قضت السيدة "ماريان شحوارو"، والدة المدوّنة السورية - زميلتنا في النادي- "مارسيل شحوارو" برصاص النظام السوري (كما يبدو، ولسوف أتأكد أكثر)ء) _ الخبر هنا.

تعازينا القلبية للزميلة الكريمة وجميع عائلتها.

ولا أراكم الله مكروهاً بعزيز ...

العلماني

جعل الله هذه الدماء الزكية المظلومة نورا على سوريا، ورحم الله المظلومين الذين قضوا،

نخص الزميلة مرسيل بالعزاء، أمها أمنا جميعا، ومصابها مصابنا جميعا.


للمظلومين أينما كانوا ألف وردة، وللأحرار الذين قدموا حياتهم من أجلنا ألف وردة، نحن نسعى أن نكون على قدر قامتكم أيها الأحرار.

البقية بحياتها وحياة جميع السوريين الشرفاء

البقاء لله
وخالص العزاء للزميلة مرسيل ولكل اهل سوريا فى شهدائهم

تعازي القلبية للزميلة مرسيل وللاسرة الكريمة ولكل الشعب السوري الصامد

لا حول ولاقوة الا بالله ، قرأت النعي هذا الصباح في صفحة الناشط والمدون المصري وائل عباس في تويتر ..

(06-18-2012, 08:41 PM)تويتر كتب:  Wael إفّندي Abbas ‏@waelabbas
أحر التعازي للصديقة مارسيل في وفاة والدتها في حلب على يد النظام السوري المجرم أمس ‎‏((

لكن لم أتوقع ان يكون المصاب في عائلة زميلتنا مارسيل في نادي الفكر ..

كل التعازي القلبية للزميلة العزيرة ورحم الله الشهيدة الغالية وإلى جنان الخلد إن شاء الله

http://jidar.net/Policy/%D9%88%D9%81%D8%...9%84%D8%A8

وفاة والدة الناشطة و المدونة مرسيل شحوارو إثر إصابتها بعدة رصاصات بحلب ..

(06-18-2012, 08:59 PM)جدار . نت كتب:  قال مصدر لـ جدار أن حاجز مسلح تابع لحزب البعث فتح نيران الأسلحة الرشاشة على أم الناشطة و المدونة مرسيل شحوارو البارحة الأحد " الثانية عشر و النصف " ليلاً
وأضاف المصدر أن السيدة ماريا شحوارو [زوجة المرحوم الأب جورج شحوارو] كانت خارجة من حفلة زواج في فندق الكارلتون في الساعة ١٢ ونصف حين فاجأهم حاجز أمني بلباس مدني تبين إنه يتبع لشعبة حزب البعث التي بجانب القصر العدلي.. فلم يتمكنوا من التوقف عند الحاجز فتم اطلاق النار على السيارة فورا.. فتوفيت متأثرة بجراحها على الفور. وتم نقلها إلى مشفى الرازاي بحلب وتبين أنها فارقت الحياة قبل ذلك.

يذكر أن الناشطة و المدونة مارسيل شحوارو تعتبر من اهم الناشطات المعارضات من الطائفة المسيحية ولها العديد من المقالات المنشورة على صفحات الانترنت ولديها مدونة تحت اسم "لمحات" و أصدرت مؤخرا كتاب بعنوان " لمحات منه " في 31/1/2010 علما أنها درست طب الأسنان و العلاقات الدولية والدبلوماسية.

وكانت المدونة قد كتبت في مدونتها في 11 حزيران الجاري بعد اشتداد قصف الجيش النظامي على قرى وبلدات ريف حلب:

[ يارب
بهاللحظة بالسما في قذيفة عم تطلع ، نحنا هون عم نسمع صوتها وبس
يارب بلكي بتضل هالقذيفة طريقها وبتنزل ع شي أرض فاضية أو يمكن ع بيت ما فيو أهل وناس

يارب
كل طفل بهالضيعة اللي عم ينزلوا عليها هالقذائف أنت من عندك عطيه القدرة يغمض عيونو ويغفى بسلام ... وأنو هالصوات اللي قريبة كتير عليه يحسبها شي لعبة ..

يارب
هالناس اللي رح تترك هالبيوت اللي عم تنقصف وتتغرب انت كون معها ، اجمعها بناس تحتويها وتفتحلها بيوتها

واعطيهن أيام حلوّة ع قد المر اللي شافوا

يارب
الشخص اللي واقف بهالدبابة وعم يقصف هالناس، انت غيّر قلبه وأنت اهديه .. يارب هاد اكتر واحد مسكين فينا ع قد ما مشوّه من عندك يارب اشفي التشوه اللي طال روحو ..

يارب
عطينا القوة نحنا الناس اللي عم نسمع .. نقدر نعمل أي شي يمنع الظلم ع الناس ، عطينا القوة نقدر نحافظ ع انسانيتنا لما نكون نحن شي يوم واقفين عم نقصف حدا تاني
وكون معنا يارب ]

انعقد لساني حين عرفت بالخبر البارحة، مأساة العزيزة مرسيل بحجم مأساة الوطن
لأمها الرحمة وألهما الله وأهلها الصبر والسلوان

Syrian National Council المجلس الوطني السوري
انضمت إلى قافلة شهداء سورية الأبرار السيدة ماريان شحوارو الناشطة في الأعمال الخيرية ورعاية الأطفال المعوقين، ووالدة الناشطة والمدونة المعروفة مارسيل شحوارو، بقتلها بدم بارد من قبل حرس أحد مقرات حزب البعث في مدينة حلب
يعزي المجلس الوطني السوري أسرة الفقيدة، ويدين هذا العمل الغادر والجبان الذي يهدف لإسكات الصوت الحر الذي تمثله هذه الأسرة الكريمة، ومنعها من الإستمرار في دعم الثورة السورية وتشجيع كل فئات الشعب السوري للإنضمام إليها
للفقيدة الرحمة ولذويها الصبر والسلوان

المجلس الوطني السوري
١٨ حزيران يونيو ٢٠١٢

مدونة كتبتها مرسيل بتاريخ 17-05-2012 تتوجه فيها للصامتين :


والله أنا كمان بدي عيش ..
وعندي حبيب بيسوى تقلو دهب بيحبني قد الدنيا ، وبيقعد بيستناني كل يوم ع نار لأرجع ع البيت بأمان ، وبراسي هالملان بمليون قصة هلق عند...ي قصة كاملة عن عرس ما بعرف إذا الله بيطعمني عيشو !
والله أنا كمان عندي احلام ورفقات ومزحات حابة احكيها
عندي أم كلما بتفتح عالأورينت ، بتدور ع وشي بين صور اللي استشهدو او اعتقلو .. وأمي بتحبني قد ما أمك بتحبك ،
وبجي بشوف عيونها هالقد من البكي لما بتسمع " وأني طالع اتظاهر ودماتي بإيديا وان جيتك يما شهيد ما تبكين عليا ".
أي فهمانة أنك حابب تعيش ، بس المشكلة أنو المعادلة ما ضلت بين أنك تعيش وتموت
صارت بين انك تعيش وتسكت وهني عم يسرقو واحد من أعز رفقاتك ، ورفيقك التاني عم ياكل قتل جوا وقلبك ناغزك وما عم يخليك تنام ..
صارت بين أنك تحضر صور لأطفال عم تموت وتقول أنو حياتك أغلى من حياتن ..
لك بالله عليك ما بتنوجع وقت مننجرح ؟ وقت منعتقل ؟ وقت منستشهد؟
أنا كمان بدي عيش ! بس شو بعملك إذا أنا مقتنعة أنو الله ما خلقني لاكل وانام واشرب .. وبس !
شو بعملك إذا انا من جماعة " ليس بالخبز وحده يحيا الإنسان "
أنا متلك متمسكة بالحياة بإيديي وسناني
وبالعكس إذا كنت بتعرفني فأنا من الناس اللي بيعيشوا الفرح لآخر درجة، بس افهمني لحظة ، السوري اللي جوا بشي زنزانة وعم يكهربوه حاسستو برقبتي، واللي تيتم من دون عدالة لشهادة أبوه حاسستو مسؤوليتي .. والبلد كلها مسؤوليتي ودين برقبتي
وكيف الواحد فينو يسكت ومسؤوليات متل هي فوق كتافو ..
أنت ما حاسس أني مسؤوليتك ؟ شلون ؟ نحنا مش رايحين عالموت برجلينا ، ولا كرهانين الحياة ! بس نحنا مش قادرين نتعايش مع حالنا إذا سكتنا ! وقت اللي بسكت عن كل هالدم بحس أنو الدم صار ع إيديي أنا وما بقدر اتحمل طعم وريحة الدم أنا
جربت مرّة شو يعني تدور ع رفيق بتجن ع ضحكتو .. طول الليل من مستشفى لمخفر لتليفونات لتعرف بس وينو ؟ جرّبت تزور أم حدا وما تعرف توعدها أنو ابنها عايش أو لأ
اللي ما عم تفهمو أنو نحنا صعب نرجع .. لأ مو بس صعب نحنا مستحيل نرجع !
خيو الجرح اللي بقلوبنا غير الحرية ما عادت تدملّو ...
فيا منعيش بكرامة يا أما منموت

اقتباس:أنت ما حاسس أني مسؤوليتك ؟ شلون ؟ نحنا مش رايحين عالموت برجلينا ، ولا كرهانين الحياة ! بس نحنا مش قادرين نتعايش مع حالنا إذا سكتنا ! وقت اللي بسكت عن كل هالدم بحس أنو الدم صار ع إيديي أنا وما بقدر اتحمل طعم وريحة الدم أنا
جربت مرّة شو يعني تدور ع رفيق بتجن ع ضحكتو .. طول الليل من مستشفى لمخفر لتليفونات لتعرف بس وينو ؟ جرّبت تزور أم حدا وما تعرف توعدها أنو ابنها عايش أو لأ
اللي ما عم تفهمو أنو نحنا صعب نرجع .. لأ مو بس صعب نحنا مستحيل نرجع !
خيو الجرح اللي بقلوبنا غير الحرية ما عادت تدملّو ...
فيا منعيش بكرامة يا أما منموت

رائعة يا "مرسيل" ...

وطاقة من الورد على ضريح الوالدة ... والله يجعلها خاتمة الأحزان ...

صحيح، رح أستعير كم كلمة من كلماتك أعلاه "كتوقيع" ..

واسلمي لي
العلماني