشكر علي كل حال الست صقورة بس هل ده سبب كافي يخلي الرب عايز يموت موسي:?:

طيب مش كان من الأحسن إنه مثلا ياخد موسي علي جنب ويقوله إنه منفسن من شكل حمامة الواد وياريت بعد إذنك يعني تطاهره أو شئ من هذا القبيل بدل موضوع القتل ده

وبعدين صقورة فهمت منين إيه اللي مخلي الرب نفسن من موسي بالشكل ده ـجايز صقورة تتمتع ب IQ عالي وبتقراها علي الطاير ـإحتمال برضه

طبعا أنا معجب بإمكانيات صقورة الجراحية وتمكنها من طهارة الواد بحتة طوبة بس ليه راحت مسحت رجل موسي بالجلدة:?:

وبعدين صقورة ـوواضح من رد فعلها ـ إنها شافت الرب وأدركت إنه غاضب وعايز يموت موسي - فهل نقدر نعتبر إن صقورة هانم من ضمن الصفوة الذين تمكنوا من رؤية الرب:what:

طيب الرب خلاص خد قرار إنه يجيب كرش موسي إيه اللي خلاه يرجع في كلامه بعد اللي عملته صقورة
هو يعني أرواح الناس لعبة ولا إيه:no2:

بصراحة أنا طبعا مش مصدق إن في أي جزء من هذه القصة حقيقي بس بستغرب من عقلية اللي فبركها يعني أي واحد سيقرأ هذه الفقرة بحيادية سيكتشف إنه أمام مجموعة من المجانين أو بيشاهد مسرحية من تأليف صمويل بيكيت إنما موضوع كتاب مقدس دي أسمحولي يعني واسعة شوية