الأعاشه والمعدات

خدمات خدمات خدمات ......... يا حبيبنا يا بلديات
خدمة ايه اللي تخليك ......... حتة شاويش يتحكم فيك
ده ان لقيت شاويش انسان ....... هتلاقي المبيت تعبان
يا شاويشنا صدق من قال ........ روح الله يجازيك
خدمات خدمات خدمات ....... يا حبيبنا يابلديات (اغنية سلامات لناديه مصطفي بعد تعديلها )

خدمات الحراسه داخل جيش حليمه تنقسم لقسمين ,خدمة خفيف الحركه , والخدمه الثابته

خدمة خفيف الحركه وهي تكون عدد من الجنود حسب قوة الوحده العسكريه كمثال في اللواء 3 كتائب وكتيبة القياده ومن كل كتيبه 5 جنود وجندي سائق مع سياره قويه ( بيجاسو عادة ) من كتيبة القياده يصبح المجموع 16 جندي ومعهم 2 صف ضابط و1 ظابط وكلهم يحملون بنادق آليه وذخيره واحد الصف ضباط يحمل RBG وكلهم متواجدين في مكان واحد بكامل تسليحهم ومستعدين للتدخل السريع والقتال في أي لحظه , ودائما هناك 3 جنود واقفين خدمه ويتبادلون مع زملائهم, والفكره في حد ذاتها جيده جدا وفعاله إلي أقصي حد , بشرط حسن أختيار العناصر , طبعا ان كل ما امر من قدامهم واشوف العساكر اللي واقفه خدمة خيف الحركه وافتكر مثلا وحدات التدخل السريع اللي بنشوفها في الأفلام , افطس علي روحي من الضحك من منظرهم , طبعا معظمهم مثلي لم يطلق رصاص طوال مدة خدمته سوي مره واحده في مركز تدريب , ناهيك عن اجادته لأي فنون قتاليه كـ الكراتيه أو الكنغ فو , وطبعا الللي موجود هما العساكر بس الظابط وال2 صف ضباط اللي مفروض يكونوا معاهم مش موجودين , وتعدي عليهم حالتهم , تقطع القلب لأن المفروض يكون فيه غرفه أو عنبر كمبيت لخيف الحركه يتواجد فيه الجنود لما يكونوا مش واقفين خدمه , وللأسف ده مكنش موجود , واللي كان بيحصل ان الجنود كانوا بيناموا علي الارض تحت السياره البيجاسو صيفا وشتاء , ولك ان تتخيل عزيزي القارئ إقامتك في العراء في جو الصحراء ونار الشمس اللافحه وزمهرير الشتاء القارس , وانت فارش بطانيه علي الارض ولا واقي سوي ظل سياره حربيه , وفي مره كنت انا واقف خدمه علي مخزن السلاح وكنا في عز الشتا والسما بترمي ثلج والواحد فينا اقدامه تجمدت داخل الحذاء وبيحتمي في مبني مخزن السلاح اللي كان عامل مربع ناقص ضلع مثل حرف U والعساكر بتوع خفيف الحركه جم (جمع جاء بالعاميه المصريه ) يناموا في مخزن السلاح , وطلع العقيد احمد زكريا في احدي نوبات جنونه في الفجر يتفقد اللواء وذهب إلي خفيف الحركه فلم يجد سوي 3 جنود واقفين خدمه وسأل عن باقي الجنود الخاليين من الخدمه واللي مفروض متواجدين بجوار زملائهم الخدمه فقالوا له انهم نايمين في مخزن السلاح من البرد وراح علي مخزن السلاح وطلع الجنود بتوع خفيف الحركه وصحاهم من النوم وقعد يكدر فيهم في الفجر وقلعهم جميع ملابسهم ما عدا اللباس الداخلي (إسكن , اسمها كده في الجيش ) واستمر يتسلي عليهم وهم عرايا في عز الشتاء من الساعه 4.30 وحتي الساعه 6.00 صباحا و6 عساكر منهم جاتلهم حمي و2 من الـ 6 جالهم التهاب رئوي وفي طابور الصبح فتح العقيد تحقيق حول الموضوع وسأل عن الظابط وصف الظباط اللي مش متواجدين في محل خدمتهم , فرد الظابط حسن ان مكان الخدمه مفيش فيه غرفة مبيت , قال له العقيد ان غرفة الإشاره فيها مكان , قاله الظابط فيها سرير واحد وكان نايم عليه صف ضابط من خدمة خفيف الحركه وهو الرقيب اول عاشور والرقيب عبدالفتاح كان موجود في في عنبر كتبة القياده وده بجوار مكان الخدمه , وانا مش هنام علي الأرض في البرد تحت السياره يا سيادة العقيد , وطبعا كلام الظابط منطقي جدا , والعقيد معرفش يعمل معاه حاجه , ولم يأكل الخري في هذه الليله سوي الجنود .

ده عن خدمة خيف الحركه ومعانتهم صيفا وشتاء , اما عن الخدمات الثابته فحدث ولا حرج بنبقي 3 جنود ( برينج , كينج , شينج ) كل واحد 8 ساعات في 24 ساعه والخدمه بتبدأ من السادسه مساء وحتي السادسه من مساء اليوم التالي وبتكون كالتالي

برينج 6---8
كينج 8---10
شينج 10 ---12
هذه ال6 ساعات الأولي
برينج 12--- 2
كينج 2 ---4
شينج 4---6
هذا عن ال6 ساعات الثانيه وبذلك تنتهي الخدمه اليليه
برينج 6 ---10
كينج 10 ---2
شينج 2 ---6
هذا عن الخدمه النهاريه وبذلك يكون اليوم قد انتهي

ولو لاحظتم ال24 ساعه مقسمه علي 3 افراد كل واحد 8 ساعات , 4 ساعات بالليل و4 ساعات بالنهار ولا مشكله في 4 ساعات النهار ولكن المشكله في 4 ساعات الليل وخاصة في الشتاء , فجنود الخدمه تنام في محل الخدمه , كنا بنفرش بطانيه علي الارض ونتغطي ببطانيتين وبطاطين الجيش خفيفه جدا ولما بنكون خدمه علي السلك الخلفي او الامامي او البوابه كنا بنام في العراء تماما , ( بتوع السلاح والذخيره كان بيلاقي حيطه ينام تحتها ) و2 مستحيل يناموا الخايف والبردان , وحتي تنام لابد لا انك تكون دفيان وعشان تدفا لازم يحدث عزل بينك وبين الجو المحيط والعازل هنا هو بطانيه بينك وبين الارض وتفضل عملية التبادل الحراري بين جسمك وبين البطانيه لحد ما تتعادل درجة حرارة جسمك وحرارة البطانيه والعمليه دي بتاخد في الشتاء في الصحراء وفي العراء ال4 ساعات اللي بين خدمتك الاولي وبين خدمتك الثانيه , يعني بعد ما تخلص خدمتك الأولي تفضل تنتفض تحت البطانيه لحد ما تيجي خدمتك الثانيه , ولو هطلت امطار يبقي تنسي انك تنام في ليلتك السوده , واللي كان هيجنني ان فيه 6000 طوبه وطن اسمنت صرفيه للوحده لأستخدامها فيما هو ضروري وتحدثنا الي قائد اللواء وطلبنا منه استخدام الطوب والاسمنت في بناء غرف صغيره تكون مأوي لأفراد الخدمه ووعد بالنظر في الأمر وفي النهايه قرر رئيس العمليات استخدام الطوب والاسمنت في تجميل ارض الطابور وعمل احواض زرع امام مكتبه ومكتب العقيد ومكاتب قادة الكتائب :D: