بدايه يجب ان نؤكد على انه لا حياء فى الدين ,,, لا حياء فى العلم ,,, لا حياء فى الجنس :D

ومن اجل ان تحقق تلك الساحه اهم اهدافها وهو الثقافه الجنسيه , فوددت ان اشارك بموضوع يهم ويشغل بال الجميع متزوجين وعزاب , وخصوصا حبيبى كيمو اللى هيتجوز على روحه :D

السعاة أو التعاسة فى العلاقات الانسانية و خاصة العلاقات الزوجية الحميمة فى مجتمعاتنا الشرقية، و يمكن معظم الغربية كمان، "من أسبابها" تصرفات الرجالة اللى أغبلهم فاهمين الجنس غلط من بدايته لنهايته..و تلاقى المعلم من دول قاعد كدة ملو هدومه عمال يلعن فى حظه الهباب اللى اداله زوجة باردة و مابتحسش، و بيفكر يتجوز عليها، و بيحصل، و بيفضل يفشل فى كل مرة و هو يا كبد أمه مش عارف ان المصيبة فى سعادته، و فى جهل سعادته بالمخلوق الخرافى اللى أسمه المرأه , و بجسمها و باحتياجاتها....أو حتى بجسمه و احتياجاته هو شخصيا.


عشان كدة انا بهديله النقاط المهمة ديه على طبق من دهب بدل ما يخرب بيته و بيت اهله :

1. لازم يا معلم تفهم ان جسمك و احتياجاتك بتختلف تماما عن جسم و احتياجات الهانم حرمكم , و ان مش شرط ان اللى يبسطك يبسطها. بل بالعكس كمان، ممكن يكون اللى بيبسطك بيقرفها و بيسبب لها التعاسة فى العلاقة الحميميةدى , و دة غالبا بيطلع على جتتك بلا أزرق فى حاجات تانية كتير!!

2. كمان ياعمنا لازم تعرف ان فيه فرق كبير بين القدرة الجنسية و بين الاداء الجنسى, يعنى ممكن تكون زى الفل و صاغ سليم بشهادة الدكاترة، لكن على رأى محمود عبد العزيز "صدَّق العليل و ما تصدقش التحاليل يا دكتور" و هنا العلة بتكمن فى الاداء الغلط او الضعيف نتيجة لجهلك الفظيع و الغير مبرر يا باشا , لأن فيه كتب و برامج و انترنت فحجتك ايه؟ هو دة اللى بيتسبب فى ان المدام ماتطيقش الموضوع دة من اساسه، او تتبلد نتيجة ان البطل مابيعرفش"...يثيرها أصلا!

3. طبعا البعض بيفتخر بينه و بين نفسه بحجم عضوه الذكرى، و بتستغرب على الولية النمرودة ديه اللى مابيعجبهاش العجب، و اللى مفروض تبوس ايدها شعر و دقن :D عشان وقعت فى فحل زيك, و مش فاهم ان الموضوع مش موضوع احجام وان دة مابيفرقش تماما فى متعتها سعادتك, يعنى موضوع الحجم أكذوبة و كل الاحجام بتتساوى لان نقطة الاستمتاع ووصول شريكتك لقمة النشوة على بعد "من 2.5 الى 5 سنتيمترات فقط" من فتحة المهبل و اسمها الجى سبوت يعنى الموضوع مش موضوع حجم مهما صغر لكن موضوع كيفية استخدام!

4. أما رؤية الحجم بالنسبة للمرأة عموما بتختلف، فهى يا اما جاهلة هى كمان و بتاخد معلوماتها من اللى بيتقال حواليها و بتعتقد ان الطول عليه عامل فى اسعادها و ان نقطة الاستمتاع هى عنق الرحم، و دة غلط طبعا لان عنق الرحم اقل احساس موجود فيه عشان تحتمل المراة الولادة, يا اما مابيفرقش معاها الحجم تماما لانها فاهمة صح, يا اما عندها مزاج شخصى مثلا، بتفضل العضو السميك لانه بيسبب لها شد لجلد هذه المنطقة و هذا بيسبب لها نوع من المتعة, واخيرا فيه امرأة بتخاف جدا من كبر حجم العضو و بيحصل لها مشاكل نفسية بتسبب لها الام اثناء الجماع اذا ما حدث أصلا!

5. لازم كمان يا همام تعرف ان الجنس عند الراجل ممكن يبتدى من لحظة الممارسة، لكن عند الست الموضوع مختلف تماما لأنه لو ماكانش متوج بتعاملات كويسة خارج نطاق السرير، نادرا ما هتتبسط....لأن القاعدة العريضة بتفضل الراجل الجدع المهذب, المحترم اللى بيحسسها بانوثتها طول الوقت، مش بس لما بيعوز حاجة منها. و اللى بيحترمها و بيحترم وجودها سواء فى وجودها او فى غيابها, لكن يكون شرس بيضربها و عينه زايغة ولا نكدى واتم, وخنيئ, و قارفها فى عيشتها او بخيل و مطلع عينها، ولا مش نضيف و أنانى و ما بيهتمش غير باللى يسعده و بس, او غيرها من الحمل والعاهات اللى بنشوفها كل يوم, يبقى سلم لى على جوزك يا اسماعيل بيه وعمر علاقاتك الجنسية معاها ماهتبقى كويسة أبدا حتى لو كنت كازانوفا و مقطع السمكة و ديلها فى الموضوع دة,,,, فرصة تانية!


6. المقدمات مهمة جدا بالنسبة للمرأة، يعنى الكلمة الحلوة واللمسة الرقيقة و الجو المثير و الاضاءة الخافتة و الروائح الجميلة و زيوت الماساج و الورد و كل الحاجات اللى تلات تربع الرجالة مابتعرفهاش ديه مهمة جدا عند المرأه , لأن الممارسة الجنسية بالنسبة للمرأة هى ممارسة عاطفية فى المرتبة الاولى فالمقدمات مهمة جدا, زى ما انت مهم بالنسبة لك دكر البط و الرز اللى بالخلطة و أم على, المرأة كائن رقيق مهما بلغت من مناصب أو تعليم أو قوة فى النهاية هى بتحتاج المناخ المناسب للعلاقة الجنسية الممتعة و انت كمان ديه حاجات هتبسطك اكتر من دكر البط!

7. لازم يا عمى تكون متنوع فى ادائك و فى بداياتك و فى طرق اثارتها و استثارتها، لكن تفضل بتعمل 1 و بعدين 2 و بعدين 3 يبقى ابشر,,.ورقتك هتجيلك على يد محضر قريب جدا. لازم تعرف مفاتيح مراتك و يكون عندك قوة ملاحظة عشان تعرف اللى بيبسطها و تعمله، و تتكلم معاها فى الموضوع دة و بدون حرج, و تسألها ايه الحاجات اللى بتبسطها و تحاول تسهل عليها المهمة و تشيل عنها الحرج بانك تقول لها "يعنى انا مثلا يا حياتى بتبسط لما تعملى كذا و كذا و نفسى تعملى كذا و كذا..." هتلاقيها اتشجعت و ابتدت تتكلم معاك, السكوت من صفيح فى المواضيع ديه يا برم!

8. لازم تطول فترة المداعبة جدا و تحاول تثيرها بكل الطرق، و اعرف ان فيه ستات كتير مابيحصلهاش اورجازم عن طريق المهبل أصلا فلابد من اثارة البظر حتى تصل للنشوة، سواء كان فى بداية الموضوع و قبل الايلاج أو أثناء الجماع أو حتى بعد كدة, المهم لازم تهتم بانها توصل فى كل مرة للقمة, و ياحبذا لو وصلت فى اللقاء الواحد اكتر من مرة هتشوفك سيد الرجالة, لان المرأة ممكن تصل للذروة كذا مرة فى اللقاء الواحد عكس معظم الرجالة, لكن توصل انت و تسيبها فى نص الطريق و تديها ضهرك و تنام, ديه مش بس انانية لأ ديه حيوانية كمان.

9. فيما يخص المداعبة يا ريس، ركز على مداعبة و تقبيل نقاط اثارتها، و ديه بتختلف من واحدة للتانية. لكن عموما هى بتتلخص فى الأذن و الرقبة و الظهر و الصدر و اصابع اليدين و القدمين و الأرداف و منطقة البظر و المهبل بصفة عامة, أو اى شيئ اخر طبقا لمزاجها الشخصى، و مش عيب ابدا انك تبسط مراتك و لا دة بينتقص من كرامتك و لا منظرك, بالعكس دة بيقوى علاقتكم و بيحسسها اد ايه انت عايزها و بتحبها، و بالتالى بينعكس عليك سعادة مش بس فى العلاقة الجنسية لأ فى كل حاجة, لكن اسلوب ديل الجلابية فى بقك و ايلاج على طول و خلّص نفسك، يبقى اكرملك تطلقها و تقعد فى بيت أهلك لأن دة ماسموش علاقة حميمية, دة اسمه نوع من انواع العادة السرية.

10. و أخيرا و ليس آخرا, اثارة كل امرأة هى شيئ خاص بيها جدا و اللى يصلح لواحدة ممكن يقرف التانية زى مثلا الكلام المثير جنسيا ممكن يثير واحدة و ممكن يدفع التانية للاشمئزاز, مهم اوى تعرف اللى بيثير مراتك و متستكبرش و تعمله، و كل ما هتبقى مثارة كل ما هيكون ادائها احسن و تتفاعل معاك أكتر، و كل ما الافرازات هتزيد و بالتالى يبقى الجماع ممتع و خالى من الألم، و العكس صحيح.

فيا بطل الابطال مفيش حاجة اسمها زوجة باردة فى المطلق لكن فى حاجة أسمها زوج جاهل و غشيم مش عارف يثير مراته!!!


وللحديث بقيه .


:98: