في خريف 2002 كنت اعمل مع مقاول تمديدات كهربائيه وكان العمل هو حفر وتمديد كابلات كهرباء في مدينة العاشر من رمضان الصناعيه , والعمل كان مرهق وشيق ومجدي ولابأس به وخالي من الحريم كالعاده , كنت أصحوا في الخامسه فجرا واغتسل (واخد بالك يا ابراهيم ) واتناول 4 بيضات بلدي كنت اضعهم علي النار قبل دخولي الحمام واخرج فأجدهم مسلوقين وارتدي ملابسي واضع البيض في جيبي واتناوله واحده بعد الأخري وانا ماشي في الطريق وعندما اصل الي بيت المقاول أجد زوجته قد اعدت شاي بحليب او حلبه بحليب لزوجها وابن عمه ومن حضر مبكرا فأحصل علي كوب , وعند السادسه الا ربع يكون اجتمع العمال من10-15 عامل ونركب في صندوق سياره ربع نقل ونحن متدثرين بملابسنا وتخرج بنا السياره من القريه الي طريق الاسماعليه - الزقازيق الزراعي وبعد مدينة القصاصين تسلك السياره كثير من الدروب عبر وادي الملاك حتي لا تمر علي نقاط المرور لأن حمل بشر في صندوق سياره نقل يخالف قانون المرور ويعرض الركاب للخطر (من يكترث منا) ونصل الي موقع العمل في السابعه والنصف كل منا يحمل معول وجاروف وننهمك في العمل الذي عادة يكون بحفر مسارات الكابلات ويكون الحفر بعمق متر وعرض 60 سم ولن اقول من حسن حظك ولكن دائما الارض في هذه المنطقه ارض صعبه فهي تربه حمراء يكثر فيها الحصي والحجاره وبسبب المطر والضغط الناتج عن النشاط البشري (مرور سيارات وخلافه ) تكون التربه متماسكه والحفر اليوي فيها بالغ الصعوبه ولا نستطيع استخدام الجرافات لأن الحفر المطلوب ليس كبيرا كما انه يتم في مناطق صناعيه وشوارع ممهده وبها اشجار وهذا لا يناسب الألات الضخمه , الطريحه بتاعة كل نفر 20 متر والأجره 25 جنيه وقد نستمر في الحفر 3-4 ايام قبل ان ننهيه ثم تأتي رافعه وتعلق فيها بكرة الكابل الضخمه ونقوم بفرد الكابل ووضعه في الحفر , وينتهي يوم العمل في الساعه الخامسه مساء ونعود بنفس الطريق السابق لنصل قريتنا في الساعه السادسه وأكون في البيت قبل السادسه والنصف مساء . استمر الحال علي هذا المنوال اكثر من 4 شهور وانا مرتاح في العمل , حيث لا قيود ولا تحكمات ولا زي رسمي فقط عمل شاق يخلق منك رجلا قويا , وفي يوم اغبر حضر واحد ضال وطلب ان يعمل معنا وكان معي في نفس المدرسه الاعداديه ولا اعرف عنه اكثر من ذلك , وخلال العمل نشبت مشاجره بينه وبين احد العمال فتدخلت لصالحه فنشأت بيننا شبه صداقه , وفي يوم صارحني بموضوع خلاصته انه عايزني اشترك معاه في شراء بانجو , فخلال فترة عمله القصيره تعرف علي احد الأعراب من بلبيس وهيشتري منه كيلو بانجو بـ 300 جنيه وسيبيعه لتاجر تجزئه في القريه بـ 550 جنيه والـ 250 جنيه مكسب هنقسمهم بالنص , قلت له طيب وانا مالي وليه متعملش العمليه لوحدك وتاخد انت الـ 250 جنيه لنفسك , قال اول شيئ انا مش معايا 300 جنيه وتاني حاجه الطريق اللي بتسلكه السياره بالعمال هو أهم ما في الموضوع لأنها لا تمر علي نقاط تفتيش , قلت له طيب ما هو نفس الحكايه معاك , قالي لأ انا العمال هيشكوا في لو شافوا معايا الكيس وخاصة انهم عارفين اني بشرب بانجو وممكن ياخدوه مني بالعافيه ويا أما هيقسموه بينهم أو هيقولوا للمقاول وهو ممكن يسلمني للشرطه , لكن لما الكيس يبقي معاك انت محدش هيجروء يمد ايده عليه حتي لو عارفين ان فيه بانجو , قلت له هو الكيس ده شكله ايه , قالي البانجو هيبقي متكيس ومتأمن في كيس بلاستيك وملفوف في جاكت او ما شابه ومحطوط في شيكارة اسمنت (فاضيه) قلت له في الحاله دي انا هاخد 150 وانت 100 (مصدومين طبعا )

اولا البانجو يعتبر مشروب عادي في هذه النواحي من البلاد بتكلم عن الاسماعليه معرفش ايه الحاله في باقي المحافظات , وثانيا لو انا مشتركتش في الحوار ده الناس هتبطل تشرب .... ابدا , يبقي ليه مستفيدش طالما انهم كده او كده شاربين , وبصراحه كنت عاوز اشتري كمبيوتر وكان ثمنه وقتها يتعدي الـ 3000 جنيه وقلت لو الواحد عدي له كل يوم كيلو بانجو ممكن بعد اسبوعين يكون معاه حق الكمبيوتر أضافه لأن عمري وقتها كان 23 عام وكنت شديد التهور , المهم انا اقنعت نفسي بعدالة القضيه وتمت اول عمليه بنجاح , وحينما طالبته بأصل الفلوس وربحها قال هنظبط عمليه تانيه , وبعد كده قالي ايه رأيك ما بدل ما احنا رايحين جايين كل يوم بكيلو بانجو ليه منجبش 5 كيلو مره واحده ونخلص وعقوبة 1 كيلو زي عقوبة 5 كيلو , قلت له فكره , قالي بس عاوزين 1500 جنيه معناش منهم غير 550 غير اجرة العربيه قلت له ملكش دعوه بالفلوس انا داخل بجمعيه بـ 1000 جنيه وهقبضها الأسبوع ده , بس انت مالي ايدك من المشتري , قالي عيب , المهم آخر الأسبوع سلمته 1000 جنيه واتفقنا ان هو بس اللي هيروح يخلص وهياخد معاه ريشه السواق قلت له ميضرش , وبعد كده فص ملح وداب , وبعد 3 ايام ظهر وطلع لي بحكايه انهم اتمسكوا من دوريه وهو جري والسواق اتمسك , قلت له سواق ايه اللي اتمسك يا حبيبي ده ريشه كان قاعد علي القهوه النهارده الصبح وكان بيحمل الناس وبيوديها سوق الأحد , قالي منا ما أخدتش ريشه عشان مرضيش يطلع معايا , قلت له أومال خدت مين , قالي خدت سواق من الحلوس , طبعا هو قالي من الحلوس وانا الفار لعب في عبي , لأنها منطقه كلها لبش وبصراحه مفيهاش واحد نضيف تستأمنه حتي علي 10 جنيه , المهم قلت له انت هتشتغلني وتصيع علي وخنقته وزنقته في الحائط فاتلمت الناس علينا , خير يا فارس فيه أيه , والنبي يا جماعه كل واحد يخليه في حاله , قالوا قلنا ايه الحكايه واحنا هنحط عليه ونخلص الحكايه من غير مشاكل .
طيب أقول لهم ايه , اقول اني كنت مشاركه في 5 كيلو بانجو
وبعد لحظة تفكير خاطفه قلت ابدا دي حكاية متستاهلش , فلمحت علي شفتيه شبح ابتسامه ( إذن فهو يعرف اني لن استطيع البوح بما كان بيننا )
وانسحبت من المكان وانا اشعر بأني لابس خازوق كبير يملأ ني , كأنك جلست الي صديق وتناولت معه شراب وقبل ان تنهي كأسك فقدت الوعي لتصحو وقد قضي صديقك وطره فيك , ومن شدة الصدمه جلست مذهولا يلفك العار وعدوك يودعك بأبتسامه ساخره .
كنت مغتاظا غيظا شديدا لعدة اسباب انا لا اجني المال بسهوله , وهو رأي بعينه العمل الشاق الذي اعمله , فمفهوم انه ينصب علي شخص مرتاح انما شخص بيطفح الدم عشان ال10 جنيه , فدي نداله ومنيكه واستهانه بي , وايضا ما حدث اهانه لذكائي , فكيف استطاع صايع مثله خداعي
في نهاية اليوم , كنت قد توصلت الي خطة عمل لمواجهة هذا الموقف .
اولها الردع , وثانيها تعويض الخساره .
طبعا لا جدوي من الشكوي لأحد سوي التسييح , اريد ان اضربه علقه موت واسلخ فيها من جسده وزن ال1300 جنيه اللي نصب علي فيهم لكن فكرت ان لا جدوي من الضرب فسيتكررر ما حدث اليوم وستتجمع الناس لتسأل ايه الحكايه , فكيف السبيل الي الأنتقام وبعد تفكير قليل وجدت ان القتل سيكون انتقام جيد , ولكن ليس الآن فربما يعلم احد بهذا الأمر واجد عند اكتشاف الحادث , قصه مترابطه لدي الشرطه , ربما بعد عام أو عامين لا مشكله لدي في الوقت , فهو بهذه الخيانه قد وضع العد التنازلي لحياته وبلغة الشارع لعب في عداد عمره .

احد اسباب اعجابي بالسينما الأمريكيه هي أن الأشرار ينتصرون احيانا , وبعض العصابات تنجح مخطاطاتها وتهزم الشرطه وتفوز في النهايه , بعكس محمود المليجي وتوفيق الدقن اللي من كتر ما فشلوا واتقبض عليهم كنت بتعاطف معاهم ونفسي اشوف فيلم واحد , يتنصف فيه استيفان روستي , أو زكي رستم , وده اصابني بحالة شغف بالأشرار في السينما العربيه , وبقي نفسي اشوف شرير واحد منتصر وبقيت اقعد اخطط وانا بتابع احداث الفيلم للشرير اللي فيه لعل وعسي يفلح المره دي , لكن كان برضه بيقع في الآخر , وبعد ان فقدت الأمل في السينما انتقلت بهذا الشغف للمسلسلات لعل وعسي واشهر حادثه وقعت في هذا الموضوع كان مسلسل الضوء الشارد حيث كانت القريه بأكملها متعاطفه مع رفيع بيه (ممدوح عبدالعليم ) وانا الوحيد اللي متعاطف مع وهبي السوالمي ( يوسف شعبان ) وحتي الدراما خيبت أملي , وبعد اللي حصل معايا قررت ان الفرصه جت لمحمود المليجي انه يعمل عمليه نضيفه وخاصة اني اننا اللي هخطط لها , وبصراحه انا ساعات بستمتع بالأذيه , وعليه قررت ان اول شيئ لازم اعمله اني استعيد ثقة هذا الشخص وأوهمه ان الحكايه مش مستهله وتتعوض وحمدالله علي سلامته , وطبعا انا رحت داخل عليه بالوش الطري ده , وده بقه مش مصدق , وخدته عزمته علي سندوتشين كبده اسكندراني من عند شوطه , وعلبة سجاير كليوبترا بوكس وده قعد يسجد فيا وانا عملت روحي مصدقه , وأصر انه ياخدني علي ما دعاه شقيق السائق اللي كان معاه البضاعه في الحلوس والحلوس دي منطقه عشوائيه محصوره بين ابوعطوة وبركة ابوجاموس ( واترك للقارئ تخيل طبيعة هذه الأماكن من اسمائها ) برضه مكدبتش خبر ورحت معاه الحلوس من باب التعرف علي مناطق جغرافيه جديده في محافظتك , وافترقنا وليس بننا سوي كل ود ظاهريا , لكن الحقيقه كنت افكر كيف أقتله , طبعا انا قررت اني سأتركه علي الأقل عام وربما عامين فتصبح المسأله طي النسيان , وساعتها اخلص عليه , ووضعت كذا خطه لذلك الأولي استدراجه ليلا الي خارج القريه ثم ذبحه ووضعه علي شريط القطار فإذا مر القطار علي جثته هيفرمها وبكده يبقي القطر اللي قتله , او استدراجه وخنقه وربطه بسلسله حديد وربط حجر او لقمتين فرامل من بتوع السكه الحديد ورميه في ترعة الاسماعليه وساعتها هيختفي ولن تظهر جثته الا في دورة التكريك بعد 3 سنوات وستكون ضاعت معالمها وربما لا يتعرفوا عليه اصلا , أو خنقه وطعنه ثم إشعال النار في جثته , المهم تركت التفاصيل , فيما بعد , و بعد تحريات موسعه عرفت انا اتنصب علي ازاي؟ العمليه الأولي لم تكن بانجو ولا يحزنون بل كانت نباتات صحراويه وبسبب احكام اغلاق الكيس لم افتح الكيس لأري ما بداخله و حتي بعد وصولنا لأني لا أدخن أو اشرب بانجو وبذلك اعتقدت اني بهرب بانجو وهو في الحقيقه ليس سوي حشائش مما ترعاه الغنم
بعد الحادثه دي بمده قليله ,كان فاضل علي رمضان اسبوع توقفت عن العمل في حفر الكابلات واكتشفت اني استطيع العمل في قريتنا نفسها ولحسابي شخصيا , ففي يوم عرض علي احد اصدقائي ردم الدور الأرضي في منزل حديث البناء , وعدة الشغل عباره عن برويطه وخلصت ردم البيت في يومين بمعدل 5 مقطورات في اليوم , وبعد ذلك حصلت علي عمل آخر مع مبيض محاره , حيث كان يريد من يرفع له رمل في الدور الثاني والحساب مع صاحب البيت ورحت معاه ورفعت له نقلة لوري رمل حوالي 12 متر مكعب للدور الثاني في يومين والمتر بـ 5 جنيه يعني 60 جنيه + الأفطار والغدا وبعد كده رفعت الرمل اللي هيتفرش تحت البلاط وبعد كده رفعت البلاط الموزايكو وبعد كده رفعت رمل تاني لاستخدامه في التبليط , وكسرت الحيطان في الدور الأرضي لتمديدات الكهربا ورجعت كسرت الحيطان في الارضي والثاني لتمديدات السباكه وحفرت خزان للصرف الصحي وصبيت سقف خرسانه له وخلال الايام التي لا أقوم فيها بعمل لصاحب البيت كنت اعمل مع مبيض المحاره , أضرب له المونه واناوله الأسمنت , وبعد ما خلص مبيض المحاره رحت مكمل مع المبلط اللي بيركب المزايكو والسيراميك وطبعا كل يوم عمل كان شامل الأفطار والغدا حتي في رمضان
المهم الصحبه الجديده كانت بتشرب بانجو بصفه شبه يوميه , وفي أحدي ليالي رمضان وبعد ان انتهينا من لعب الكرة جلسوا الأصدقاء يدخنون البانجو وانا معهم وتسائلوا باستغراب لماذا لا يتوفر البانجو وبنفس اسعاره في رمضان طوال العام , وهنا قال احدهم احنا لازم نستغل الفرصه , ونخزن شويه عشان هيشح في العيد , فسألتهم هو كيلو البانجو بكام دلوقتي قالي ممكن بـ 350 تخلص فيه , قلت ولو اتباع قطاعي يعمل كام , قالي الكيلو ممكن يعمل 80 بكته ( وفي راية أخري ورقه) مرتاح والورقه بـ 10 جنيه يعني 800 جنيه , وانا قلت في سري بس الفرصه جت عشان اعوض خسارتي وقلت لهم انا عاوز 2 كيلو بانجو وفلوسهم جاهزه , فواحد قام عمل تليفون وقال بعد بكره , وفعلا خد مني الفلوس وجاب المصلحه وسهرنا عليها لغاية السحور كنا مبكتين المصلحه وفضل شوية للشباب يعملوا بيها دماغ , وقلت لهم موعدنا ليلة الوقفه وخدت البانجو وخبيته في بيت الجيران , والحكايه ان الجيران عندهم شبه منور لشباك الحمام ومفيش مدخل له إلا من سور بيتنا وفعلا مع نهاية الشهر الكريم كمنت في البيت ومعايا خمس ورقات وكل ما يخلصو اروح اجيب غيرهم , وبعد كده الغم نفسي واروح الأفراح وخلال اسبوع كنت موزع 2 كيلوا في السكرته ولا من شاف ولا من دري , لكن بعد كده بدأت ناس تقابلني وتسألني هو صحيح انت بتبيع بانجو ؟ كنت ببص له باستغراب واقول ليه يا عم فلان كده انت تعرف عني كده , يقولي منا برضه لما سمعت مكنتش مصدق وطبعا بقت تيجي أشكال ضاله تسأل علي في البيت , وقلت والله ما كان الموضوع يستاهل التسيح ولا التشريد ده كله وطبعا شعرت بالعرفان ان الموضوع خلص لحد كده , وعوضت جزء من خسارتي السابقه , والموضوع لا يتعلق بالمال بقدر ما يتعلق بأحساسك بالفشل وانك هفيه واتضحك عليك , ولم يبقي سوي الأنتقام .

أي حد هيستظرف أو هيقل أدبه هطلع دين أمه