زميلنا باسل قد ينقطع عنا اياما لا نعرف عددها ولكن اتمنى ان يرجع وقد حقق ما يرغب وما ذهب من اجله



وصلتني منه هذه الرساله وطلب مني ان اسلم على الجميع واابلغهم عن انقطاعه ولكني سانقل لكم الرساله كما وصلتني ;)

اقتباس:عزيزتي ...

 

أعتذر أولا عن استطاعتي عن الردعلى اتصالاتك و التي لم الحظها الا متأخرا و ذلك لانشغالي بأمور ما قبل السفر و التجهز للسفر .

كما انشغلت بجمع بعض المساعادات المادية و العينية التي رغب بعض الشباب هنا بارسالها معي الى المحتاجين و النازحين و المصابين من لبنان ( حملة ليست بالدعائية ) .

 

المهم خلينا بالعربي ..

لح اوصل على الشام و بدي شوف شو الوضع و بناء عليه بعرف كيف لازم اتصرف ... غالبا لح ضل اسبوع بالشام  مشان المساعدات و ترتيب الأمور و بعدين انشالله الى لبنان .

 

مشاعر غريبة بحس فيها كل ما قربت .. حسيت حالي كتير مأخر عن الرجعة و كان لازم ارجع من قبل بس ظروف العمل ما سمحتلي بس مش مشكلة انشالله بعوض اللي فات .

 

لازم كون بلبنان .. مشان كون جزء من النصر يمكن ماكون حامل بندقية و عم حارب بمعركة عسكرية مع اني بتمنى بس على الأقل لح كون بين الناس بمكاني بالصليب الأحمر و يعني اذا ضمدت جرح واحد بكون قدمت شي اذا خليت طفل يبتسم بكون عملت شي .

 

المشكلة حسب ما فهمت هي ايصال المعونات الى بيروت عن طيق البر و طريق الجو لازم الاتفاق مع اسرائيل و مشان هيك لازم نلاقي طريقة عبر الصليب الأحمر الدولي ... الجواء كتير مشحونة و الوضع بتوقع انو لح ينفجر اكتر من هيك بكتير .. التهديد بضرب تل ابيب او المفاعلات النووية و المخازن الكيماوية لح توسع الحرب و تغرق المنطقة كلها .

 

الحلو بالموضوع انو الشعب السوري فاتح بيتو للبنانيين و للمرة المليون بتبرهن او الشعب السوري و الشعب اللبناني هو شعب واحد بغض النظر عن كل الحكي و التسميات و هيدا شي ما قدر حدى لهلق انو يكسروا و مش لح ينكسر .

 

المجهود يلي قدمتو الجمعيات الخيرية و الناس بسوريا و المنظمات الانسانية مجهود جبار امام ضعف الامكانيات المتاحة .

 

الشي يلي مش عم افهمو انو الشعب العربي شو عم يعمل ؟ انو لمى بيطالب انو يقاطع المنتوجات الأمريكية لازم يقاطع الحكومات العربية أول شي لأنها هي اول منتوجات أمريكية بالمنطقة .. لازم يصير شي مع انو مش لح يصير .

 

 

لسى العالم عم تحكي و الأطفال عم تموت ... مش عم يستوعبوا أنو هدول هنن المستقبل بلاهن بنكون خلصنا و انتهينا ... و لسى عم يقولو حزب ايران و شيعة و ما بعرف شو .. طيب وينن السنة ؟؟ شو عم يعملوا ؟؟ و اسرائيل حزب أمريكا أحسن من حزب الله ؟؟  

كل واحد في يعمل شي غير الحكي ... انشالله يدعي لأضراب مفتوح لترضخ الحكومات لشعوبها .

 

العالم يلي بيكون الوطن بالنسبة الن متل الفندق بيجوا ليناموا فيه كل فترة هدول مالن حق يحكوا على الوطن من بعيد .. يتركوا أمريكا و فرنسا و سويسرا و المانيا و البرازيل و يرجعوا على وطنن ساعتها يحكوا . مش يحكوا و هنن عم يتفرجوا على التلفزيون .. ..... مش لح فوت يهيدا الموضوع هلق لأنو مش ناقصني .

 

ما عندي وقت كتير .. عم استخدم الموبايل تبعي عواض المودم و اتصل منو لأني لسى عم اتنقل من مكان لمكان تاني و أهلي لسى ما شفتن لأني ماوصلت للشام بعد بعدني عم شوف الأوضاع بالجنوب السوري ... الضيع و البلدات هون صارت مختلطة لبنانيين و سوريين و البيوت مشتركة بينهن .. شي جميل رغم البشاعة .

 

سلملي على الشباب بالنادي يمكن انقطع عنو فترة منيحة و اذا نزلت علي لبنان ماحدى بيعرف شو بيصير .. سلمي على حالك أول شي .. لا تدعي بسلامتي على قدر ما تدعي اقدر أعمل يلي نزلت مشانو .

اتمنى لك كل الخير يا صديقي