الرد على: ناطورة المفاتيح من أروع المسرحيات التي قدمها الرحابنة
بربر : هاتي خبرينا تنشوف
زاد الخير : يا عمي شغلني بزق الحطب , لكن أنا ما شفتو قتل حدا , وبيسكر متل عبود وبينكت وبيضحك .. بس بيضل في بوجهو نمر مخبا
بربر : إي اشكري ربك اللي ما فلّت النمر عليكي
زاد الخير : يا تعتيري
صبية : دخلك شو بيشتغل الملك
زاد الخير : بيشتغل ملك , حامل كيف .. عندو حاشية كبيرة , حرس خدم طباخين , ناس بيضحكو ناس بيبكو ...
بربر : عرفتي إنون حبسو مراد الأسمر ؟
زاد الخير : منين بدي أعرف , اللي بيقعد فوق ما بيعود يعرف شي من شي .
__________
ديك المي : لوز لوز .. طلع اللوز
ومن لوزاتي أحسن لوز
جايبلكون أول , أول قطفة حتى تدوقوا , تدوقوا اللوز
أهل الحي : اشتقنالك يا ديك المي
ديك المي : وأنا مشتاق يا أهل الحي
أهل الحي : وين قاعد مش عم نشوفك
ديك المي : أنا قاعد على برك المي ..
قاعد وحدي ما بدي مشاكل
خلّوني لوحدي ما بحب المشاكل
أهل الحي : عرفت باللي عم بيصير ؟
ديك المي : ما بدي أعرف
أهل الحي : صاير إشيا مهمة كتير
ديك المي : خلوني ما أعرف , خلوني عم غني على برك المي
يا دنيي هنية على برك المي
على برك المي عم تلعب صورنا
وببرك المي عم تغرق صورنا
يا قمرنا تفرج ع صورنا
وبسهرنا بسهرنا ضوي
ضوي ضوي ضوي ع صورنا
من صغرنا وعم تغرق صورنا
وكبرنا كبرنا وبعدا
كبرنا وبعدا عم تغرق صورنا
آه صورنا آه صورنا
أهل الحي : ديك المي ديك المي جايب لوز لأهل الحي .. ديك المي ديك المي جايب لوز لأهل الحي
بربر : خير السنة ورزق جديد واللي طعمنا عمرو يزيد
أهل الحي : خير السنة ورزق جديد واللي طعمنا عمرو يزيد
بربر : حبيني ولا تحبيني والمحبة مش بالإيد
أهل الحي : خير السنة ورزق جديد واللي طعمنا عمرو يزيد
ديك المي عمرو يزيد
ع الرمانة الرمانة بفي الرمانة
لحظ عيونك يا حلوة بالهوى رماني
ع الرمانة يا صغيرة ع الدلال صغيرة
عم تحكي عليي الجيرة وفضحتني الغيرة
قلبي مولّف بعدو مولّف
بدي أعرف وين سهرانة
لبست أخضر زيتوني خطفوها عيوني
واللي كانوا يلوموني مابقى يلوموني
والـ ملهية بشو ملهية
عشقتا وهيي مش دريانة
القائد : ليش مجمّعين
ديك المي : متل منك شايف عم نرقص ونغني الله يطول عمر الملك
القائد : شو مناسبة الرقص
ديك المي : اللوز
القائد : اللوز ؟
ديك المي : نعم .. أول قطفة جايبينا للأهالي
القائد : أول قطفة! صادروه ..
ديك المي : بس ما قلتو إنو اللوز ممنوع
القايد : أول قطفة للملك
ديك المي : الله يطول عمرو شو ضرسو طيب
القائد : شو عم تقول ؟ وقفوه ..
الأهالي : أخدو ديك المي .. أخدو ديك المي ..
ديك المي .. ديك المي .. ديك المي
الملك : خير السنة ورزق جديد واللي طعمنا عمرو يزيد .. خير السنة ورزق جديد واللي طعمنا عمرو يزيد
جاد الحكيم : يا مولانا اللي طعمكون عم ياكل قتل هلأ
الملك : بيستاهل .. بيستاهل .. خير السنة ورزق جديد واللي طعمنا عمرو يزيد
القائد : عاش الملك
الملك : نعم
القائد : في متمرد هاجم الحرس وشتم جلالتكم , حاول الهرب اضطروا يقتلوه
الملك : شو إسمو ؟
القائد : ديك المي
الملك : ديك المي .. مش هوي الي كان عم بيجمع ثوار بالجرود حتى يسقطوا الحكم ؟
القائد : نعم يا مولانا
الملك : ونهبوا عنابر القصر ..
القائد : نعم نعم ما أوسع معلوماتكم يا مولانا
الملك : ولو , جهازي الخاص شو قاعد يعمل
جاد الحكيم : يا ملك الزمان ديك المي رجال مسكين لا ثاير ولا شي وهوي اللي طعمكون سلة اللوز ..
الملك : يييييييي .. وما قلتولي بلكي كان مسمملي فيا .. الحقوني الحقوني .. وينك يا جاد ؟
جاد الحكيم : أنا هون يا مولانا
الملك : الحقني الحقني سمموني الثوار .. بعتولي سلة لوز مسمم
جاد الحكيم : ما في ثوار يا مولانا
الملك : آخ .. آخ .. دخيلكون نفسي ضاق .. الخدر مشي بجسمي .. عم بتوفى .. عم بتوفى .. عم بتوفى .. وداعاً أيها الملك المستوحش .. أيتها النجوم المتحكمة بمصائر الناس .. أنا عم بموت .. عم بموت .. عم بموت
جاد الحكيم : روق روق يا سيدنا اللي مات هوي ديك المي البريء
الملك : مات! مات! مات! .. انقلب السحر ع الساحر ! ههههههههه ولك أنا شو بيموتني , لا تشوفوني رفيعاني , أنا وصغير كان في حاوي يكمش حيات ويسقيني كل يوم نقطة من سمون حتى إتحسن , ولك أنا بموّت مملكة وما بموت .. ولو .. وسيعلمون غداً .. وسيعلمون غداً بأني سيدٌ تهوي الرجال إذا مشا في ساحه , ما كنتَ ديك المي , ما كنت ديك المي أول فارسٍ يوم الردى .. شفت شفت أرديته بسلاحه ..
يالله خلينا نشوف القضايا المفيدة للمملكة اعملولنا ترتيبات لاستقبال الملكة صار بدا ترجع من عند أهلها
جاد الحكيم : استقبال رسمي , وزينة بالشوراع
الملك : وجماهير غفيرة يا جاد , الملكة بتحب الكنفشة
______
بربر : يا إخوان .. كل واحد منكون يتوجه ع منطقة
الشباب : بأمرك يا بربر
بربر : وبتقولو للزعماء يستعدو للرحيل حسب ما اتفقنا
الشباب : بأمرك يا بربر
بربر : قولولون ما يضل حدا , كلون لازم يرحلو .. رجال نسوان ولاد وشيوخ , كلون لازم يرحلو خلي المدن تفضى وتتسكر البيوت
الشباب : وأيمتى الرحيل ؟
بربر : يستعدوا ينطروا الإشارة , ولما بتنعطالون الإشارة , متل رفوف الطير بيمشو , صوب رياح جديدة بيمشو
الشباب : بأمرك يا بربر
بربر : ولازم بسرعة توصلو بسرعة
الشباب : منقطع بالنهورة بالطرقات المهجورة , منلبس الليل , ولون الأرض وسفر الغيم حتى نوصل
بربر : ومحروسين
الشباب : بخاطرك يا بربر
زاد الخير : أربعة وقفوا معك .. وديتون وراحوا
لبسوا الليل لبسوا خيالات الشجر , لبسوا سكوت الأرض
وديتون وراحوا .. قلي لوين راحوا؟
بربر : عم تسألي تتعرفي وبتعرفي
زاد الخير : يعني الرحيل !
بربر : شو بعد في غير الرحيل .. شو بعد في!
مواسم الزرع منتّفة ..وأيامنا عم تنطفي ..
خيل الحرس من كل باب تمد راسا وتختفي ..
وصوتو يحمّل ضحكنا ويهج بهالعاصفة
زاد الخير : كلو صحيح لكن أنا ما بفل عن باب بيتي
بربر : رح يفلو الكل .. شو بتعملي وحدك؟
زاد الخير : أنا راح ضل
بربر : بكرا متى هجرنا ..
زاد الخير : يا خوفي كيف بدكن تهجروا .. وتصير هالدنيي
طرقات ما عليها حدا وبيوت ساكنها الصدى
بربر : رح تتعبي وحدك ما بوافقك تبقي ..
إنتِ يا زاد الخير ما بتعرفي بالظلم
زاد الخير : بعرف أنا واليوم عند العصر
شفت البكي معبي طواق القصر ..
شفت البكي نازل .. ع حينا نازل ..
محمّل دموع الناس محمّل أصوات الناس
وصوت ديك المي , بيناتهون شفتو .. عرفتو وما عرفتو .. عرفتو وما عرفتو
كرمالهُن .. كرمال ديك المي .. هالراح مرة وما رجع
هاللي تعذب وانوجع .. تـ هج بالحيطان وفل من حالو
وبعدو كل يوم بينوجع ..
كرمالهن ما بفل .. ويهيج بحر الظلم
بدي ضل بدي ضل
بربر : بدك تضلي ضلي .. نحنا رح منروح .. ما زال هو بدو الأرض .. بدو البيوت
بدنا نخليلو الأرض , نخلي البيوت .. رح ناخد الإنسان .. رح ناخد الإنسان
وساعتا يضلّو ملك , ع العتم والحيطان .
إنت وأنا ياما نبقى
نوقف على حدود السهل
وعلى خط السما الزرقا
مرسومة طريق النحل
أنا ومتكية ع بابي مرقت نحلة بكير
غلت بزهور الغابة وصارت تعمل مشاوير
وتعن العنين حزين ومش حزين
بسكوت الظهرية تكسّر الحنين
إذا رح تهجرني حبيبي ورح تنساني يا حبيبي
ضل اتذكرني واتذكر طريق النحل
طريق النحل الطاير فوق الضو المكسور
بيصير يرسم دواير يكتب ع الهوا سطور
من فوق القصور أعلى من القصور
أعلى من قبب العالي عم يكتب سطور
إذا رح تهجرني حبيبي ورح تنساني يا حبيبي
ضل اتذكرني واتذكر طريق النحل
___________
لما بيرسي مركب الليل على سطوح المدينة
وبياخدني سفر الليل انطريني .. انطريني
ع باب المسافة انطريني .. أنا رايح انطريني
اشهدي يا بيوت .. اسمعي يا بيوت ..رح بتضلي بعينينا يا بيوت
صرنا ورق الريح .. صرنا سفر الريح ..و ايامك عهد علينا يا بيوت
على بابك يا بواب الإلفة على بابك يا بواب
مننقش صور الدمع ونحمل من حفافيك تراب
نمشي مية يوم .. نعبر أرض النوم
يا قصة انكتبت ع المي ومتروكة بكتاب
اشهدي يا بيوت .. اسمعي يا بيوت ..رح بتضلي بعينينا يا بيوت
صرنا ورق الريح .. صرنا سفر الريح ..و ايامك عهد علينا يا بيوت
اشهدي يا بيوت .. اشهدي يا بيوت .. اشهدي
الشعب : زاد الخير انطري البيوت , انطري المفاتيح للزمان التاني
زاد الخير إنتِ صرتِ وحدك صرتِ ناطورة البيوت .. ناطورة المفاتيح .. ناطورة المفاتيح .. ناطورة المفاتيح
بربر : لما بيرسي مركب الليل على سطوح المدينة
وبياخدني سفر الليل انطريني .. انطريني
ع باب المسافة انطريني .. أنا رايح انطريني
أنا رايح انطريني .. أنا رايح انطريني
زاد الخير :
وينن .. وينن
وين صواتون وين وجوهن وينن
صار في وادي بيني وبينن
وينن ..
ركبوا عربيات الوقت وهربوا بالنسيان
وتركوا ضحكات ولادُن منسيّة ع الحيطان
تركولي المفاتيح
تركو صوت الريح
وراحوا وما تركوا عنوان
...
عشاق الطرقات افترقوا لا حكي لا مواعيد
أنا وحدي صوت الشوراع أنا طير القرميد
هربت بهالليل من مرابطها الخيل
وأنا قنديل الحزن الوحيد
وينن .. وينن
وين صواتون وين وجوهن وينن
صار في وادي بيني وبينن
وينن ..
موســـــــــيقى
الحراس : بأمر الملك يُطلَب من الشعب ..
أن يتجمّع أن يتجمهر على طول الطرقات ويقيم الزينات لاستقبال الملكة الراجعة من سفرها , وعلى الأهالي إنو ما يضل واحد ببيتو وكل من لا يحضر يعرض نفسه للعقوبة .. الإمضاء الملك غيبون
زاد الخير :
لا تجي اليوم .. ولا تجي بكرا
مش لنا الزينة وبيارق المدينة
نحنا لنا ورق الخريف ..
الـ عم بيدهّب مراكب الرصيف
غير إنت وأنا .. غير إنت وأنا
يا حبيبي يا حبيبي ما لنا
لاتجي اليوم .. ولا تجي بكرا
خوفي لـ تضيعني بالعيد وما تقشعني
تعا لما بينده الحنين موسم الناس المنسيين
إنت المدى .. قبلك ماحدا وبعدك ماحدا
يا حبيبي يا حبيبي ما حدا
إنت وجايي يا حبيبي
لا تجي بالشمس بيلحقك خيالك
تعا بالضباب تعا بلا خيال
أنا خيالك أنا خيالك
___________
القائد : ليش ما زيّنتوا ؟
زاد الخير : مين بدو يزيّن ؟
القائد : الناس
زاد الخير : أيّا ناس ؟
القائد : وين الجماهير تستقبل الملكة شو ما سمعوا الأوامر !
زاد الخير : ما في حدا يسمع
القائد : مش عم افهم
زاد الخير : الناس راحوا هجروا , تركوا بيوتون
القائد : بهالحشرة ؟ منين معون إذن يروحوا , بكرة بس يرجعوا كلون رح يتوقفوا .
زاد الخير : يا قايد حاج تهددون , صاروا أبعد من التهديد , ضهروا برات الخوف ما بقا ينطالوا ولا رح يرجعو
القائد : معقول ما يرجعو , هيدي بلدهون , وهيدي بيوتون .
زاد الخير : إي لا تنسى إنو الملك شريك النص , وكل عمرو هاك النص حامل هم نص , هالمرة خلي النص هيدا يحمل حالو
القائد : بلا كترت حكي بدي أعرف كيف راحوا
زاد الخير : بتعرف كيف بيرحل رف السنونو عن القرميد ؟ هيك راحوا
القائد : الموقف حرج .. مين بدو يزين الشبابيك والقناطر؟
زاد الخير : لا الشبابيك زينة ولا القناطر , هني كانوا الزينة
القائد : لتكوني عم تشاغبي على رجوع الملكة , مشي معي بدي فتش البيوت .
_________
للملك المالك نشيد السيف .. كلام البطولة وفرح الصيف
للملك المالك منابت الغار .. والصرخة النبيلة وغضب النار
والملك جايي يستقبل الملكة , بساحات الزينة وجماهير المدينة
والملك جايي يستقبل الملكة , بالدهب الغالي ومجد التاج العالي
الملك : يا جاد الحكيم الملكة قربت توصل ومنّي شايف لا جماهير ولا ناس , شو القصة ؟
جاد الحكيم : نادى المنادي بكل المطارح
الملك : إي وينن ؟
جاد الحكيم : ما بعرف
الملك : اسحبوون من بيوتون
جاد الحكيم : بالبيوت ما في حدا
الملك : شه .. الملكة إلها شهر غايبة بزيارة أبوها الملك صخر الأول وترجع من دون استقبالات شعبية , مش أصول .
جاد الحكيم : يا مولانا راحت الحاشية والحرس يستقبلوها , ورح منقلا اعملنالا استقبال رسمي بسبب ظروف خاصة
الملك : ظروف شو ؟ يعني لفلفة متل العادة
جاد الحكيم : يا مولانا الناس إلهون ظروفهون
الملك : أنا أدرى منك بالناس , لما بتحتاجون بيتلأمنو عليك , على كل حال بعد الإستقبال حققولي ليش غابوا
جاد الحكيم : بعتنا القايد يحقق
الملك : عال
جاد الحكيم : طلت الملكة .
الملكة : يا ملك الزمان , بعبرلك عن صدقي بخضوعي وعن حبي برجوعي
الملك : إنتِ الفرح الطالع نجمة المطالع ..
جاد الحكيم : يا مولاتي انشالله الرحلة كانت سعيدة ؟
الملكة : الرحلة كانت زهرة العمر , لولا الشوق لمولانا الملك .
الملك : وكيف حال جلالة أبوكي عمي الملك صخر الأول وجلالة حماتي إمك الملكة جلبهار ..
الملكة : بيدعولك بطول العمر , بيدعولك بالنصر
وكيف بحيرات الشمس وشواطئ الرمل , كيف الناس بمملكة رود بلدك الأول
الملكة :
ببلدي الأول رحبوا فيي وقالوا كتير اشتاقوا عليي
ببلدي الأول حوم الحمام صار عليي يفيي وعملّي شمسية
لوحو بإيديهن سألوني .. إذا فايقة عليهون سألوني
سكبوا الورد وسقيوني .. ببلدي الأول آه ببلدي
ببلدي الأول ببلدي الأول ببلدي الأول آه ببلدي
ببلدي الأول رجعت بنت صغيرة اركض ع الطرقات وشوف السما كبيرة
ببلدي الأول رجعت الإيام ورجعت مشاويري من جيرة لجيرة
لوحو بإيديهن سألوني .. إذا فايقة عليهون سألوني
سكبوا الورد وسقيوني .. ببلدي الأول آه ببلدي
ببلدي الأول ببلدي الأول ببلدي الأول آه ببلدي
وصوتك ندهني حملت حالي وجيت
قلي اتركي أهلك حملت حالي وجيت
أنا عندي وطنين هواهون بكاني
وطني الأول كبرني ورباني
وعيونك حبيبي يا حبيبي
عيونك يا حبيبي وطني التاني
لوحو بإيديهن سألوني .. إذا فايقة عليهون سألوني
سكبوا الورد وسقيوني .. ببلدي الأول آه ببلدي
ببلدي الأول ببلدي الأول ببلدي الأول آه ببلدي
الحاشية : رجعت الملكة سعد الملك , ضحكت المملكة وضحك الملك
جاد الحكيم : عصفورين ع غصن التقوا , ع غصن الزواج ع الحب التقوا الملك والملكة منتركهون يتبادلو كلام المحبة للملك والملكة
الحاشية : الملك والملكة منتركهون يتبادلو كلام المحبة للملك والملكة
الملكة : يا سيد غيبون .. شو هالإستقبال الشرشوح ؟
الملك : ما تبلشي استقبال رسمي بسبب الظروف
الملكة : لما شرّفت أميرة كرمستان , عملتلا الي ما انعمل , شعب وجماهير وزينة وكلا قد الشبر , ليش ! بدك تتشاوف قداما , نفخت حالك متل ديك الحبش , بس أنا الملكة شو استقبال رسمي
الملك : ولك يا عمي هيك الإستقبالات , الملك والحرس والحاشية
الملكة : كلو مش مهم , أنا بدي الشعب
الملك : هلأ صرتي تحبي الشعب ؟!
الملكة : اي .. بيعطوا منظر , ليش ما دعيتون
الملك : اي دعيناهون وما إجو
الملكة : ما إجو ؟ شو السبب ؟
الملك : ما بعرف بعتنا نحقق بالأمر
الملكة : عقوبة شديدة
الملك : شديدة
الملكة : شو هالفوضى شو هالفوضى
الملك : ولك يا عمي لوين رايحة اقعدي خبرينا تنشوف
الملكة : تعبانة
الملك : شووو بصبصتي كتير بهالرحلة ؟
الملكة : انخجل ,ناسي اني ملكة
الملك : شو يعني الملكة مش ست , بتلطى تحت هالتاج وبتصير تبصبص
الملكة : لأ هيك كتير , ما بسمحلك تحكي معي هالحكي
الملك : احترميني أنا الملك
الملكة : الملك على غيري مش عليي , شو هالمملكة الي كلا غبرة , قطيعة يوسعوا الطرقات شوي , موكبنا كان تفركش , اي روح شوف بمملكة بيي الساحات والشوارع
الملك : ايه شو بعملك , بييك قبض من الإمبراطور حاروس
الملكة : وإنت شو .. شقفة نهر طاف عندك طرحت الصوت ع الدول , بوابير الطحين الي إجتك أعانة درفتا لولاد خالتك وبعتوها سوا يا عيب الشوم
الملك : ولك الشاطر ما يموت
الملكة : فإذاً اعمل معروف , لما بتجيب سيرة أهلي الملوك حط ايدك ع راسك
الملك : اي فلقتيني بأهلك , فلقتيني بأهلك , أنا ملك إبن ملك , بييك متعدي ع الكار تعداية إي بعدو لهلأ بيلبس التاج بالقلب
الملكة : فشر
الملك : إنتي فشرتي
جاد الحكيم : يا أصحاب الجلالة استرونا وطوا صوتكون
الملكة : إذا كنت حكيم حكملو عقلاتو
الملك : ولك يا عمي , شو هيدا , شو هيدا بتروح لعند أهلا بيعبوها جر جر جر جر ع راسا بترجع معباية , بيقلي بالي شي ساعة رح اسحب سفيرنا
جاد الحكيم : من تحت راس حكي
الملك : اي نعم هيدا تدخّل بشؤوني الداخلية
جاد الحكيم : طول بالك طول بالك
الملك : كل الحق عليك , كل الحق عليك , إنت إنت اللي جوزتني , إنت الي علقتني هالعلقة
جاد الحكيم : يا مولانا جبنالك اياها بنت مملكة مستورة , وجلالتكون شفتوها وغشيتو
الملك : يا عمي , يا عمي إمها قوية , إمها جلبهار فحول لعبتلي بعقلاتي
جاد الحكيم : وجلالتكون موضوع قابل , مواكبكون الملكية حفرت الطرقات , ليلية تاخدو هالجيش وتروحوا تلفو , اللي يشوفكون يحسبكون رايحين ع الحرب
الملك : شفت شفت , شفت منيح الي إنت ما تجوزت يا عمي تيضل في حدا بهالدولة عقلاتو براسو ,
حققتوا بأمر الرعية ؟
القائد : طال عمرك ما في رعية
الملك : نعم ؟ وين راحت ؟
القائد : هربت
الملك : الرعية الرعية
القائد : هربت
الملك : هربت ؟
القائد : نعم هربت
الملك : آلاف الناس المدن الشوارع , الجماهير الغفيرة اللي كانت تهتف عاش الملك كلون هربوا معقول !؟
القائد : هيدا اللي صار , المملكة صارت مهجورة وشملها الصمت , وما بقي فيها إلا زاد الخير وخيالات الحرس
الملك : زاد الخير وخيالات الحرس , ما بيصير , ما بيصير
جاد الحكيم : ما حدا بيعرف كيف بتتفجر المي , أنا بعرف ثورات وإضرابات ومقاطعة السلطة , بس شعب يهاجر كلو , ما بعرف
الملك : غلبوني يا جاد غلبوني , عوض ما يروح الملك راح الشعب , سكروا عليي المملكة وراحوا نفيوني بحالي وراحوا , ولك وين كنتوا ما سكرتوا البواب الطرقات الجبال ؟
القائد : ما بتتسكر يا مولانا
الملك : الحالة خطيرة يا جاد
جاد الحكيم : نعم يا مولانا , ما بيصير ملك بلا رعية
الملك : أنا صرت ملك المنفى , ملك البيوت الفاضية والساحات المهجورة , هربوا وانتصروا .. زاد الخير , إنتي ليش بقيتي ؟
زاد الخير : أنا ما بدي فل
الملك : ليش ؟
زاد الخير : هيك .. لازم حدا يبقى , سلّموني مفاتيح بيوتون , ورسموني ناطورة المفاتيح يا جلالة الملك لو المفاتيح سيوف , كنت بتسلّح جيشك من المفاتيح اللي عندي
الملك : يعني إنتي هلأ صرتي المفاتيح
زاد الخير : نعم
الملك : وإنتي صرتي الشعب
زاد الخير : نعم
جاد الحكيم : يا مولانا ما زال بعد في شخص واحد , يعني في رعية وفي ملك
الملك : صارت رعيتي زاد الخير .. ليش فلّوا يا زاد الخير؟
زاد الخير : صار بدك البيوت والأرض تركولك اياهون وراحوا
الملك : وشو نفع البيوت بلا ناس
زاد الخير : هلأ عرفت قيمة الناس , كانو يروحوا رخاص عندك ديك المي راح بسلة لوز
الملك : اخرسي .. أنا الملك السيد وبإيدي الحياة والموت , وإنتي الرعية وعليكي الطاعة
زاد الخير : إي لا تزيد عليي بفل
الملك : احبسوها
جاد الحكيم : له يا مولانا , لا بيسوى تحبسها ولا بيسوى تتركها تفل , بتصير بلا رعية
الملك : منقتلا ؟
جاد الحكيم : كمان بتصير بلا رعية
الملك : فإذاً يا شعبي المحبوب يا زاد الخير , خلينا نتفاهم
زاد الخير : منتفاهم , بس إلي شروط
الملك : شروط ع الملك لأ ما بقبل
زاد الخير : وأنا ما بقبل
الملك : ييييييي على هالشغلة , لمن كانت الرعية موجودة , ما كانوا يتفقوا على راي , شي يقولو اي , شي يقولو لأ , لمن زاد الخير صارت الرعية صارت كلمة وحدة يا إي يا لأ
جاد الحكيم : يا مولانا خلي عطفك على زاد الخير
الملك : يا قايد ,يا جاد الحكيم .. اعملوا لشعبي المحبوب زاد الخير متل ما بدها
زاد الخير : شيلوا عنا حصة الملك
الملك : شيلو حصة الملك , خففو الضرايب , افرطو السخرة ما تشغلو حدا ببلاش ادفعوا مال لزاد الخير بدون ما تشتغل ..
زاد الخير : لو المال تفاح كنت باكلون , لو المال تياب كنت بلبسون , هلأ هني والتراب متل بعضون منين بدي اشتري فيون ومن مين , إذا ما في ناس لشو المال
الملك : بتعرف يا جاد , صار العرش بإيد زاد الخير وبديت تهزو , مش لازم استسلم لازم اخلق رعية , فلتو المساجين خليهون يصيرو رعية
جاد الحكيم : ملك رعيتو المجرمين !!
الملك : مش أحلى ما تكون رعيتو خيالات الشجر ؟ أيكتب لهذا الملك التعيس أن يحمل كيسه ويندار يشحد على أبواب الملوك .. يا قايد فلّت المساجين ..
طلعنا .. طلعنا .. تحررنا .. طلعنا
طلعنا على الضو طلعنا على الريح
طلعنا على الشمس طلعنا على الحرية
يا حرية يا زهرة نارية يا طفلة وحشية يا حرية
صرخو ع العالي على العالي اركضو بالحقالي على العالي
قولو للحرية نحنا جينا وافرحوا .. افرحوا
يا ليل يا حب يا دروب يا حجار الحقونا ع الشجرة البرية
غيرو أساميكن إذا فيكن ولون عيونكون إذا فيكن
خبو حريتكم بجيابكم واهربو .. اهربوا
ع الضو ع الريح ع الشمس ع البرد ع بيادر مضوية ومنسية
اهربوا .. اهربوا .. اهربوا
______
بيتي أنا بيتك وما إلي حدا
من كتر ماناديتك وسع المدى
نطرتك ع بابي وع كل البواب
كتبتلك عذابي ع شمس الغياب
لاتهملني لاتنساني
ماإلي غيرك لاتنساني
بلدي صارت منفى
طرقاتي غطاها الشوك والاعشاب البرية
ابعتلي بهاالليل من عندك حدا يطل عليي
بيتي أنا بيتك وما الي حدا
من كتر ماناديتك وسع المدى
لاتهملني لاتنساني يا شمس المساكين
من أرض الخوف منندهلك ياشمس المساكين
من ايام المظلومين
من لفتات الموعودين
عم اندهلك خلي يضوي صوتك عليي
أنا ع الوعد وقلبي طاير صوبك غنية
لاتهملني لاتنساني .. ياشمس المساكين
من أرض الخوف منندهلك .. ياشمس المساكين
أنا زهرة من زهورك باركني ساعدني
بالدمع بتزرعني بالفرح بتحصدني
عدلك فاض عليي كرمك ضوعني
إذا كلن نسيوني وحدك مابتنساني
ناديتك من حزني
عرفت إنك معي
وسعي يا مطارح ويا أرض اركعي
________________
الملك : زاد الخير .. كيف حال الرعية اليوم ؟
زاد الخير : ضجرانة
الملك : اطلعي .. اطلعي تنتسلى
زاد الخير : لأ إنت انزل .. هون الشوك غطّى الشوارع لازمنا حدا يدعّس انزل
الملك : الملك ما بينزل
زاد الخير : والشعب مش رح يطلع
الملك : الهيئة مش رح نتلاقى
زاد الخير : الشغلة بإيدك يا مولانا
الملك : وآخرتا معك . . هيأتك عايشة ع ذوقك تحت , بدي أعرف مين الملك أنا ولا إنتِ
زاد الخير : المحابيس اللي فلّتون هربوا
الملك : عارف عارف .. ما عاد في غير وجهي ووجهك
زاد الخير : يمكن واحد منا صار لازم يروح .. يا أنا يا إنت ..
الملك : ما بيصير مملكة بلا ملك
زاد الخير : وما بيصير ملك بلا شعب
الملك : اي أنا ما قلتلون يفلّوا
زاد الخير : ظلمك قلون .. راحوا وما سألت عليّون , أنا ليلية بشوفون تايهين تحت النجوم لا أكل ولا شرب ليلية بتجي خيالات ولادون العطشانة تشرب من برك المي وتهرب متل الغزلان
الملك : ولك يا عمي هني فلّوا حتى يسقطوني , لكن أنا اجتزت الأزمة وبقيت
زاد الخير : إنت بقيت , لأني أنا بقيت .. لكن هلأ عم قول لحالي إذا رح ضل , إنت رح تضل , وبيكونو اللي راحوا راحوا بلا تمن , من شان هيك , رح البس فقري وتعاستي وتوّج حالي بالأعشاب البرية واتمشى باحتفال تحت زينة الشجر وقبة السما صوب ارض جديدة اتمشى وكل ما ببعد مسافة عرشك بيغرق شبر حتى توصل إنت للأرض وأنا للحرية ..
الملك : لأ يا زاد الخير لا تروحي وقوليلون يرجعو أنا بحبون
زاد الخير : إنت قلون
الملك : ما بيسمعوا مني
زاد الخير : إذا بدك اياهون من صحيح , بيرجعوا . .. أنا رايحة .
الملك : زاد الخير .. اوقفي .. بدي اياهون بدي اياهون , شو بينفعني ملكي بلاهون , هلأ حتى شفت حالي , شفت الملك قشة على بيدر معول بحقلة متروك
يا صحاب البيوت وينكون .. الملك جايي لعندكون وينكون .. جايي بتياب الملك يزوركون حدا يرد عليه .. لا تخلو الملك ينطر ع البواب .. يا صحاب البيوت شحدوني كلمة حلوة .. جايبلكون مجد المملكة وتاج الملك وزعوون ع الولاد خليون يتسلو يا صحاب البيوت يا صحاب البيوت يا صحاب البيوت
زاد الخير : يا صحاب البيوت .. الملك جايي يزوركون .. عم بيدق بوابكون .. الملك عم يندهلكون .. البيوت عم تندهلكون يا صحاب البيوت ..
غني يا مدينة , وسعي يا مدينة
رجعوا الناس وعمرت المدينة
وصل الضيف وأنا على بابي
قلي جايي زور صحابي
عنكون سألني صار يحاكيني
ويسميكون ويسميني
بيوتنا صغيرة لكن تفضل
مقاعدنا واطية لكن تفضل
ما في عنا دهب وزينة
عنا سياج وفوقو ياسمينة
الملك : شو أنا بلاكون , أنا بيدر مهجور , أنا قشة بالريح , أنا بيرق مكسور
نزل الحاكم لعند الناس , فات على بيوتون صار من الناس
قعد ع المقاعد سهر بالزوايا يومها انغفرت كل الخطايا
جايي جايي من الجبل جايي والسما زرقا والدني مضواية
واصل واصل بالفرح واصل زرع القصيدة وضاعت الفواصل
طاير طاير بالقصص طاير حبك الأول وحبك الآخر ..
(تم إجراء آخر تعديل على هذه المشاركة: 10-24-2010, 08:29 PM بواسطة بسام الخوري.)
|
بحث
قائمة الأعضاء
التقويم
وثائق المساعدة
/
ناطورة المفاتيح من أروع المسرحيات التي قدمها الرحابنة
