من وكالات خيالى

فى سابقة تاريخية لم تحدث فى أى دولة فى العالم , ما بالك فى دولة من العالم الثالث .. قرر سيادة الرئيس مبارك أعلان يوم الأثنين اللى جاى عطلة رسمية عشان الناس تسهر وتتفرج على المتش براحتها , وتنزل تحتفل بالكأس فى الشارع .

فبعد ان كسر الفراعنة عبارات الفشل والتبرير , بعد المر اللى شربناه .. جاء فرعون اسمه " حسن شحاته " وبنى جيشه , وأستعدى أفضل الفرسان من كل فج عميق . وقاد أهم أمم أفريقية , وأحسن مبارايات كرة قدم رأيتها فى حياتى القصيرة لفريق المصرى من ناحية التنظيم واللعب بالأوراق , وضمن الكأس لأول مرة مرتين متتاليين .

وفى رصدنا لفرحة الشعب بالنصر الكسيح , خرجت الجماهير الأسكندرية على طريق البحر , والطرق الرئيسية فيها بعربيات نصف نقل محملة بالناس وبالطبل والدفوف , وهاتفوا " مصر , مصر , مصر " . على طول خط البحر من المندرة الى الميناء , وقد أوقفوا طريق البحر بأعداد هائلة من البشر .

وقد لفت نظرنا وجود المواطن " محدود الدخل " فى أحدى تجليات الأحتفال , وقد وقف فوق عربية ملاكى يهتف " أبو تركية يا أبو تركية " فيما يبدو أنه سيصبح السلام الوطنى الجديد . وأقتربنا من " محدود الدخل " , وحاولت بعلو صوتى أن أنادى عليه : يا محدود , أيه رأيك فى اللى حصل ؟

محدود : أربعة , أربعة , أربعة .

ويبدو أن " محدود " نسى جلساته الدائمة مع رئيس الوزراء , والوزراء وخرج يحتفل بهزيمة قاسية جدا على منتخب ساحل العاج , ونسى طابور العيش والسوق ومشاكل البطالة , نسى كل شئ وليس فى باله غير " أربعة واحد "


* ملحوظة : على الرغم من أن ضباط المرور , وأقسام أسكندرية كلها كانت فى الشارع لحد الفجر , الا أنهم سابوا الناس تتظاهر وتعبر عن فرحتها .
البلد كانت أمبارح " واقفة " , ويوم الأحد " هيكون العيد " .

لحسن شحاته , وفرسان مصر واحد واحد (f)(f)(f)(f)