كلنا خالد سعيد
كل ما أشوف الفيديو ده .. وأقرأ النوت دي اللي كتبها واحد اسمه خالد معانا في الجروب أحلم بمصر تانية خالص غير اللي شايفها دلوقتي .. وأشوف إن الموضوع مش أحلام بالعكس ده حقيقي .. التغيير هيبدأ لما كل واحد مننا يغير من نفسه .. وبجد هنقدر! اقروا النوت دي ضروري بجد:


بقلم: خالد .. شاب مصري بيحب مصر

يا ريت تتفرجوا على الفيديو اللي عملته وبيشرج نفس الفكرة

أنا رأيي لو عاوزين نبدأ فى حاجة ايجابية فعلاً
و نبدأ نغير بلدنا للأحسن
اننا نعمل الوقفة اللى جاية بجانب انها وقفة حداد على أرواح ضحايا التعذيب
نضيف ليها انها تكون وقفة مع النفس ... كل واحد فينا يفكر مع نفسه ... هو المفروض يغير ايه فى نفسه عشان بلده تتغير للأحسن ؟؟ ... و عشان ميبقاش هو ( خالد سعيد ) اللى جاى ؟؟

تبقى وقفة مصرية حداداً على كل فترة وحشة مرت بيها بلدنا
و تبقى وقفة مصرية مع النفس عشان كل واحد فينا يحدد

هل هو مستعد يتغير عشان مستقبله أو مستقبل ولاده يتغير للأحسن ؟؟
هل هو مستعد يساعد أى حد لمجرد ان الحد ده ( مصرى ) زيه ؟؟
هل هو مستعد ميقبلش على نفسه رشوة أو حتى يديها لحد ؟؟
هل هو مستعد لما يشوف غلط يفضحه بكل شجاعة .. و ميقولش : و انا مالى ؟؟
هل هو مستعد يخاف على البنت اللى ماشية فى الشارع باعتبار انها ممكن تكون اخته ؟؟
هل هو مستعد يكون ايجابي و يشارك فى الانتخابات و يدي صوته للى يستحقه ؟؟
هل هو مستعد بتقبل الآخر و يحترمه حتى لو بيختلف معاه فى الرأى ؟؟
هل هو مستعد يغير من نفسه و ميستناش حد يتغير قبله أو يغيره ؟؟
هل هو مستعد
هل هو مستعد

حاجات كتير بنعملها و عارفين انها غلط ... و محتاجين وقفة فعلاً مع نفسنا
يمكن لما كل واحد فينا يلاقى اللى جنبه بيحاسب نفسه و بيتعاهد مع نفسه على التغيير للأحسن
ساعتها يتجرأ انه يحاسب نفسه هو كمان و يحاول يغير من نفسه ... عشان ( هو ) عاوز يتغير للأحسن


و ساعتها يا شباب خالد مش هيكون مات ... ساعتها خالد هيبقى هو اللى صحى ضميرنا ... هو اللى خلانا نغير من نفسنا
عشان ربنا يساعدنا اننا نغير من بلدنا

و كلنا نقف وقفة حداد واحدة على كل حاجة غلط عملناها قبل كدة و كانت السبب فى اللى احنا وصلناله دلوقت
و كل واحد فينا يبدأ يصلح من نفسه ... و يفتكر ان مافيش رقيب عليه ... ولا حد دايماً معاه عشان يحاسبه على الغلط
( هو ) بس اللى يحاسب نفسه لما يفكر يأذى غيره

ولو كل واحد فينا قدر يحدد حاجة سلبية ( واحدة بس ) فى نفسه ... و غيرها ... تخيلوا بقى ساعتها هيبقى كام حاجى سلبية فينا اتغيرت ؟؟
و التغيير ده أكيد هيشجعه لأنه يغير حاجة كمان .. و حاجة كمان .. لحد ما هنلاقى مستقبلنا دا أحلى و أحلى

لو سمحتوا ... الوقفة الجاية تبقى : حداداً على الماضى الأليم لمصر ... و ميلاداً لشعب مصري جديد همه ان بلده تكون أحسن
تعالوا ( احنا الشباب ) نفتح صفحة جديدة فى تاريخ مصر ... كل واحد فينا يكتب فيها سطر