هو اسمحلى انى اتناقش معاك و لو انى على ادى فى مواضيع المناقشه الدينيه و اللا دينيه , بس انا معجب بمقالاتك و محاوراتك , فلعلى استفيد منك

حضرتك طلبت اثبات ان الله واحد لا شريك له , سؤال جميل جدا و هيعمل معضله فكريه عند اى مسلم مش فاهم دينه لان اغلبهم بياخد الدين حفظ مش فهم , بس تعالى نتناقش من ناحيه علميه بحته و ننحى الدين على جنب شويه
و هحاول اقولك كام مساله لعلى اقدر اوصل فكرتى عن طريقهم

المسأله الأولى : طبعا كلنا بشر و كلنا بنتولد و اخرتنا هى الموت , و مفيش حد يقدر يقول غير الكلام ده , فمتهيالى لو كان فيه اكتر من اله كان هيكون فيه اكتر من بدايه لحياه الانسان و بالتالى هيكون فيه اكتر من نهايه لان كل اله هيحط تصوره او الاوبشن بتاعه زى ما بيقولو علشان يبقى مميز عن الاله الاخر .
المسأله التانيه : وجود الانسان نفسه و وجود باقى الكائنات و المخلوقات اعتقد انه معتمد على الاله الواحد لان تقريبا نفس الانظمه الحيويه موجوده فى كل الكائنات (نظام للتنفس و نظام للتغذية و نظام للنمو و نظام للتكاثر و نظام الإحساس) فلو كان فيه اكتر من اله على الاقل خالص كان هيبقى فيه مخلوق شاذ عن الطبيعه مش بيعترف بالانظمه الطبيعيه المكونه لاى مخلوق مهما كانت درجه صغره .
المسأله الثالثه : لو كان فيه اكتر من اله , و هنعتبر وجود الهين (مش اكتر لان الهين كافيين لتوضيح المثال) متهيالى لو كل واحد منهم اراد شئ عكس الاخر و تناقضو فى شئ واحد و لو كان بسيط فساعتها متهيالى هيحصل دمار و خراب مالهمش اول ولا اخر لانهم مش بشر , ساعتها هيكون صراع الهه

أعتقد ان هو ده الدليل على وحدانيه الاله الخالق