كيفك يا حكيم؟ أهلين يا أبو الحكم...

نص الترجمة بتاعة شهود يهوه أعطاها لي شاب تعرفت به حيث كنت أبحث عن عمل للترجمة في المحكمة وإذ بي أقع في إيديه الرحيمة... وعوضاً عن أن نتكلم بشكل مكثف عن الشغل بدأ بتبشيري بـ شهود يهوه وعقائدهم من أول قعدة وجاب لي كتب مطبوعاتهم وطبعاً نسخة من ترجمة العالم الجديد. قريتها يا حكيم بس بشكل عابر. بصراحة لم أشعر فيها بدقة كاملة. في اعتقادي هي مجهود فردي زي عشرات المجهودات اللي حصلت مؤخراً وانطبعت في دار الكتاب المقدس. مثلا أنا كنت ضمن لجنة لعمل ترجمة للكتاب المقدس وبكل سهولة قامت على طبعها دار الكتاب المقدس في لبنان. زمن البيزنس وآخ يا زمن!! طبعا الترجمة اللي ساهمت بإبداء رأي فيها ترجمة زبالة وأعنى كلمة زبالة. ولكن كل ترجمة يا أبو الحكم بتكون موجهنة ومؤدلجة وواخدة خط معين. أكيد ترجمة شهود يهوه ها تركز على مفاهيم عقائدهم وينصب كل فهم واصطلاح في الترجمة عليهم تماماً زي لما واحد بروتسطانتي هايعمل ترجمة كالفينية أو لوثرية للكتاب المقدس... من المؤكد أنه لن يبخل علينا بعقائد القضاء والقدر بمفهومه الكالفيني وأن سبق تدبير الله وأن الله دفع التمن كاش عشان أجرة خطايانا إلخ. صعب يا صديقي أنك تلاقي فعلا ترجمة موضوعية. عشان كدة من رأيي لو عايز فعلا ترجمة أمينة للعهد القديم عليك بالتناخ العبري وترجمته الأسبانية وأنت حدد اللفظ العربي زي ما أنت عايز. أنت راجل أديب وتقدر تحدد اللفظ بصياغتك وبطريقتك. على رأي "العلماني" تقوم باجتراح تراكيب ومعاني جديدة.

ترجمة العالم الجديد للعهد الجديد أكيد ينصب كل تركيزها على نظرتهم للاهوت شهود يهوه وإن المسيح كان إله وكل واحد إله واللي له إله يصلي عليه وكل الكلام اللي لا يجيب ولا يودي ده. مش عايز يقول المسيح هو الله وفي نفس الوقت يقول عليه إنه "إله"! طب من فين هو إله و في نفس الوقت يقولوا إنه مخلوق؟ أي إله هذا المخلوق من حيث فكرة اللوغوس؟! ما الداعي إذا للقول بأنه "إله"؟!سفسطة بصراحة في غير محلها. لف ودوران لا يقنعني. هل نضمن عدم دخول الأجندة العقائدية في ترجمة النصوص المقدسة؟ صعب جداً.

ولي عودة صديقي.