** الشخصيات الرئيسية**
الرواى
الرواية
الأب : سالم
الأم : راجية
الأبن : عماد
الأبنة نعمة
الخال : حسن
المعلم: أنيس

صياغة و حوار و اشعار : إمان بكرى
فكرة: محمود عبد الله

منصة التمثيل بلا قطع ديكور،و لكنها غنية بالموتيفات الشعبية الفلسطينية، و شاشات عرض لأفلام الإنتفاضة و ما يحدث على الأرض المحتلة لشحن المشاعر و تهيئة الجمهور المتلقى.

و من خلال هذه الشاشات يظهر الراوى و الرواية لإلقاء بعض الأبيات ، و كأنهما خارجان من قلب الأحداث و يتبادلان إلقاء المقطوعة الشعرية...

الرواية:
الأوله يا عين
و الثانية يا ليل
و الثالثة يامين

الرواى:
الأولة يا عين و الصبر اجيبه منين
صبرى عليهم طال

الراوية:
و الثانية يا ليل قولى نهارك فين
تتبدل الاحوال

الرواى:
و الثالثة يا مين ملِّك غراب البين
و أمورنا للأندال
ده الندل لما حكم قال للخسيس أعلى
و الواطى مهما عِلى برضه الأصيل أعلى

الراوية:
يا مقسمين الأرزاق على الحلوة و المره
أنا اللى صبرى طال مانصفتونيش مره
ظلم الخلايق فاق و انا كلمتى حره
مكتوبة ع الأوراق بالتمر و الحنه
ده الحر لو يوم فاق ماكنشى يوم مره
قدام جبان يتهان
و لا ينحنيش مره

الرواى:
و انا صانعتى قوال
و القول علينا حق
لو شفنا قاضى حكم بالظلم
حنقول لأ

الرواية:
يحرم علَّيه النوم
دى لو القيامة تقوم
و الأرض لو تنشق
عمرى ما أقول الأه
و انا جوه بصرخ لأ

الرواى:
آه يا زمان العِبر
الحر فيك انضام
شفنا ف زمانك عجب
و الحكم له أشكال
حسب المزاج و الطلب
و الصنف و الألوان
و للى حكم ع العرب
قاضى مالهش ميزان
الخصم عنده حكم
و الشرع فيه متهان

الرواية:
قوم يا تاريخ انظلم
و اكتب على الأبدان
ده الظلم لو يوم حكم
حكمه ف جميع الاحوال
براءة اللى قتل
و اللى اتقتل إعدام

صوت:
و التهمة إيه؟

الرواية:
مقتول

صوت:
و جريمته إيه؟

الرواى:
مفعول

صوت:
و الجانى مين؟

الرواى :
مجهول!!

صوت:
مجهول و كل العيون شايفاه
مجهول و كل الناس عرفاه
شيطان رجيم إبليس جبان
افعى بتسعى بالأذى تنفث سموم غلها
فى كل شبر و كل مكان
الله عليك يا زمان
يامولف الحيتان ع الزور و ع البهتان
يلى رفعت العلم فى دولة الطغيان
حكَّمت كل سفيه
و اتحكموا الأندال

صوت:
مش بس دولة.. ألف دولة و ألف جلاد فوق رقاب كل العباد
كل الحقوق اتقسمت علىِّ مالهش حقوق
كل الأبدان اتسلسلت بالعافية أو بالذوق
و الحق ضاع و يَّا اللى ضاعوا من زمن

صوت:
و شهادة الزور الخيانه و اللى باع من غير ثمن

صوت:
و الكلام اللى حروفه اتشققت من نزف أوجاع الألم
و الحقايق اللى طمسها الخوف على جبين الوطن

صوت:
و نصرة الظلم المبين

صوت:
و اللى ناصب ع الطريق ألفين كمين
و الوعى و الحس و العقل و العدل كل ده فين؟

الرواية:
العقل لما اتسجن جوه ف زنازينه
فرد قلوعه الخوف و فرض قوانينه
و لا كل مين خاف سلم من نصل سكينه
الظلم لو يوم حكم على مهاودينه
الحلم يبقى سراب و توه عناوينه
و الفرد يصبح صنم مكتوب على جبينه
يبلع سكوته مرار يشرب دموع عينه
و لكل ظالم فجر
اتباع مطاوعينه
حايس مع متعوس قدم قرابينه
من حلم عمر انفجر جوه ف شراينه

الرواى:
و ده اللى احنا شايفينه
نبكى على المكتوب و احنا اللى كتبينه
نلطم على المقتول و احنا اللى قتلينه
عينى عليك يا جدع
فين الخلاص فينه
داير يقول للبيع و الكل بايعينه

الرواية:
و ينادى جاى ياهوه ولا حد حيعينه
و قالوا زمان فى المثل واظن فاكرينه
مش عارف ايه لو وقع تكتر سكاكينه
يخرب زمان الخوف و الجبن و سنينه

صوت:
يعنى باختصار محكوم علينا بالدمار

الرواى:
و الف سور و حصار
و معاهدة استقرار
ع الإنهزام و الموت
و الصوت مايعدلوش صوت
ضى النهار بيموت
و الخوف صبح دستور و قانون بقى مفروض على كل خلق الله
اللى العمى أغواه
و اللى الظلام خلاه ماشى ف طريق مسدود

الرواية:
و قلوب ماليها الخوف ف الضلمة مسجونه
عشقت ليالى الصمت و بنفس مكسوره
زرعت إديها الأرض بالدمع و الحسره
طرحت نداله و جبن و ديابه مسعوره
لا همُّهم حراس و لا ناس بقوا صوره

الرواى:
ماتفوقوا حبه يا ناس و تصحصحوا شويه
و لا انتو يعنى خلاص
بقى دمكم ميه
عشقتوا لون الدم و الدنيا خادتكم
مابين رغيف و غموس دنياكوا محصوره
لمُّوا عيدان الشر من قبل ما تفرَّع
و ازاى تنبِّت أرض و الكل بيقلَّع
دى الأرض بتشابى و بصرخه مكتومه
حابوا عليَّه حرام خلونى مستوره

صوت:
الستر من عند الله و ازاى بقى حنعود و كل عام ببنود
و الجوده بالموجود

صوت:
و مستحيل حيعود من تانى عام الفيل و الطير الأبابيل
فيه ناس كتير بتقول للبيت إله يحميه

الرواى:
ده كلام جميل بس كمان بيقول اسعى و أنا أسعى معاك

الرواية :
صحى الأمل جواك بس خلى العزيمة وقود و سلاح و نار و بارود
و اصرخ و انا وياك .. اصرخ و انا وياك





يتبع
إن شاء الله

أغنية:
اصرخ
من حقك تصرخ.. تتألم
و لسانك ينطق يتكلم
لو حزن
أوعاك يوم تضعف و تسلِّم
لو جرح
علم على جرحك و اتعلم
قاوم. حاول.صمم.قرر
نبضك فى عروقك يتحرر
لو طعم الشهد حيتمرر
خد تمر نخيلك و اتمرمر
و اصرخ
قوم هد سجون الخوف جواك
حرر.. و اتحرر و احنا معاك
لو صوت الحق يضيع ف سماك
راح يعلا صوت الظلم هلاك
و اصرخ

صوت:
نصرخ و نحكى و نقول نزيح قناع الخوف و نكشف المستور خلف الأسوار فى المستوطنات فى المناطق اللى باقية
من فلسطين يمكن نقدر ننقذ اللى باقى منها

صوت:
ايه رايكم نبدأ و نحكى الحكاية من أولها و القضية الفلسطينية قضية العرب كلهم
و ما تنساش أن الفن وسيلة نقل لكل الدنيا بالحرف
بالكلمة بالحركة و بالايقاع

صوت:
خلاص نبدأ نعرض قضيتنا و نمارس العمل المسرحى كمحترفين
و بدون تحضير بأمانة حنعرض الصورة و بصدق حنقدر نوصلها
لكل مكان.. على الاقل نشعر بعدم السلبية و يبقى لنا
دور إيجابى

صوت:
حنبدأ نمثل و الدعوة مفتوحة لكل إنسان صاحب رأى و كلمة
بالمشاركة معانا...

صوت:
انت يا.. حتلعبى دور الام و انت يا .. دور الأب....
دور نعمة و ....دور عماد و ... دور الأستاذ أنيس
و .... دور حسن بقولكوا ايه نبدأ
و نخلى توزيع الأدوار من خلال الأحداث و متطلباتها..

الرواية:
طب و انا و ... دورنا ايه؟

صوت:
آه .. .. و .. .. احنا عارفين انكم ماتقدروش
تسكتوا و عشان كده انتم لكم الحق فى التواجد و التعليق
فى أى وقت من خلال العرض.
شغل الإضاءة و اضبطوا الكاميرات و اجهزوا... إبدأ

الرواية:
اللى مايعرف عدوه
عمره ما يعرف صديق
و اللى يختار يوم رفيقه
عمره ما يضل الطريق
و اللى واقف ع المفارق
يوم مشرق و يوم مفارق
مش حتفرق لو يفارق
قله حيفضى الطريق
و اللى ماشى لوحده سارح
تنكره كل المطارح
ميته من بحر مالح
عمرها ما تبل ريق
و اللى مايعرف عدوه
عمره ما يعرف صديق
و اللى يختار يوم رفيقه
عمره ما يضل الطريق

يقتحم المسرح رجل ذو أهمية و يتبعه مجموعة من
الرجال بشكل مريب و ملابس غريبة و مريبون يفرضون
وجودهم على المجموعة يتقدم الرجل المسئول و يوجه
حديثة للمجموعه بعد أن يوقف العرض.

المنتج:
أعرفكم بنفسى أنا منتج المسرحية و جيت أطمئن
بنفسى على العرض و معايا ضيوف.. (( ينظر حوله))
اتفضلوا يا جماعة

يستغرب المؤدون

صوت:
مين دول؟ تعالى لما نشوف
نحب نتعرف مين دول و ايه أهميتهم

المنتج:
دول جماعة سواح أصدقاء بأثق فيهم ثقة عمياء
و حيكونوا عيونى اللى حشوف بيها و ودانى اللى
حسمع بيها.

صوت:
غريبة!!

المنتج:
و ايه الغريب بقى فيها.. يعنى اعتبروهم زى مقص
الرقيب و جهة عليا تراقب كل ما يحدث كل ما يقال..

الرواى:
مش من حقك تفرض أى رقيب ع الكلمة

المنتج:
بس الكلمة سلاحها خطير

الرواية:
برضه اساس الكلمة أمانه
و ساعات كلمة بتبقى أمانه
و ساعات كلمة بتبقى ضمير.

المنتج:
أى ضمير؟

صوت :
أى ضمير ممكن شعب و فرد و أمه ممكن كلمة
تحرك ثورة.

المنتج:
ياه.... ضمير... و ثورة... و امانه ايه الكلام
الكبير قوى ده.. إن كان على حقى فأنا من حقى
بفلوسى و بنفوذى أقرر مش ممكن أبداً حتصور إن
فلوسى تضيع فى كلام و عموماً المسرحية دى
و الفكرة و اللعبة دى كلها كده على بعضها لعبتى
خيوطها ف ايدى و على رأى المثل ان كان لك عند الكلب حاجه قوله يا سيدى.

الرواى :
طب قوللى ياسيدى..
مين دول أصلاً و يهمهم إيه من عرض مسرحيتنا
و إيه أهمية رأيهم فى رؤيتنا و لاَّ كلمتنا..

المنتج:
قلت اصدقاء لى مصلحة معاهم و يهمونى أصدقاء
ياسيدى من دوله صديقه..

صوت:
بلاش و النبى كلمه صديقه دى احنا عايزين ناس
تقول الحقيقة..

المنتج:
طب اتعرفوا الأول

يهودى:
يا صديقى سيبنا نعرفهم بنفسنا ده لو كانوا لسه
ماعرفوناش من شكلنا أصلهم بيشموا ريحتنا من
على بعد أميال و على العموم نعرفكم بنفسنا..
أنا شالوم عازر

صوت:
عازر مين بالضبط

يهودى:
و انا كوهين بيريز

صوت:
يا حفيظ

يهودى:
شامعون رابين

صوت:
يانهار أبوكو طين
و جايين لغاية عندنا يا سفاحين الدما يا مشردين
أجيال.

صوت:
ايه اللى جابكم هنا مالكوش مابينا مكان
الأرض دى أرضنا و الفكر و الكلمة من حقنا

يهودى:
أوكى أوكى مش مشكلة بس احنا برضه من حقنا
نقعد فى ركن يخصنا نتفرج و ننقل و نراقب و نقول
راينا مش دى برضه الديمولوخية بتاعتكم
سورى قصدى الديموقراطية و لاّ انا غلطان

صوت:
لأ مش غلطان انت أولعبان و جبان لابس قناع
ملعون حرباية متلونه بألف شكل و لون.
و مستحيل حيكون لك أو لغيرك أى حضور أو أى
دور و اتفضلوا بره من غير مطرود

يهودى:
لأ لأ لأ الكلام كده مرفوض

المنتج:
الحل عندى أنا و قرارى ده بشرط حرسم حدود من
هنا و خط أحمر هنا همه حيقعدوا و هنا المكان ده كله
لكم و دى مساحة مش هينه ده قرار و واجب التنفيذ
غير قابل لأى نقاش و لا جدل و لا لتهويش.. يا إما
عرض مسرحية عن فلسطين و القضية فنيتو مافيش.

يهودى:
ايه فلسطين..
ياه ... انتم لسه فاكرين.. ما خلاص حَضيَّعوا
وقتكم و وقت الناس.
و الناس عايزه تهيص تفرفش يرقصوا يغنوا يتسلوا
و خلاص.
الناس محتاجه رغيف غموس لقمه هدمه نومه
مَنِى فلوس و خلاص و جاى تقوللى فلسطين
ما خلاص الناس نسيت زى ما كل الدنيا نسيت
اسم فلسطين بحه خلاص..

الرواية:
خلصت روحك إنت و هوه يلِّى فتحتوا مابينا الهوه
يلى زرعتوا جذور الغربة جوه قلوبنا و اسأل كل
الناس حتجاوبك حتقول لأ بعلو الصوت.
و فلسطين و الشعب العربى عمر ضميره فى يوم ما يموت

الرواى:
طين الأرض و صوت المادنه
طلة نخلة و ظل الشجرة
لون الفجر و ضى القمره
غصن زتون فى ساحات الناصره
رملة يافا و حيفا و يونس
ضحكة طفل و دمعة حسرة
قومة شعب و أمه و ثورة
جيل ورا جيل ورا جيل ورا جيل
حافظين كل حروف الكلمة
و مش ناسينك يا فلسطين
مش ناسينك يا فلسطين


يهودى 1:
حلو كلامك و بنهينك.. روحك عاليه و صوتك عالى بس خسارة مافيش و لا كاميرا و لا تسجيل علشان
تشجب و تهتف ترفض و تدين.

يهودى 2 :
قول الشعر و رص قصايد و اسعل جو الرفض السائد
كل ده كله مش حيفيد.. المستفيد الوحيد هو أنا
بس انتوا مش فاهمين
شوفوا لكم موضوع تانى غير فلسطين

صوت :
خنقدم المسرحية رضيتوا رفضتوا حنقدمها .. بكيفكوا
غصب عنكوا حنكملها..
متوجها لأحد الكواليس
يا مدير المسرح.. ابدأ العرض و بلا مقدمات

يعترض إسرائيلى طريقه

يهودى 3:
نحن أغلبية ياسيدى و لنا الحق فى أننا نقدم
عرضنا زينا زيكم بليز من فضلك

صوت:
آه بداتم اللعبة اللى احترفتم فنونها المسكنة
و الدحلبه و التزييف و التدليس و الضحك على الدقون
ضللتم العالم باكاذيبكم و للاسف كثير صدقوكم
مش ذكاء منكم لكن غباء مننا و تهاون لكن الحال
مش حيدوم أكيد فى يوم حينكشف القناع و الكل
يعرفكم على حقيقتكم.

الرواية:
العنصرية فى دمكم و الندالة طبعكم و الخيانة هى
راية مجدكم
نفس الوجوه هيه هيه
و الأساليب هيه هيه
و الملاعيب هيه هيه

يتدخل المنتج:
خلاص انتهينا
(يتجه و يضع علامات على المسرح)
هى دى حدودكم و هذه حدودكم انتم و لا تتعدوها

يهودى :
بالطبع بالطبع لن نتجاوزها لكن ممكن جدا..
..جايز مين عارف على العموم هى دى بداية اللعبة

(( الممثلون يتجمعون و يرددون))
احنا منسحبين(( واحد منهم))

الرواى :
للأ .. هو ده غرضهم لازم نكمل و نقول و نوصَّل رسالتنا
و كلمتنا و نحاول و بكل طريقة نوصل لعقول العالم
و ضميره نصحى وعيه و تفكيره لازم نبدأ و من الأول.

(( يمكن أن يدور حوار حركى بالجسد بين الفريقين
يحاصر الممثلون العدو و ينجحون فى إبعادهم و إدخالهم
دائرة الظلام ثم يردد واحد منهم.))

دلوقت ممكن نبدأ .. كل واحد ياخد مكانه..ابدأ العرض





يتبع
إن شاء الله

الظلام و نور يرتكز على وجوه الرواى و الرواية.

الرواى:
هو اسمه عماد

الرواية :
و هى اسمها نعمه

الرواى:
هو مدرس موسيقى

الراوية:
و هى مدرسة تاريخ
عاشوا ف حلم جميل متحنى بلون الفرحة جوه
عيونهم هيه بتحكى و هو يغنى.

الرواى:
تحكى حكاية شعب سجين بين قضبان عاش الأسر
سنين و سنين
لكن لسه وريده بينبض
لسه عيونه السمره بتحلم.. صامد حى ليوم الدين
و هو بيحضن عوده
وصوته بيهز قلوب الملايين
هو يغنى و كل الناس بتغنى وراه
جمَّع كل الناس حواليه

الرواية:
و الأطفال كانوا ضى عنيه
ما همه أملنا ف بكره و بعده
ع الإصرار و العزم اتواعدوا
و اسمعوا صوتهم .. واصل ليكوا؟
فتح عينك و انت تشوفهم
افتح كل مسام إحساسك و انت تحس برعشة خوفهم
اسمع.. حاول مره تشوفهم.

تنتقل الإضاءة على نعمه و عماد و حولهم بعض
الأطفال يتغنون بأغنية فيها أمل و حماس..

هيلا هيلا هيلا و يالله
النصر قريب إن شالله
سمى و كبر قول بسم الله
فجر بركان الثورة صلاه
و ارفع علمك و بأذن الله
النصر قريب إن شاء الله
هيلا هيلا هيلا و يالله
النصر قريب إن شالله
بجهادك عزمك و بإيديك
و بدمك و بدم شهيدك
حتحرر أرضك و نشيدك
يعلا للفضا و بعون الله
النصر قريب إن شاء الله
هيلا هيلا هيلا و يالله
النصر قريب إن شالله
ضم صفوفك و حد صوتك
أرضك عرضك همه وجودك
و امسك إيد طه يا عبد الله
هيلا هيلا هيلا و يالله
النصر قريب إن شالله

بعد إنتهاء الأغنية يقتحم اليهود المكان مرة أخرى
فى ضيق واضح.

يهودى 1:
اسمحوا لنا نعترض على الأغنية.

صوت:
ليس من حقكم الإعتراض أو توجيه أى نقد.

يهودى:
نحن شركاء.

صوت:
شركاء! فى ايه بالضبط؟!

يهودى:
فى المسرح.. المسرحية.. العرض.. و الأغنية

صوت:
مهاترات و افتراءات كالعادة.

صوت:
يا ساده المسرحية دى مسرحيتنا احنا اللى كتبناها
و احنا أصحاب الفكرة و الأشعار و الأغنيات.

يهودى:
اه بس انتم نسيتم ان فيه اتفاقيات

الرواى:
إيه؟ اتفاقيات (يضحك).. ابوك السقا مات انتم اللى
بتتكلموا عن الإتفاقيات ؟ من امتى احترمتوا اتفاقية
و لا حافظتم على عهد.

يهودى:
بتحاولوا توصلوا للناس ايه بالضبظ؟

الرواية:
بنحاول نخلق جيل جديد يحافظ على أرضه و ذاكرته
و على وعيه

يهودى:
آه يعنى إرهابيين جدد للمستقبل

الرواى:
الإرهاب ده انتوا اللى تعرفوه و خلقتوه و صورتوه لكل
الدنيا بشركم و بشرعكم اللى لا بيراعى حقوق و لا
دين ولا شرع.

صوت:
ماتحاولش معاهم هم بيحاولوا يعطلونا و يضعفونا
و يصرفونا عن واجبنا

الرواى:
بالضبط كده واصلوا العرض و لا تلتفتوا لهم.

يواصلون العرض و ينكمش اليهود فى ركن مظلم

مرة أخرى
نرجع تانى لحكايتنا
حكاية عماد و نعمه
فى كل بيت ألم و الآلام أشكال مره بنشوفها و مره
بنداريها و مره بنلاقى نفسنا جواها
تدور الآه و احنا معاها
كان الحب بيرفرف على قلبين

الرواية:
بس الدمعة كانت جوه عيونهم ترسم طعم الحزن
فى نظره فى همسه فى كلمه
أصل عماد كان نفسه ف عيل يحمل اسمه و شكل
ملامحه يبكى يضحك يصرخ يجرى يملا البيت
بشقاوته حياه كان ده املهم هو و نعمه
بس ظروفهم كانت صعبه
أصل الخلفه ماهياش لعبه

الرواى:
و قالوا زمان ان الولد بيكون سند و ولد يقلب الموازين
و يخلى للدنيا شكل و طعم و لون
فرع يفرع من جذر ثابت و يمد فى الأرض لسابع
ارض و يكون له وجود و يكمل باقى المشوار

الرواية:
ولد يقلب الموازين

الرواى :
ولد يقلب الموازين

يتحرك الرواه و تدخل نعمه و عماد فى دائرة الضوء

نعمه:
عماد

عماد:
نعم

نعمه:
فيه ايه يا عماد مالك؟ بتهرب منِّى ليه؟

عماد:
مافيش حاجه يا نعمه و بعدين الهروب مش من
طبعى يا نعمه

نعمه:
جرالك ايه؟ على طول سرحان ايه اللى شاغلك؟

عماد:
انت اللى متغيره و عنيكى حيرانه و مكسوره.. ايه
الى شاغلك انت..

نعمه:
نفس اللى شغلك يا عماد

عماد:
ايه بس اللى شاغلنى يا نعمه

نعمه:
نظرة حزن غريبه فى عينيك بتبوح بسرك و حيرتك
و انت فى وسط العيال فى المدرسة

عماد:
قصدك ايه؟

نعمه:
الخلفه يا عماد..بقالنا سنين منتظرين

عماد:
التحاليل و الأطباء قالوا مفيناش حاجه حنعمل ايه
يعنى حنعمل ايه؟

نعمه:
طب اهدى شويه العصبيه دى كلها ليه أنا معذورة
محاصرة والدتك بنظراتها و اسئلتها مش بتقدر أن
الموضوع ده بيهز كيانى و بياثر عليَّه و فيَّه كمان،

يربت على ظهرها

عماد:
معلش يا نعمه ماتزعليش منها طوِّلى بالك و ارمى
حمولك على اللى خلقك.. تعالى يا نعمه.

ينصرف عماد و نعمه و تظهر مجموعة اليهود فرحين

يهودى1:
هما فين.. اظن ماحدش هنا مشيوا تفتكر حد سامعنا

يهودى 2
لألأ ما أظنش

يهودى 1:
سمعت بودانك حكاية جميلة هأهأ رائعة تخيل العقم
يسود فى كل مكان و فى كل شىء الفكر الإبتكار
الفنون العلوم النسل الحس كل شىء كل شىء.
و يجى اليوم اللى تبور فيه الأرض الفلسطينية و لا
يبقى فيها لا أحياء و لا أموات..
و لا هوسه و لا ضجيج أصوات و تعود لنا أرض المعاد.

يهودى2:
هما راحوا فين.. مافيش حد على خشبة المسرح
فرصة هايله الآن نقدم لكم يا سادة مسرحية
اسرائيلية عبقرية

يهودى1:
اسألهم الأول يمكن يعترضوا أو يرفضوا

يهودى 2:
قصدك الناس يعنى ، ما اعتقدش لا فيه رفض ولا اعتراض
و حتى لو افترضنا فيه اعتراض كأن مفيش اعتراض
.. نقدم لكم يا سادة و بكل افتخار مسرحية شعب الله المختار اخراج موشى سملانسكى
قدمت عام 1891 لرواد الصهاينة

يجتمع مجموعة اليهود ليشكلوا المشهد بسرعة.

يهودى 3:
آه آه

يهودى 4:
حفيت قدماى الشواك تمشى بداخلها

يهودى3:
عزيزى هل تقابلنا من قبل؟

يهودى 4:
بعصبية-ربما نتقابل بعد لحظات فى الجحيم كيف اقابلك
و كل منا أتى من بلد مختلفة و لم أر وجهك غير الآن

يهودى3:
هون عليك لقد جمع الألم بيننا

يهودى4:
اغرب عن وجهى فالطريق مازال طويلا

يهودى3:
إلى اين وجهتك

يهودى4:
الإستيطان فى يهودا والخليل

يهودى 3:
و العرب

يهودى4:
سناخذها منهم فالأمر سهل فى البداية نتسلى
عليهم بمشاكل و همية و نماطل و نؤجل و نزعجهم
بالغارات حتى يرحول

يهودى3:
إلى اين؟

يهودى4:
هذا شانهم

يهودى3:
دعنا نبقى هنا فقد أصبحنا أصدقاء فالجوع
و قدماك الحافيتان دعوننا للبقاء

يهودى 4:
انك أبله اننى أسير على حرير الحلم و بسط من
الذهب و هل سنعيش بمفردنا

يهودى3:
سنجعل هذه الأرض مركزا لتجمع كل المهاجرين
مع معونات أصدقائنا و أسلحة الأخرين نكون
مستوطنات فى كل مكان و تبقى ارض الميعاد

يضحكان بصوت عالى

يهودى 4:
برافو برافو آه عذراً إذا لم تعجبكم

يدخل الممثلون فيعود اليهود لحدودهم متظاهرين بالبراءة

صوت:
خرجتم عن دوركم المرسوم و خالفتم كل أصول اللعبة.

يهودى:
لعبة! .. هى دى لعبة

صوت:
سنضطر لطردكم من خشبة المسرح

يهودى:
نحن أغلبية لا تستطيع ماتقدرش

يلف اليهود ليقيموا الصلاة يدفعهم الممثلون و يسيطرون مرة أخرى على المسرح
مصاحباً لذلك حركة و موسيقى

الرواى:
عفوا يا سادة .. الآن بإمكاننا أن نواصل العرض
و نقدر نكمل مسرحيتنا و نحكى الحكاية
احكى و قول يا ولد
و احكى حكاية بلد
العزم فيها اتولد
و صبرها كان سند
وقت الوجع و الآه
و سرى فى ترابها الضيا
حفظت وجوه أنبيا
موسى و عيسى و ضيا
طه حبيب الله

الراوية:
و على براق الهدى
اسرى النبى المهتدى
و صلى و نال الرضا
فى المسجد الأقصى
بوركت يا أرضنا
يا مسامحة يا مؤمنه
يلى حملتى الضنا
و الحمل يا ولداه
صرخة ألم فى الخلا
كاس الأهات اتملا
يا مصاحبة قوله آه
الله عليك الله

بعد الأبيات السابقة يلقى الضوء على عائلة عماد و نعمه و الأب و الأم






يتبع
إن شاء الله

عماد:
حصدنا المر و الصبار
و عشنا الذل ليل و نهار هربتوا يابا ليه هربتوا
و سيبتوا الأرض ليه و الدار.

سالم:
لا ما هربناش و لا ضعفناش حاولنا كثير و مقدرناش
جيوش الظلم و الجبروت و اعوانهم فى كل مكان
كانت فرضه علينا الموت و عشنا دنيا محصوره
و معزوله وراء قضبان

عماد:
تقوم تهرب

راجية:
ابوك ماهربشى م الميدان وقف ورفاقه وسط النار
فلاحين طلبه و عمال و شيوخ و حريم و أطفال يخطًَو
بدمهم على ارضهم شهادة ميلاد مابيجيش و بقاء
محكوم عليه بالموت و ايه يعمل قليل الحيلة ويا كلاب
ينبحوا الكل ينبح وراهم يذبحوا و الكل يذبح معاهم.

عماد:
و العمل ايه؟الحل فين؟..نضيع؟ نموت؟

نعمه:
لأ ندوِّب جبال الثلج و قوالب الشمع اللى حاصرتنا
و فرضت علينا قانون اللاوعى و الاشعور.. نبعث
ننتفض إنتفاضة الروح و البدن و الحجارة و الصخور
نقاومهم بكل قوتنا و بكل عزيمة نقف وقفه واحده
نصرخ صرخة واحده نرفض الذل والهوان
و الخضوع و قول لكل العالم ان الحقوق ما بتضيعش
و الأرض ما بترجعش إلا بالمقاومة و المقاومة هى
قرارنا و الجهاد هو مشوارنا

عماد:
فرقونا

راجية:
نتلم

عماد:
شتتونا

نعمه:
نتجمع نتحد نلملم حروفنا و نرفع سويف الحق
و نكون جملة صحيحة و مفيدة نكتب الجملة صح
مرة واحدة فى حياتنا
أول حروفها لأ

راجية:
لأ للظلم لأ لضعف لأ للتهاون لأ للإستسلام
لألألأ

نعمه:
ملعون كل من لا يقول الحق

الجميع:
ملعون كل من لا يقول الحق
ملعون كل من لا يقول الحق

اغنية:
ملعون العجز بأشكاله
ملعون الظلم و أعوانه
ملعون السجن و سجانه
لو يوم حيحاصر خطوتنا
ملعونه ياعهود كدابه
يا افاعى يا صقور يا ديابه
يا وشوش خداعه و قلابه
خدنا قرارنا و دى كلمتنا
ملعون الضعف اللى اسرنا
ملعون الصمت اللى حاصرنا
ملعون الخوف لو يجبرنا
بإيدنا نكتف ثورتنا
ملعون-ملعون-ملعون

تتغير الإضاءة لتناسب جو الأسرة، الأب سالم يجلس فى شبه ظلام و فى يده خطاب يقرأ ،فى الخفاء تدخل راجية

راجية:
ايه يا سالم فيه ايه و ايه اللى ف ايدك

سالم:
مافيش حاجة يا راجية ايه ده ما تقولى حاجه
و انت داخله تكحى تخبطى على الباب أى حاجه

راجية:
طب ايه اللى بتقراه؟

سالم:
جواب جواب يا راجية

راجية:
جواب و النبى صحيح جواب من مين من محمد من عمر

سالم:
لأ لأ ده من أمين ابنك

راجية:
بيقول ايه فيه؟ كويس تعبان جعان بردان شبعان
ماتقول

سالم :
حاضر يا ستى كويس والله

راجية:
باعت فلوس

سالم :
مش كتير حاكم الواد أمين ده حظه قليل و رزقه
قليل المهم بيسلم علينا كلنا..

راجية:
ياه.. العيال وحشونى قوى يا سالم و يا عالم
حنشوفهم امتى و ازاى سنين متغربين يا كبد امهم
فى بلاد الله لا بنشوفهم و لا بنطمن عليهم يرضى
مين ده يا رب..

سالم:
سيبك بقى من الكلام ده ما تقلبيش علينا المواجع

راجية:
يعنى قالك إنه راجع؟

سالم:
إن شاء الله و بيبوس إيديكى
و بيسأل عن أخوه عماد و بيقول يا ترى عماد جاله
الولد و لا لسه ما أنش الأوان
لسه والله يا بنى باين يا بنى ما أنش الأوان

راجية :
يوه يا حاج ماتقولش كده على مهلهم

سالم:
يعنى حنسيبه كده مهموم و حيران الواد تعبان تعبان
يا راجية

راجية:
مالكش صالح بيه ربنا يسعده هو و مراته و يهنيهم
بيحبوا بعض يا حاج و النبى ماتكسر بخاطرهم
و بكره ربنا يكرمهم بالخلفه الصالحة يا رب.

سالم:
بس اكيد هيه عارفه أن العيب منها

راجية
منها و لا منه ماحدش عارف سيبهم ف حالهم

سالم:
ازاى اسيبهم عماد ده ابنى فرع من جذرى لازم
أفرح بيه و بعياله و انا مخلف أورطه و هو لازم يكون
طالعلى.. شوفى بلغيهم قدامهم مهله شهر و إلا
حيكون لى تصرف تانى ينصرف

راجية:
يا حاج .. يا حاج

سالم:
ده آخر كلامى

يدخل و يظهر اليهود و هم فرحون بهذا الحزن و هذه
المشكلة التى تؤرق الأسرة و يرقصون و يغنون

أغنية:
شعللى و المعى و اطفى و ولعى
زيدى زيدى يا نار خليها دمار
امنحى و امنعى و ارفضى و اسمعى
و امليها جفاف أضعاف اضعاف
و الضعف يسود فيسود أنصاف
و الفرع إن مات الجذر يموت
و إن جيه مولود هيكون موؤد
حيموت حيموت
و لا فيه مين شاف ولا فيه من درى
شعللى و المعى و اطفى و ولعى
زيدى زيدى يا نار خليها دمار
امنحى و امنعى و ارفضى و اسمعى
شعللى شعللى شعللى شعللى

ينصرفون و صوت القدام يظهر و يدور حوار بين
الأم و عماد و نعمه لإقناعهم بالنزوع ف بحر ايوب
للتبارك و حل عقدة الحمل

نعمه:
يا خالتى اللى بتطلبيه ده صعب قوى مستحيل

راجية:
مش صعب و لا حاجة و الموضوع مش مستحمل تأجيله
و يعنى الأطبا كانوا عملوا ايه؟

نعمه:
نقوم نلجأ للدجل و الخرافة

عماد:
يا نعمه المطلوب شىء سهل ماتكبريش الموضوع

نعمه:
انت اللى بتقول كده يا عماد جرالك ايه؟ حاجه غريبة والله

راجية:
يابنى لازم نخبط على كل باب جايز ربنا يجيب
الفرج و العلاج واجب

نعمه:
العلاج ايه يا خالتى مش العادات و الخرافات هى اللى حتحل المشكلة

راجية:
يابنتى ده بحر مبارك بحر أيوب بس اللى يصبر
لازم ينول و دى عادة مش خرافة..

عماد:
يا نعمه احنا عملنا اللى فوسعنا و مش عارفين نعمل ايه؟

نعمه:
لأ يا عماد إحنا عارفين بس إحنا مش عايزين
رافضين خايفين من جوانا نجيب عيل يشوف اللى بنشوفه
يشيل حمل الماضى و لا يلاقيش حاضر
و المستقبل فى علم الله يا عالم حيحصل فيه ايه.
حنربيه إزاى و حنواجهه ازاى و حنقوله ايه؟
حنرضعه عكاره و نشربه ميه مسمومه و يتنفس هوا فاسد
اللى حيحصل اننا حنسيبه فى حضننا و حنخنقه بحلم مش عارفين نحققه
مش حتعرف تغنيله ولا حعرف احكى له.
علشان كده مش عايزين رافضين خايفين هى دى الحقيقة هى دى الحقيقة

سالم:
ايه الحكاية لأ و مش حقيقة ان الست اللى
تكون عاقر تتعالج و مش عيب لو دورت على العلاج
فى كل بلاد الله.

راجية:
ياحاج ليه الكلام دا ..

نعمه:
سيبيه يا خالتى أنا مش عاقر يا حاج بصوا حواليكوا
و انتو تعرفوا مين اللى عاقر
الأرض هيه اللى صابها العقم و الجفاف اسألوا
الأرض الشراقى ايه اللى صابها. الأرض عشان تنبت
لازم تتسمد و ترتوى بجهد و عرق و عزم الرجال
يا إما تشقق و الجذر يموت
أرضكم هيه اللى عاقر مش أنا
أرضكم هيه اللى عاقر مش أنا
و منين حيجى الولد تنكش فاكر انه حيجى فارس
همام و يعيد لنا زمن الفرسان

عماد:
نعمه جرالك ايه اسكتى

نعمه:
لأ مش هسكت
فى زماننا العجز و اليأس و القهر مابيجبش فرسان
لما الجبن يبقى وسام
لما سيوف الحق تنام بتحرق الخيل و بتهرب الفرسان
حنجيبه فى زمن جبان ملعون
العدل فيه سجان
و الحق فيه بهتان
و الظلم فيه سلطان
و الملك فيه طغيان
بنهرب من زمن لزمن و من أرض لأرض و من موت لموت
كرهنا صمتنا المكشوف زهقنا من ليالى الخوف
و ادمنَّا النعوش و الموت
منين حيجى الولد منين حيجى الولد منين حيجى الولد

تبكى نعمه و تنصرف و ينصرف الجميع فى حزن ورائها
نستمع لصوات نقاش يدور بين الأسرة فى محاولة
اقناع لنعمه لنزول البحر

راجية:
سبع مرات يا بنتى زى مابيقولوا و نزول البحر طهر يا نعمه

نعمه:
انا ما اذنبتش يا خالتى

راجية:
يا بنتى...


نعمه:
البحر مابقاش بحرنا دنسوه و غيروا لونه و طعمه و شكله
بحرهم غدار و الميه نجسه و موجهم مالهش أمان

عماد:
يلا يا نعمه .. يهديكى يا نعمه

نعمه:
بلاش يا عماد

عماد:
عشان خاطرى يا نعمه

راجية:
ربما يكرمكم يا ولاد بحق جاه النبى يا رب

يمكن أن يصاحب بعد هذا الحوار موسيقى تتصاعد و تحمل معانى الصبر الكرم و أيوب

أغنية:
يا ناعسه يا ايوب
توبنا اتملا بذنوب
و صبرنا على المكتوب
صبر النبى أيوب
يا ناعسه يا أيوب
الطهر لونه اختفى
و الصدق أصبح جفا
من اللى خان السوَّر
بدِّل آيات الوفا
و كتب حروف اسمنا
يا امايه بالمقلوب
يا ناعسه يا ايوب
يا شط بحر العجب
موجك ده ولا لهب
مين فينا كان السبب
و بحق جاه النبى
ضى و نجمه و صبى
و اصبر و انول مطلبى
لجل النبى ايوب
يا ناعسه يا ايوب

نعمه:
خايفه يا عماد

عماد:
ماتخفيش

نعمه:
الميه متعكره..

عماد:
إغطسى الأوله
خدى نفس و اغطسى التانية

نعمه:
مش قادرة الثالثة
روحى رايحه الرابعة

عناد:
كمان مرة الخامسة

نعمه:
البحر مش بحرنا طلعونى

عماد:
الخامسة

نعمه:
مش طايقه

عماد:
السادسة

نعمه خرجونى حموت خرجونى خرجونى

تصرخ صراخاً عالياً مع تصاعد الموسيقى و تغير الإضاءات
منزل الأسرة و سالم أمام العشاء و يتحدث لراجية

سالم:
فين العيال يا راجية حتعشى لوحدى

راجية:
طيب حاضر...

سالم:
البنت عامله ايه دلوقت كانت تعبانه قوى؟

راجية:
يا كبدى يا بنتى بس الحمد لله دلوقت أحسن حقوم
اندهلهم يا عماد يا نعمه.. تعالوا يا ولاد

يظهر عماد و يسند نعمه و يبدوا عليها إعياء شديد

عماد:
تعالى يا نعمه.. ارفعى راسك يا حبيبتى ماتوطيش

نعمه:
خايفه اقع

عماد:
لأ ماتخافيش كلنا جنبك اسندى ظهرك

راجية :
عامله ايه يا بنتى دلوقت

نعمه:
كويسه يا خالتى الحمد لله

سالم :
حمدلله على سلامتك يا نعمه يا بنتى انتى غاليه
علينا و عرفنا غلاوتم عندنا..

عماد و نعمه يتحدثان بصوت منخفض

سالم:
ايه يا ولاد انتوا بتتكلموا ف ايه

عماد:
ابدا يابا دى كلمات لحن جديد

راجية:
كلماته بتقول ايه يا عماد يابنى و النبى تسمعنا

عماد:
اغلى كلام ياما
و احلى معانى يابا

سالم:
عن ايه

عماد:
عن القدس

راجية:
القدس .. يا سلام

عماد:
الحلم يابا

سالم:
أجمل حلم يا عماد
اجهزوا ياولاد

راجية:
لإيه يا حاج

سالم:
للقدس يا راجية
الحلم و الضروره حنروح نصلى فى الاقصى

نعمه:
و المعابر و التصاريح و الحصار و التفتيش

سالم:
ماتخافيش ماتخافيش ربنا حيوفقنا و يقوينا
و يسهلنا ده احنا رايحيم نشكى له و ندق على بابه

نعمه:
الأقصى

عماد:
الأقصى

راجية:
الأقصى

الجميع:
يارب نصلى فى رحابه يا رب نصلى فى رحابه




يتبع
إن شاء الله

مشهد يبين معاناة الاسرة فى رحلتها الى القدس بين المعابر و نقاط التفتيش و تنبين وحشية المعاملة من قبل اليهود و يمكن ان تستخدم طريقة تكنيكية لتضخيم اجساد اليهود و تصور اقدامهم و كأنها قضبان تحيط بالأسرة و هم يقفون كموانع حديدية و تصاحب هذه المشاهد تلك الأغنية التعبيرية

أغنية:
ممنوع الحلم ماتحلمش
ممنوع الحرف ما تنطقش
ممنوعه الكلمة بمعانيها
ممنوعه الخطوه تخطيها
ضلك غربه و مسجون فيها
ممنوع.. ممنوع.. ممنوع
ممنوع الهمس ماتهمسشى
ممنوع اللمس ماتلمسشى
ممنوعه الآه لو تتالم
ممنوع تنطق او تتكلم
ارمى سلاحك و اركع سلم
ممنوع.. ممنوع.. ممنوع

يظهر أفراد الأسرة و على وجوههم الإعياء و الإرهاق و قد وصلوا قرب المسجد الأقصى و يتصادف وجودهم اقتحام شارون المسجد و الصراع الذى دار بين الجانبين، ينطلق مجموعة على المسرح فى معركة بالحجارة و صوت طلقات النار تتفرق الأسرة و كانها تبحث عن افرادها وسط هذا الهياج و مراسيلى النباء يظهرون على المسرح و كانهم ينقلون الحدث

مراسل1
احييكم من امام المسجد الأقصى حيث تستمر
قوات الاحتلال فى اطلاق الرصاص و من الواضح أن الموقف
يزداد وسوف يزداد تعقيدا مع تحيات وليد العشرى من رام الله.

مراسل 2
سيداتى سادتى السؤال الذى يتبادر الى الذهن
لماذا يقتحم شارون المسجد الأقصى فى هذا الوقت
بالذات هل سيصعد الموقف و يثير الغضب العام؟

يشتد القصف يهرع الجميع و يظهر طفل مع أبيه يختبئان من القصف خلف حجر كبير و الطفل يمسك بحجر صغير فى يده ، يركز جنود الإحتلال فوهات بنادقهم على الصبى ، يصرخ الأب و هذا هو المشهد إستشهاد محمد الدرة.

صوت:
بلاش بلاش الوله
الولد معايا ..حاسبوا..حاسب
مات الوله مات الوله

موسيقى تصويرية مصاحبة لحركات تعبيرية على المسرح تصور بشاعة الاحساس بالقهر و الظلم..الكل يجتمع حول الطفل و والده ، يسير الاب فى شبه ذهول و يردد مرتين.

صوت:
لما ندانى الوله
أنا قلت ياولدى
و بصرخة شق السما
طرح النهار بلدى
حضنت كفوفه الحجر
و كأنه ماسك قمر
نور ف ليل بلدى
أنا قلت لجل الوطن
ولدى ده مهر و ثمن
و تعيشى يا بلدى

ينصرف الأب و الطفل الشهيد مع مجموعة من المحتشدين و تبقى الأسرة و بعض الأشخاص.
يمكن أن تكون الكلمات الآتية أغنية مصاحبة لمشهد الحزن والشهداء

الرواى:
ياضمير الإنسانية سكت ليه
إظهر و بان قول للجبان يرفع إيديه
وف أى مله و أى دين
هو احنا فين
يبقى القتيل هو المدان
و ف شرع مين
مخنوقه يا صرخة الم
مالكيش نصير
هدم و حصار خسه و دمار
و لا فيش ضمير

الرواية:
ملعون يا شرع الغاب
فى كل كتاب و دين
نطق الحجر لما الضمير
قال مستقيل
ثورة طيور صحت
وريد الإنفجار
حق و مصير شعب انتفض
تحت الحصار
مدفع سلاح قدام جناح
عصفور سجين
صرخة شهيد قالت
نشيد العدل فين

الرواى
يا ضمير الإنسانية
سكت ليه
سكت ليه
سكت ليه

تذهب الاسرة لتصلى فى أحد الاركان فيحاصرها الجنود و يؤدون الصلاة و فوق رؤوسهم فوهات البنادق و أرجل المحتلين و هم يقومون بالصلاة و يدور الحديث بين مجموعة من اليهود

يهودى:
رايحين فين و لمين؟

سالم :
عايزين نصلى و ندعى لرب العالمين و لاَّ ده كمان ممنوع
حرام عليكوا.

يهودى:
مفيش صلاة

عماد:
ابعد ايدك أنت و هوه سبونا نصلى و حنمشى على طول

يهودى:
ممنوع صلاة إلا لشيوخ فقط ممكن أنتِ و هوة بس

سالم:
وده يرضى مين ده مكان مقدس لكل الأديان و كل
إنسان حر فى عباداته و إقامة شعائره

يهودى:
مش مضبوط.. احنا بس اللى نقول مين يدخل و مين
لأ و مش عايزين نضيع وقت يلا صلوا قدامنا هنا..

يصلى سالم و راجية و يبتعد عماد و نعمه و هو ممسك بذراعها و يدور الحديث بين جنود اليهود

يهودى1:
متطرفون.. ارهابيون.. سفاكون

يهودى 2:
إن الرب ليندم ألف مرة فى اليوم لأنه خلق
الفلسطينيين و العرب لابد أن نتسيد هذا العالم و تلك
البقعة نحن أحق من أى شعب آخر..

يهودى3:
لابد و أن نهيمن و نخضع الكل لسطوتنا فنحن أحب
إلى الرب من الملائكة و القطب حاكم العالم خارج من
بذرتنا و سنسيطر معا على كل أطراف الأرض

صوت:
لن يحدث أبدا.. الأرض ليست إرثاً لكم .. انتم تحلمون تتوهمون و سيأتى اليوم الذى فيه تتساقطون
و يتلاشى مجدكم الواهى القائم على الظلم و الإعتداء
و البغى و العدوان.

يهودى1:
مين انت؟

صوت:
إنسان له الحق فى القول و الإعتراض و الرفض
فلسطينى!

يهودى 2:
يعنى عربى

يهودى 3:
يعنى إرهابى

صوت:
لأ إيجابى هارب من قيود السلبية التى تحاولوا
تفرضوها على جيل باكمله..

يهودى1:
لا أعتقد ،أنك لا تؤمن بما تقوله فأنت واضح أنك من
جيل الشباب و عارف كويس أن بينا معاهده سلام
و بينا اتفاقيات و عهود.. و اشهدوا يا خلق أهو
احنا نريد السلام و هم لأ..

صوت:
السلام بقى واهن زى بيوت العنكبوت و خيوطه اللى
نسجتوها حولنا.

الرواى :
سلام .. يا سلام
لو ع السلام مليون سلام
لو الحمام أسراب حمام
بس السلام يبقى بأصول
مش ضحك يابا على الدقون
و لا فض مجلس و السلام
السلام يعنى المحبة
يعنى قمحة فوقها قمحه

الرواية:
يعنى بنت بنوت بطرحه
يعنى ضىّ و يعنى نور
مش مناحل شر قازحه
سارحه بتحش الجذور
السلام يعنى المصالحه
يعنى فرع من الأمانى
خضرا جوه قلوب مسامحه
السلام يعنى البشاره
يعنى صفارة أمان
يعنى إيد على إيد تسلم
تنفتح كل البيبان

الرواى:
هو ده معنى السلام
يلى خبيتوا المدافع
جوه ف ابراج الحمام

الرواية:
يلى موتوا المعانى
لجل ما يموت الكلام
ملعون أبو اللى يسلم يوم عليكوا
يلى دابحين السلام

يتجهون على الشباب الواقف يشترك عماد و نعمه تقف بينهم تحاول أن تتدخل بينهم يضربون الشباب بظهر بنادقهم و يلقونهم على الأرض و يلتفون حول نعمه يقربون منها و يلقفونها فيما بينهم و هى صامده لا تتحرك بعينها عزيمة و اصرار على الصمود و يحاول عماد أن يدافع عنها و لا يقوى يتخاذل يضعف يستند على ذراع أبيه و أمه.. و ينظر فى هلع إلى نعمه و هى محاصرة.


يهودى1:
عنيده

يهودى2:
عفية

يهودى3
جميلة
عربيه

يهودى1:
جريئة

يهودى 2:
لا تخشى شيئاً

يهودى 3:
انفاسها تتلاحق

يهودى1:
ماتت

يهودى 2ك
حيه

يهودى 3:
متعبه
سنريحها

يدورون حولها فى نهم مع مصاحبة موسيقى تتصاعد مع طبيعة الحديث يقتربون منها و يمدون اذرعهم فى محاولة للمس جسدها ، تظهر نعمة الصمود و التحدى.

الرواية:
يانه يامه يامه آه
آه يا قلبى كان ف جنبى
حلم جابنى من بعيد
و لحد دارك
بس بابك كان موارب
و العقارب و السنين شقين رحاية
و أنت مطحونه ف ادمايه
كان معايا ألف حلم و ألف غاية
ميت مراية
و الوشوش هيا هيه
و الزوايا منتهيه

الرواى:
و البداية خط مايل
ف النهاية عبد شايل
فوق كتافه
حمل ناطق بالحقيقة
و العيون ماتت بريئه
لما باعونا ف دقايق
و المظالم لبسوها توب حقايق
و الحرايق نهر جارى فوق دمايا
مين عليه و مين معايا
ألف ضفر و ألف حافر
مغروسين جوه فى حشايا
و ف بنوك الدم ضعنا
لما بعنا دم أحمر حمر فاير
و اشترينا دم فاسد

الرواية:
و الروافد هيه هيه
و الحكاية منتهيه
و اللى ساير ع الجميع
لابد يوم حيسير عليه
علىّ داير فوق خطوط العرض حاير
حلّى يا شمس الضفاير
و ابدريها ألف مره
يلى خليت صوتى عورة
الكلام مالهوش مواسم
يلى واشم فوق عروقى
ألف دقة خوف كفايه

الرواى:
تهت يامايه ف طريقك
و ف طريقك كان حريقى و كان حريقك
كنت واقفه و أنتِ شايفه
ريشى طاير من لهيبك
بس خوفك بل ريقك
قام طريقك حاف و حِّود عن طريقى

الرواية:
أنت فاكرانى بحقيقى
و لا ناسيه

الرواى :
ألف صحة و ألف عافية
ترجعى لى بالسلام
و ف شرايينى اللى ماتت
ترجعى لى دم وافر
حلم عاقر جوه منى
مستحيل البعد عنى

الرواية:
قربينى من عيونك
و استرينى بطرف توبك
و اشترينى قبل ما يبيعوا اللى فاضل
اشترينى قبل ما يبيعوا اللى فاضل


يرتفع صوت الأذان من المسجد الأقصى تحاط نعمه بهاله من النور و يتراجع الجنود فى رهبه و رعب من هذا الصمود

و هذا المشهد مشهد فى منزل الأسرة الكل مهموم و حزين و صوت الرصاص يصل لمسامعهم يستمعون الى طريق الباب تقوم الام لتفتح

راجية:
حسن أخويا خش يا حبيبى.. شفت اللى حصل لنا
و اللى جرى لنا شفنا الموت بعنينا.

حسن:
الموت بنشوفه كل يوم يا راجية( يتلفت حوله) فين عماد و نعمه

راجية:
كل واحد فيهم قاعد لوحده حالتهم لا تسر عدو و لا حبيب

يدخل سالم

سالم:
استاذ انيس و حسن اهلا اهلا! اعملنا شاى يا راجية
و اندهى ع الولاد..

انيس:
عماد عماد فين يا حاج سالم عايز أكلمه..

سالم:
نفسه مكسوره حاسس بإنكسار مش راضى يكلم حد
الموقف كان صعب على أى حد ف مكانه

أنيس:
بس مش لازم يستسلم.. الوقت ده لازم نكون كلنا
مع بعض آن الأوان نفوق من الوهم .
الوهم كبير مالوش قضبان و لا سجان لازم نعيش الواقع
و الحلم و الحقيقة.

حسن:
ده لازم يحصل يا استاذ أنيس لازم نفرح بالتحول
الإيجابى و الروح الجميلة اللى سادت فى كل شبر عربى..

تدخل نعمه

سالم:
يالا بينا يا راجية نصلى المغرب و نسيبهم مع الولاد
شويه

راجية:
بينا يا حاج يا رب النصر من عندك يا رب.

نعمه:
محدش هيرجَّع حقنا إلا أحنا يا أستاذ أنيس
بإيدينا و بإيد ولادنا و ولاد ولادنا.


أنيس:
صح يا نعمه أنت صح(يدخل عماد من الجانب الآخر و هو حزين مهموم كسير)
لا يا عماد ما أحبش اشوفك مهزوم و لا ضعيف أنت أقوى من كده
جواك بركان ثورة لازم تترجم مشاعرك
أفكارك و تحولهم سلاح فى وش عدوك يقاومه
و يقضى عليه
ده لو كان بإيديه أو يقدر عليه

نعمه:
مايقدرش يعمل حاجه سلبى.. متواكل مش انت
اللى حبيتك و اخترتك شريك لحياتى

عماد:
كانوا كتير و اقوى منى

نعمه:
انت الأقوى ..لأنك صاحب حق..لكن للاسف
ساكت صامت و صوت الظلم مابيعلاش و يسود إلا
لما صوت الحق يضعف و يموت.

يتقابلان يحاول ان يهرب منها من نظراتها تسلط الاضواء عليهم و يدور بينهم حديث و عتاب


نعمه:
كنت الحنان
كنت الأمان
كنت الندى
كنت الطريق اللى ابتدا
كنت الحروف كنت الشموس كنت الشجر
كنا بنسهر نقرا أحلامنا على ضى القمر
و يهزنا لحن الوتر
و تهزنا كلمة وطن

عماد:
بس الحروف أتغيرت ..اتلونت .. اتبعثرت
و البحر خان كل المواكب و الشطوط بعدت و غابت
فى العدم مين السبب(يهزها أو يدور حولها)

نعمه:
معرفش مين

عماد:
مين اللى شد القوس لصياد الأمل مين اللى حدد له الهدف

نعمه:
معرفش مين

عماد:
مين اللى غير ف السور حدد بروايز اللغة

نعمه:
معرفش مين

عماد:
ضى النهار ليه اختفى
مين اللى باعه ف الخفا.. مين اللى زيف حلمنا أنت و أنا ،
أنا مش جدير بيكى يا نعمه و مش أنا الشاطر حسن
أنا حرف منذور للسلاسل و الزلازل و العطش
حرف مندور للسكون للموت لكرباج الحرس
حرف متحاصر بقضبان التقهقر والتراجع و الخرس
للحصار الموت لأثواب الكفن
من أول الحرف النبى و لآخر الحرف العفن
أنا مش جدير بيكى يا نعمه و مش أنا الشاطر حسن
أنا مش جدير بيكى يا نعمه و مش أنا الشاطر حسن


يهرع بالخروج و هو منفعل يبكى و تهم نعمه وراءه يناديها أستاذ انيس

أنيس:
سبيه يا نعمه تعالى يا بنتى هو محتاج يعيد
حسباته و يتغلب على ضعفه
ياه يا نعمه فكرتينى لما كنتى صغيره كنت شعلة..
نشاط و ثورة و عناد.. لسه زى ما أنت


نعمه:
متهيألك يا أستاذ أنيس أنا كمان تعبت تعبت من
المقاومة و قولة الحق فى زمان الحق فيه اندبح
بإيدينا قبل ادين أعدانا.

أنيس:
لأ يا نعمه لازم كل واحد فينا يبقى قوى لأن القوى
بتكون مبادئه نابعه من جواه و إرادته هى اللى
بتحكم و قراره بيكون بإيده.. أما الإنسان الضعيف
بيكون عبد لأفكار الغير و يمشى ورا إرادتهم.
هى دى حل المشكلة.

تنطلق اصوات و غناء يلهب مشاعر الناس و تصل إلى آذانهم تصرخ نعمه

كلمات عماد.. كتبها أمتى.. لحنها أمتى .. تعالوا
تعالى يا أستاذ أنيس خالى حسن سامعين.. عماد
مع الناس ف وسط النار بيغنوا يا حبيبى يا عماد
ماكنش لازم احرجه و لا أشك فى وطنيته و قدرته
على المقاومة اسمعوا الكلمات و الحماس و الإصرار.

أغنية:
لبيك يا قدساه
نحن عباد الله
أقسمنا باسم الله
نحمة حمى الأقصى
سجل فهذا قرار
نحن جنود النار
سنهد ألف حصار
و سنشعل الأحجار
و نعيد بالإصرار
ارضنا لنا و ديار
تبت يد الفجار
سجل فهذا قرار
نحن عباد الله
و الناصره و صبرا
أقسمنا بسم الله
نحمى حمى الأقصى
شهداؤنا أحرار
و زئيرنا إعصار
و ضلوعنا اسوار
و جميعنا ثوار
سجل فهذا قرار

يدخل عماد يلقى نعمه و نظرات الحب تحاصرها و كأنهم عرفوا طريقهم الصحيح.

نعمه:
شفت يا عماد الكلمة عملت ايه

حسن:
الناس كلهم بيغنوا و يرددوا كلماتها بكل عزم و قوة
و إصرار الكلمة أمانه يا أستاذ حسن
و الكلمة ضمير و حكمه و موقف أمه

نعمه:
بالكلمه حنفضحهم ،مسموعه و مرئية ف كتاب فى أغنية

عماد:
لازم نكشف تاريخهم زيفهم خداعهم قدام كل الناس

نعمه:
و مش بالكلام بالإثبات و الدليل بالعلم و المنطق و بالتاريخ اللى زيفوه

عماد:
و حرفوه و زوروه

حسن:
تاريخهم كله مكتوب بأيد كهنه فى عصور الجهل
و التخلف و كل دياناتهم و كتبهم بتحض على سفك
الدماء و القتل و الدمار و الخراب.

أنيس :
تاريخهم يشهد ببشاعتهم مش بس مع البنى آدمين
لم ينجوا من آذاهم الرسل و الأنبياء.

نعمه:
يا استاذ أنيس أنا خلاص أنا قررت أنى اشارك فى
المقاومة بتأليف كتاب

حسن:
عنهم

نعمه:
طبعا .. اصلهم .. فصلهم .. نسلهم .. خداعهم..
نذالتهم لازم نكشفهم و نحاربهم بنفس سلاحهم
نوصل كلمتنا لكل العالم اللى صدقهم و انخدع فيهم

ينطفى النور فجاة.





يتبع
إن شاء الله

متابع

عزيزتي ليلى
(f)(f)

رائع.. مؤلم.. وموجع



كم أثّر فيّهذا المقطع

لأن الكلمة
تبقى الأساس
وهي السلاح المتاح بين أيدينا
وسلاح مؤثّر....
شعرت أن هذا المقطع لخّص المسرحية بكاملها

Array

الرواى:
مش من حقك تفرض أى رقيب ع الكلمة

المنتج:
بس الكلمة سلاحها خطير

الرواية:
برضه اساس الكلمة أمانه
و ساعات كلمة بتبقى أمانه
و ساعات كلمة بتبقى ضمير.

المنتج:
أى ضمير؟

صوت :
أى ضمير ممكن شعب و فرد و أمه ممكن كلمة
تحرك ثورة.

[/quote]


مشكورة ياليلى
(f)
وبانتظار التتمة

تحياتي ومودتي
:yes:
أمان

الليبرالي؛

أمان؛


تعرفى أمان الأحداث الاخيرة اللى حصلت فى مصر فكرتنى بالمسرحية دى ، علشان كدا حبيت تشركونى فى قراه احداثها
جميل و قوي جداً الجزء اللى اقتبستيه ، و دا كمان اللى انا بشوف ان المسرحية بتقوله
مش مهم الأحداث بتحصل فين
مش مهم فى فلسطين، فى العراق، فى لبنان، او فى مصر
المهم هى الكلمة والضمير و قضية الحرية و الكرامة.

سعدت جداً بتشجيعكم
شكراً جزيلاً
تحياتى لجميع من تابع

نعمة:
ودى برضه طريقتهم ينطفى النور علشان
مانتكلمش و صوتنا ما يوصلش لكن خلاص مش
حسكت ابداً بعد النهارده حاكتب و اقول مش
حسكت أبداً.. كرهت السكون الضعف العجر كرهت
السجون و المخبرين و الأسوار كرهت الحصار صوت
الحرس كرهت الحزن و صوت الرصاص كرهت البارود
كرهت المقايضة كرهت العهود جنون القنابل
صليل السلاسل و برد السجون و ح اكتب و اقول..
حقول .. لازم نكون لازم نكون لازم نكون.

ينصرفوا و يدخل اليهود و ليصبحوا فى دائرة الضوء

يهودى1:
مجنونة فاكره لوحدها حتقدر تعمل حاجة

يهودى 2:
اعداء السامية المجرمين بيحاولوا يفضحونا

يهودى 3:
ماتخافشى مش حيقدروا يعملوا اى حاجة و زى ما
أنت شايف كل واحد لوحده.. و هنا نقطة ضعفهم..
احنا مجندين كل الدنيا لخدمة أهدافنا و زى ما أنت
عارف كلهم اصبحوا أبواق و حناجر أقصد العرب
لكن فعل صعب صعب جداً

يهودى1:
يعنى تعتقد أننا نجحنا فى تشتيت شملهم و تفريق
كلمتهم

يهودى2:
طبعاً.. ده أكيد.. بس المهم أننا نواصل
تكتيفهم و تكميمهم مش لازم الكتاب ده ينكتب و لا
يترجم لازم يندبح حروفه من قبل ما تتنفس

يهودى 3:
فعلاً البنت دى لازم تستسلم تسكت خالص عنيده..

يهودى 1:
نكسر عندها .. نزلها نبعدها عن كل الناس نسجنها
نسحلها نجننها المهم لازم تسكت و للأبد..

يدخل او ينضم اليهم بعض الجنود و يمسكون العصا بأيديهم و يقومون بقرع العصا على الأرض فى دائرة شيطانية و حركات هستيرية.

اغنية:
سكوت سكوت سكوت
مش عايزين نسمع صوت
و مصير الكلمة الموت
جدران منازلكوا حدود
و الأرض ضريح و تابوت
غرقان فى ذهول و سكوت
سكوت سكوت سكوت


سكوت ليلى شبه إضاءة على نعمه و هى جالسة فى حالة انهماك فى الكتابة و إرسال أخبار لوكالات الأنباء العالمية فجأة يقتحم عليها الغرفة أشباح أربعة يشلون حركتها , الأخرون يلملمون الأوراق و يتقاذفونها فيما بينهم , يدخل عماد على هذا المشهد الحركى ينتهى المشهد بقتل واحد منهم دفاعاً عن نعمه و عن شرفه و عرضه و يختفى عماد وسط ذهولهم.. هذا المشهد يمكن أن يتم عن طريق التعبير الحركى و الموسيقى.

يهودى1:
موتوه الإرهابين

يهودى 2:
غدر و خيانه..

يهودى 3:
كنا بنلعب مجرد لعبه يقوموا يقلبوها جد
شايفين.. شاهدين.. مش كانت مجرد لعبة ساكتين
ليه.. حتشهدوا معانا مش كده لازم تشهدوا لازم تشهدوا معانا.

تدخل الأم على نعمه و هى فى حالة قلق و غليان

راجية:
أهدى يا بنتى ماتعمليش فى روحك كده

نهمه:
فى شرع مين يقتحموا البيوت و يهتكوا سترها و يهددونا
لغاية امتى.. لغاية أمتى.. و عماد عماد يا خالتى راح
بيدوروا عليه فى كل حته
بقاله كام يوم لا حس و لا خبر

راجية:
خلاص يا نعمه عماد عرف طريقه و بدأه و محدش
حيقدر يرجعه

نعمه:
خايفه عليه خايفه عليه يا خالتى

راجية:
لأ يا بنتى أنا فرحانه بيه و رفاقه اللى زيه فكرونا
بايام زمان رجعوا الحلم و الجهاد و المقاومة
صحونا..

نعمه:
معقول يا خالتى الحلم يكون لسه جوانا حى؟

راجية:
طبعاً حى الحلم عمره مايموت يا نعمه مالوش وطن
إلا فى قلوب الناس.

يدخل سالم فى حالة ضجر

سالم:
المجرمين السفله سمعتوا الأخبار

نعمه:
مش مهم يا عمى الأخبار المهم ان البلد اتملت ثوار
معاهم شمس بكره الجاى

صوت المذياع ينطلق بإعلان عمليه إستشهادية فلسطينية يستمع الجميع ثم يهتفون

الجميع
الله اكبر الله اكبر

راجية:
يحميك يا ولدى و يحرسك أنت و الجدعان يا رب
ساعدهم يا رب (تبكى)

سالم:
بس يا راجية ماتخافيش ربنا معاهم.

يدق الباب و يدخل المنزل اليهود الأربعة يقومون بتفتيش المنزل و جمع كل ما يصل إليهم و يوجهون حديثهم لنعمه

يهودى 1:
أنت تعالى.. قربى.. بلاش كلام كثير، أحسن لك
و للجميع مافيش اتصالات و لا كتابه و لا تصوير و لا همسه و لا حرف

نعمه:
و مين قالك أنى ههمس أنا حصرخ و بعلو صوتى
ماعدناش نخاف منكم.. أنتم بترتجفوا قدام عيون
طفل ماسك فى ايده حجر.. بتصغروا فى عيون كل
الدنيا و هو بيكبر بيكبر اكبر مما تتصوروا..
بتترعبوا بتترعشوا و هو يقابل رصاصكم و قنابلكم
ببسمة جرح و بضحكة ألم حتى لو مات بتفضل عيونه
مفتحه رافضه تغمض عن الظلم تانى..

يهودى:
اخرسى .. اخرسى

راجية:
هى البيوت عندكم ملهاش حرمه اطلعوا بره البيت
نجستوه و دنستوه عايزين منا ايه.. ربنا يهد حيلكم يا بعدا.

يهودى1:
فين عماد اتكلموا مش حنمشى إلا لما ناخده معانا
محكوم عليه بالموت زى ما قتل واحد منا..

يهودى:
مافيش حاجة

يهودى :
مافيش حاجة
راجعين لكم تانى مش حنسيبكم
(موجه حديثة لنعمه)
و انت لو متعلمتيش من الدرس الأول ممكن
يبقى فى درس تانى..
كفى عن المقاومة.. الحلم الصهيونى تحقق معظمه
و مهما كتبت مش حيصدقك حد، العالم كله ملك قبضتنا

نعمه:
واهم.. واهم جدا بكره العالم كله حيعرف اجرامكم
و لكم يوم قريب و الكل حيرفضكم و يطاردكم..
آه...

يضحك يإستهزاء

يهودى:
تقصدى الشجرة اللى حتنادى و تقولكم ورايا يهودى
ممكن يكون ده صحيح..
بس يا مدرسة التاريخ مش فى زماننا ده
لا أحنا اليهود اللى حيكونوا وراء الشجرة و لا أنتم
بحالتكم دى اللى حتحاربونا هأهأ .. استنوا بقى
الفرج نكون احنا خلاص رسمنا الحدود و شكلنا
العالم كله زى ما حلمنا بيقول سنسود سنسود سنسود.

يضحكون و ينصرفون و بعد قليل تستمع الأسرة لصوت الرصاص ، ينظر الأب سالم من النافذة

سالم:
يادى الخراب سحاب حريق القدس وصلنا دخان
الطف يا رب

راجية:
الأيام كلها شبه بعض بس فيه حاجه جديده روح
جديده إحساس جديد يا حاج حلو حلو قوى

نعمه:
هاتى شالك يا خالتى

راجية:
على فين يا بنتى

نعمه:
أدور على عماد فى أى مكان لازم الاقيه لازم اكون جنبه
لازم نتحرك الكل لازم يتحرك..

يسمعون طرقاً و يدخل حسن و الأستاذ أنيس ، حسن مجروح و يستند على أنيس

أنيس:
وسعوا سكه وسعوا سكه ارتاح يا حسن اقعد هنا
هاتوا شاش و قطن يا نعمه بسرعة

راجية :
أخويا.. يا ضناى يا حبيبى فيك ايه جرالك ايه؟
ايه اللى حصل

أنيس :
ما تخافيش يا حاجة نشان جاله على كتفه وسام

سالم:
فيك ايه يا حسن احكى لى خوى انت بخير

حسن:
بخير يا سالم هو أنا حكون اغلى من العيال
و الشباب اللى باعوا أرواحهم عشان يفدوا الأرض
و العرض الموت مش مهم ما احنا ميتين ميتين يبقى
على الاقل نموت بشرف

سالم:
بعد الشر عليك يا حسن

نعمه:
استاذ أنيس ماشفتش عماد

أنيس:
سيرته على كل لسان ف وسط النار و البارود
و الدخان بيقاوم و بيغنى كلماته و أغانية بتلهب
الحماس واقف ايده فى ايدهم و بصدره بيحمى
ظهورهم ربنا معاهم

نعمه:
هاتى الشال يا خالتى لازم اروح له

راجية :
يا بنتى الدنيا جحيم بره

نعمه:
مش مهم

راجية:
ثوبك مقطوع

نعمه:
شالك حيداريه يا خالتى

مشهد مطاردة للجنود اليهود للفدائيين و عن عماد وسط تشكيلات ،مره يندس بين الشباب و الشيوخ فى مسيرتهم و يقومون بتهريبه وسط كلمات حماسية.

أغنية:
أرفع.. علمك صوتك رايتك
و احمى أرضك طينك عرضك
واحرس قرآنك انجيلك قدسك دينك
فينك
واصل قاوم اثبت حاول واوع تساوم
فتح عينك
بص شمالك .. بص يمينك
حرص واوع تطاطى جبينك
فينك
ضم سنابل طرح ميلادك
واوع الديب لا ف لحظة يغافلك
تبت فى جذورك بضوافرك
واوع تفرط
وحد صفك
فينك

ينطلق عماد وسط هذه المجموعة يلتف حوله الأطفال و هم يتغنون بأغنية و يقف فى وسطهم .. و الجنود اليهود يبحثون عنه

اغنية:
توت توت
توت توت توت
طق بغيظك فرقع موت
يا استعمار أمشى بقى و غور
وسع سكه لضى النار
العصفور اهو عدى السور
و لا حيخاف و لا يوم حيسلم
و لا حيصدق اى وعود
توت توت
الأرض بتولد أحرار
جوه قلوبهم ثورة و نار
حالفين يوم ياخدوا بالثار
م الظالم ابو قلب جحود
مش هتعيش بينا و لا تسود
توت توت
توت توت توت
طق بغيظك فرقع موت
جابوا مدافع و يا بارود
و الندل عليهم بيجود
شافوا الحجر النبى بيصلى
فى عيون طفل برىء مولود
هرب الديب خاف م الكتكوت
توت توت
توت توت توت
طق بغيظك فرقع موت

يهرب عماد من الحصار و يتقابل مع نعمه فى مشهد رقيق و بعيداً عن الأعين و يمكن أن يتم إظلام المسرح و يحدث تكثيف للضوء على وجه نعمه و عماد

نعمه:
عماد

عماد:
نعمه

نعمه:
وحشتنى

عماد:
وحشتينى
ليه الخوف اللى ف عنيكى و الرعشة اللى ف اديكى

نعمه:
خايفه عليك

عماد:
اوعى تخافى الكلمه دى كرهتها لازم نلغيها من قاموس حياتنا

نعمه:
انا فرحانه بيك ..اتغيرت

عماد:
رجعت فقت انتفضت زى الارض ما انتفضت و فجرت
الزلازال و البراكين اللى جوانا

نعمه:
راجع امتى لينا

عماد:
ده احنا لسه يا دوب ابتدينا

نعمه:
و حلم الولاد

عماد:
الأرض ولدت لنا الآف الأولاد هم املنا يا نعمه

نعمه:
يعنى مش بتفكر

يضع يده على فمها

عماد:
اوعى تكملى أنا مش ممكن استغنى عنك و لا كان ممكن
افرط فيكى انت وجودى و امتدادى.. و حياتى يا نعمه

يسمعون وقع اقدام اليهود و يمكن أن تنتشر الإضاءة على المسرح كله يفترقان و قبل ان يترك يدها

نعمه:
عماد عماد انا حامل يا عماد.. حلمنا حيتحقق
و فرعنا حيفرع لفروع يا عماد جاى الولد يا عماد

عماد:
خالى بالك من نفسك و سلامى للجميع..

الرواى:
ضى النهار
لو يوم طلع
ماحدش يقدر يمنعه

الرواية:
وصوت الحق لو ينطلق
الكل لازم يسمعه

الرواى:
وقف عماد وسط الولاد
و الرصاص و البارود
و صرخ بعزم الصوت
يانعيش سوا يا نموت
و الموت ماهواش بالجوع
و العيشه مش بالقوت
عمر الخلاص مايكون
فى طريق ضلام مسدود
شرك الضلام منصوب
علشان تبان مغلوب
بيكتفوك بالقوت
و بيضربوا المربوط
علشان تخاف و تموت

الرواية:
بعنا آمال و نفوس
علشان رغيف و غموس
و صبحنا يا ولداه
بين فك ديب و لصوص
زندك مدام موجود
إياك تميل ع الغير
و حرس من التعبان
و ده قرصته و الموت
و إياك تعيش فى الكون
موجود و مش موجود
و زعق بعزم الصوت

الرواى:
يانعيش يا نموت

الرواية :
يا نعيش سوا يا نموت

الرواى:
قوم يا وطن هز الهلال
قوم هد قضبان المحال
حل الضفاير يا وطن
و إياك تقوم تعظيم سلام
للإنكسار و الإنهزام
آه يا وطن ده انا فيك بموت
آه يا وطن لو يوم تعود

الرواية:
قوم يا وطن واصحى بقى
و لا الشقا
مكتوب عليك م الأوله ليوم الخلود
قوم عيد حساب المسألة
و احسبها.. صحصح يا وله
قوم علِّى صوتك للسما
قول اللى باعك يا وطن
ده ماكنش أنا
أنا مش جبان و لا نيش
نبات شيطانى سارح بالجحود
يلاَّ يا شمس اتسرسيبى
بين العروق و اروى الشراقى و الشقوق
اللى حفرها الخوف على جبين الشروق

الرواى :
قول السلام
عمره ما كان
معناه تراجع و لاَّ خوف

معا:
قوم يا وطن اصحى و فوق
حط النقط فوق الحروف
حط النقط فوق الحروف


مشهد لمنزل الأسرة سالم و راجية يبدوا عليهما القلق

راجية:
صوت الرصاص زى المطر و الدخان فى كل مكان
ياترى الاولاد فين و شباب البلد مين فيهم مات مين
انجرح من لسه حى
احرسهم يا رب يارب

سالم:
ربنا يستر يا راجية الباب افتحى بسرعة يمكن يكون فيه اخبار

دقات سريعة ، يدخل حسن .. بسرعة

سالم :
افتحى يا راجية

راجية:
حسن حسن يا خويا

حسن:
اوعى الرصاص هيطول رقبتى

راجية :
فين الولاد يا حسن بخير و رحمة ابوك تقوللى..

حسن :
بخير يا راجية بخير..
استنوا لما اخد نفسى يا ساتر..
الإنتفاضة يا سالم بقت حرب ، يا سالم معركة مش متكافئة
دبابات و طيارات و جيوش بيواجههم شباب و اطفال
بحجارة و خرطوش.. وحوش يا عالم ضد طيور مافيش عدل..
مافيش حق مافيش ضمير

سالم:
و الجرحى كتير

حسن:
كتير المشكلة العلاج و الأدوية مانعين المجرمين أى
معونه تصل خلال الحدود,,
ربنا موجود.. اللى بيحصل ده ضد الإنسانية و حقوق
الإنسان و كل شىء..
بس يا راجية العيال واقفين زى الأسود بيقابلوا
الرصاص بصدورهم و اللى بيسقط منهم بيقوم
بداله عشرة و كأن الأرض بتنشق و تطرح زرع مفرع
لا بيدبل و لا بيموت الله اكبر انصرنا يا رب

دقات أخرى على الباب و اصوات ضجيج تدخل نعمه و حولها تلاميذها و بعض الهاربين من الرصاص و الدمار و كل طفل يمسك كتاب التاريخ

راجية:
نعمه فيه ايه ياختى أدخلى أدخلوا أدخولوا يا ولاد..
يرضى مين يا رب الشحططة و الخوف و الفزع و الظلم ده.
عماد.. شفتيه يا نعمه.. ردى عليه

نعمه:
عماد بخير يا خالتى بخير و بيسلم عليكوا كلكم

راجية
أمال وشك مخطوف كده ليه

نعمه :
تعبانه شويه.. عندى إحساس بالغثيان

راجية:
معقول يا نعمه.. أوعى تكونى.. الف مبروك
سامع يا حاج

سالم:
أحمدك يا رب مبروك لينا كلنا
لما ربنا يريد.. كله بأمره

طفل يتأوه من أثر جرح فى يده، تهرع إليه نعمه

نعمه:
إجمد يا بطل ده وسام على صدرك يا مصطفى
دم الثورة الى بيحرر التراب و الأرض

الطفل:
كل البلاد اتحررت بالحجارة؟

حسن:
لا يابنى الحجارة رمز المقاومة و إعلان للجميع
أننا مش هنسلم و نستسلم للمستعمر الجبان اللى محاصرنا
فى كل شبر و كل مكان مانع عنا السلاح
و الرجال و المعونة و العلاج و المياه و النبض

طفل:
و فى المعارك كل شىء مباح

أنيس :
بس دى مش معركة المعركة لازم تكون متكافئة
و لها قانونها و أهدافها دى مذبحة مذبحة بمعنى الكلمة
إباده جماعية مابتفرقش مابين راجل مدنى
و لا كهل و لا طفل و لا مسن

حسن:
ماهيه دى مدابح اليهود و هو ده أسلوبهم خسه
و نداله و انتصارات مزيفه

نعمه:
سجلهم مليان و متعبى مذبحة بلده ناصر و دير ياسين
وبلده صالح و صابرا و شاتيلا و الأقصى و الحرم الإبراهيمى
مش كل دى مذابح مسجلة باسمهم القذر

حسن:
بس برضه زى ما فيه مدابح مسجلة فيه برضه
أبطال كتبوا بدمهم تاريخ المقاومة و الصمود اتحدوا
القهر و الموت من حياة البلايس لمحمد الدرة شهداء
العرض و الأرض و الدين و القدس.

يدخل عماد متسللا من النافذة يرتدى ملابس تنكرية و يكمل الحوار ، يلتفت الجميع حوله ، تهتف نعمه عماد

راجية:
ابنى حبيبى

سالم:
عماد ابنى انت بخير

عماد:
و المقاومة حتستمر و حتمتد فى كل شبر على أرض
فلسطين النفوس اتحررت من سجن البدن و الخوف
و ما عدناش نصدق عهود و بنود و اتفاقيات وهمية
و شباك و كماين و كذب و زور.
خلاص انتفضت الأرض و هزت كل اللى عليها
و كشفت القناع و سقطت كل الأقنعة المزيفة

راجية:
تعالى فى حضن امك يا حبيبى

سالم :
عماد.. تعالى يابنى نفسى احسس عليك اطمن عليك

أنيس:
عرفت تعدى من الحصار إزاى يا عماد

عماد:
كان لازم اشوفكم كلكم و اطمن عليكم نعمه أبويا
أمى المستقبل اللى سايبه فى أديكم يا ولاد أمانه

راجية:
فيه إيه يا عماد.. حاسة بصوتك متغير

عماد:
ابدا ياما أنت بس متهيألك

سالم:
مالك يابنى

عماد:
سلامتك يابا فيه ايه

يوجه حديثة لنعمه

عماد:
كملى مشوارك يا نعمه كملى حكايتنا و اكتبيها

سالم:
نعمه حامل يا عماد .. و حتجيب الوله..

عماد:
مش مهم نعمه تجيب الوله المهم الأرض تولد
أبطال و أرضنا ولاده يابا و نعمه حتجيب مقاتل ياما.
رضعيه غضب و ثورة خليه يشم ريحة الأرض يا نعمه
ترعرع فى عروقه و تفرع إراده فى شراينه و يكمل حلمنا
و انت يا أولاد
حلم عمرنا حطوا إيديكم فى إيد بعض و اثبتوا تبتوا
ف الأرض دى الأرض عرض و العرض غالى..

سالم:
عماد
ابنى ... بص فى عنيه أنت ناوى على إيه

عماد:
و لا حاجه يابا أنا دلوقت قوى قوى جدا فوق ما
تتصور كل منافذ الضعف اللى جوايا اتسدت و بنت
جوايا سد صوان.. حبيت الأرض قوى يابا حبيت
الحرية اللى بتحلم بيها كل الشعوب المسجونة وراء قضبان الإحتلال

راجية:
عماد يابنى.. أنا خايفه عليك

عماد:
من إيه ياما بس خايفة و إيه اللى ممكن يحصل لى

راجية:
الموت..الموت يابنى

عماد:
و إيه يعنى ياما الموت
الموت ولِّف علينا من زمان ياما بيكبر كل ما بنكبر
و بيكتف آهات الصوت.. الموت غمِّس معانا اللقمة
و بلع معانا القوت إيه يعنى ياما الموت

راجية:
و مين الى حيحمى الأرض لما شبابها يروح

عماد:
من حيفا و نابلس و الناصره
من يافا و أرض فلسطين
م القدس و م الأرض الخضرا
راح تطرح أبطال حطين
رجاله بملامح تانيه
ف عيونهم عزم و اصرار
ف قلوبهم حلم الملايين
راح تولد ثورة و ثوار
راح تولد يامه احرار

نعمه:
مش حتبور الأرض السمره
و لا حتموت الكلمة الحره

عماد:
و لا حتموت يامه فلسطين
و ان مات منا ولد حنجيب
بدل الواد مليون و اتنين
بس إن مات فى قلوبنا وطنا
حنجيب ياما بداله منين

طفل:
كلامك جميل قوى يا استاذ عماد نفسى ابقى زيك

عماد:
كلكم لازم تبقوا واحد

طفل:
لوحدنا حنقدر

عماد:
نبدأ و الكل حيحصلنا.. لغاية ما تكمل الدايرة و نرفع
رايات الحق و نكمل

أنيس :
نكمل الجملة يا نعمه
الصح اللى أول حروفها لأ..
لازم الجملة تبقى صح طول ما الإيدين الواعية
القوية هى اللى بتكتبها لما القلم يكون مداده ثورة
و إرادة و عزيمة لازم يكتب صح
يتكلم و يقول للكل كلام صح..

الرواى:
يابن خالى و يابن عمى
يلى نبضك هوه دمى
مد إيدك يلاَّ سمى
نبدأ المشوار سوا
متقلش أنت و لا أنا
لأ كلنا مع بعضنا
حنخضَّر الرَّملة
ونزرع سوسنه
جوه التراب اللى شرب
من دمنا
دم الفدا اللى سال لهيب

الرواية:
يلى واقفين ع المفارق
قربوا دلو الغريب
حرروا صوت الجرس
جوه الكنايس
و الآدان جوه الجوامع
حرروا دمعة ألم جوه الحارات
و امسحوا دمع الشوارع
و ارفعوا راية العلم
شايفه مريم واقفه
بتنادى اللى تايهه
واخده عيسى ف حضنها
و الرسول فوق البراق
يوصينا نحمى عرضها

أنيس:
شدوا فى جوف التابوت
عزم الرجال
و اكتبوا أغلى الحروف
أروا الشراقى و الرمال
بالدم و الموت الحلال

حسن:
و اكشفوا زيف الزمن
اخلعوا قناع العفن

عماد:
اخرج يا مارد من الكفن

نعمه:
اخرج يا مارد من الكفن

الجميع:
اخرج يا مارد من الكفن

موسيقى ثورية و تؤدى أغنية فى إصرار و ثورة يشترك فيها الجميع

أغنية:
غضب غضب غضب غضب
غضب سيحطم أغلالى
غضب سيفجر بركانى
بسيوف الحق بإيمانى
ستعيد القدس العربية
فى أرضى غضب و سمائى
غضب بوريدى و دمائى
بيمينى غضب و يسارى
غضب سيفجر إعصارى
و نعيد القدس العربية
غضب قد ضاق بقضبانى
بالسجن ووجه السجان
بالحجر ساعلن عصيانى
سنعيد القدس العربية
غضب غضب غضب غضب

يسمع الجميع صوت اقدام تقتحم و تحاصر المنزل و صوت يطالب عماد بتسليم نفسه

يهودى:
سلم نفسك يا عماد.. المقاومة لن تفيد

تنطلق طلقات الرصاص يقفز يقفز عماد مع دعوات الجميع يتساقط الأطفال و تظهر نعمه تمزق ثيابها و تنقل الأطفال و تضمد جراحهم الى ان تكاد تتعرى.. يدخل الجنود

يهودى:
إذا هرب عماد.. مش مهم
لكن فيه اللى اهم منه مستقبله امتداده حلمه
سنأخذك أنت يا نعمه و الولد اللى انتى مستنياه..
لازم تموتى و يموت حلمكم معاكم

دائرة الجنود تحاصر نعمه و تدور حولها مهدده مصاحباً ذلك المشهد موسيقى تعبيرية إلى ان يقتربوا منها وسط ترديد الموجود على خشبة المسرح..

أصوات:
عدلك يارب.. لطفك يارب
سترك يارب

تلقى أبيات الإستمرار و المشاركة.. و فى أثناء ذلك يدخل الجميع واحد تلو الأخر داخل الدائرة و أولهم عماد الذى يعود ليدافع عن زوجته و مستقبله حتى تنفتح الدائرة و ينحسر وجودهم و يصعد أناس آخرين من داخل الصالة ليصعدوا على المسرح و يتجمهروا و كلما صعد فرد أختفى فرد من اليهود الى أن تنتهى الآبيات مع ظهور نعمه صامدة و الجميع من حولها..

الأبيات

الرواية:
قوم يا ولدى
عدى فوق النور و خطى
جوه منك نار و ثورة
صوت إرادة أمه حره

الرواى:
صوت ترابك بيناديلك
شق عتمه ظلم ليلك
خلى صوت الحق يعلا
شد طرف النور يجيلك

أنيس:
قوم و عدى بس حاسب
فجر كاذب بيناديلك
لجل ما يغرق قلوعك
لجل ما يحدد مصيرك

حسن:
جوه منك ألف مادنه
و الآدان أهو آن آوانه
فين إرادة شعب ناضل
لجل ما يحقق كيانه
جوه منك الف طاقه
راح تقول سمعا و طاعه
لو نأدى الفرض حاضر
و الجهاد أفضل جماعة

الرواى:
بس حرَّس خلى بالك
ميت شيطان واقفين قبالك
و القرار مابقاش قرارك
و الديابه فى عقر دارك

الرواية:
و لو تسلم مش حتسلم
راح تموت لو يوم حتحلم
لو تغير لون ملامحك
او تسلم لحظه رمحك
قلبى مش ممكن يسامحك

أنيس:
بس له النبض سارى
جوه شريان الحقيقة
صوت بيصرخ جوه منك
لسه فيه مليون طريقه

حسن:
قوم و شارك بالتحدى
على صوتك مره ثور
قول لكل الدنيا ديه
يا ضمير الإنسانية
لما قاضى يمد إيده

الجميع:
الشهادة تبقى زور

حسن:
و الحقايق تبقى ضايعه

الجميع:
و العداله فى أرض بور

الرواى:
قوم و قول الحق عربى
خلى كل الدنيا تقرا
فوق جبينك اسم عربى

الرواية:
خط فوق جدران سكوتك
مش حبيع و بخط عربى
ده التاريخ و الأصل عربى

الرواى:
و الكتاب و رسولنا عربى

أنيس:
و المصير و الحق عربى

حسن:
و التراب فى القدس عربى

الرواية:
بينادينا بحس عربى

الجميع:
قوم يا ولدى
قوم يا ولدى
قوم يا ولدى



يمكن أن يشترك الجميع فى إنشاد هذه الأبيات و لا تقفل الستار لأن العرض مستمر إلى أن تحل القضية و يصل الصوت للجميع.



تمت


ملحوظة :
اسم الكاتبه فيه خطأ إملائى، اعتذر عليه

إيمان بكرى
سنة النشر 2007