العزيز الفاضل "المفتش كولمبو"
محبة و سلام

أشعر أنني أعدت إكتشافك في النادي.
أنا أحب التعرف على الوطنيين و المعنيين بشئون مصر.
شعارك بتاع "مصر أولا" جذاب جدا ... تحياتي.

على فكرة أنا كنت هافتح موضوع الإقتصاد المصري بس كنت مستني لم اخلص كتاب عن الموضوع ده.
أنا متابع كل الحوادث الإقتصادية اللي حاصلة في الفترة الأخيرة ...
و خصوصا الخصخصة و السياسات اللي بتزعل إخواتنا الشيوعيين اللي في النادي ربنا يجعل كلامنا خفيف عليهم ..
تطورات الجات ..
التخفيضات الجمركية و الضريبية ..
تحرير سعر صرف الجنية ..
الكويز ..
النية لخصخصة بنك الإسكندرية ..
التخلص من بورسعيد كمنطقة حرة ..

أنا متابع على قدي كده .. يعني مش ضليع, بس مهتم و عايز أتعلم.
انا في كلية تجارة كمان و حابب أفهم الحاجات ديه.
فلو عندك أي مقالات بتتكلم عن الموضوع ده إبقى سيبها لي في الموضوع بعد إذنك.
روزا جابت لنا الكتاب بتاع "تحولات الإقتصاد المصري" هو حلو جدا بس أنا لسة مخلصتوش ..

للأسف انا مش عارف معنى الدرجات ديه و عايز أعرف انا كمان ..
على العموم ياريت اي واحد من جهابذة الإقتصاد في النادي هنا يقولنا الحاجات ديه ..

بس إنت خدت بالك من حكاية عجز الموازنة اللي هيزيد ديه ...
انا رأيي إن تخيض الضرائب كان مهم من زمان علشان تشجيع الإستثمار و مردود الحكاية ديه جاي قدام لما الإستثمارات تزيد حصيلة الضرائب هتزيد تاني ..
في كل الحالات كانت الضرائب فعلا عالية جدا و تساهم في التهرب الضريبي ..

بس لو يحاولوا يقللوا الفساد و التهرب الضريبي بيتهيألي هيقدروا يحصلوا ضرائب أكتر حتى من اللي كانوا بيحصلوها.
بس طبعا حكومة الفساد لا تتنازل عن هويتها.

ثم إن لو مفيش فساد برضه كانت حصيلة بيع شركات القطاع العام كانت هتغطي تقليل الضرائب ..
لكن بيع شركات كسبانة و بأبخس الأثمان .... فساد النظام مرة اخرى.

و بعدين انا لسه قاري مقالة بتقول إن عجز الميزان التجاري زاد مع التطبيق الكامل لإتفاقية الجات.
الواردات زادت زادت اكتر بكتير من زيادة الصادرات ...

شكل البلد هتخرب ولا ايه .. مش عارف ؟
أنا من انصار تطبيق الإصلاحات الراسمالية لكن بدون فساد أو غباء.

ولا ايه رايك ؟