١٧ فكرة لترويج وقفة الجمعة ٩ يوليو - نسخة مبدأية

Today at 12:19am
إزاي الخمسة آلاف اللي حضروا الوقفة يبقوا خمسين ألف

بداية بجد .. شكرا لكل الولاد والبنات والآباء والأمهات اللي نزلوا يوم ٢٥ المنظر كان رائع وكان بجد تعبير غير عادي عن اتحادنا كإيد واحدة وإننا بعد كده مش هنسكت على أي حق من حقوقنا.

دلوقتي وقفة الجمعة ٩ يوليو محتاجة تحضير كتير ومحتاجين إنها تبقى وقفة بتوصل رسالة قوية إن الأعداد بتزيد وإننا كلنا بالفعل ايد واحدة. وده مهم جدا في المرحلة الحالية .. لأن المسؤولين بيشوفونا بنعبر عن غضبنا بالطريقة دي بيقلقوا وحتى وإن مظهرش عليهم القلق ده بياخدوا قرارات من شأنها تصليح الأوضاع.

الوقفة الصامتة هي تعبير غير تقليدي على احتجاجنا .. احنا بنصرخ بصمت .. وهي شعور بيخلي الواحد يحس إن عنده آلاف الاخوات اللي ميعرفهمش .. وعشان كده احنا عايزينكم تساعدونا ازاي نقدر نوصل لمصر كلها. ولازم يوم الجمعة اللي جي كل واحد مننا يخصص ٣ ساعات من وقته عشان الوقفة الصامتة تنجح.

الأفكار القابلة للتنفيذ:

(١) هنغير كلنا صورتنا من يوم الجمعة ٢ يوليو للجمعة يوليو لشعار بيتم تصميمه دلوقتي: أنا نازل الجمعة ٩ يوليو

(٢) ابعت دعوة لكل اصحابك على الفيس بوك لعنوان الوقفة: http://bit.ly/cyKW22 … وابعت دعوة لكل اصحابك لصفحة كلنا خالد سعيد: http://www.facebook.com/elshaheeed

(٣) اكتب على صفحتك على فيس بوك: قوتنا في صمتنا .. الوقفة الصامتة على كورنيش النيل والبحر .. موعدنا الجمعة ٩ يوليو الساعة ٦ ونص في كل مصر

(٤) حط الصور والفيديوهات الللي اتعملت عشان الوقفة ودي مجموعة جميلة منها:
- صور من الوقفة الصامتة التانية يوم ٢٥ يونيو: http://bit.ly/a00ui3
- صور امن الوقفة الصامتة الأولى يوم ١٨ يونيو: http://bit.ly/aDKJny
- صور من حملة التعاطف مع خالد في كل أنحاء العالم: http://bit.ly/9dEEVA
- فيديو أغنية لما نقرب أوي من بعض عن الوقفة الأولى: http://bit.ly/aUUApF
- فيديو أغنية شعبنا قامت قيامته: http://bit.ly/bxelkW

(٥) إعمل دعوة لكل اصحابك لـ Event تكون إنت اللي عامله بحيث إنكم كأصحاب تروحوا منطقة واحدة وتقفوا فيها (بلاش تعزم ناس متعرفهاش من فيس بوك على الصفحة) .. اختاروا المكان اللي انتم عايزينه. عمل Event سهل أوي في فيس بوك ولو محتاجين شرح نقدر نشرحه ليكم

(٦) اتكلم مع أهلك .. الوالد والوالدة .. وريهم الفيديوهات .. سمعهم الأغاني وفرجهم على الصور .. اشرحلهم إن القضية مش قضية خالد .. وإن القضية هي قضية التعذيب والإهانة اللي بيتعرضلها المصريين من جهاز الشرطة … حارب الخوف اللي عندهم بإنك تفرجهم على صور وفيديوهات الوقفات القديمة

(٧) الو انت لسه طالب في الجامعة اتصل بخمسة من إصحابك اتناقش معاهم اقنعهم ينزلوا معاك .. فيه حاجات كتير تقنع بيها: إن خالد زي أي واحد فينا وإن اللي حصل له ده يحصلنا .. وإن فيه ناس كتير بسبب سوء التعامل بتنضرب ومش بتاخد حقها .. وإن الوقفة نجحت الأسبوعين اللي فاتوا .. وازاي انت انبسطت لما نزلت .. وإن لازم نبقى ايجابيين وكفاية سلبية بقه. كلمه عن المكاسب اللي حققناها وازاي ان فيه فايدة وبسببنا قضية خالد بقت رأي عام.

(٨) لو تعرف أي شخصية مشهورة في المجتمع زي أعضاء مجلس الشعب أو الشورى أوالفنانين والمغنيين ولاعبية الكورة والكتاب الصحفيين ساعدنا في دعوتهم. وجودهم بيفرق كتير معانا في التواجد الاعلامي وهيخلي الناس كلها تسمع عننا

(٩) ابعت رسالة لكاتب صحفي إنت بتحبه وبتقدره وقل له إنه لازم يكتب عن ظاهرة الوقفة الصامتة اللي طلعت من الفيس بوك وبقت ثقافة وفيه آلاف بيعملوها دلوقتي. خليه يحلل الظاهرة من وجهة نظره .. أي كتابة عن الموضوع بإيجابية أو سلبية هتخلينا ننتشر

(١٠) اتصل بأي قناة فضائية أثناء أي برنامج توك شو بيتكلم عن قضية خالد وقول إن قضية خالد وحدتنا كلنا مع بعض واحكيلهم لما نزلت ووقفت على الكورنيش حسيت بإيه .. وإزاي احساسك إن المصريين بيتوحدوا على الفيس بوك تحت شعار: "كلنا خالد سعيد"

(١١) لو بتعرف تعمل فيديوهات أو بتصمم جرافيكس أو بتكتب شعر أو صوتك حلو .. ساعدنا .. عايزين ننشر الفكرة والصور والتصميمات بتفرق كتير جدا مع الناس. الشعار الخاص بالحملة هو: قوتنا في صمتنا .. ولازم توضيح الوقت (الجمعة الساعة ستة ونص) والمكان (كورنيش النيل والبحر)

(١٢) صور نفسك ماسك ورقة لو تقدر يكون فيها صورة خالد ومكتوب عليها: كلنا خالد سعيد - أنا هاحضر يوم الجمعة ٩ يوليو الوقفة الصامتة الساعة ٦ ونص

(١٣) كلم بواب عمارتكم والأمن اللي فيها والمكوجي بتاع المنطقة .. كلم أي شخص تعرفه في الشارع اللي انت ساكن فيه شفته مرة بيتعرض لأي مشكلة مع ظابط أو أمين شرطة .. واقنعه إنه يحضر هو كمان ووريله الصور من موبايلك وفهمه إن البلد بتتغير

(١٤) ادخل على المنتديات المصرية المشهورة على الانترنت ومواقع الشات وادعوهم بشكل ميضايقهمش للحضور والمساندة وحاول تكلم صاحب الموقع إنه يتعاطف معانا

(١٥) لو أنت مدوّن أو بتكتب كويس .. اعمل نوت على فيس بوك واشرح فيها إنت ليه بتدعم قضية خالد وايه أهدافك من الدعم ده .. وخلي النوت دي يقراها كل اصحابك وسيبها مفتوحة بحيث أي حد يشوفها ويستفيد منها.

(١٦) احضر الجمعة اللي جاية الصلاة لابس أسود والقداس يوم الأحد في الكنيسة لابس إسود .. وكلم كل اصحابك في الجامع والكنيسة وقول لهم إنهم لازم يحضروا معانا

(١٧) لو أنت من الناس اللي بتحب الكورة أو مشترك في أي نادي وبتخرج مع شباب زيك بيشاركوك نفس اهتماماتك (زي شباب الألتراس مثلا) ادعوهم ينزلوا الوقفة. ممكن كمان تعملوا نفسكم فرق .. مثلا فرقة الأمل .. فرقة الإيجابية .. بحيث كل مجموعة تنزل في مكان معين وتقف مع بعضها.

محظورات عشان سلامة كل واحد مننا:

- متعملش أي نشاط عام لتنظيم الوقفة على فيس بوك زي مثلا جروب خاص بالوقفة في محافظة معينة بإسمك الحقيقي خاصة لو هتعزم ناس متعرفهمش.
- متنزلش الشارع تدعو ناس متعرفهمش إنهم ينزلوا الوقفة .. ممكت تكلمهم عن قضية خالد بس متكلمهش عن موضوع الوقفة.
- بلاش عمل أي ملصقات ولا شعارات يتم طباعتها .. لأن ده ممكن برضه يعرضك لمشكلة.

---

عجبنى اوى واحد قال لهم عيب عليك



فيديو تاني للتهييج اللي كان بيقوم بيه بتوع مراكز الشباب على الكورنيش لشوية أطفال في نفس ميعاد الوقفة الصامتة ... الكلام ده صدفة؟ لا أعتقد .. بس ده أكبر دليل إننا مؤثرين وإنهم بيحاولوا يحاربوا حتى صمتنا

---

الفيديو ده .. صاحبه قعد أكتر من ١٤ ساعة عشان يعمل الكارتون .. بجد حاجة بتفرح لما نلاقي الشباب بيستثمر وقته في قضية بيؤمن بيها