الساحل السوري تحت حكم شبيحة آل الأسد - قصص زياد الصوفي

زياد الصوفي شاب من اللاذقية
يروي قصص الرعب والتشبيح من آل الأسد والمستفيدين منهم
اللذين حكموا اللاذقية والساحل بسلطة الأب النافق والإبن المعتوه

الشاب مسيحي، ولذلك الكثير من قصصه تتعلق بعائلات مسيحية كان عن مقربة أو تواصل معها

هلا عاقل...اسم علقان بضمير و ذاكرة كل أهل اللادقية الأشراف من أكتر من عشرين سنة و لهيدي اللحظة..
هالبنت اللي اتفوقت على كل رفقاتها بصف الحادي عشر و طلعت الأولى على مدرسة الثورة، هالمدرسة اللي بتوقع بمنطقة فقيرة باللادقية بس خرجت طلاب اتفوقو عالكل بحياتهون و نجحو بمستقبلهون كتير...
بنت عيلة بسيطة ساكنين بمشروع الزين، كل يوم تمسك شنطة كتبها و تمشي من المشروع لصوب فندق القصر باللادقية لحتى توفر على أبوها تمن تذكرة باص الدولة و تلحق بصفها...
بنت آية من آيات الجمال... و هيدي كانت لعنتها...
ما كان أبوها عرفان يوم اللي نزل عيلتو من الضيعة ليكونو الأولاد قريبين من مدارسهون و هوة قريب من وظيفتو، أنو بيوم من الأيام هيك رح يصير فيهون...
القصة بنهاية التمانينات، لما رفعت الأسد ترك البلد و ترك وراه كل كلابو اللي كانو بيوم من الأيام تحت اسم سرايا الدفاع و الصاعقة...
طلع نجم شبيح جديد يومها بالبلد، و سمى حالو شيخ الجبل...
محمد الأسد ( شيخ الجبل ) جمع كل كلاب رفعت اللي فلتت بالشارع بعد ما تركهون وراه لمصير مجهول و هرب على باريس...
هلا و هية حاملة شنطة مدرستها و ماشية تحت مطر اللادقية، بينصدم بجمالها شيخ الجبل...
كل يوم على هالحالة، من مشروع الزين لمدرسة الثورة و هوة وراها بالسيارة، على تلطيش و رذالة منو و من هالكلاب اللي معو...
البنت خافت و راحت خبرت أبوها، بس هالدرويش اللي لا حول له و لا قوة ما كان قادر يعمول شي مع جبروت الشيخ و زعرنة كلاب رفعت..
الكارثة بديت لما بيندق الباب و الكهربا مقطوعة و بيفتح الأب عضو الشمعة ليشوف شيخ الجبل واقف ورا الباب عم يطلب يشوفها لهلا...
ما تواخزني يا شيخ، بس البنت نايمة مريضة و حرام فيقها...
هلا المسكينة متخباية ورا أمها و أخوها بهالبيت الرطب و عم تسمع شيخ الجبل ورا الباب عم يطلب يشوفها من أبوها...
إسماع علي.. عندي كلمتين ما في غيرهون.. البنت بدي ياها، و برجعلك ياها بكرة الصبح و عضهرها مية ألف ليرة، شو قلت؟؟؟
مية ألف بهديك الأيام كان رقم كبير كتير و خصوصي لعيلة معترة متل هالعيلة، بس شرف و نخوة الأب و رجولة الأخ ما خلتهون لثانية وحدة يفكرو بالقبول..
بيركض أخوها من الغرفة الجوانية و بيطلع عشيخ الجبل و بيلبطو على بطنو بيخليه يقلب على الدرج...
باللحظة اللي عم يسكرو الباب ليهربو. شيخ الجبل كان شايل مسدسو و مقوصو للأخ بس رحمة الله كانت موجودة و الرصاصة ما اجت بهالشهم... بيطلع من البناية و كلابو ناطرينو تحت و هوة عم يتوعدها لهالبنت بأنو انتظري اللي جاييكي..
أسبوع كامل و هلا ما عم يخلوها أهلها تروح عالمدرسة...
اعتقدو أنو القصة خلصت و شيخ الجبل شالها لهالبنت من راسو...
باتصير الساعة 12:30 الضهر موعد وصول هلا عالبيت، و هالبنت ما وصلت...
تلات ساعات و الأم و الأب رح يموتو ليعرفو شو صار بأميرتهون، بس ما في خبر...
بيرن التلفون: ما اشتقتلولا لبنتكن؟؟؟؟
كنت بدي أعطيك مية ألف على ضهرها لهالبنت و هنت رفضت، هلق هنت و مرتك رح تسمعو صوتها لبنتكون كيف كل شب من هالشباب اللي عندي عم يغتصبا...
و ليك تقلك: أنا أبقا إلي نفس بهالهبورة، تركتها لهالشباب يتسلو فيها...
نص ساعة عالتلفون، و الأهل عم يسمعو صوت بنتهون عم يغتصبوها كم كلب من كلاب شيخ الجبل لحد ما اختفى الصوت و انقطع الاتصال...
ما تركو مخفر ما خبروه و ما حدا ساعدهون لمجرد يسمعو بإسم شيخ الجبل..
ما تركو مستشفى ما سألو فيها إذا بنتهون دخلت، و كل أبواب المستشفيات تتسكر بوجههون لما يسمعو اسم شيخ الجبل...
بيطلع الصبح على هالعيلة المساكين و النوم عدوهون، و بينطو من خوفهون على صوت جارتهون أم إسماعيل:
الحقوني الحقوني... يا بو عمار الحقني...
بينزل أبو هلا ركض عالدرج ليشوفو بنتهون القمر مرمية ميتة على باب البناية...
فحص البكالوريا كان عالأبواب، و رفقاتها ملهيين بالتحضير، و قضيتها لهالبنت اتسكرت ضد مجهول متلها متل كل القضايا اللي من هالنوع بلاذقية العرب

زياد الصوفي : فيس بوك
القصة:
أجاني كتير أيميلات عم تسألني: كل القصص اللي عم تحكيها يا زياد من أيام حافظ الأسد،
باشارة من المرسلين أنو يا ترى التشبيح وقف بأيام بشار؟؟
التشبيح ما وقف و لا بعمرو رح يوقف مادام هالعيلة النسة موجودة..
حكاية اليوم صارت من شهرين تماما كبرهان لحكيي..
لسبب من الأسباب، و ما رح أدخل بالتفسير، رح أتركلكون الكون التدوير عن الدوافع.. من بداية الثورة حاول النظ…ام يظهر أخواننا المسيحيين باللادقية على أساس أنو هنن مع النظام..
لحتى ما كون منافق، قدر ينجح بالبداية بجذب طبقة معينة من المسيحيين لصفو، الشي اللي أعطى انطباع أنو كل المسيحيين مع النظام..
و هاد انطباع غلط بالمطلق..
بالاشهر الأخيرة، لجأت هالعيلة للضغط على أخوانا المسيحيين لما اكتشفو أنو هنن بالأغلبية ضدهون..
الخطف كان و مازال أهم أسلوب من أساليب شبيحة النظام باللادقية للضغط ماديا و نفسيا على المسيحيين و الأمثلة كتيرة، بيوم تاني منحكي فيها..
حكاية اليوم صارت باللادقية، المشروع الأول من شي شهرين تماما..
المشروع الأول يعتبر من المناطق الراقية بالمدينة، و سكانو خليط من كل الطوائف..
جورج جبور ( أبو زياد )، شب من هالحارة، سحب كم متر من بيت أهلو و عملهون محل لتأجير و بيع الأفلام لحتى يقدر يعيش..
شخص محبوب من محيطو، و قدر بوقت قصير يربي زباين بهالوقت الصعب باللادقية..
سليمان الأسد ابن هلال، اتسلط على هالمحل.. و صار كل يوم يجي ياخود الأفلام و سيديات الموسيقا بدون ما يدفع حقها..
أبو زياد، قال يقلبو معلشي خليه يجي و ياخود هالافلام ببلاش بس يكف بلاه عني و عن هالمحل…
بس سليمان ما اكتفى بهالموضوع …
كل ما دخل عالمحل مع خمسة مسلحين من مرافقتو، يتغالظ عكل الموجودين، و يتزعرن عالبنات الموجودين جوا..
شهر كامل على هالحالة..
جورج بيقرر يحكي مع سليمان بهالموضوع، قلو بكل أدب: يا استاذ سليمان يا ريت لما بتجي لعندي، ما يدخلو الشباب مرافقتك عالمحل، عم يطفشولي الزباين..
كانت ليلة خميس، و المحل مليان عالم، و الحارة معباية شباب و صبايا و أشبال الأسد اللي ما بيعرفو يعملو شي إلا يزاورو الرايح و الجاية..
بيجن جنونو لسليمان أنو كيف أبو جريج بيطلب منو هالطلب..
بنص المحل و قدام كل العالم،بيسحب مسدسو و بيقرطو كف لأبو زياد بيعلو عل.. و بيجبرو ينزل يلحس رجلو..
هالمسكين ما قدر يعمل شي إلا ينبطح عالأرض و بلش يلحسلو بوطو العسكري لابن الأسد..
ضحكة سليمان غطت عكلشي، و ما اكتفى هون قلو: شلاح ولك حيوان بالزلط و لحاس المحل كلو بلسانك..
منظر جورج و هوة عم يمسح المحل بلسانو و هوة بالزلط مللو لسليمان أفندي، فقرر ينهي هالموضوع و يترك المحل..
طلع بسيارتو و ضحكات مرافقتو مغطاية وجوهون القبيحة..
من حيونتو هالولد سليمان ما اكتفى بكلشي عملو جوا المحل، لما طلع بالسيارة نادالو لشب من بيت الساعي كان عم يتفرج على هالذل اللي لحق بجارو جورج، و طلب منو يمد راسو جوا شباك السيارة عاساس بدو يحاكيه شي..
باللحظة اللي مد راسو الساعي جوا السيارة، سكر الشباك على رقبتو و حشرلو راسو جوا..
بينزل من السيارة لحتى يكفي درس الأخلاق العالية اللي بديها مع جورج..
بيشيل عصاية من تحت المقعد و بيصير بيضربو عطيزو و على ضهرو لابن الساعي قدام كل البشر الموجودين و قدام جورج اللي كان بعدو عم يلبس تيابو…

الحكمة:
اللي بيعتقد أنو البلد نضفت من هالقرف..
سليمان ابن هلال، خير خلف لخير سلف..

و طفلةٍ ما رأتها الشمس إذ برزت ,, كأنها هي ياقوت ومرجانُ

يقودها العلج للمكروه مكرهة ,, و العين باكية والقلب حيرانُ

لمثل هذا يذوب القلب من كمد ,, إن كان في القلب إسلام وإيمانُ

(01-31-2013, 06:41 PM)((الراعي)) كتب:  الساحل السوري تحت حكم شبيحة آل الأسد - قصص زياد الصوفي

زياد الصوفي شاب من اللاذقية
يروي قصص الرعب والتشبيح من آل الأسد والمستفيدين منهم
اللذين حكموا اللاذقية والساحل بسلطة الأب النافق والإبن المعتوه

الشاب مسيحي، ولذلك الكثير من قصصه تتعلق بعائلات مسيحية كان عن مقربة أو تواصل معها

من بعد اذنك
و للتصحيح

الشاب ليس مسيحي

بصراحة كنت ناوي ادعيه لزياد كي يدخل نادينا... و كنت قد نشرت له قصة هنا

http://www.nadyelfikr.com/showthread.php?tid=49790&pid=1026867503#pid1026867503

الموضوع و انفتح

احب ان اضيف النهاية التي ختم بها زياد قصته

اقتباس:الحلقة السابعة و الثمانون..

القصة:
كل الأهالي بالدنيا بيفرحو لما يشوفو ولادهون عكم يكبرو ناجحين و حضورهون حلو قدام العالم، و بيشوفو حالهون ببناتهون إذا كانو حلوين و بيلفتو نظر الرايح و الجاية بشكلهون و أخلاقهون و طباعهون..
إلا ببلادنا.. البنت الحلوة لعنة على أهلها بالأول، و على حالها من كتر ما بتتعرض لمضايقات من زعران البلد و قليلين الأخلاق و الناموس...
عم تكبر هالبنت قدام أهلها و رفقاتها، و الكل اللهم صلي عسيدنا محمد شو صايرة حلوة و كل مالك عم تحلي أكتر و أكتر...
.........

الحكمة:
قطفوكي شبيحة الأسد و بعدك متل الوردة الجورية..
مو حامي الأقليات اللي رح يرد شرفك، اتركيها على ثورة الحرية..

لا اشك ثانية بأي سطر كتبه زياد

شكراً مصطفى علي الخوري على التصحيح
وجدت أن الكثير من قصصه تتعلق بعائلات مسيحية فاعتقدت أنه مسيحي
ولكن بما أنك تعرفه للشخص فأنت أدرى

===========
قصة أخرى عن عصابة الأسد:

بتمشي بشارع 8 آذار باللادقية، باتضيع من عجقة الأرمات الحاملة أسماء دكاترة مهندسين، و دكاترة أطباء، و دكاترة محامين، لدرجة انك بتعتقد للوهلة الأولى أنو هالشعب تلات أرباعو دكاترة و الربع البقيان عم يحضرو رسالة الدكتوراه..
كلمة دكتور بسوريا الها أكتر من معنى..الطبيب بيقولولو دكتور، و بروفيسور الجامعة بيحكولو دكتور، حتى ميكانيكي السيارات إذا كان شاطر بيعطيلو دكتور..
و البركة بتشيكوسلوفاكيا و الاتحاد السوفياتي و كل الدول المارقة اللي منحو أغلب هالالقاب لفطاحلة و جهابذة البعث.. فلمجرد انتماءك لهالحزب، انت مشروع دكتور مستقبلي حتى لو ما عندك مؤهلات لتكون صبي دكتور..
حكاية اليوم بتشرحلكون كيف البعثي بياخود شهادة الدكتورا، و المشكلة الكبيرة أنو ما بيخجل يقدم نفسو قدام كل الناس اللي بتعرفو عأساس الدكتور فلان..
فلك جميل الأسد اخدت البكالوريا و قررت عالرغم من علاماتها العالية أنو تتنازل و تدرس أدب انكليزي.. كلية الآداب و العلوم و التربية بهديك الأيام كانت بمبنى واحد اسمو كلية التربية، قبل المكرمة الكبيرة لحافظ الأسد بتأسيس جامعة تشرين..
امتحانات الفصل الأول من السنة الأولى و المدرجات عم تغص بالطلاب اللي بيجمعهون قاسم مشترك واحد هوة الخوف من جو الامتحان، و الرهبة من وجود هالبنت معهون بقاعة وحدة..
إلا الطالبة فلك..
بيوصل موكب الرانجات السود المعباية مرافقة و حرس، و بتنزل منها و بتدخل على قاعة الامتحان، و راحة البال و الثقة بالنفس عالية كتير نتيجة إتقانها اللغة الإنكليزية من نعومة أظافرها...
أربع أساتذة عم يراقبو سير العمل الامتحاني، من بينهون استاذ خريج جديد اسمو احمد عيسى من ضيعة صوب القرداحة..
بيبدا الامتحان، و بتدخل ورقة الاجوبة لفلك..
لما بديت تفك الخط و تنقل الأجوبة، حميت براسو لأحمد عيسى، و ركض عليها بدو يسحب ورقتها..
إذا بتمد أيدك بدي كسرلك ياها فهمان ولك جحش؟؟ أبتعرف مين أنا؟؟؟
كبرت براسو أكتر لأحمد عيسى لما ذكرتو بحقيقتو المنسية، و سحبها لهالورقة من أيد فلك..
و الامام و علي الليلة مانك نايم ببيتك يا فدان..
و بتركض لبرا و بتنادي لكل الفدادين اللي ناطرينها.. بيدخلو بالسيارات الرانج روفر لباب قاعة الامتحانات..
هالحيوان هوة اللي سحبلي الورقة جيبوه..
و بيركضو هالفدادين و بيشحطوه قدام كل الطلاب و بينزلو فيه قتل..
السادية المشهورة فيها فلك ما خلتها تشبع من منظرو للعيسى عم ياكول القتلة، بتنزل بنفسها من السيارة و بكعب كندرتا صارت تضربو على وجهو..
و نادتلون للفدادين اللي معها حتى يضبوه بطبون السيارة..
بيطالعوه بالطبون و بيعملو فيه برمة جوا الجامعة بيفرجو كل الطلاب الموجودين شو ممكن يصير باستاذ بيتطاول على بنت الشيخ جميل..
بعد ما خلصت الكزدورة بطبون السيارة ، و الأستاذ ميت من القتل، بيرموه برا السيارة عباب نفس القاعة و ببتوعدلو بالمرة الجاية إذا بيتطاول عليها، نصيبو رح يكون أكبر..
بحكم أنو احمد عيسى من ضيعة قريبة للقرداحة،فحكما بزمن البعث لازم يكون بعيلتو كم ضابط.. فقرر يكبر الموضوع و يوصل هالحكاية لحافظ الأسد و يشكيلو على بنت أخوه..
بتسمع بهالشي فلك و بتخبر أبوها..
بييي : هاد العيسى مكبرها و بدو يوصلها لعمي، و الله ما اشتقت لشيراتون الشام تأقعدلي فيه كم يوم اقامة جبرية..
بيجيبوه للعيسى على مكتب جميل، و الشيخ قاعد عم يتضرع لرب العالمين..
و الله باينتو لسانك طويل يا ابن العيسى.. شو رأيك انقصلك ياه و نريحك منو..
بس يا استاذ جميل...
ولك بس و لا كلمة.. حضرلي حالك نبعتك بعثة تعمول دكتورا و ترجعلنا دكتور قد الدنيا و تريحنا من لسانك.. كيفك فيا ولك عيسى؟؟؟
احمد عيسى نسي القتلة، و الجروح اللي براسو من كعب كندرة الست فلك كانت دواء لكل داء، و البوكسات صارو بلسم لجروحو، و بزاق بنت الأسد اللي نزل على وجهو البعثي المقرف كان بارفان فرنسي..
بيطلع سنتين على انكلترا و بيرجع عميد كلية الآداب لمدة سنتين..
و لحتى ينسي الطلاب البهدلة و القتلة اللي أكلها، كان جبروتو بالكلية ما بينوصف لدرجة الحكي البزيء من تحت الزنار لطالباتو اللي لا حول لهم و لا قوة من الشعب الصابر.. و الشاطر إذا ما بيدفع رشوة مادية و غير مادية و فهمكون كفاية أنو ينجح بمادة النقد اللي كان يعلمها..

(02-01-2013, 05:01 AM)((الراعي)) كتب:  شكراً مصطفى علي الخوري على التصحيح

هيء هيء

كان الوالد يقلي: إذا بتعاشر رقاصة بيقولو عنك طبال.. ابعود يا ابني عن عشرة بيت الأسد، و عن عشرة ولاد الضباط، ما بيجيك منهون إلا المشاكل و وجع الراس..
و بالفعل و طول عمري اللي عشتو بسوريا، ما كان عندي لا رفيق ابن مسؤول و لا بعرف من بيت الأسد حدا بشكل شخصي..
بس ببعض الأحيان، الظروف بتكون أقوى منك..و ما بتخليك انت بنفسك تقرر أصدقاءك و معارفك، و مثال عهالشي، مالك صاحب قهوة العصافيري باللادقية، شب هوة و عيلتو دفعو تمن كبير لمجرد أنو فواز الأسد كان يحب يقعد بالقهوة كل يوم..
و اتكونت علاقة بين هالشخصين، ما قدر مالك يتهرب منها و لا يوم بحياتو..
حكاية اليوم رح تشرحلكون شو اللي ممكن يجيكون من عشرة ولاد المسؤولين و تحديدا بيت الأسد..
صيف 98 و الناس عالبحور و عالجبل..صلنفة و كسب لأولاد اللادقية و حلب، الرمال و المشتى لأولاد حمص و طرطوس، و وادي بردى لأولاد الشام..و محافظة باريس و ضيعة لندن لأولاد بيت الأسد( الله يرحم جدودهون)..
إلا فواز الأسد.. لا كان يحب يسافر و لا يطلع برا البلد.. أنو قاعد عقلوبكون يا ولاد اللادقية صيف و شتا...
بيطلع خبر أنو جورج وسوف جاية على مشتى الحلو بسهرة عيد السيدة..
هيك نوع من الاخبار بتبسطو كتير لأبو جميل، لأنها مناسبة للظهور قدام العالم و فرصة لممارسة التشبيح..
بيدخل عالعصافيري و بيناديلو لمالك: و لك مالك حضرلي حالك على يوم السيدة ناعسة رح نطلع عالمشتى نحضر بو وديع.. ماشي؟؟
و الله يا معلم ما رح أقدر روح معك جاييني ضيوف.. إنشالله غير مرة..
ولك مالك، علي الحلال ماني رايح إذا هنت ما رح تروح، بكرة منجيبو لهالكر الوسوف لعندي عالمكتب بيغنيلنا للصبح..
بيمر الاسبوع متل نوم العيون و بيوصلو ضيوفو لمالك من بيروت و المفاجأة انهون حاجزين طاولة لحفلة الوسوف نفسها و حاسبين حسابو لمالك ياخدوه معهون..
غط على ألبو لهالمسكين مالك، لا قادر يقول لضيوفو أنو ما قادر يروح معهون منشان الحديث اللي صار مع فواز قبل بكم يوم، و لا قادر يقلو لأبو جميل يجي معهون، ما بدو يبهدل حالو قدام ضيوفو مع هالاجدب..
صباحية الحفلة، مالك و ضيوفو الخمسة بيركبو هالسيارات و بيطلعو عالمشتى بعد ما مالك وصى كل معارفو أنو ما يحكو لأبو جميل إذا سألهون عنو...
بس الخدومين كتار...
بيجي بالليل فواز عالقهوة و على عادتو أول شي بيعملو قبل ما يغسل وجهو بالويسكي أنو بيسأل وينو مالك؟؟
و الله طلعو الخدومين كتير كتار، و خلال لحظات كان أبو جميل عرفان أنو مالك أخد ضيوفو و طلعو عالمشتى يحضرو أبو وديع..
كلام الناس لا بيقدم، و لا يأخر..
بيوقف أبو وديع عن الغنا، و تحية لأبو جميل اللي نورنا و أهلا و سهلا أبو جميل، ماني سامع أبو جميل..
مالك الحزين متل اللي انكب برميل مي سخنة على ضهرو، عرف أنو البهدلة قربت..
بيحط أيدو أبو جميل عكتفو لمالك: إنشالله مبسوط بهالسهرة يا مالك؟؟ قلي إذا الوسوف ما يغني منيح لحتى نطلبلك كم غنية على كيفك يا مالك..
الشر بعيونو لأبو جميل، لما بيطلب من مالك و ضيوفو يمشو معو برا الصالة..
الوسوف عم يراقب أبو جميل و هالست شباب اللي عم يتركو الصالة: الله معك يا أبو جميل..
ولك ريجعلك ريجعلك..
سيارتين مرسيدس عباب الصالة من برا، و ميكرو باص أبيض صغير..
بتفهم وجود المرسيدسات بوجود أبو جميل، بس اللي ما بتفهمو وجود سرفيس صغير عم يرافق موكب المعلم..
بيركضو المرافقة و بيمسكوه لمالك و ضيوفو، و بيحطوهون بالسرفيس، و بيقفلو الأبواب عليهون..
ولك ما بس كذبت علي يا مالك، و طالع فوق منها تنبسط من دوني!!! ايه انقبر هنت وضيوفك هالزبالات بالسرفيس، و أنا ببقى بحكيلك عالسهرة و شو صار بس خلصلك هالليتر الويسكي اللي طالبو ..
لو نويت تنسى اللي فات، و اللي كان و الذكريات..
ضل مالك يغنيلو هالغنية لأبو جميل شهر كامل حتى يسامحو على هالعملة السودة..

الحكمة:
بصلنفة.. بكسب.. بالمشتاية..
كلاب أبو جميل معباية.. ما فيك تتخبى حتى لو لابس مانطو و جبة و عباية..

حكاية اليوم بتشرح كيف بتصير عملية اعداد الطفل الأسدي عقائديا ليكبر و يصير شبيح...

إجا الربيع و قرب الفصح، و بلشو هالمغتربين يجو لزيارة أهاليهون و تمضاية أيام الأعياد بين صحابهون..
دير مار جرجس بمارماريتا اللي كان بيرأسو يومها المطران يوحنا يازجي و اللي صار اليوم بطريرك الروم الأرثودوكس، كان على موعد مع كرنفال صباحي بيجتمعو فيه الأهالي مع ولادهون ليلعبو و يتبرعو و يصلو بنهاية النهار..
فصح 2007..و منشان تكمل مسرحية حماية الأقليات، أحد مستشاري بشار بينصحو يبعت الحسناء مرتو مع ابنو حافظ للمشاركة بهالكارنفال..و التفاعل مع الطبقة الكادحة..
بتوصل المدام و معها ابنها و بيرافقها بهالزيارة المباركة محافظ حمص أياد غزال( الصديق الشخصي لبشار الأسد)..
الله. سوريا. بشار و بس ...
الله. سوريا. بشار و بس...
داخلة و الكل عم يصفقلها و يحييها و يحط روحو فدا زوجها..و ينافقلها على حسنها و جمالها، و على تربايتها لابنها و دلالها..
نظرة القائد ماشالله بعيونو..
الله يعيشو و يكبرو ليصير ذخر لهالوطن..
الله يبعتلو أيام حلوة و امرأة صالحة متل أفضالك..
يعيش و ياخود عمر جدو على هالثقة بالنفس..
بتبدا الألعاب و بيبلشو هالاولاد الطبيعيين يلعبو و يوقعو و ينجرحو و يكبو الأكل عتيابهون.. إلا حافظ الصغير واقف متل القرد اللي قاتلو صاحبو عم يتفرج تحت حراسة عشرين خنزير مرافق..
بالأخير و تحت ضغط دمعة و مخطة حافظ، بتقرر أسماء تخليه يشارك بلعبة القفز بالشوالات..
بس المشكلة أنو الولد حمار..
بيطلع ترتيبو التامن من بين عشر مشاركين..
الولد الرابح من عيلة مقيمة بكندا.. بلش ينط من فرحو أنو ربح هاللعبة و أمو المسكينة لسان حالها عم يقول بس ولك ابني ما تفرح كتير قدام هالولد التحفة بهدلتنا.. و تحت ضغط زور المرافقة اللي شايفينو لحافظ الصغير الإله المنتظر و أنو لا بد من وقوع خطأ تكنيكي و تكتيكي و استراتيجي كبير خلى أبو بشار يخسر هالمعركة.. و تحت ضغط جعير و دموع حافظ نفسو أنو كيف قالولي أهلي أنا الواحد الأوحد اللي ما بيخسر و خسرت من واحد امبريالي كندي..
اجت لحظة توزيع الجوائز، و هالولد الكندي ناطر يطلع اسمو ليطلع عالمنصة و يستلم جائزة المركز الأول.. بس اللجنة المنظمة و عطريقة الميدالية الذهبية بالفروسية لعمو باسل، ارتأت و تحت ضغط الأوامر اللي صدرت من اياد غزال:

الطبول عم تضرب، و هالكندي عم ينط ناطر اسمو، و الأم محضرة الكاميرة لتاخدلو الصور التذكارية..
الفائز بالجائزة الأولى:
الحبيب ابن الغالي حافظ بشار الأسد..
التصفيق بلش، و الدموع انذرفت، و الصراخ علي، و ما كان ناقص إلا المرافقة يضربو 21 طلقة مدفع احتفالا بقيامة بطل جديد بالركض بالشوالات..
و فصح مجيد..