كأي شاب وصل لـ 19 عام يقوم بالتوجه إلي مكتب التجنيد التابع له ويسجل اسمه ويعطي بياناته ثم يترقب ما ستؤل إليه الأمور لعل وعسي يفوز بتأجيل 3 سنوات ثم يحصل علي معافاه من التجنيد تحت بند لم يصبه الدور , والمناحيس امثالي لا يمكن ان يفوته الدور وبدون الدخول في تفاصيل نجحت في الكشف الطبي وخدت كارنيه يفيد بأني جندي في الجيش المصري ويجب ان اسلم نفسي في الهايكستب يوم الاربعاء 8 يوليو في مركز استقبال المستجدين .

سألت اولاد الحلال قالو لي ان الهايكستب مقابل سوق العبور علي طريق مصر(القاهره) اسماعليه الصحراوي , واني لازم اكون هناك في تمام الساعه 7 صباحا وان اي تأخير مش في مصلحتي , وابن الكلب يعطيك احساس انك رايح تركب ديسكفري وانك لو مرحتش قبل 7 الصبح ممكن يطلعوا القمر من غيرك , وخرجت من بيتنا الفجر ورحت اسماعليه وركبت بيجو ونزلت من البيجو علي طريق مصر اسماعليه الصحراوي قصاد سوق العبور وسألت ولاد الحلال قالوا لي لازم اعدي الناحيه التانيه , ( لو انت جاي من القاهره يبقي مش لازم تعدي ) وفعلا عديت ولقيت ميني باص من بتاع الجيش وواحد شاويش عمال ينادي , مستجدين مستجدين مستجدين رحت راكب ولقيت واحد تاني بيلم الأجره خد نص جنيه ومدانيش تذكرة ورحنا علي مركز استقبال المستجدين وظلت الجماهير تتوافد حتي الساعه العاشرة صباحا سمعنا اول بيان عسكري بيشرح لنا ازاي هنتوزع علي معسكرات التدريب الاساسيه ويحثنا وبشده علي الشراء من كانتين المركز حيث اننا ذاهبون نحو المجهول ,وبدأت الأسئله تنهال من الحمقي والمغفلين وهم بالعشرات حول المكان الذي سنذهب ايه وكأنه اذا علم انه رايح مكان سيئ سوف يستطيع تغيير مصيره والبهيم منهم يحسسك انه مش في مركز استقبال المستجدين في الهايكستب لأ ده في مكتب حجز سياحه وبيفاضل بين الفنادق واسعارها وانا لسان حالي يقول يا خبر بفلوس بعد ساعتين يبقي ببلاش واني طالما لا استطيع تغيير المصير الذي ينتظري , يبقي لا جدوي من السؤال عنه وعلي فكره دي حاجه بلاحظها كتير في الناس حوالينا يعني مثلا منذ انتهاء التصفيات التمهيديه المؤهله لتصفيات كأس العالم في افريقيا وانتظار ما سوف تسفر عنه القرعه , لم يتوقف الحديث يوما واحدا علي القنوات الرياضيه عن توقعات الكابتن فلان للقرعه وتوقعات الجماهير والمفاضله بين تونس والجزائر والمغرب وايهما يجب ان نتجنبه , مع ان التوقعات لن تقدم او تأخر شيئ في نتيجة القرعه ولو وقعنا مع اقوي فرقه في افريقيا مثلا هنقول لأ مش لاعبين القرعه دي متنفعش ونعيط , بصرحه كنت بتشل لما اسمع اسئله مستقبيله عن اشياء قدريه لا حيلة لنا في التعامل معها او تفاديها .

اكتمل حضور الناس بعد الواحده ظهرا , وانا اللي كنت عبيط وجاي من الساعه 7 صباحا وبدأ جرد المواشي عن طريق كشوف والبقر اللي رايحه المدفعيه علي اليمين والحمير اللي رايحه المدرعات علي الشمال وظللنا 3 ساعات تحت شمس يوليو حتي تم توزيعنا علي الباصات وتحركت القافله حتي وصلت مركز تدريب المدرعات , وخلال 45 يوم هي مدة مركز تدريب الاساس خرجت بنتيجه مفادها ان مركز التدريب ده هو اونطه ومالوش لازمه , لانه ببساطه كل اللي بنتعلمه خلال 45 يوم هو الرتب والدرجات وان المشير حسين طنطاوي هو القائد العام وحسني مبارك هو القائد الاعلي , والخطوه المعتاده والخطوه السريعه وحد اتنين تلاته هوب شمال ودي حاجات مش محتاجه 45 يوم في مركز تدريب ممكن الكلام ده يحصل في الوحده اللي هيتوزع عليها الجندي من خلال سرية مستجدين في كل وحده عسكريه في الجيش ونوفر موصلات وتنقلات بين الهايكستب وباقي المحافظات ومن موقعي هذا اتقدم بهذا الاقتراح وهو الغاء معسكرات التدريب الاساسيه واستبدالها بسرية مستجدين في كل وحدة عسكريه .
وخلال وجودي في الهايكستب 45 يوم مركز تدريب اساس ثم 3 شهور فرقة سواقة دبابه استطعت استخلاص الغرض من مراكز التدريب دي , الغرض الوحيد منها هو استنزاف الجندي المستجد
الطعام من اسوأ ما يكون وكذلك المبيت والماء مقطوع باستمرار , وكلما ازداد القحط تزداد مبيعات الكانتين , وطبعا كل واحد بيبقي عامل حسابه في 200او 300 جنيه هو رايح الجيش ومهمة مركز التدريب ان يجرده من امواله بالطرق المشروعه وغير المشروعه

1

كنا قاعدين في العنبر لا بينا ولا علينا , لقينا 2 عساكر من امن الوحده بيخرجونا وبيطلبوا مننا نقف طابور قدام العنبر وبعد كده ساقونا امامهم مثل اسري حرب واتجهوا بنا علي الميز(صالة الطعام) وهناك وجدت مجموعات اخري من الاسري تأتي تباعا والعقيد ابراهيم صلي قائد الوحده يتوسط الجموع وضباط الصف يعملون علي وقوف الجنود بنظام , ووجدت الجنود مقسومه الي فسطاطين الناس اللي حضرت الغدا والناس اللي زوغت من الغدا وطبعا انا كنت بتصدر صفوف المزوغين , واعتلي العقيد ابراهيم صلي صخره واخذ ينظر لفسطاط الضلال ناثرا تهديده ومتوعدا بالعقاب واشد العذاب الفئه الضاله التي هربت من تناول الطعام واخذ يختار عينات عشوائيه ويسألها عن سبب عدم حضورها لتناول الطعام , وتنوعت الاسباب والاعذار ما بين مصاب بالبرد ومن عنده مغص , فحبيت الفت انتباهه عشان يسألني , فوقفت وقفة لا مبالاة وكسرت رجلي ونظرت له مباشرة , ونجحت الخطه ولما لمحني اعتدلت في وقوفي فسألني ليه مجتش الغدا في الميز , فقلت له بصراحه الأكل زباله وزي الزفت , فبهت الرجل من الرد , قالي يعني انت بتاكل فين , قلت له في الكانتين , رد وقال وايه اللي مش عاجبك في الاكل , قلت له الرز مليان طوب ويا معجن يا شايط والطبيخ ما يتاكلش ,ولو مش مصدق حط الخضار اللي مطبوخ النهارده قدام كلب واسجني شهر لورضي ياكل منه , بدل ما تجمعوا الناس بالعافيه عشان تاكل ظبطوا الأكل الناس هتيجي لوحدها , طبعا هلفط بشوية كلام علي اننا في مصنع الرجال ولازم اتعود علي المحن والشدائد وانتهي الموضوع بأني خاين وعميل وسجن 5 ايام, بس عملت شعبيه جامده وفعلا بدء يتابع طعام الحنود علي فترات متقطعه واتحسن الموضوع شويه

يتبع