خلونا نكمل...

بعد أن تشرب التمر الهندي وترتوي وتكمل شندويشة الشاورما تبع مطاعم السلام وتحلف ستّين يمين ما توكل من عندهم مرة ثانية، ستكمل طريقك على نفس السايد من الشارع (السايد اليمين وانت طالع) ... على يمينك بعد حوالي خمس إلى عشر متر ستجد حلويّات القاصي، وهاظ يقال أنّه ملك الهريسة وأصابع زينب لكن أنا قناعاتي وإيماني مختلف وسأحكيلكم من وين توكلو هالقصص بس مش بشارع السعادة (لقدّام جاييكم بالكلام)، كمّل طريقك إلى الأعلى ستجد كشك عطور، طبعا كلها عطور زيتية وطريقة الحل تبعها تحدد حسب ذوقك إذا عاوز العطر دهن والا بخّاخ، لكن ما تاخذ بخّاخ لأنه بيطير بسرعة وما فيش ريحة، أما الدهن فهاظ ريحته بتعلق على ملابسك أسبوعين بالتالي أوفر لك بدل ما تبخبخ كل يوم:D بإمكانك أيضا أن تطلب من البائع أن يعبئ العطر في قزازة ماركة معروفة لأنهم بيشتروا القزايز الفاضية من البشر بنص ليرة (الله يذكر هاظيك الأيام بالخير لما كنت أستنى الوالد الله يطول عمره يخلص عطره وأمسك القزازة أراكض فيها عند العطّارين عشان نص ليرة :aplaudit: ) وطبعا أشهر عطر هو اللابيدوس أو CK وطبعا أي نوع من هاظ أو هظاك ما بيهمّش المهم الإسم بشكل عام :bouncy:

بعد كشك العطّار بتلاقي بسطة الإكسسوارات، طبعا الإكسسوارات عند هاظي البسطة بالذات شبابية وشغل الدواوين، يعني مواس على شفرات على بلاكات على واحد بتلاقيه حامل عدة التوشيم اللي هي عبارة عن علبة كبريت وبيضل يحك الكبريت بجلدك لحتّى يهريه، وطبعا بعديها لازم تروح ركاااض عالمستشفى تاخذ جميع المطاعيم من أول وجديد، بتنتظرلك شي أسبوع زمن وبصير الوشم جاهز، طبعا أشر ما يتم وشمه هو شعار الثلاث نقاط على شكل مثلث وله دلالة ما بقدرش أحكيها علني :ninja: يأتي بعده إسم الحبيبة أو أبو غضب، أبو عذاب، أبو شفّة إلخ إلخ من هاظ الحكي. وبتلاقي كمان سناسل خشب وبلاستيك، طبعا لشو البعزقة على الفضة والذهب مثل تبعون عصابات نيو يورك؟؟؟

بعد ما تدق على إيدك وتشتريلك سنسالين ثلاثة بتمر على كشك الموسيقى والأغاني اللي بعد الكشكين الأولانيين مباشرة وبتشتريلك كسيت أو سي دي مصطفى كامل اللي فيه أغنية "رحلة عمري" زائد شريط أو كاسيت أبو وديع اللي فيه أغنية "يوم الوداع" زائد أي شريط أو سي دي لمحمّد عبده ... تكمل طريقك بتكون وصلت لأول مربّع (تقاطع شوارع) فا بتروح قاطع الشارع لتكمل الرحلة:D