الحقيقة بس يا علمانى انا خايف اكون هجيبلك أحباط , لان وقتى ضيق وخلقى ضاق من المنطقة وتاريخ المنطقة والأمل فى زوال كل ده - لهذا هكلمك عن معلومات شبه عامة أعرفها عن الموضوع وبنيت رؤية عليها - فلا تظن بى من الكسل او شئ من هذا , بس بجد المنطقة دى هتجبلى السكر ...

المهم ,..

ثورة الجياع والجماعات الأسلامية ومراكز القوى والقطط السمان والأنفتاح سداح مداح " لن نختلف عليها فى تقييم عصر السادات " لان اغلبه كانت أخطاء لا تقل او تزيد عن أخطاء نظام عبد الناصر الحديدى , وهى أخطاء هيرتكبها اى نظام لا توجد فيه صحافة حرة او يكتسب شرعيته بوجود معارضة ..

لكن نقطة السلام مع اسرائيل دى اللى هنختلف فيها , لاختلاف المنظور نفسه - من منظور داخلى مصرى , يعنى بالجندى المصرى والاب والام المصرية السلام كان هو الحل لايقاف عملية الدبح وحروب الخرفان هذا , اللى ربما اتورط فيها عبد الناصر بطريقة او بأخرى . لكن انت تنسى يا صديقى ان السادات ورث المعركة , ولم يذهب اليها ! بل أن ممكن أستطرد واقفز على استنتاج ان حالة السلام التى نعيشها الأن مع اسرائيل , وما تحقق على مدار ثلاثين سنة بينا وبينهم منع عن مصر سناريو " الجولان , جنوب لبنان , وغزة " وكان السبب الأول له هو " السادات وسياسته فى تصفية النزاع واستعادة الأراضى المصرية ".. وهذا له علاقة بالسادات وشخصيته فى الأساس , فالرجل حضر نهاية الحرب العالمية الثانية , وحرب 48 , والعدوان الثلاثى , وحرب اليمن , والنزاعات العسكرية اللى مصر كلها اتورطت فيها او دخلتها " وأظن انه وصل للأستنتاج اللى كان اى حمار ممكن يفهمه , ان الهزيمة فى معركة او الفوز يحتاج الى شيئين فقط " اقتصاد قوى , وميكنة عسكرية متطورة " والحمد لله أحنا لا عندنا ده ولا ده ..

لم يكن أمامه الا حلول بسيطة " انه ينسى الموضوع ويعد الأجيال القادمة بأنهم يستردوها على شاكلة الحل السورى , ان ينتحر ويأخذ الشعب معاه فى فتح صراع مسلح هدفه القضاء على اسرائيل وفى ظهره الأتحاد السوفيتى ومن امامه الولايات المتحدة وده يبقى على شاكلة النموذج العراقى , او يستمر فى عمليات التخريب على سبيل حرب العصابات وده يبقى الحل اللبنانى , او انه بكل بساطة يروح يشوف الناس دى زعلانة ليه ونخلص بقى من حرب المعاييز دى وثلث البلد اللى كانت بتتأكل " وده يبقى الحل المصرى " ..

وكل يوم يمر حتى هذه اللحظة يؤكد فيها ان السادات كان رجل حربى وانسان قلما تجد شخص فى شجاعته , ألاف مؤلفة من الشباب تعمل فى سيناء وعلاقات اقتصادية بين اسرائيل ومصر , وقناة السويس , والغردقة ومرسى علم , كل ده اللى رجع مصر على خريطة العالم السياحية مرة أخرى ! ولا تقنعنى ان فى صراع عسكرى مسلح يمكن لأى دولة ان تقوم على رجليها او حتى يكون ليها مصدر دخل او اى شئ " ألا انها تشتغل مرتزقة يقاتلون بالأجر وأملا فى الحصول على الدعم الخارجى ". كل هذا تم بفضل ما خاف الكثيرين ان يفعلوه , وهو السلام مع اسرائيل وانتهاء النزاع العسكرى ..

الأن , ما علاقة هذا بأم برين ؟
لا اعتقد انها كان ليها خبرة عسكرية فى اى شئ , ولا حتى بعد كل هذه البهدلة اللى شافها السادات كشخص خريج كلية حربية " كلية قاسية فى تربية افرادها " والحرس الحديدى مرورا على عمله مع الألمان , وما رأه من عبد الناصر وما فعله عبد الناصر ... يأتى هيكل بأدعاءات " لا دليل عليها اصلا " وكأنه محلل نفسى يقول " اصل جدته وفقره اثروا فى نشاءته ؟ "

طيب ما عبد الناصر وعامر واغلبية الشعب كانوا فقراء , وهيكل نفسه لم يكن وريث عرش ولا هو ولا اهله , وكان الشعب فيه طبقات وسطى ومعدومة وطبقات فوق المتوسطة ! أم كلثوم لا اعتقد انها من العائلة المالكة ولا عبد الحليم ولا حتى نجيب محفوظ ولا اى شخص كان من الأغنياء ... بل العكس هو الصحيح ان فى الماضى كان هناك شرعية للانتقال من الطبقة المنعدمة الى الوسطى الى العالية - لا عجب ان محمد الفايد نفسه كان من اسرة متوسطة وقفز الى مرتبة الباشوات فى وقت وجوده فى مصر , فده كان الطبيعى ولم يكن الأستثناء ..

وبالتالى عندما تتضع هذا بجوار ان هيكل كان هو المقرب الى العرش فى ايام عبد الناصر , والصحفى اللى اخبار البلد كلها عنده , وأستمر ليكون الناصح الأمين لسادات - فيأتى السادات بجرة القلم يرميه فى الشارع , يبقى بلغة البوليس تلقى " دافع لأرتكاب جريمة ". وعليه لا يصبح كلامه مجرد انحياز , ده يخلى كلامه ينزل تحت الميكروسكوب وتبحث فى كلمة يقولها بالأدلة والبراهين لانه شخص " مشكوك فى حياديته " .

وأصلا انا لا اعرف كيف تصف هيكل بأنه كاتب مخضرم , والأخ بيقول مرجع اثنين والباقى " انا لم كنت هناك سمعت فلان ... أصله الملك كان ساعاتها موجود وقالى ...  " ومراجع من نوعية قالولى , سمعت , شوفت " يعنى بيعتبر نفسه مرجع شخصى , وبيحكى عن ناس ماتتتتت وشبعت موت . فضلا عن انه عنده هواية جمع الوثائق , زى اخوانا بتوع الطوابع - هيكل يسافر امريكا ولازم يشترى حاجة لأولاد , يروح المكتبة اللى جنب الكونجرس الأمريكى ويقول للولاد هناك : عندكم وثائق سرية مصرية ؟

لو قالوا اه , يقولهم طيب هاتولى بخمسة جنيه واتوصوا ..

ويروح طالع على الجزيرة فى برنامجه " مع هيكل , هنقرفكم فى الحياة " ويعلم على كام سطر فى محضر او اثنين ويشدله كتاب او اثنين , ويقوم حاشى كل ده بثلاثة اربع كيلو من نوعية " انا سمعت .. انا شوفت ... انا كلمت " يعنى فى النهاية برضه مراجع ذاتية كل ده عشان يوهم الزبون - اللى هو احنا - انه بيتكلم كلام مصدق وموثق ومن الارشيف كمان ..

وتقولى مصداقية !



* انا لن انظر الى التاريخ وأحكم وادعى الحكمة الأن , لكن ما يهمنى الان هو ما يمثله نموذج هيكل لمستقبل مصر , ونموذج عبد الناصر , ونموذج فلسطين , و 37 سنة من السلام مع اسرائيل - هذا هو ما سيشكل الحاضر وهيأثر عليه ! ولن اتسامح مع تجربة عبد الناصر او السادات فى " الحاكم المطلق , والمحاكم العسكرية , والمغامرات " لأن هؤلاء يكرهون صوت الشعب ويكرهون ان يكون لى يكون اصلا لى صوت , ومهما فعلوا خبرا فهو فى عينى صغير , ولو كان شرا فهو كبير " لانه يدمر مستقبلنا ويضيع الحاضر , وكله من اجل الماضى "

** انا على فكرة يا علمانى اعتز بك كصديق واخ كبير جدا , وانا لم انقطع عن النادى نهائيا ولكن انا مشغول جدا الايام اللى فاتت والقادمة , واقتصرت المشاركة على الاشياء الهامة فقط

تحياتى يا سندى