اولا: انا ضد ان كل شويه واحد يطلع يقول آمون عميل حكومه آمون مخبر وهذا الكلام الفاضي...الراجل غير انه غير ملزم بالرد على هذا الكلام اعلن اكثر من مرة انه ضد الحكومه فياريت بقى الناس تتهد وتسيبها من انتمائات الاعضاء الشخصية وتركز في كلامهم بس

ثانيا: اخ امون مع احترامي الشديد ليك فكلام "المصاطب" -بحسب تعبيرك- الوحيد اللي انا سمعتة كان: "مصر دخلت عصر الفضاء والطاقه النوويه"!! انت بتتحفنا كل شويه بالفاظ قاسية بخصوص عموم الشعب المصري وكانك بتلومهم على تخلفهم! المصري البسيط الغير متعلم لا يلام على كلام المصاطب....اللي يلام هو الانسان المتعلم القارئ اللي عنده عنين بيشوف بيها وبعد كل ده يقول وبقلب جامد "مصر دخلت عصر الفضاء والنووي"!....فياريت تخف على المصريين من تعبيرات "حثالة" و "رعاع" وخلافه.

بالنسبة بقى للموضوع بتاعك لو حللناه لعناصرة نلاقي مستند على فكرتين
1- النخبه الحاكمه هي صاحبة الحق في تقرير المصير....الاخ الاكبر بمعنى اصح..هم بس اللي يقدروا يحكموا ايه الاحسن للشعب...وطبعا ده عندك لان الشعب 1-متخلف 2-غير واعي....ومقلتلناش رايك ايه سبب تخلف الشعب وهل غياب الوعي عنه ده غلطتة ولا غلطة الحكومه
2- نتيجه للنقطه السابقة فيجب اننا نثق في الحكومه لانها في الغالب (ومع "شئ من الاصلاح السياسي" بحسب تعبيرك.. اكرر "شئ"!!) بتعمل لمصلحة البلاد بالضرورة! وطبعا الحاجه الوحيدة اللي انت سردتها كدليل يدعم موقفك هو النمو الاقتصادي! طبعا متجاهل انتشار الفقر المدقع مع هذا النمو وسحق الطبقة المتوسطه مع هذا النمو وغياب العدالة الاجتماعية مع هذا النمو وانتشار الفساد مع هذا النمو وفشل التعليم والتعليم العالي مع هذا النمو وانهيار منظومة الصحة مع هذا النمو! كل ده مش مهم المهم ان المعلمين فتحوا السوق (70 مليون نفر) لاي جحش معدي يخش يبيع بضاعتة! كانهم فتحوا عكا! وبيسموه انجاز كمان عشان يرفعوا ضغطي اكتر ماهو متنيل

طيب ايه رايك بقى في القراءة الاتية لنفس الاحداث اللي انت استخرجت منها النتايج المبهره دي: مصر اشد بلاد العالم فسادا.. بلد بلا قانون تقريبا...التفقر ( دي زي التصحر كده) بيزحف على الشعب ...احوال المعيشه من سيئ الى اسوا... النخبه الحاكمه عايشه في رفاهه عيش والتغيير الوحيد اللي طرا عليها هو مزيد من الاموال....نظام الحكم السياسي بيتحول من جمهوريه شكليه لملكية فعليه قدام عيون الناس في القرن الواحد والعشرين ... فين في القراءة دي بتحط النمو الاقتصادي بتاعك ولا الستين مليار دولار

طبعا انت في الاخر قلت انه من الصعب في الظروف دي ان الشعب يصبر(اخيرا احترمت ادمية الشعب) ولكن لو صبر فهو حيعبر للجانب الاخر!! ونرجع تاني للفكرتين اياهم...النخبه هي بس اللي تقرر وقرارها بالضروره حياخدنا للاحسن جبت منين الوهم ده انا مش عارف!

من الاخر وبعد كلام المصاطب بتاعي ده قلي سبب واحد يخليني اصدقك في ان حكومه نظيف ناجحه نجاح باهر من تلات سنوات ولازم نصبر عليها اكتر ... ومتقليش بند الانفاق في الميزانيه ابو ستين مليار الا لما تقلي بيروحوا فين!!