حكاية الدبانة

أحكيلك حكاية الدبانة؟
إن قلت ايه وان قلت لأ بدي أحكيلك حكاية الدبانة
إن قلت ايه يللا وان ما قلت ايه يللا بدي أحكيلك حكاية الدبانة
إن قلت طيب وان ما قلت طيب بدي أحكيلك حكاية الدبانة
إن قلت مابدي وان ما قلت مابدي بدي أحكيلك حكاية الدبانة
إن قلت خاصني وان ما قلت خلصني بدي أحكيلك حكاية الدبانة
إن قلت اف بقا وان ما قلت اف بقا بدي أحكيلك حكاية الدبانة
إن سكتت وان ما سكتت بدي أحكيلك حكاية الدبانة


آل كان في دبانة صغييرة صغيرة
مقشتها صغييرة صغيرة
قامت لتكنس
لقت فليـّس
اشترت فيه دبيـّس
لحست لحيّس
وخلت لحيّس

أجت لعندا خالتا الدبانة الكبيرة
قالت لها: وين منخلك
قالت لها: عالفريّن
مغطى فيه دبيّس
الحسي لحيّس
وخلّي لي لحيّس
قامت لحست كل الدبسات

راحت الدبانة لعند عمّا القاضي
قالت له: يا عمي القاضي يا عمي القاضي
وزززززز يا عمي القاضي يا عمي القاضي
قال لها: إيييييه ، شو بدّيييييييك
قالت له: قمت لكنس
قال لها: تنشّطتي
قالت له: لقيت فليّس
قال لها: زنكلتي
قالت له: اشتريت في دبيس
قال لها: تحليتي
قالت له: لحست لحيس وخليت لحيس
قال لها: وفرتي

قالت له: أجت لعندي خالتي الدبانة الكبيرة قالت لي وين منخلك قلتلها عالفرين مغطى فيه دبيس الحسي لحيس وخلي لي لحيس قامت لحست كل الدبسات

قال لها: ها هاااا - مادام هيك - كل ما بتشوفي دبانة واقفة بشي محل بتشلحي سكربينتك وبتضربيها
قام و هو عم يحكي أجت دبانة وقفت على دقنه قامت الدبانة الصغيرة شلحت سكربينتها ورمتها عليها قامت أجت على دقنه قام قال: أي أي أي أي
قالت له: مو أنته قلتللي!!