عزيزي إبراهيم :
شكرًا على اهتمامك , وأنا مش هقدر أحكم على الغرب عشان ما عشتش هناك وكل حياتي كانت بمصر المنهارة وبعض دول الخليج المتخلفة المصدرة للتخلف , ولكن كلنا بشكل أو بآخر على احتكاك بالغرب من خلال تكنولوجياتهم وبرامجهم وإعلامهم وفنهم ودا بيعطينا صورة شديدة الوضوح عنهم , وأنا معاك إن مش كل اللي في الغرب بيفكروا تفكير نقدي , بس فيه اتجاه للتفكير العلمي بصفة عامة والبعد عن التفكير الخرافي للظواهر والأشياء , مثلاً لو فيه طالب ثانوي عندنا تاخر في دراسته امه وابوه هيبتدوا يفكروا إن معمول له عمل وسحر أو إن عين الحسود صابته وهيبتدوا يحلوا المشكلة على الأساس دا وممكن يصرفوا فلوس كتير على الهبل دا وأولادهم في أمس الحاجة لكل قرش , ولكن في الغرب ـ في الغالب وليس الكل طبعًا ـ هيفكروا إن عنده مشكلة نفسية أو عائلية أو مع أحد أصدقائه أو أنه لا يدرس دراسة لا يحبها وهكذا ..
التفكير العملي اللي هو ضد الخرافي هو البداية وهو الفرق بينا وبينهم في الأساس , دا كمان غير مناهج التعليم عندهم وحياتهم بصفة عامة التي تتصف بالعلمانية الجميلة المحمودة في مقابل فكرنا المتخلف وشوف الفضائيات بتاعتنا حتى ميلودي بتاع الأغاني العريانة بتاجر في النغمات الدينية وإلا رسول الله , ودلوقتي لو واحد عايز يدخل الحمام لازم الأول يتصل ببرنامج عم يتساءلون وياخد راي فضيلة الشيخ والشيخ ( ة ) ...
بالنسبة للكتاب لم اقرأه ولو عندك نسخة الكترونية منه ممكن تطرحها لينا وتكون مشكور وهحاول أقراه لو تيسر وقتي الضيق الموزع بين مشاغل العمل والتزامات الأسرة ..