بعضاً من الكلمات:

الشعب:
والكذب بيفش القلب
متلو متل الغنية
والصدق ما عادلو درب
بضيعة غربة المنسية

عالعين موليتين وسطعش مولاية
حكيت الصدق عالصبح
بالفلقة رجلاية

أبو أحمد بيطلع بموال (أسامة الروماني):
أوووف
الصدق مالو حيل
يسند عواميدو
والكذب باعو طويل
ما أطولا إيدو
يا يا يابا ...

الشعب:
كل عام وأنتو بخير
يا هالغربة الشمالية
وانشالله تضلو بخير
يا هالغربة القبلية

أبو شحادة (عمر حجو):
يالله نبدا العيد يالله

أبو أحمد:
ومافينا نبدا قبل ما تيجي

الشعب:
(مين)

أبو أحمد:
الحكو .. حكو حكو .. مة

الشعب:
ليكا إجت الحكومة
سلام خد للحكومة
أهلا وسهلا يا حكومة

البيك(دريد لحام):
باسم الشعب والدستور
باسم النحلة والدبور
باسم الإزدهار
والتقدم السار
نفتتح هذا العيد

يا وجهاء الكذابين
صفولي جنب الحكومة
أكذب واحد فيكن
بياخد كاس الدولة

الشعب (هاتفاً) :
الكاس للحكومة ..
الكاس للحكومة ..

البيك:
شكراً على هالثقة

بس اليوم مخصص إلكن
وإلنا طول السنة كلا
ولازمنا شي يوم أمومة

الشعب:
مين بيبدا

البيك:
أكذب واحد
هاد بيبدا
(يشير إلى أبو أحمد)

الشعب:
يالله يا بو أحمد هاتلك
هاتلك كذبة صغيرة

أبو أحمد:
اسمعوا.

الشرطة:
سماااااااع.

أبو أحمد:
رايح إدعي ولازم يدعي معي الكل

الشعب:
إدعي ندعي.

أبو أحمد:
إلهي يحرسنا من العين
ويديم علينا الحكومة
آآآه
إلهي يحرسنا من العين
ويديم علينا الحكومة
آآه
إلهي
إلهي

الشعب:
فهمنا والله
إلهي ..
بس عشو بابا

أبو أحمد:
شو على شو
المدارس عمرتها
والمعامل شغلتها (يا عيني)
والطرقات زفتتها
والشوارع نورتها

الشعب:
إلهي يحرسنا من العين
ويديم علينا الحكومة

أبو أحمد:
وتذكروا المستشفيات
ولا تنسولي الجامعات
والملاعب والجناين
والضمان للمواطن
والحرية ..
والعدالة الألكترونية

وهيك يا سادة خلصت الكذبة

الشعب:
إلهي ...
يقصف عمرك با بو أحمد على هالكذبة
ويقصف عمرك با بو أحمد على هالكذبة

البيك:
يخرب بيتو على هالكذبة
أنا ولا، أنا بعمل هالعمايل

الشرطة:
ما بيعملها البيك بنوب

البيك:
لك طلع أكذب من الحكومة

الشرطة:
فشر يا بيك

البيك:
هاي مفهومة.

الدور لمين..

الشعب:
حكرا بكرا
قللي عمي عد للعشرة
واحد تنين تلاتة ستة تمانية عشرة
عليك الدور يا بو ريشة

أبو ريشة (نهاد قلعي):
أنا من الكذب هربان

البيك:
ما رح بسمحلك تسافر
إلا بشي كذبة عالماشي

الشعب:
لما بتهاجر لبعيد
انسى الكذب وانسى غربة
يللا قول يا بو ريشة

أبو ريشة:
مو رايقة معي الحشيشة

البيك:
روقوه.

الشرطة:
يللا.

أبو ريشة:
لأ بحكي.

الشرطة:
سمااااااااع

أبو ريشة:
كنت مرة بالغابة
عما أستنى الطيارة
على غفلة طلعلي نمر
نمر بيطلع قد حمار
عيونو عما بتقدح نار

لقطت النمر وبطحتو
وبكس مرتب بوكستو
قللي بعرضك يا بو ريشة
شفقت عليه وفلتو
رجعت رجوع وتركتو

الشعب:
هي، هي، عيني عيني عالمرجلة

أبو ريشة:
أنا ما بحب البهورة
والعفو عند المقدرة

الشعب:
عيني عيني هالشهامة.

أبو ريشة:
بس الواطي أخو الشليتة
غافلني وإجا من ورا

الشعب:
له له، إلا تعمل شربكتلها

أبو ريشة:
أكلني وفصفص عضامي
فكرني عرنوس درة
وادعولي الله يرحمني

الشعب:
يعني أكلك هيك عالخالص؟

أبو ريشة:
ما خلى ولا شقفة مني
وادعولي الله يرحمني

الشعب:
شو هالكذبة يا بو ريشة؟
كيف مت وبعدك عايش؟

أبو ريشة:
ها ها ها ها ها
لك ولوه هاي عيشة
تضربوا وإنتو هالعيشة.

الشعب:
يا سلام على هالكذبة
بيطلعلوا عليها الكاس.

البيك:
إي يضرب هو وهيك كذبة
كذبة تعبانة ومهرية
راح الكذب عليه
وصفا برات الدوري.

وهلق لمين الدور
على مين الدور

الشعب:
حكرا بكرا
قللي عمي عد للعشرة
واحد تنين تلاثة ستة تمانية عشرة
وهلق صار دورك يا غربة

غربة (صباح الجزائري):
دوري أنا؟

الشعب:
أيوة أنتِ
عطينا شي كذبة معقولة.

غربة:
بالله شو، سمعة جديدة
يعني في كذبة معقولة، وكذبة لأ؟

الشعب:
يعني شي كذبة بتتصدق.

غربة:
مرة سارحة بهالليل
مهندسة ومغندرة
والدنيي صيفية
عمبدندن غنية
طل فارس من بعيد
راكب فوق حصانو الأبيض

الشعب:
خطفك الفارس
وطلع فيكي للسما
قطفلك تلات نجوم
وقدمهن عالصينية
حبيتيه وحبك
وتجوزتو عالقمر
شهر العسل بالمريخ
وخلفتو بنت وصبي
سميتوهن محبة وحب

غربة:
مزبوط هادا اللي صار
شو عرفكن، مين اللي قلكن؟

الشعب:
هي كل عام بتحكيها
وما بتنسي كلمة فيها

غربة:
بالحقيقة ما فينا نحب
خلونا بالكذب نحب

الشعب:
لا مطر لا حب
ورح يبس هالقلب
ويا حسرتنا عالأيام

البيك:
طــــز

الشرطة:
سماااااااع.

البيك:
قلبتولنا العيد جنازة
شو مطر شو حب
شو هالحكي الفاضي
سعادتكن بوجود البيك
ادعوا الله يديم البيك

الشعب :
الله يديم علينا البيك

الخ.

تسجيل الدخول
اسم المستخدم:
كلمة المرور:	فقدت كلمة المرور؟
	تذكرني

المواضيع المحتمل أن تكون متشابهة…
الموضوع		الكاتب	الردود	المشاهدات	آخر رد
	أغاني مقاومة .. أصوات الحرية .. أصوات العروبة و القومية	بهجت	74	19,079	04-23-2012, 12:32 AM آخر رد: بهجت
	أغاني النضال والحرية والثورة الحقيقية	ابن سوريا	4	1,363	03-03-2012, 12:58 PM آخر رد: خالد
	أغاني بريئة جدااااا	coco	24	6,261	06-28-2011, 03:28 AM آخر رد: minatosaaziz
	أفضل خمس أغاني أجنبية	SH4EVER	1	3,474	10-13-2010, 10:59 PM آخر رد: Free Man
	أغاني مسلسل العار - قولو للي أكل الحرام يخاف	thunder75	0	3,589	09-24-2010, 12:15 AM آخر رد: thunder75