مساء الورد يا بهاء (f)

تفتكر أقدر أركب البالتوك على الكمبيوتر ماركة الـ ماك؟ أحاول استخدام الماك mac وهو يحفظني من بهدلة الفيروسات قدر المستطاع. لو عرفت أركب البالتوك عليه أو عملوا واحد يركب على البالتوك ممكن أجرب.

فيه كتاب عايز أهديه لك يا بهاء وأهديه لزملاء آخرين وهو كتاب ممتع لـ يوحنا قمير واسمه السعادة إمرأة:
http://ibrahim.nadyelfikr.net/السعادة%20ام...وحنا%20قمير.pdf

تعمل رايت كليك وتحفظه ع الجهاز. فيه برضو مقال هنا:
http://maaber-new.com/issue_september04/evolution12.htm

صراحة ممتع واللغة والأدب والفكر فيه حاجة جبارة. مش هانقول نتفق مع المؤلف في كل فكرة ولكنه يكفي أنه يحمل فكر واتساع وأدب ولغة وحاجات فوق مستوايا.

فهمت من كلامك أنك لك صديقة يونانية وتربطك بها علاقة ممتازة. شجعتك على تعلم اليوناني؟ فيه دي في دي تقدر تنزله ببلاش من على التورنت وهو الـ روزيتا ستون. تروح على جوجل وتكتب rosetta stone torrent.

على فكرة إمبارح نزلت فيلم حلو لعادل إمام أنوي أتفرج عليه وهو الواد محروس بتاع الوزير ونزلته في جزئين. لو عايزه ممكن أرفعه لك. لو تعرف موقع عربي حلو فيه أفلام حلوة على الرابيد شير افتكر أخوك إبراهيم الغلبان. أيضا أي أغاني حلوة بس من بتاع زمان لأني ماليش في أصالة والجيل ده. أنا واحد وأربعين سنة يا بهاء دلوقتي هههههه. كلنا لها.

بالنسبة لليوناني دي لغة أحبها لله في لله. درسته لمدة سنة في السميناري بس أي كلام وآخر بعككة حيث يدرسونها وكأنها لغة ميتة. في ذلك الوقت كنت أتصل بقسيس يوناني يصحح لي نطقي وتمنيت لو أمشي فيها أكتر. اليوناني القديم لغة صعبة بس فيه كلمات فيها لا زالوا يعرفوها وتقريباً يستخدموها. مثلا قلت له يقرا لي كلمة "إيذيه" ومعناها already. سألته: لسة مستخدمة؟ قال أيوة لازلنا بنقولها. لما رحت الكنيسة اليونانية وكلمتهم عن اليوناني بتاع العهد الجديد قالوا لي مافيش حد يستخدمه. بس اليوناني من اللغات اللي فعلا أتمنى أشد حيلي فيها حديثه وقديمه. الواحد بيقرا كتب ودراسة اللغات تحتاج لضبط وربط ومش تسالي عصاري بتاعة الكتب. حاول تنزل الروزيتا ستون لو سمحت.

مساءك ورد.
:redrose: