كلامك صح أن التصوف نزوع إنساني عام بين الأمم وبير ينهل منه جميع أهل الديانات. في الحقيقة التصوف هو جوهر الدين عامة ودين بدون روح تصوفية يبقى لت وعجن وكلام ع الفاضي. من ناحية ديانة مصر القديمة فتفسيرها من زواية صوفية بتهيأ لي صعب شوية... كيف تقدر أن تقوم إلباس عقائدهم عبائة التصوف؟ هم اللي قام بتخريج ناس زي موسى والشرائع اليهودية والسبحة فرطت من هناك وطلعت أديان الشرق. شريعة الغيرة الواردة في سفر العدد مأخوذة بالحرف الواحد من ممارسات كهنة قدماء المصريين وشفت حلقة عن كدة في قناة الهيستوري كنت أنا وزوجتي في فندق وماكناش مصدقين بالمرة وبقيت أضرب كف على كف.. حاجة زي دي هاتخليها صوفية إزاي؟ دول شوية طقوس واشربي المحلول والحس البوشعة ومش عارف إيه إلخ. التصوف هو النزعة الوجدانية الراقية وبدون ممارسات شعائرية بل في اعتقادي تتجاوزها تماما وهذا مستوى الناس مش مستعدة له لأن كلنا عايزين نلحس البوشعة ونمر بطقوس الشبة والفسوخة حتى يهدأ بالنا وضميرنا المعذب في أرق الدين. لازم من طاسة الطربة. هية كدة الأديان. طاسة طربة.. جرن معمودية.. ماء وضوء.. ميكفا لتطهير النسوان من الحيض عند اليهود.. تطهيرات أشكال وألوان.. ولكن التصوف يتجاوز كل المولد ده لما هو أبعد منه تماماً. التصوف يدخل في فحوى الحياة الروحانية ويضرب ع الوتر الحساس وهو يبحث في وجدان البشر الحقيقي وسؤلهم عن المطلق فيرتوي ظمأ قلبهم الوجداني.. لعل وعسى.