تعلمت كتير أشيا وأنا عايش أنه من مبدأ أنه الواحد عايش وعايش ومعه معه بيتعلم ، وحتى لو ماكان معه بس مو مشكلة ساعتا بيتعلم أكتر
تعلمت مثلا أنه لازم الواحد قبل ما يرمي كيس الزبالة بشي حاوية ينتبه أنه ما فيها ولد صغير (( مو منشان شي بس منشان ما يجي الكيس فوق راسه ))
تعلمت مثلا أنه أطلع بباص مليان والعالم فيه فوق بعضها لأنه الباص الفاضي عادة ما بيوقف على كل المواقف وخصوصا اذا كنت بدك تنزلي بموقف ما حدا بيوقف فيه من ميتين سنة (لعمى ) وخصوصا أنه ما عاد حدا أخد موقف من أي شي ولا حتى من شقفة باص صغننون ما بيعمل شي غير أنه ما بيوقف بالمواقف اللي لازم ناخدا ولا بياخدنا من مواقف صرلنا مليون سنة واقفين فيها ولك صرت حس أنه الموقف صار هو اللي واقف فيني مع أنه أنا اللي واقف فيه أو بالأحرى كنت ... كنت واقف فيه لأنه هلأ قاعد ... قاعد عليه ومكتر كمان ( أيه يلعن ... ولك شو بدي إلعن لإلعن ) وهي بتشبه حالة الشخص يلي على قد ما بيفوت بحيطان وبفوت بحيطان وبضلو بفوت بحيطااااااااااااااااااان بيصير بحس حاله صار حيط متله متل أي حيط . شايفة هالحيط ؟؟ ياااااااه قديه صار طويل وعالي وعلى قد ما بتشوفيه عالي بالعلالي بتحسي أنه خلص ... خلص ماعاد في شي فوقه ولك ما ممكن يكون في شي فوقه ، بس مع ذلك وخصوصاً لما تعرفي أنه صفة الطول هي صفة نسبية أصلاً متل ما بيقول المعلم أنيشتاين ( الله يرحمه شو كان بيفهم ) المهم ومع ذلك هالحيط الطويل والعالي يعني ها يادوب وبيصير بيوصل عالخط ، وطبعاً إذا الله طول بعمرك رح تكتشفي قديه كان كلامي مظبوط
تعلمت مثلاً أنه لما أكتب شي جملة مو شرط أنه لازم حط بعد آخر كلمة فيها نقطة ... لأنه ساعتها مارح تكون جملة مفيدة ... لأنه الجملة المفيدة هي اللي منقدر نكملها بشغلات تانية لدرجة أنه ما بتخلص ... وعالأغلب الجملة اللي بتخلص وبتعطينا معنى واحد ومفيد ما بتكون جملة مفيدة
تعلمت مثلا أنه يا اما أكتب يا اما ضل ساكت ، وبما أنه أنا تحت الخط فهالشي يعني كلشي بكتبه هو تحت الخط كمان ، وبما أنه كلشي بينكتب تحت الخط ما حدا بيسمعو أو بيعرف فيه حتى ، لهيك أنا دخلت أو بالأصح نزلت لتحت أكتر وأكتر وكتبت ومو منشان شي لا سمح الله بس منشان ... ما بعرف ، أساسا كنت بدي قلك شكرا على تعليقك و تفاعلك مع الموضوع ... بس ما بعرف ليه حسيت من كلامك أنك مفكرة أني لما كتبت هالشي كان عندي أمل ... ومع أنه أمل تزوجت من زمان والله يرحمها ... صدقيني لما كتبت المقال ما كان عندي أمل بأي شي ولا حتى حماس ولا فتح ولا أي شي ... حتى ما كنت عم أكتب من مبدأ أنه يا عمي خلوا بقلوبكم رحمة بالعكس تماما ... (( ما نرضاش تدوس البشر بعضها ... ما نرضاش يموت جوا قلب نداه )) ... (( مين اللي عاقل فينا ، مين مجنون ... مين المدبوح من الألم ... من اللي ظالم فينا ، مين مظلوم ... مين اللي ما يعرفش غير كلمة نعم ))...... هي دي الحدوتة

أخيرا وليس آخرا
صباحك سكر