لا أعرف لماذا تطاردني تهمة العاطفية في هذا المنتدي؟؟
مع ان كل أصدقائي الذين عايشوني واقعياً يتهمونني بالبرود والجمود العاطفي، وأحياناً بانعدام القلب.

رغم إني فعلاً أحياناً بكون عاطفي ورومانسي، وتحيا مصر

نهايته

الاستفادة يا زميل أبجد من الهبوط والصعود في العملة هي مجرد استفادة تجارية ومالية عادية زي غيرها، لكن لما نحب نتكلم عن دور الدولار كعملة عالمية، فاحنا هنا بنتكلم عن مسألة هيكلية.
ويكفي لمعرفة مدى اهمية مسألة كون الدولار يبقى العملة الحاكمة إنك تعرف إن السبب الرئيسي في ضرب أمريكا للعراق هو بداية تعامل صدام في البترول باليورو، مع إن حجم معاملاته قليل بالنسبة لدول تانية، لكن كان الخوف من إمكانية تقليد الاخرين له
عموماً انا مش عايز أكرر الكلام المكتوب، ولا اللي ممكن تقراه في الكتاب المرفق
الخلاصة يا زميل إن العملة اللي بتحكم العالم بتدي للدولة صاحبتها مزايا عديدة، وبتمكنها من السيطرة على السوق بل والعيش على قفا الآخرين، لأنها مش محتاجة تصدر عشان تجيب عملة اجنبية تستورد بيها، لأ دا بتطبع مجرد ورق وتصدره بره، وبدون متتحمل النتيجة الطبيعية لطباعة ورق مفيش قصاده إنتاج، وهى التضخم، واكتر من كده تصدير أزماتها ليهم، بما فيها التضخم ده
المهم في نفس الوقت، كمية الدولارات المتواجدة حالياً في السوق الدولية أقل من المطلوب للمعاملات الدولية، ما يضطر امريكا لطبع المزيد من الدولارات وضخها في السوق الدولية، فبتكون النتيجة إن نسبة الدولارات للغطاء الذهب عند امريكا بتكبر، يعني قيمة الدولار نفسه تقل، لأن كمية الدهب المقابلة لكل ورقة دولار بتقل
وبكده بيكون توسع السوق الدولية على حساب زيادة عجز ميزان المدفوعات الامريكي، والميزان التجاري
الخلاصة إن وضع زي ده لا يمكن يستمر للأبد، لآن الدولار كعملة كل ما قيمتها بتقل بتفقد الثقة فيها، ويبدأ المتعاملين فيها في محاولة التخلص من الفائض منها
خصوصاً إن الاقتصاد اللي وراها مش على المستوى اللي يسمح لها بأنها تحكم المعاملات الدولية، واللي هيا مجرد مظهر له.
وبالتالي مع انخفاض نسبة إنتاج أمريكا للانتاج العالمي، ومع زيادة العجز في موازينها وتراكم الديون، بيكون لازم يسقط الدولار للمستوى اللي بيعبر عن الواقع ده باعتبار الانتاج هو الاقتصاد الحقيقي، وكل اللي بيعملوه حاليا للحفاظ عليه ما هو إلا مسكنات.

لكن الانخفاض هيستمر هيستمر، وهتكون النتيجة فقدان امريكا لمزايا العملة الدولية الحاكمة ومعاها ميزة توجيه النظام النقدي الدولي.
وده هيعزز الانهيار الاقتصادي فيها وربما التفكك السياسي

ونيجي بقى للمهم، واللي هو هدفي

ليه ميتمش التعاون مع دول زي الصين، وتبدأ مجموعة دول الاوبك بالتعامل باليورو اوباليوان او بعملة اخرى غير الدولار
باختصار أنا أتمنى إننا نساهم في التعجيل بالقضاء على السيادة الامريكية وبأي وسيلة، وهو ده هدف موضوع زي ده ومعاه أي موضوع مشابه

نقطة اخيرة زميل أبجد
في الاقتصاد لاتجوز المماهاة ما بين سياسات ربح الأفراد وسياسات الدول، لأنه وإن وجد تشابه في بعض الحالات، إلا إن الأصل الاختلاف

تحياتي