الموضوع ده بيفكرني بموقف حصل معايا لما كنت في مصر , اضطرتني ظروف وكنت مزنوق في مبلغ بسيط 2000 جنيه واللي اعرفهم كلهم موظفين وبيكملوا الشهر بالعافيه او هكذا قالوا ولفيت علي كل الضالين اللي اعرفهم ملقتش غير 200 جنيه ورحت لما غلبت لواحد مقتدر عندنا في الحته وعنده محل اجهزه كهربائيه كبير وحكيت له الظروف و طلبت منه 2000 جنيه سلف لمدة 3 شهور وله الضمنات اللي عاوزها فقالي انت غالي عليا واول مره تقصدني في طلب بس انت عارف ........... الخ طيب والحل يا حاج , طيب مفيش حد يسلفني المبلغ وياخده بعد 3 شهور 2200 او 2300 مثلا فقال لي اعوذ بالله حد الله بيني وبين الربا طيب انت تعرف حد بيتعامل بالربا , لا معرفش ولو اعرف مش هعرفك عليه لأنني هبقي مشترك في الذنب , طب والحل يا حاج , سكت شويه وبعدين قالي بص فيه حل تفك بيه ازمتك وحلال , قلت له ايه هو , قالي تشتري ثلاجه وتلفزيون بالقسط وتحرقهم ( تعبير عن انك هتبيعهم بالخساره كأنهم مستعملين ) وبكده تحل مشكلتك وتبقي تسدد اقساطهم علي راحتك من غير ما تشيل ذنب ومعصيه , قلت له والثلاجه والتلفزيون قسطهم كام , قالي 4000 جنيه قلت له ومين هيشتريهم , قالي متشيلش هم انا هجيب لك مشتري ليهم , طيب وهيدفع فيهم كام قال لي هيدفع لك فيهم 2000 جنيه , قلت له يعني انا دلوقتي آخد من واحد 2000 جنيه وارجعهم له بعد 3 شهور 2300 يبقي ربا وحرام ولما اشتري بضاعه ثمنها 3000 جنيه وادفع فيها 4000 جنيه وابيعها في نفس اليوم بـ 2000 جنيه يبقي حلال , قالي ما انت الـ 4000 جنيه هتدفعهم بالتقسيط علي 30 شهر وبعدين انت دلوقتي مفيش معاك ولا قرش وهتمسك في ايدك 2000 جنيه وتبقي تدفع براحتك ولا انت عاوز تشترك في ربا وتغضب ربونا , قلت لأ ودي تيجي لازم ارضي ربونا واتخزوق :roll: انا قالي خلاص فكر ورد علي , وفعلا فكرت ورحت صالحت ابويا وخدت منه الفلوس