اقتباس:وبدي اوصفلكم بشكل مفصل شو شعور العسكري وكيف بيتمرمر وبيتعذب وبيتحاصر من قبل ضباط الجيش والعواينة والفسافيس . وكيف كنا مدعوس علينا لما كنا عندهم.

حاليا رح احكيلكم شو صار معي وانا جوا وان شاء الله رح احكيلكم كيف نشقيت ببوست تاني

تركيبة الجيش تبعنا كل الناس بتعرفها .. الشب بيروح بيخدم عسكرية بس مشان يتسرح ويرجع لحياتو لانو العسكري الالزامي ممنوع يعرف شي .. شغلتو بس يطلع ع الاجتماع الصباحي ويردد الشعار وينضف هون وهون ويحش حشيش هون وهنيك ويطلع رياضة ويخدم معلمو ويشحد أهلو لحتى يجيب لمعلمو مصاري مشان ما يعذبو بقطعتو ويتحطط عليه .
العسكري همو الوحيد و الأوحد الاجازة تكون طويلة وما تكلفو مصاري كتير لانو ما في اجازة ببلاش وكل اللي خدم جيش بيعرف هالشي.

واللي بدو يبيعنا وطنيات يروح يشفلو زبون متل حكايتو يشتري منو.

اما المناصب الحساسة اللي ممكن الواحد يستفاد منها بتكون اما للضباط المتطوعين او لصف الضباط المتطوعين العلويين وفي كتير اختصاصات مهمة ممنوع العسكري الالزامي يعرف عنها شي .

انا خدمت دورة ست شهور باعتباري صف ضابط طبعاً شفنا ذل مافي بني ادم بيشوفوا بكل جيوش العالم بيجيك ضابط علوي شربان لورخان وببلش عقوبات فيك ومنين بيخترعوا العقوبات ما حدا بيعرف والله العظيم بتكره عمرك وبتكره الساعة اللي اجيت فيها ع الجيش لانو بيعاملوك مو كجندي جاي يخدم الوطن .. بيعاملوك ككتلة ينبع منها مصاري وفيك تخلص من العقوبات والذل والاهانة بشوية خمسميات .
احد العقوبات اللي ما بنساها ما حييت كان التلج عبيزخ والدنيا برد كتير ودرجة الحرارة شي 10 تحت الصفر جمع الضابط هالعساكر وشلحهم بالشرط وصلبهم شي تلت اربع ساعات وفي اكتر من واحد تكسرت ايديهم بعد ساعة لانو وقعوا والدم والعظم كان جمدان فيهم واكتر من واحد اغمى عليه.

المهم ببداية الثورة بلشوا يكثفولنا دروس التوجيه السياسي والمؤامرة الكونية وانجازات الجيش وكيف مسكو مدري كم ارهابي ومدري كم مندس ومدري كم داسوس لاسرائيل وقطر والسعودية ووووووو لبين ما الوحد ينتفخ مخو وينغسل غسل وطبعا في كتير عساكر بينغسل مخها من كتر الضخ وفي عساكر فاهمة الوضع وما بينغسل دماغها ولا حتى باللودلين .

صاروا ينشروا بيناتنا فسافيس وعواينية ينقلو الكلمة والحرف والحركة ومنعوا عنا الموبايل والراديو والتلفزيون والدش وحتى الـ mp3 بس خلولنا تلفزيون واحد فيو قناة الدنيا والارضية السورية .
وصار عملية تصفية للعساكر يعني الضابط اللي بيعرف العسكري فلان كانت تصرفاتو مو عاجبتو قبل الثورة حطو تحت المراقبة لاي حركة وسلطوا علينا صف الضباط المتطوعين ويلي هنن معظم من الطائفة العلوية .
طبعا كانت شغلة صف الضابط المتطوع يشمشم الاخبار ومين عبيحكي ع الثورة ومين عبيتناقش بالاوضاع .. مجرد انك تذكر كلمة جيش حر او ثورة حطو عليك خط احمر وبيخترعولك اي مصيبة لحتى يبعتوك ع الفرع وبعدين الله اعلم شو بيصير فيك.

نحنا اللي كنا مع الثورة جوا كنا لما بدنا نحكي نقول الارهابيين ع الجيش الحر والازمة ع الثورة مشان ما حدا يطقلنا شي برغي .

والله العظيم 30 بالمية من رفقاتي تدهوروا وراحو وما عرفنا شو صار فيهم بس لمجرد كلمة والله العظيم كلمة يا شباب .. كلمة دهورتهم وتشحشطوا ع الفروعة الامنية وماعاد عرفنا شو صار فيهم
وفي شب رفيقي حكا كلمة مزح بعد تلت ايام اجا ضابط الامن اخدوا وما عاد عرفنا عنو شي

انا مرة الضابط تبعي بعت علي وقعد يسالني شو بتعملو لما بتقعدوا مع بعض شو بيحكي فلان شو بيعمل فلان .. وانا كنت شتتلوا ذهنو وقلو منلعب شدة مناكل منشرب ومنتسلى وكنت دايما اسلبها عليه اغشم حالي مشان يبعد عني ومع هيك كنت تحت المراقبة بس لانو رفيقي المقرب شحطوه ع الفرع.

الطائفية بدمهم .. يعني لما عسكري علوي بدو اجازة كان يعطوه ياها فورا بدون نقاش بس اذا شي عسكري سني بدو اجازة يمرمروه ويكذبوا عليه ويقولوله في ارهابيين وسلامتك بتهمنا وما بعرف شو .. وإذا الح ع الاجازة يحطوا عليه نقطة انو هادا عبيفكر يروح ما يرجع.

بالفترة اللي صار يجي فيها احتياط انا شفتهم كلهم 100% علويين وكان الهم امتيازات ..الموبايل مسموح اللبس المدني مسموح الدقن مسموحة واذا صارت مشكلة بين واحد منهم وبين عسكري عادي يحطوا الحق ع العسكري فورا وبدون ما يفهموا شو القصة.

اصعب شغلة كانت علينا ونحنا هونيك اللي مع الثورة انو ما نحسن نحكي او نأمن لحدا لانو مافي لعبة اي حركة غلط العوض بسلامتنا
كان ضابط الامن يكبس علينا بنص الليل يفيقنا ويبلش يفتشنا ويفتش التخوت والبطانيات ويتبلى علينا انو معنا موبايلات وعمنتواصل مع الارهابيين وكتيرين انظلموا وراحوا ع السجن بتهمة حيازة موبايل مع انو ماكان معهم موبايلات بس لانهم من ضيعة معينة فيها مظاهرات.

وفي اكتر من واحد كان رح يتقوسوا وهنن جوا بسبب آرائهم وانتمائهم الطائفي.

لما ينزل حدا ع الشوارع للقمع ينفشوهم وينفخوهم وبعدين يحطوهن بالمقدمة وهنن من بعيد وبالفترة الاخيرة اللي كترت فيها الانشقاقات صار يحطوا بين كل مجموعة عسكري احتياط علوي ويوزعوهم بشكل انو ما حدا ياخد راحتو بالكلام.

وفي بداية الامر كان ينزلوا السنيين ع الشوارع ويخلو الاحتياط العلويين بالقطع والوحدات باعتبارهم درجة اولى بس آخر الشي صار يزتوا الكل ع الموت.

ولك حتى الراتب اللي كانو يعطونا ياه يسرقو نصو والنص التاني يشلحونا ياه تشليح.

انا الحمد الله انشقيت من زمان وفي كتيييييير بدهم يعملو متلي بس ما عبيعرفوا ولا عبتصحلن فرصة وأنا برأيي ما خنت الوطن ابدا بالعكس انا خدمت الوطن والشعب .. والوطن ما بيسوى شي بلا المواطن اللي فوقو .. وما بيهمني رأي حدا والله كتبلي الخير وان شاء الله واذا الله خلاني من الطيبين رح احكيلكن كتير شغلات بتشيب والله يشهد انو كلها حقيقية والله بيعلم شقد ضليت عاني من الامن والشعور بالخوف حتى بالنفس والتفكير. لانو كانت غلطتنا بألف