الحقيقة بعد تأمل طويل وتفكير عميق وعمل دراسة جدوي لدي أحد المكاتب العالمية لقيت إن أحسن حاجة الواحد يعملها في الزمن الأغبر ده إنه يعمل دين جديد لحسابه الخاص

خلاص بقي هرجنا كتير وضحكنا كتير والناس حوالينا عمالة تنصب يمين وشمال وإحنا لسه واقفين في مكاننا ـ عايزين نعمل قرشين ينفعونا في وقت زنقة

بعد تقليب الموضوع من جميع جوانبه وجدت أن الموضوع يحتاج عناصر أساسية يجب توافرها حتي ينجح الدين - المشروع ـ وسأسردها أولا وبعد كده سأناقش كل عنصر علي حده

1- شخصية مركزية ـ أنا طبعا ومش عايز تمرد من أولها بدل ماأقل أدبي عليكم:mad2: ـ عالم تخاف ماتختشيش صحيح يبقي الواحد هو صاحب الفكرة ورأس المال ودراسة الجدوي ودول من بجاحتهم يقولولك إشمعني أنت - وبعد ماأموت وأروح في ستين داهية أبقوا إتخانقوا براحتكم علي خلافتي إنشالله تولعوا في بعض بجاز وسخ

2ـ كتاب مقدس ـ أنا فعلا إستقريت علي إسمه وهو ـالبرميل ـ ودي كلمة أصلها تشيكوسلوفاكي وتعني بالسنسكريتية وعاء الحكمة وفي الهيروغليفية وعاء الطرشي

3- معجزات ـ بصراحة الكدب خيبة وأنا مش شاطر قوي في الحكاية دي لكن محلولة بإذن الله
وسنناقش هذا الموضوع في أول إجتماع لحاملي الأسهم وربنا يسهل ـ بس بقولكم إيه مش عايز غباوة علي غرار معجزة ـومات مسموما ـ بتاعة كيرلس أفندي إحنا جايين ناكل لقمة عيش مش نتحبس - يعني اللي يألف حاجة تبقي في إطار المعقول

ولابقولكم إيه محدش يضمن حد في الزمن الأغبر ده وأنا الذي سأتولي بنفسي تأليف المعجزات
ومفيش إجتماع جمعية عمومية ولا زفت أنا لغيته خلاص محدش ييجي

4 ـالطقوس والأعياد الدينية ـ يعني صلاة صوم وماشابه مع إختيار يوم راحة أسبوعي علي ألايكون الجمعة أو السبت أو الأحد وذلك لتميزنا عن باقي الأديان والطوائف الكافرة

5- التسييح للدين الجديد ـ وهو شئ مشابه للتبشير عند فريق الصليب والدعوة عند فريق الهلال وشعار التسييح سيكون ـ الزن علي الودان أمر من السحر ـ

6- التمويل- مبدئيا سيكون رأس المال من الأعضاء لكن لما ربنا يفرجها والبلية تلعب سنطبق نظرية من دقنه وأفتله

7ـلحظات حاسمة في تاريخ الدين الجديد /حاجة كده زي الموعظة علي الجبل أو محاكمة المسيح وصلبه وقيامته أو خطبة الوداع أو خطبة مارتن لوثر كنج بتاعة i have a dream

8ـ أعداء الدين الجديد/ ودول مهمين جدا لإستدرار عطف الناس علينا وإجتذابهم لدعوتنا عندما يرون الإضطهاد الذي نلاقيه في سبيل دعوتنا - يعني كمثال الولد الشرير كعبة اللي شتم عمو نيوترال ممكن نستخدمه لتوضيح مدي الإضطهاد الذي نعاني منه

9- المؤمنين بالدين الجديد / دول سينقسموا لعدة طبقات

طبقة الحبايب ـ ودول حاجة كده زي التلاميذ أو الصحابة ودول سيكونوا المقربين للشخصية المركزية اللي هو أنا-وقلت مش عايز حد يفتح بقه بدل ملطشله:mad2: ـ وغالبية طبقة الحبايب ـ إن لم يكن كلها ـ ستكون من النساوين تعويضا لهم عما لاقوه علي يد الأديان الباطلة الأخري من ظلم وإضطهاد ودول سيكونوا في حالة إجتماع حميمي دائم مع الشخصية المركزية اللي هو سعادتي ـ لسه في حد عنده إعتراض:mad2: ـ للتباحث في شئون الدين الجديد

طبقة الفواتير - اللي هو سعادتكم وستكونون حلقة الوصل بيني وبين الطبقة الثالثة وهي طبقة القطيع ولكن يحظر تماما عليكم إجراء أي إتصال بطبقة الحبايب ـ إحنا دين محترم وليه سمعته في السوق ومش عايزين كلام الناس يكتر علينا -أنتم فاكرنها سايبة ولا إيه

طبقة القطيع ـ ودول مجموعة الحثالة والمغيبين الذين سيتم السيطرة عليهم عن طريق الفواتير بتوجيهات من الشخصية المركزية ـ أظن دلوقتي عرفتم هو مين:) -

10ـ قصص تحول من أتباع الديانات الباطلة الأخري للدين الجديد ـ ودي أنا كنت ناوي أناقشها في الإجتماع الذي سنناقش فيه موضوع المعجزات وبما إني لغيته فسأتولي بنفسي تأليف تلك القصص


سنناقش غدا التفاصيل لكل العناصر السابقة