اقتباس:انت فعلا متوقع ان تقدر قوة في الدنيا على زعزعة النظام الملكي الحاكم؟ وممن؟ من الشعب لوحده؟
هو شعب مدعوس لا حول له و لا قوة, لكنه بالتأكيد سيبصق (سواء في السر او في العلن) على اي شخص (حتى لو كان رجل دين) يدعو للانبطاح و التطبيع و يبث الفتن و يهاجم من يختار طريق النضال....

لا طبعاً مالي متوقع هيك شي .. بس يعني متل ما بقولوا المصريين اللي ماقدر عالحمار بيتشاطر عالبردعة ..بئا هالناس فشت خلقها بهالشيخ من قلة الحيلة .

اقتباس:شو بنا يا أندروبوف؟ تنامي التيارات القومية في منطقتنا سبق قيام الاتحاد السوفيتي بعقود...

بعدين هل كان يكفي دعم الاتحاد السوفيتي للتيارات العلمانية لكي تنتشر في المجتمعات العربية يومها؟

هل عبد الناصر مثلااستمد شعبيته من الاتحاد السوفيتي؟ ام ان المنظمات الفدائية اليسارية التي كان الشباب ينخرطون فيها افواجا افواجا كانت رائجة بسبب البروباغندا السوفيتية؟

اي بكفي و نص يا عزيزي الاتحاد السوفيتي كان بيحرك نص العالم ..بشكل أو بآخر المنظمات الفدائية اليسارية كانت معتمدة فعلاً على الاتحاد السوفيتي و عندها قضية و بالمعسكر التاني في الرأسمالية أمريكا و اسرائبل من جهة تانية.

حالياً عندك مثلاً حماس و الجبهة الشعبية بنفس الخط السياسي تقريباً .. فينا نقارن بين القاعدة الشعبية عند الفريقين مثلاً .؟

وين كانت حماس بالماضي أو شو كانت ..؟

استطراداً ..بس لاتفهم مني اني ضد حماس و تعلمي وصلة ردح بس مالي معها بصراحة و مالي مع عباس ..يمكن أقرب الشي لمصطفى البرغوثي )

اقتباس:الناس عندنا مستعدين اليوم لتقبيل الارض التي يمشي عليها أي تيار يحمل لواء النضال و الكفاح علمانيا كان او دينيا مسيحيا ام بوذيا, يساريا أو رأسماليا (مع صعوبة ذلك), شرقيا او غربيا... المناضل في الجيش الاحمر الياباني اوكاموتو ما زال الى اليوم يستقبل الوفود الشاكرة لتاريخه المجيد و بين الوفود رجال دين و عمائم من نفس التيارات الدينية التي تولول عليها...

اعلام تركيا العلمانية تنتشر الان بسبب بضعة مواقف بسيطة لاردوغان, و صور هيوغو تشافيز اليساري أيضا, بل ان البعض يرفع في المونديال اعلام كوريا الشمالية الملحدة!

ببساطة الناس يائسة و انقطعت فيهن أسباب الأرض فاتجهوا إلى السماء .. رح أعطي مثال ..

شخص مريض بمرض عضال حاول العلاج مرة و مرتين و تلاتة عند أحسن دكاترة البلد و كل مرة كان يفشل العلاج ..جرب يسافر و ما تغير الحال ..المريض بضل متعلق و لو بأمل صغير بالشفاء .. جرب طبيب أعشاب و كمان ما مشي الحال .. جرب العلاج بالطب البديل و الطب العربي و العلاج بأبر النحل و الحجامة كمان مامشي الحال .. آخر الشي بتلاقيه صار يجرب الرقية الشرعية و التداوي بالقرآن الكريم و ممكن يتدين أكتر و ممكن يروح يحج .. بس يا ترى هل طب الأعشاب و الطب البديل و الحجامة و العلاج بالرقية الشرعية و القرآن الكريم بكونوا أحسن للمريض من الطب الحديث اللي ما نفعوا ..

بشكل عام هيك بحس الوضع بمجتمعاتنا .. و لا تنسى مو من زمان كتير أبل كم سنة كانت شعبية الرزقاوي و ابن لادن و صدام بالأردن أكتر من شعبية نصر الله و شافيز و أردوغان حالياً على سبيل المثال لا الحصر ..

اقتباس:اساس لو كان الغرب يريد للعلمانية ان تنجح في مجتمعاتنا لما اسقط التجربة الناصرية, و لو كان يريد لها النجاح اليوم, فلن يكون الامر بتلك الصعوبة فيما لو كان مستعدا لذلك.... فالناس تؤيد اليوم التيارات الدينية ليس حبا بالدين لذاته, بل لاسباب اخرى اهمها انعدام البدائل...

طبعاً أن متأكد أنو الغرب ما بدو للعلمانية النجاح بمجتمعاتنا .. و انشالله عاجلاً أم آجلاً بيحصدوا اللي زرعوه ..بس الغرب بشكل عام دعم بوقت من الأوقات القوميين ضد الشيوعيين .. على قاعدة عدو عدوك ضديقك و لما استشعر خطر القوميين على مصالحو رجع حاربن ...و متل ما حكيت برأيي تصاعد التيارات الديني سببو اليأس و الغريق عم يتعلق بقشة و للأسف العلمانيين ضايعين .

سامحني اذا عم أكتب بالعامي بس لاني بعرفك انك لبناني و جارنا يعني بتفهم علينا من جهة .. و من جهة تانية بصراحة مالي خلئ أكتب بالعربي الفصيح ..