نفس فكرة القصة أعلاه حولتها إلى نص مسرحي قدمتها فرقة البكرة لمسرح الطفل في حفلة عيد الأم



مسرحية للأطفال







مسامير












إعداد : نيقولا ديب




المنظر الأول :
يدخل الطفل مسرعا" وهو يفرك عينيه ويتثاءب , يبدأ بجمع كتبه ودفاتره بمحفظته ... تقع الدفاتر ثم يعود ويجمعها من جديد ......... و يدخل الأب .
الأب : على مهلك يا بابا ( يكمل الطفل جمع دفاتره ويخرج ) ... نسيت القلام ( يعود الطفل ويأخذها بيديه ويخرج ) نسيت تلبس صدرية المدرسة ( يعود يحاول أن يلبسها )
الطفل : أخّرتني عن المدرسة ( يكمل لبس صدريته ) .
الأب : أنا ما أخّرتك , الزرار
الطفل : يعني شو بعمل
الأب : الحق عليك ... بتمنى قول عنك طفل جيد
الطفل : أنا طفل جيد , وهادا اللي بيهمني
الأب : بس ما حدا بيقول عنك جيد , الأخبار عابتجيني غير هيك
الطفل : كذابين
الأب : عيب عليك , بالحارة ما في حدا من الجيران إلا واشتكى منك , وآخر مرة طرّشتو بالطين لجارنا
الطفل : كذابين
الأب : وبالمدرسة كسرت قفل باب الصف
الطفل : كذابين
الأب : يعني يا العالم كذابين يا أنت منيح
الطفل : تركوني , تركوني , أنا رايح عالمدرسة
الأب : طيب ( يلتفت الطفل ويعود ) رح ساوي أنا وأنت اتفاق
الطفل : تأ خرت عن المدرسة
الأب : لأ ما تأخرت لسى في وقت
الطفل : يعني إذا بدك تقلي دروس , فرشي سنانك , ونام بكير , مارح أسمع
الأب : طوّل بالك يا ابني , رح اتفق معك اتفاق بيعجبك .
الطفل : شو هالاتفاق العجيب
الأب : شو رأيك .. من هلق ورايح ... عندك مسامير ؟
الطفل : مسامير ! عندي
الأب : من هلق ورايح كل ما تساوي شغلي مو منيحة بدّق مسمار عالحيط
الطفل : بدقلك مسامير قد ما بدك
الأب : لأ , بدّق مسمار كل ما تساوي شغلي بيشتكي منّا الناس
الطفل : شو بدي بالناس
الأب : بتخسر شي إذا ساويت متل ما عا بقلك , دق مسمار كل مرة بيشتكي منّك الناس
الطفل : طيب موافق , بس ليش؟
الأب : بعدين بتعرف ليش
الطفل : عشنا وشفنا وطشنا
الأب : شو ؟
الطفل : رح دق مسامير

المنظر الثاني :
مسامير مدقوقة على الجدار , يدخل الطفل ليدق مسمارا" جديدا" .. يدقّه ويدخل الأب
الأب : شو , صعب دق المسامير
الطفل : لأ كتير سهل
الأب : بدو شطارة
الطفل : لا بدا شطارة ولا شي ... ( يدق مسمارا" ) وهادا المسمار لأنو حطيت العلكة على كرسي الأنسة وقعدت عالكرسي ولزّقت عابنطلونها
الأب : والمسمار اللي قبلو
الطفل : لأنو رشيت أستاذ الرياضيات بالحبر على قميصو من ورا
الأب : ليش كل هالشي يا ابني ؟
الطفل : الحق عليون , الأنسة مادخّلتني عالصف لأنو تأخرت , وأستاذ الرياضيات ما بيعرف يشرح
الدرس
الأب : علكة وحبر ! ولا تنسى تدق مسمار لأنك كسرت بللور جارنا بالحجر
الطفل : هلق بدك تسألني ليش ... لأنو وقت عابلعب بالطابة , أخدها وشقلي ياها
الأب : وليش ضربت سالم بالحارة ؟
الطفل : عاملي حالو رفيقي
الأب : أي
الطفل : ما نقلني بالمذاكرة
الأب : ليش كان عندك مذاكرة ؟
الطفل : نعم كان عندي مذاكرة
الأب : دق مسمار لأنك ضايقني وما درست للمذاكرة
الطفل : حاضر
الأب : ومسمار لأنو ما قلتلي أنو في عندك مذاكرة ( يخرج الأب )
الطفل : حاضر ( تعتيم ثم دق مسمار بشكل متكرر ثم يخرج الطفل )
يدخل الأب ينظر إلى المسامير ثم بدخل الطفل ورائه
الأب : شو في مسمار جديد ؟
الطفل : لأ ما بقى في عندي مسامير بدي أشتري
الأب : (يعد المسامير ) واحد اتنين تلاتي ......... هلق صار الوقت مناسب
الطفل : أي ما عرفت ليش دق كل هالمسامير
الأب : هلق بدنا نشيلون
الطفل : ليش دقيناهون إذا بدنا نشيلون !
الأب : بعدين بتعرف
الطفل : يي يي ( يذهب ويحاول أن يقتلع المسامير )
الأب : لأ طوّل بالك , من هلق ورايح منشيل مسمار كل مابتساوي شغلي منيحة بتعملها
الطفل : حلوة هاللعبة
الأب : عجبتك
الطفل : لنشوف شو آخرتها

المنظر الثالث :
يدخل الطفل ويقتلع مسمارا"
الطفل : هلق ارتحت شوي , بدي أخلص من هالمنظر ( يدخل الأب )
الأب شو شايفك شلت مسمار
الطفل : ماني مصدق أيمت بدي شيلون من وجهي
الأب : برافو يا ابني
الطفل : حاسس بشي جديد , لازم كمّل للأخير ( قلع مسمار ثم تعتيم وهكذا )
تعتيم – إضاءة – يقلع مسمارا" , ولعدة مرات
يدخل الأب بينما الطفل يقلع مسمارا"
الأب : شو شايفك عابتشيل مسمار
الطفل : أي لازم شيلون كلون
الأب : برافو شو عامل ؟
الطفل : ساعدت رفيقي , وقع عالأرض وانكسرت أجرو
الأب : وغيرو
الطفل : درست للمذاكرة اللي قلتلك عليها وجبت 8 / 10
الأب : برافو أحسن من 3 / 10
الطفل : وهي رح شيل آخر مسمار
الأب : ليش ؟
الطفل : اعتذرت من الأستاذ والأنسة ميشان العلكة والحبر
الأب : برافووووو
الطفل : واعتذرت من الطلاب
الأب : برافو , وهلق ( يقترب من مكان دق المسامير وينظر بتمعن )
الأب : لاحظ محل كل مسمار دقيتو وشلتو ( يقترب الطفل وينظر )
الأب : شو شفت ولاحظت ؟
( يشير الطفل بعدم فهمه السؤال )
الأب : صحيح أنك نجحت وشلت المسامير لكن كل المسامير تركت أثر , لاحظ
الطفل : الأثر ! نعم تركت أثر ( ينسحب الأب )
( منولوج الطفل )