--------------------------------------------------------------------------------

القصة الثالثة

--------------------------------------------------------------------------------


الشخصيات :
عباس : موظف بالشهر العقاري
وائل : ابن عباس طفل في العاشرة مصاب بفشل كلوي

--------------------------------------------------------------------------------


يتأمل الاستاذ عباس ورقة مواطن ثم يوجه حديثه له
عباس : لا يا استاذ ختم النسر ده مش واضح روح اختمه مرة ثانية
المواطن : حرام عليك يا استاذ عباس انا ختمت الورق ده عشر مرات لغاية دلوقت

عباس : انا راضى ذمتك بص كده و قلي اذا كان الختم واضح
النسر اللىفي الختم اللى قدامك ده دكر و لا نتاية (ذكر ام انثي)

المواطن يتأمل الورقة ) الكدب خيبة انا مش شايف غير نسر و بس

عباس : شفت بقه اهم حاجة اتقان العمل انا بعمل بضمير
لازم يكون الختم واضح
يصعد المواطن للدور العاشر للموظف الاخر
ارجوك اختم كويس انا تعبت انا عايز اروح بيتنا
الموظف : اكتر من كده انت فاضي باين عليك

المواطن : (يضغط على معصم الموظف و يغمز بعينه ) الاستاذ عباس بيقولك ركز شوية علي النص التحتاني علشان الختم مش واضح فيه ان النسر دكر

الموظف : دكر ايه و نتاية ايه يا اخينا انت باين عليك شارب حاجة
يا فتاح يا عليم هي ناقصاك النهاردة يا افندي كل نسورنا رجالة عيب اوي تغلط في نسور الحكومة

يرجع المواطن الي الاستاذ عباس
يجد المصلحة كلها قد توقفت عن العمل
الاستاذ عباس يرتدي شبشب بلآستيك و شمر عن اكمامه و ثنى بنطلونه
و ذهب للوضوء
استمر تدافع الموظفين كلهم في المصلحة
بعد انتهاء الصلاة
بدأ الاستاذ عباس يلملم اوراقه لينصرف

المواطن : انت رايح فين انا بقالي نص ساعة مستنيك
عباس : يا برودك يا شيخ مش كنت باصلي ولا كنت بالعب
المواطن : انا ما اعترضتش بس الختم طلع دكر زي الفل

عباس : وريني كده
يتامل عباس الختم
لا انت عايز توديني في داهية
علي العموم مواعيد العمل انتهت فوت علينا بكرة

المواطن : انا بقالي 3 ايام ارجوك خلصني

يأتي مواطن اخر و يهمس في اذنه بكلمات
يخرج المواطن 20 جنيها و يضعها مع الورق فوق الختم
و يريها للاستاذ عباس

عباس : يتامل الورقة الخضراء اهو كده راجل و ابن راجل
اقعد اجيبلك لمون
المواطن : ارجوك انا عايز اروح
ينهي الاستاذ عباس المصلحة و ينصرف المواطن اخيرا

يرجع الاستاذ عباس الى بيته و في الطريق
يكلم نفسه
ان هذه الاموال حرام انه يقف امام الله فكيف يقبل هذا علي نفسه
يعاهد نفسه ان يكون اليوم هو اخر يوم

يقفز من الاتوبيس ليفلت من رائحة العرق التي سببها تراكم الاجساد داخل الاتوبيس

يفتح بيته
يجد ابنه ممددا علي سريره
انه يحتاج الي تغيير دم مرتين في الاسبوع
في كل مرة يجلس 12 ساعة

وائل : يسأل اباه دامع العينين
ليه انا بس اللي كده وكل اصحابي بيلعبوا
كان نفسي اكون معاهم
ليه ربنا عمل في انا كده بس

عباس : (يعتصر قلبه الالم )
ربنا هيكتبلك قصر في الجنة
وهتلعب وهتعمل كل اللي نفسك فيه ساعتها

وائل : وهم هيروحوا النار؟

عباس : لا كل واحد بعمله

وائل : طب ليه انا مش زيهم
هم يلعبوا دلوقتي وفي الجنة
انا زعلت ربنا في حاجة؟؟

عباس : ابدا ده ربنا بيحب الاطفال
وائل : مانت كمان بتحبني بس مش بتعمل معايا حاجة وحشة انا بحبك ومش بحب ربنا

عباس : اوع تقول كده
ده ابتلاء من ربنا علشان يعرف الكويس من الوحش

وائل : وليه سايب اصحابي

عباس يحس بمرارة في داخله تعتصره ) يللا يا وائل نروح المستشفي احنا اتأخرنا

يصل الي المستشفي مع ابنه
الموظف :
استني دورك يا اخينا انت قدامك ساعات فيه غيرك في دور في اتقان للعمل

عباس :
(يخرج العشرين جنيه ) ويضعها في يد المسئول

المسئول :
مش تقول كده انت جيت من شوية ومشيت
دورك دلوقتي

ينظر عباس لابنه وهو يدخل مرحبا به من الجميع
و لا يدري ماذا كان سيفعل لو لم يأخذ العشرين جنيه
في ذلك الصباح
ينظر للسماء
اعمل ايه يارب