Hani Nawaya
"رسالة إلى من يعيش بقلبه وروحه معنا... إلى مغتربي مدينة حمص في المهجر..."

والله العظيم ماني عرفان من وين بدي بلش... بس صدقوني كل م بحكي مع حدا منكم بحس بالقهر والزعل... ما بدي منكم تحمّلونا هم فوق همنا... كل ما بحكي شخص مغترب بلاقي الحزن والألم بصوتو... مانو عم يعرف ياكل ولا يشرب... لا ليلو ليل ولا نهارو نهار... طيب ليييييش!!! بجاوبك كيف بدي آكل وإشرب وعيش وأهلي وناسي وأحبابي بحمص عم يتدبحوا وينقتلوا كل يوم... لدرجة صرت حس إنّو الألم اللي عم يعيشو المغترب أصعب بمية مرة من اللي عم نعيشوا نحنا... أنا بقلك يا أخي... إنو الحياة مستمرة... ونحنا هون بحمص عم ناكل ونشرب... وعم نساعد بعضنا بكل شي بنقدر عليه... رغم الحصار والدمار... رغم القصف والقتل اليومي... بس الحياة بدها تستمر... رغم الجراح... كلياتنا بنحزن وكلياتنا قلوبنا عم تبكي على هالمناظر اللي عم نشوفها كل يوم... بس إنّك تحمّل ذنب هالناس اللي عم تموت عليك وحدك... هادا ما بصير... أول شي ما حدا بموت ناقصو عمر... تاني شي اللي عم يستشهد عم يرتاح... وعم يكسب الشهادة اللي كلياتنا بنحلم فيها... تالت شي... إنت بتقدر تخدم الثورة حى لو كنت برا البلد.. إنت جزء من هالثورة... لإنك أولاً وأخيراً بتنتمي لهالبلد... ثورتنا بحاجة لدعمك قبل دموعك وحزنك... التفاؤل أساس النجاح... ونحنا لو ما متفائلين بالنصر كنا استسلمنا من زمان... حاول تدعم الثورة... بكلمة حق... بالمال... بأي شي بتقدر تقدموا... لا تيأس ولا تحمّل نفسك فوق طاقتها... نحنا منتصرين... والله العظيم منتصرين... ماني عم قلك هالشي من فراغ... نحنا ولاد هالبلد... ومعايشين الثورة لحظة بلحظة... وأملنا برب العالمين كبير... بدنا منك شغلة وحدة بس... بس تخلص هالثورة... بدنا ياك ترجع عبلدك.. وتتركلنا هالغربة عاد... بدنا ياك تشارك معنا ببناء سوريا الحرة... هادا أهم شي عنا... نحنا هلئ عم نشتغل منشانك... وبدنا ياك بوقتها تشتغل معنا... منشان البلد... وأهل البلد.