الساعه 6.40
امام مخزن السلاح

ليلة شتاء بارده (يناير تقريبا) أخري قد انتهت ولازلت علي قيد الحياه كنت واقف خدمه ليليه وكنت شينجي ( برينج ,كينج ,شينج) وعلي الشنجي مرعاة ذلك (ان يتمم علي السلاح والذخيره عند تسليمهم في الصباح ) والمفروض ان مخزن السلاح يفتح الساعه 6.15 وبعد ما اسلم السلاح آخذ الشده (البطاطين ) احطهم في العنبر ثم اذهب للحمام للأغتسال والحلاقه ثم اتوجه لأرض الطابور تمهيدا للتمام وطابور اللياقه

الساعه 6.55

اخيرا حضر الصول مدحت مساعد ظابط نبطشي ومعه مفاتيح مخزن السلاح (علي مخزن السلاح 3 أقفال , ومفاتيحهم موزعه كالتالي أمين المخزن ,ظابط نبطشي , مساعد ظابط نبطشي ) والغرض من ذلك ان يكون الثلاثه موجودين وقت فتح المخزن ولا يستطيع احدهم ان يفتح المخزن منفردا , ويتم استلام السلاح وفقا لترتيب اماكن الخدمه وكنت آخر من قام بتسليم سلاحه وكانت الساعه قد تجاوزت 7.05 وعدت ركضا إلي العنبر لآخذ الصابونه وماكينة الحلاقه واذهب للحمام وانتظرت امام احدي دورات المياه (3 boath room , و3 حوض وجه لخدمة 50 فرد ) وما ان اصبحت واحده شاغره وهممت بدخولها حتي وجدت من يجذبني ويعيدني للخلف فنظرت فوجدت الصول محمد مساعد السريه ينهرني ( انت يا جزمه عاوز تدخل قبل الصول ) فأجلت الحمام واكتفيت بالحلاقه وارتديت ملابس اللياقه وخرجت مسرعا لأرض الطابور

7.15
أرض الطابور

كنت آخر من حضر إلي ارض الطابور ووجدت نفسي انضم إلي 4 من المخالفين 2 مثلي تأخرا بسبب عدم تسليم السلاح في الموعد و2 بسبب مخالفات أخري والعقيد احمد زكريا علي غير عادته يتوسط ارض الطابور ويراقب اجرائات التمام وبعد ان تم اعطائه التمام توجه ناحيتنا للتحقيق معنا في ما ارتكبناه من مخالفات ودار الحوار التالي

ــ اسمك أيه ؟
-- عريف مجند القط حلمي
ــ جاي الطابور متأخر ليه
-- لا جواب
ــ اسمك ايه
-- عريف مجند الجمل صالح
ــ جاي الطابور متأخر ليه
-- لا جواب
ــ ما انتم في جيش حليمه , انا عقيد وجاي الطابور 7.05 (حاله شاذه يوميا يأتي 7.25) وانتم جايين 7.15 والله العظيم لأكون نايكم النهارده ( شعرت بقشعريره في مؤخرتي )

غدا وراح امامنا متأملا فينا ثم توقف امامي وهم بمخاطبتي ثم صمت , وعاد وتوقف أمامي وبادرني قائلا
ــ انت بتاع اسماعيليه
-- ايوه يا فندم
ــ اسمك ودرجتك
-- جندي مجند فارس بركات
ــ جاي الطابور متأخر ليه
-- لأني كنت خدمه ليليه وسلمت السلاح متأخر الساعه 7.05 وبعد ذلك حملت الشده للعنبر ثم ذهبت للحمام
ــ ليه سلمت السلاح متأخر
-- لأن مخزن السلاح فتح 6.55
ــ رقيب عبدالفتاح ( أمين مخزن السلاح) الكلام ده صحيح ؟
-- ايوه يا فندم
ــ وميعاد فتح مخزن السلاح الساعه كام
-- 6.15 وانا كنت موجود في الميعاد المحدد بس سبب التأخير ان ظابط نبطشي مكنش موجود
ــ مين ظابط نبطشي
-- ملازم أول محمد فاضل
ــ وين حضرة الملازم متوجها بحديثه للكتيبه 207 التي يتبع لها الملازم
-- نزل اجازه الساعه 6.00 صباحا اليوم يا فندم ( صوت من داخل الكتيبه )
ــ اه بقي كده حضرة الظابط نبطشي نزل اجازه قبل ما يفتح مخزن السلاح ويتمم علي سلاح الخدمه , وترك مفاتيح النبطشيه مع مين ؟
-- مع رقيب نبطشي الكتيبه
ــ اه مممممممممممم وانت يا رقيب عبدالفتاح فتحت مخزن السلاح من غير وجود ظابط نبطشي
-- انا انتظرت يا فندم 50 دقيقه , يعني مستلمش السلاح والناس متطلعش الطابور ؟
ــ ايوه متستلمش السلاح إلا في وجود ظابط ( أصلا كل يوم ظابط نبطشي بيبعت مفاتيح السلاح مع أي عسكري ومحدش بيحضر فتح المخزن غير الرقيب عبدالفتاح ومساعد ظابط نبطشي ) , يا حالصول سعد أعمل للرقيب عبدالفتاح اورنيك ذنب

تتجه جميع انظار ضباط الصف في كتيبة القياده نحوي ونظرة غيظ باديه علي وجوههم , ويعز علي العقيد ان نفلت من العقاب فيعود ادراجه لنا ويستخرج مخالفات كشعر طويل او وجه غير حليق وأخذ يوزع العقوبات

ــ أسمك ودرجتك
--عريف مجند القط حلمي
ــ يعزل لجندي
ــ اسمك ودرجتك
-- عريف مجند الجمل صالح
ــ يعزل لجندي
ــ اسمك ودرجتك
-- رقيب مجند السيد متولي
ــ يعزل لدرجة عريف
وهكذا حتي وصل إلي
ــ اسمك ودرجتك
-- جندي مجند فارس بركات
ــ يعزل لدرجة كلب .

.......... يتبع

اعتقد ان الكتابه بالعاميه هتكون افضل ده بعد اذنكم , من مده طويله وانا عاوز احكي لكم علي جيش حليمه بس بصراحه رائعة نيوترال هرتله تمنعني من الخوض في الموضوع , واشهد اني لا استطيع ان اجاري نيوترال في اسلوبه فلذلك لم استطيع ان اضعها في الساحه الساخره

كأي شاب وصل لـ 19 عام يقوم بالتوجه إلي مكتب التجنيد التابع له ويسجل اسمه ويعطي بياناته ثم يترقب ما ستؤل إليه الأمور لعل وعسي يفوز بتأجيل 3 سنوات ثم يحصل علي معافاه من التجنيد تحت بند لم يصبه الدور , والمناحيس امثالي لا يمكن ان يفوته الدور وبدون الدخول في تفاصيل نجحت في الكشف الطبي وخدت كارنيه يفيد بأني جندي في الجيش المصري ويجب ان اسلم نفسي في الهايكستب يوم الاربعاء 8 يوليو في مركز استقبال المستجدين .

سألت اولاد الحلال قالو لي ان الهايكستب مقابل سوق العبور علي طريق مصر(القاهره) اسماعليه الصحراوي , واني لازم اكون هناك في تمام الساعه 7 صباحا وان اي تأخير مش في مصلحتي , وابن الكلب يعطيك احساس انك رايح تركب ديسكفري وانك لو مرحتش قبل 7 الصبح ممكن يطلعوا القمر من غيرك , وخرجت من بيتنا الفجر ورحت اسماعليه وركبت بيجو ونزلت من البيجو علي طريق مصر اسماعليه الصحراوي قصاد سوق العبور وسألت ولاد الحلال قالوا لي لازم اعدي الناحيه التانيه , ( لو انت جاي من القاهره يبقي مش لازم تعدي ) وفعلا عديت ولقيت ميني باص من بتاع الجيش وواحد شاويش عمال ينادي , مستجدين مستجدين مستجدين رحت راكب ولقيت واحد تاني بيلم الأجره خد نص جنيه ومدانيش تذكرة ورحنا علي مركز استقبال المستجدين وظلت الجماهير تتوافد حتي الساعه العاشرة صباحا سمعنا اول بيان عسكري بيشرح لنا ازاي هنتوزع علي معسكرات التدريب الاساسيه ويحثنا وبشده علي الشراء من كانتين المركز حيث اننا ذاهبون نحو المجهول ,وبدأت الأسئله تنهال من الحمقي والمغفلين وهم بالعشرات حول المكان الذي سنذهب ايه وكأنه اذا علم انه رايح مكان سيئ سوف يستطيع تغيير مصيره والبهيم منهم يحسسك انه مش في مركز استقبال المستجدين في الهايكستب لأ ده في مكتب حجز سياحه وبيفاضل بين الفنادق واسعارها وانا لسان حالي يقول يا خبر بفلوس بعد ساعتين يبقي ببلاش واني طالما لا استطيع تغيير المصير الذي ينتظري , يبقي لا جدوي من السؤال عنه وعلي فكره دي حاجه بلاحظها كتير في الناس حوالينا يعني مثلا منذ انتهاء التصفيات التمهيديه المؤهله لتصفيات كأس العالم في افريقيا وانتظار ما سوف تسفر عنه القرعه , لم يتوقف الحديث يوما واحدا علي القنوات الرياضيه عن توقعات الكابتن فلان للقرعه وتوقعات الجماهير والمفاضله بين تونس والجزائر والمغرب وايهما يجب ان نتجنبه , مع ان التوقعات لن تقدم او تأخر شيئ في نتيجة القرعه ولو وقعنا مع اقوي فرقه في افريقيا مثلا هنقول لأ مش لاعبين القرعه دي متنفعش ونعيط , بصرحه كنت بتشل لما اسمع اسئله مستقبيله عن اشياء قدريه لا حيلة لنا في التعامل معها او تفاديها .

اكتمل حضور الناس بعد الواحده ظهرا , وانا اللي كنت عبيط وجاي من الساعه 7 صباحا وبدأ جرد المواشي عن طريق كشوف والبقر اللي رايحه المدفعيه علي اليمين والحمير اللي رايحه المدرعات علي الشمال وظللنا 3 ساعات تحت شمس يوليو حتي تم توزيعنا علي الباصات وتحركت القافله حتي وصلت مركز تدريب المدرعات , وخلال 45 يوم هي مدة مركز تدريب الاساس خرجت بنتيجه مفادها ان مركز التدريب ده هو اونطه ومالوش لازمه , لانه ببساطه كل اللي بنتعلمه خلال 45 يوم هو الرتب والدرجات وان المشير حسين طنطاوي هو القائد العام وحسني مبارك هو القائد الاعلي , والخطوه المعتاده والخطوه السريعه وحد اتنين تلاته هوب شمال ودي حاجات مش محتاجه 45 يوم في مركز تدريب ممكن الكلام ده يحصل في الوحده اللي هيتوزع عليها الجندي من خلال سرية مستجدين في كل وحده عسكريه في الجيش ونوفر موصلات وتنقلات بين الهايكستب وباقي المحافظات ومن موقعي هذا اتقدم بهذا الاقتراح وهو الغاء معسكرات التدريب الاساسيه واستبدالها بسرية مستجدين في كل وحدة عسكريه .
وخلال وجودي في الهايكستب 45 يوم مركز تدريب اساس ثم 3 شهور فرقة سواقة دبابه استطعت استخلاص الغرض من مراكز التدريب دي , الغرض الوحيد منها هو استنزاف الجندي المستجد
الطعام من اسوأ ما يكون وكذلك المبيت والماء مقطوع باستمرار , وكلما ازداد القحط تزداد مبيعات الكانتين , وطبعا كل واحد بيبقي عامل حسابه في 200او 300 جنيه هو رايح الجيش ومهمة مركز التدريب ان يجرده من امواله بالطرق المشروعه وغير المشروعه

1

كنا قاعدين في العنبر لا بينا ولا علينا , لقينا 2 عساكر من امن الوحده بيخرجونا وبيطلبوا مننا نقف طابور قدام العنبر وبعد كده ساقونا امامهم مثل اسري حرب واتجهوا بنا علي الميز(صالة الطعام) وهناك وجدت مجموعات اخري من الاسري تأتي تباعا والعقيد ابراهيم صلي قائد الوحده يتوسط الجموع وضباط الصف يعملون علي وقوف الجنود بنظام , ووجدت الجنود مقسومه الي فسطاطين الناس اللي حضرت الغدا والناس اللي زوغت من الغدا وطبعا انا كنت بتصدر صفوف المزوغين , واعتلي العقيد ابراهيم صلي صخره واخذ ينظر لفسطاط الضلال ناثرا تهديده ومتوعدا بالعقاب واشد العذاب الفئه الضاله التي هربت من تناول الطعام واخذ يختار عينات عشوائيه ويسألها عن سبب عدم حضورها لتناول الطعام , وتنوعت الاسباب والاعذار ما بين مصاب بالبرد ومن عنده مغص , فحبيت الفت انتباهه عشان يسألني , فوقفت وقفة لا مبالاة وكسرت رجلي ونظرت له مباشرة , ونجحت الخطه ولما لمحني اعتدلت في وقوفي فسألني ليه مجتش الغدا في الميز , فقلت له بصراحه الأكل زباله وزي الزفت , فبهت الرجل من الرد , قالي يعني انت بتاكل فين , قلت له في الكانتين , رد وقال وايه اللي مش عاجبك في الاكل , قلت له الرز مليان طوب ويا معجن يا شايط والطبيخ ما يتاكلش ,ولو مش مصدق حط الخضار اللي مطبوخ النهارده قدام كلب واسجني شهر لورضي ياكل منه , بدل ما تجمعوا الناس بالعافيه عشان تاكل ظبطوا الأكل الناس هتيجي لوحدها , طبعا هلفط بشوية كلام علي اننا في مصنع الرجال ولازم اتعود علي المحن والشدائد وانتهي الموضوع بأني خاين وعميل وسجن 5 ايام, بس عملت شعبيه جامده وفعلا بدء يتابع طعام الحنود علي فترات متقطعه واتحسن الموضوع شويه

يتبع

مفاجاة سارة عزيزي فارس ، استمر فإني لك إن شاء الله من المتابعين (f)

الجيوش في الدول العربية اقرب ما تكون الى قطعان البقر , فلا تنظيم ولا ثقافة اللهم ثقافة الكره , والولاء للاله الارضي ( الحاكم ) ...

تابع زميلي ابو الفوارس
هذه لك :rose:

وهاي لسيستاني لانه سبقني بالرد :rose:

2

احب دائما ان اكتشف الاشياء بنفسي وغالبا لا آبه بنصائح الآخرين حول موضوع , واري ان نجاح اسلوب شخص ما في التعامل مع موضوع لا يعني بالضرورة نجاح هذا الأسلوب مع كل الناس , وعشان كده وانا لسه داخل جديد الجنود القدامي يبدأو في طرح خبرتهم عليك وكل واحد باسلوب مختلف ما عدا بعض العبارات الارشاديه العامه والتي تمثل منارات علي طريق الخدمه العسكريه , وإليكم بعض المقولات الحكيمه التي تصلح لإنارة الطريق لمن يخوض تلك التجربه

ــ ساقية الجيش بيجرها أي تور (ثور)
لا تتوقع اي نوع من العداله والتقدير داخل الجيش وان حدث فيكون هذا شذوذ , بأختصار ان الموجود هو من سيؤدي العمل حتي لو كان يكاد يغمي عليه من التعب والارهاق
ــ وانت داخل الجيش اترك كرامتك علي الباب واستردها بعد انتهاء خدمتك العسكريه
اعتقد ان العباره لا تحتاج لشرح
ــ اطع الأوامر ولو كانت غلط
ــ لا تعطي الصعيدي بلطه(فأس صغيره لقطع الخشب) ولا المنوفي سلطه (حكم)

وتنقسم طريقة تعاملي مع الجيش لثلاث مراحل
المرحله الأولي هي الرومانطيقيه :) , وهي بأختصار ان اطيع الاوامر وانفذ المهام المكلف بها بأخلاص ولو اخطأ احدهم في او وجدت تقصيرا في حقوقي فيجب ان الجأ للمسؤل واقدم شكواي لقائدي , وان لا اسكت امام اي اهانه او تعسف , وامتدت هذه الفتره طوال اول خمس اياملي في مركز التدريب وادركت بعدها عدم جدواها , وقمت باجراء تعديلات جذريه تتلخص في القدره علي المراوغه والمكر والخداع وقليل من البجاحه وظللت علي هذا الوضع حتي انتهاء مركز التدريب وانتقالي للوحده الاساسيه تمهيدا لو ضع خطه بديله
المرحله الثانيه وهي امشي جنب الحيط :( وقد حققت بعض النجاح كما منيت خلالها بكثير من الخسائر

المرحله الثالثه كان شعارها أحه يا ولاد دين الكلب:angryrazz: وقد حققت نجاحا باهرا

Array

المرحله الثالثه كان شعارها أحه يا ولاد دين الكلب:angryrazz: وقد حققت نجاحا باهرا
[/quote]

:lol::lol:

هنبتدى الهجص والنتش اهو ....

اعترف بالحقيقه على طول دون مراوغه , واذكر بكل سلاسه واريحيه انه الجيش طلع ميتين اهلك .

مش عيب على فكره , كل من قضوا الخدمه العسكريه سبقوك فى ذلك.

الحمد لله انا معافى نهائيا , حيث انى غير لائق للخدمه الوطنيه والعسكريه \

:D

:98:

رائع يا فارس
كمل يا دفعة ....................:D

المرحله الرومانطيقيه

اول يوم استلمنا المهمات , وكانت مقاسات الملابس فضيحه وكذلك الحذاء من الداخل صخري الملمس وفضلت اعرج اسبوعين وطلب منا المبيت داخل احد العنابر علي الارض والمكان اشبه بزريبة مواشي وعشان كان الجو صيف نار فرشت البطانيه علي الارض امام العنبر ونمت حتي الصباح وفي اليوم التالي كنا نقف طوابير ونتعلم الخطوه المعتاده تعرفت خلالهم علي صف ضابط (رقيب اول ) محمد عبدارحمن مساعد اركان حرب تعليم الكتيبه (اركان حرب منحها لنفسه ) والراجل صراحه كان حدوته , يعز الأذي مثل عنيه تمام واول معرفتنا بيه كانت من خلال طابور ثبات , ولا اذكر ما الذي فعله احد الجنود فأمرنا الأنبطاح ارضا واخذ يمشي علي ظهر كل واحد فينا بحذائه وبعد ذلك امرنا بالزحف , والزحف لمن لا يعرفه هو ان تضع يديك خلف ظهرك وتزحف علي الارض مثل الثعبان مستخدما فقط عضلات ظهرك ,وباقي اليوم نظل واقفين في طوابير ثبات في القيظ ووجدت ان الموضوع كده هيبقي واقف بخساره , وراح اتبهدل ببلاش فبقيت ازوغ في اول اليوم وكل ما لاقي فيه جرد للعساكر ارجع الطابور في الخباثه , وبقيت بارع في الحكايه دي بيقت اقف في آخر الصف واستغل أي غفله للضابط الصف واروح شايل الطاقيه ومنسحب بهدوء وكأني واحد معدي وخلاص وخاصة ان المعسكر كان فيه 5000 عسكري وفي جو زحمه زي ده سهل الزوغان واروح اقعد تحت اي مكان ظل واراقب الطابور ولما القيه مسك الورقه وبيتمم علي السريه (80جندي) ارجع اتمشي ناحية المجموعه وانضم ليها بدون ما حد يشعر ولأن العدد كان كبير لسه جايين ملحقش حد يحفظ اسماء او اشكال وهكذا كانت تمضي الايام الاولي , نوم علي الأرض وطوابير ذنب

يتبع

Array
:lol::lol:

هنبتدى الهجص والنتش اهو ....


اعترف بالحقيقه على طول دون مراوغه , واذكر بكل سلاسه واريحيه انه الجيش طلع ميتين اهلك .

مش عيب على فكره , كل من قضوا الخدمه العسكريه سبقوك فى ذلك.

الحمد لله انا معافى نهائيا , حيث انى غير لائق للخدمه الوطنيه والعسكريه \

:D

:98:
[/quote]

اصبر علي رزقك يا عاشق كله جاي في السكه بهدله وذل من اللي قلبك يحبها

اعفاء طبي بمناسبة أيه اوعي يكون خرم (....) كان عل جنب

سيستاني (f)
احمد طارق(f)
سبشيال وان(f)