يا زملائي الأفاضل .
مساكم الله بكل خير
و أجدع سلام على الناس الأمرا
أعلم أن هناك قليلون لديهم القدرة و المستوى الثقافي لمتابعة هذه الدراسة ،و لهذا أريد أن أقطع سياق هذه الدراسة قليلآ لأتحدث بشكل مبسط بل و حتى باللهجة العامية حتى يفهمها الجميع .
ماهو رد الفعل تجاه هذا النص الموجود في القرآن و " قَاتِلُوا الَّذِينَ لَا يُؤْمِنُونَ بِاللَّهِ وَلَا بِالْيَوْمِ الْآخِرِ وَلَا يُحَرِّمُونَ مَا حَرَّمَ اللَّهُ وَرَسُولُهُ وَلَا يَدِينُونَ دِينَ الْحَقِّ مِنَ الَّذِينَ أُوتُوا الْكِتَابَ حَتَّىٰ يُعْطُوا الْجِزْيَةَ عَنْ يَدٍ وَهُمْ صَاغِرُونَ" (التوبة-29) .
مفيش رد فعل واحد أو ( استجابة ) واحدة لهذا النص ، ليه ؟. لأن الناس ليسوا كلهم على نفس المسافة من التفكير الإسلامي التقليدي ، ( كويس !) ..نوضح أكثر .
1- أبدأ بالحالات النادرة و هي واحد نسميه المثقف العلماني ،و ده يمكن أن يكون مسلم مؤمن يصلي و يصوم ،و لكنه يؤمن بسبب ثقافته المدنية ومش الدينية بالطبع ب(فصل الدين عن الدولة) ، يعني الدين حاجة شخصية بالإنسان و الدولة حاجة تانية عامة زي شركة مثلآ .. أحب أن أؤكد أن مثل هذا الحالة ليست شائعة بين المصريين ولا حتى العرب ، ففيه ناس ملحدين و لكنهم مش علمانيين ، دا موضوع كبير مش مكانه هنا . هذا المثقف لن يفكر في النص أصلآ وهو يناقش علاقة المواطنين داخل المجتمع . الكلام دا مش مزيكة و لكنه كلام مضبوط جدا .. هو لا يفكر في النصوص الدينية إلا في الصلاة و العبادات بس ، طيب فيه عاقل يحل مسائل الفيزياء بأغنية تحت الشجر يا وهيبة أو يا وحشيني رد عليه ازيك سلامات . نفس الحكاية بالنسبة للعلماني الأصلي اللي مش مضروب ، لا يفكر في الشؤون العامة بالنصوص الدينية ( المقدسة ) ليه ؟. لأن النصوص الدينية مش نظريات علمية و لكنها نصوص ثقافية زي الشعر مثلآ .إزاي بيفكر الراجل العلماني ده ( او الست دي ) بطريقة مختلفة عن المجتمع رغم أنه من المنصورة زينا ،و اتربى في مصر و بيقول انه راجل جدع و حريف كورة زمان . طبعا دي مش حالة عامة ، فيه ناس بتطلع شيطاني زي زويل و مجدي يعقوب و ... استثناء و لكنه معروف في نظريات الإجتماع ، عموما سيبنا منه و يمكن نقول انه (بيمثل و بيقول الحاجات دي عشان نقول عليه مثقف ) و ده بيقوله البعض من التافهين بالفعل لأنهم بيفتكروا كل الناس أغبياء و جهلة زيهم .
2- طيب الثاني برضه علماني بس علماني بالمحاكاة .. بالتقليد يعني . لبناني يعيش في الغرب ، أو مصري بيعمل في جو الإستثمار و الشركات و البيزنس ،و طبعا في وسط مسيحيين و أجانب و ... ، ده لو قرأ النص و توقف عنده ، هيقول لنفسه .. " الكلام دا مش ممكن يحصل ، دا زمانه فات خلاص ، طنش يا راجل .. جزيه ايه و خيبة ايه ، دا كلام بتوع الإخوان و الشركات الإسلامية بيضحوا بيه على الغلابا " ، هوه برضه لن يأخذ الحكاية جد ،و لكن مشكلته إنه بلا جذور ولا قناعه و يمكن يقلب مع تغير الظروف ،ودول كتير جدا أكثر من الهم ع القلب جوه النادي و براه أكتر .
3- ندخل ع الجد .. فيه ناس طيبين و مخهم على قدهم مثل أغلب المشاركين ، هؤلاء يتبعون الفقه السائد أو ( الخطاب الإسلامي الوهابي أو الأصولي ) كما نقول نحن اللي غاويين ثقافة و محاكاة الغرب الصليبي الملعون في التفكير المنهجي العلمي ، هؤلاء الطيبين يتبعون قاعدة فقهية سائدة بالفعل هي أن (العبرة في عموم اللفظ لا في خصوص السبب) ،و بالتالي فهي (قد تنزل على واقعة لا تتفق مع الأولى في علة جامعة) ، بالنسبة لهؤلاء فالنص واضح جدا ،ولا يحتاج لسفسطة فارغة من " مثقف أخوك لا بطل " ها ها !. كلام ربونا يا مؤمن ، يعني لما تقوم دولة الإسلام في مصر وقتها ناخذ الجزية لأن دا شرع الله ، بس هيه فين دي دولة الإسلام و عظمة الإسلام و سماحة الإسلام الوسطي !؟، طبعا الناس دول يعدون نفسهم لنصرة الإسلام بأكل سندوتشات الفول وشرب الشاي و تدخين الحشيش و السجاير و الدق ع الكي بورد و مهاجمة " الزفت " بهجت بتاع النوادي اللي مش حاسس بألام الشعب و لا شعبولا القلة !. بس لا نريد التقليل من شأنهم ..دول يا صاحبي يمثلون 90% من المسلمين الشعبيين الآن و حتى قيادات من عينة الشيخ الإمام حسن البنا و مهدي عاكف و محمد بديع و ... كلهم كلهم .
4- طيب إزاي يفسر الناس دول إنهم مابيطلبوش بالجزية ،و أن دولهم بتعلن أنها دولة مواطنة لكل المواطنين ، و المسيحي زي المسلم ، طبعا مش هيغلبوا ، فالحكاية كلها هبل في هبل يعني استهبال . غالي و الطلب رخيص .. دا اسمه تعطيل ، يعني الحكم قائم ولازم ، بس التنفيذ هوه اللي يستنى حاجة بيسموها .. (التمكين ) ، يعني يستنوا لحد ما تقوم حرب نووية و تنتهي أمريكا و الصين و أوروبا و العالم كله ،و ميبقاش غير المسلمين ،و قتها .. هبوه .. هات الجزية يا عم شنوده ، و خلي عينك في الأرض .. يا صاغر يا وحش !.
5- يبقى قلة صغيرة من بعض المثقفين الإسلاميين من عينة جمال البنا و دول بلا قاعدة ولا شعبية ، دول زي ما بنقول " يحسنون الظن بالله " و العياذ بالله ! ، وهم بيقولوا أن الأحكام مرتبطة بأسباب النزول " هذه الأسباب (تقيّد) مدلول النص وتجعله مرتبطا بتلك الحادثة التي من اجلها نزلت الآية" ، و لكن هؤلاء يتهمون بالزيغ في العقيدة و أن هذا الموقف حسب رأيي شيوخ التلفزيون و الخليج " يتنافى مع صلاحية القرآن واحكامه لكل زمان ومكان " ، يعني دول بيقولوا أن نص الجزية ليس عام بل محدد بواقعة و قبائل معروفة و في زمان و مكان زمان .. ،و لكنها مش عامة تشمل الجميع ،و هي لا تشمل مثلا أقباط مصر أحبابنا و اخوانا ، و لكن معظم الشيوخ بالأخص من لهم علاقة بالسعودية و الخليج و الإخوان و التكفير و معكمينهم الفلوس من دولار و يورو ... طبعا لا يعجبهم هذا الكلام ، يكفروا اللي بيقوله ، لأنهم هيخلوا الأحكام مش نافعة و مش هيبقى من الدين غير العبادات و الأخلاق زي المسيحيين ، يبقى ازاي دولة و دين ؟.
6- الداهية كلها لما يجي واحد يتفلسف زي نصر أبو زيد .. أيوه ده اللي مات من شهرين ،و يكلم ناس متخلفين عن حاجة اسمها تاريخية النص ، يعني مصيبة .. النص بتاع ربونا يبقى تاريخي ، يعني ميعرفش حد يفهمه صح إلا في زمنه .. أمال ازاي يبقى يصلح لكل مكان و زمان ،و يبقى بتوع الإسكيمو يتمموا صعيدا طيبا ؟!. ده لازم يتكفر و يفرقوا بينه و بين مراته و حتى الشغالة بتاعته و بنت الجيران كمان .. ليه لأنه ولا مؤاخذه كافر ومش من بتوع ربونا .
7- طيب و اللي مش مسلم هيفكر ازاي . الحكاية مش عايزة فتاكة ، تماما زي ما المسلم هيفكر لو جالله واحد مسيحي او بوذي في البلاد اللي هم فيها أقلية ( 90 دولة ) و طلب منه غما يؤمن بالبوذية مثلا أو يقطعوا رقبته او يدفع مبلغ جزية و لازم يكون عينه في الأرض زي .... لا مؤاخذة ، لو واحد قالك الكلام هتقول عليه ايه ؟. هل هتقول ده دين سماوي ولا دين عصابات و لصوص ؟!. عايز كل واحد يفكر و يقول بصراحة لنفسه .
هنكمل بعدين لو فيه مناسبة .( مترجم من الثقافية إلى العامية بواسطة بهجت ) .

جميل جدا يا استاذ بهجت واحيي نزولك الى مستوانا حتى نفهمك اكثر , ويمكن تعتبرني اتفق مع جمال البنا احيانا كثيرة واحيانا اخرى مع نصر حامد ابو زيد فتلك الاية التي اؤمن بها مرتبطة بحكم زمني وقتها لاننا لا يمكن ان نقطع اي جملة من كتاب عادي من سياقها اصلا .

واجدع ناس المنصورة فهم محبوبون من جميع محافظات مصر

تحياتي

(09-01-2010, 06:14 AM)علي هلال كتب:  جميل جدا يا استاذ بهجت واحيي نزولك الى مستوانا حتى نفهمك اكثر , ويمكن تعتبرني اتفق مع جمال البنا احيانا كثيرة واحيانا اخرى مع نصر حامد ابو زيد فتلك الاية التي اؤمن بها مرتبطة بحكم زمني وقتها لاننا لا يمكن ان نقطع اي جملة من كتاب عادي من سياقها اصلا .

واجدع ناس المنصورة فهم محبوبون من جميع محافظات مصر

تحياتي

يا أخ علي هلال .
صدقني اللهجة العامية أصعب لأن الواحد لازم يكون فاهم قوي عشان يعبر بلغة الحياة اليومية ، كثير قوي تكون الرطانة العلمية هروب شيك (من الإبانة ) ، يعني كاتب يكرر مقولات و السلام زي ما يعمل أخوانا الوهابيين في النادي ده و غيره .
أنت بتقول كلام صح قوي ، مستحيل تفصل نص من مكانه ( من سياقه للتجمل !) ، احنا مجبناش حاجة من بيتنا لأن ده اللي كان شائع في مصر و بنفهمه تلقائيا ، احنا المصريين ناس سمحين أو كنا كده ، بنحب الشعوب التانية و هما بيحبونا ، عشان كدا فهمنا القرآن بقلوبنا الطيبة ،و حتى الشافعي الفقيه لما جه مصر غير الفقه بتاعه و خلاه أسلس من الفقه اللي كتبه في العراق ، صدقني اني قرأت القرآن كله مرات بلا عدد و كنت حافظ معظمه رغم دراستي الهندسبة ،و عمري ما فهمت منه اننا نعادي المسيحي أو ان الجزية لها معنى دلوقت ، أو إن أحكام زي احكام العبيد أو السبايا أكثر من حاجات تعرفنا ازاي كان المسلمين بيفكروا زمان ،و كانت شخصية النبي أنه راجل طيب و فقير و انه اضطر للدفاع عن نفسه ، وان الحرب لا تشرع إلا للدفاع عن النفس لما لا يكون هناك أي حل آخر ، استمر الحال كده حتى هوجة أنور السادات وده طلع راجل متأسلم وله علاقات مريبة بالسعودية و أمريكا ،و كل يوم بيظهر أكتر المصايب اللي جابها بسبب غباء الست والدته . فجأة هبت علينا رياح خماسين سودا ،و جابوا لنا اسلام جديد خالص كله ريحة جاز و نسوان و غباء لا يتصوره عاقل ، و قالوا لنا أننا كنا كفرة أو بالقليل جهله بديننا ، و إن الدين هو قتل الاخر و تحقير المرأة ، التي ليست الأخت و الأم و الإبنة و الزوجة و لكنها أداة الشيطان !، و الجزية و الرزق تحت ظلال الرماح ،و دار الإسلام ودار الحرب و ..... ، و أن النبي مجرد قاطع طريق وزير نساء و ...، ببساطة النموذج الوهابي اللي ورده لنا السعوديون و فرضوه بفلوسهم و بعملائهم من التدين السياسي يعني الإخوان و الجماعات الإسلامية ، و الأخطر شيوخ الزهر اللي باعوا ضميرهم مقابل المال زي الغزالي و القرضاوي و .... عد على كيفك ، غير مؤشر الراديو على الموجة الجديدة و بدل ما تقبض من وزارة الأوقاف 50 جنيه في الشهر هيوصلك ملايين الدولارات ، وده اللي حصل بالضبط ، و اعطيني اسم واحد منهم خسر فلوس بسبب موقفه الجديد !. يعني رزق الهبل ع المجانين اللي هم السعوديين و احنا كمان اللي بنرقص على أي مزمار حتى لو كان مزمار عدونا ، لأن معندناش رجاله بجد ولا مثقفين بجد ولا نظام قوي ولا شخصية قوية .
بعد شوية جه الحاج الخميني بأفكاره اللي عمرنا ما سمعنا عنها في مصر ، مهدي جاي و آخر الزمان و الشيطان الأكبر و الشيطان النونو كوتوموتو ، و كله حدف على مخ المصري المسكين ، اللي مش متعود على الحاجات دي ، و اللي تربى على اسلام الشافعي و ابوحنيفة و على الأخلاق و الفضيلة من غير سياسة و خرافات آخر الزمان . دي كلها من وهابية إلى الولي الفقيه إلى ... كلها حركات سياسية اسمها حركات " إحيائية " يعني عودة المذاهب الإسلامية لتتحكم في الحياة السياسية و اليومية زي ما بنشوف في العراق دلوقت .معدش الإسلام دين بين الإنسان وربه و لكنه سياسة بين الإنسان و الإمام أو المرشد أو المفتي أو ..... ، أما دين زمان فمفيش حد بيبكي عليه ، زي أي واحد طيب مسالم محدش بيفتكره إلا ناس قليلين خالص زي بهجت اللي كان سعيد و فخور بيه زمان ،ودلوقت مش هقول هيخجل منه ،و لكنه يخجل من الوهابية اللي مغطياه ببرقع و نقاب و حجاب ولكن بلا لباس تحت هذا كله !.و المضحك إن كل الناس في العالم عارف ايه تحت النقاب و شايفينه و فاهمينه و بكده بقى الإسلام مهزأة و النبي مادة للنكت و الكاريكاتير ، مش بس لأن هناك من بيكره المسلمين ،و لكن لأن المسلمين هما اللي ماشين ورا شوية زمارين و جهلة و بيشوهوا صورتهم حتى مدش في العالم بقى طايقهم ولا عايز يسمع اسمهم . تعرف أن المؤرخين كانوا بيقولوا إن المسلمين اتعرفوا بالتسامح ، فين راح التسامح ؟. هل الهبل ده اللي مالين بيه النادي اليومين دول تسامح ؟، واحد مصري كان بيهددني أنني بالدفاع عن المسيحيين هخليه يثور على جاره المسيحي و يمكن يقتله ولا يضربه ( او يسرقه ) يعني هذا الغبي ميعرفش أن دي طريقة تفكير صايع لا يشرف دين ولا عيلة ولا بلد .
طيب نفكر بعقل شوية .. قرفنا العالم بهذه الطريقة و استمرينا نعتدي على المسيحيين و نلعن دينهم و نراهم كفار و ... ،و نتحدث عن جزية و حروب و... ، و نرفض المم المتحدة و حقوق الإنسان لأنها مش اسلامية ( يعنس مش وهابية طبعا ) ، طيب ايه اللي يمنع انهم يقفلوا علينا الميه من أثيوبيا ،و يمنعوا عنا القمح و يفرضوا علينا عقوبات أول من سيطبقها السعودية نفسها ،و يخلونا نسف التراب ؟. ساعتها العيال اللي بيهرضموا هنا و هناك اول من هيعيط و يلعن دين أبو الإسلام و اللي جابه خاصة لو منعوا عنهم الحشيش .
يعني شوية عقل مش هتضر حد . المصري طول عمره فقير و متحضر ، و هما عيزينه يظل فقير بس كمان يبقى متخلف زيهم .
هي دي الحكاية .
لو فيه وقت هواصل الحكاية .

أتفق معك بنسبة 99% واتمنى ان يتسع الوقت لتواصل حكايتك الحقيقية المعبرة , واشكرك على تعبك , وان شاء الله نرجع مصر زي زمان .

(09-01-2010, 12:15 PM)بهجت كتب:  ، صدقني اني قرأت القرآن كله مرات بلا عدد و كنت حافظ معظمه رغم دراستي الهندسبة ،و عمري ما فهمت منه اننا نعادي المسيحي أو ان الجزية لها معنى دلوقت ، أو إن أحكام زي احكام العبيد أو السبايا أكثر من حاجات تعرفنا ازاي كان المسلمين بيفكروا زمان ،و كانت شخصية النبي أنه راجل طيب و فقير و انه اضطر للدفاع عن نفسه ، وان الحرب لا تشرع إلا للدفاع عن النفس لما لا يكون هناك أي حل آخر ،




طيب نفكر بعقل شوية .. قرفنا العالم بهذه الطريقة و استمرينا نعتدي على المسيحيين و نلعن دينهم و نراهم كفار و ... ،و نتحدث عن جزية و حروب و... ، و نرفض المم المتحدة و حقوق الإنسان لأنها مش اسلامية ( يعنس مش وهابية طبعا ) ، طيب ايه اللي يمنع انهم يقفلوا علينا الميه من أثيوبيا ،و يمنعوا عنا القمح و يفرضوا علينا عقوبات أول من سيطبقها السعودية نفسها ،و يخلونا نسف التراب ؟. ساعتها العيال اللي بيهرضموا هنا و هناك اول من هيعيط و يلعن دين أبو الإسلام و اللي جابه خاصة لو منعوا عنهم الحشيش .
يعني شوية عقل مش هتضر حد . المصري طول عمره فقير و متحضر ، و هما عيزينه يظل فقير بس كمان يبقى متخلف زيهم .
هي دي الحكاية .
لو فيه وقت هواصل الحكاية .

طيب يا أستاذنا لو واحد زى حالاتى بيفكر بالظبط زى حالاتك كده , وله تفسره الخاص لأيات الجزيه من خلال منطوق القرأن نفسه , فأنا أرى أن الأمر " قاتلوا " هو أمر دفاعى وليس أمر هجومى , فقاتلوا تعنى أن هناك جيوشا قد تمترست ضد الدوله وتحاربها لمنع الجزيه ومن الطبيعى قتالها , يؤكد ذلك صيغه الجمع المستخدمه فى الأيه من مثل " لَا يُؤْمِنُونَ " و " وَلَا يُحَرِّمُونَ " و"وَلَا يَدِينُونَ " و " وَهُمْ صَاغِرُونَ " بعكس لو كان الأمر " اقتلوا " فالأمر هنا هجومى و ضد كل " فرد " منع الجزيه ورفض دفعها .

كما أن كلمه " حتى " الوارده بالأيه هى شرط توقف القتال "حَتَّىٰ يُعْطُوا الْجِزْيَةَ عَنْ يَدٍ وَهُمْ صَاغِرُونَ" وهذا يعنى أنه لو أن أهل الكتاب أمتثلوا " ابتداءا " لقرارات الدوله وما تفرضه من ضرائب ما كان هناك داعى أصلا للقتال , وأن القتال تم شرعنته فى حال الامتناع عن دفع الجزيه وتجييش الجيوش لمقاومه الدوله فى هذا الأمر .

وهذا الواحد اللى زى حالاتى يرى أن الجزيه الأن لا محل لها من الاعراب فى ظل ما يؤديه المواطن من ضرائب فى ظل دوله المواطنه , والذى يتجاوز كثيرا الجزيه التى كان يتم تأديتها الى الدوله فى ذلك الزمن .

بل أن هذا الواحد اللى زى حالاتى تجاوز وتخطى هذا التفكير الى مرحله انكار بعض الحدود التى يدعون كذبا أنها اسلاميه مثل حد الرده وحد الرجم , فيا ترى فى أى فسطاط تضع هذا الواحد اللى زى حالاتى من ضمن فساطيطك الثلاثه ؟

ياترى علمانى من المنصوره , ولا علمانى بالمحاكاه , ولا من الناس الطيبين اللى عقلهم على قدهم ويتبعون الخطاب الوهابى الأصولى ؟

(09-01-2010, 03:22 AM)بهجت كتب:  طبعا الناس دول يعدون نفسهم لنصرة الإسلام بأكل سندوتشات الفول وشرب الشاي و تدخين الحشيش و السجاير و الدق ع الكي بورد و مهاجمة " الزفت " بهجت بتاع النوادي اللي مش حاسس بألام الشعب و لا شعبولا القلة

بس خلاص ....

كده أنا عرفت فى أى فساط تم تصنيفى

ده رغم أنى مبحبش الفول , وعمرى ما دخنت الحشيش .

وا حسرتااه

أنا بس عاوزك تفرد مساحه أكبر لنماذج أكثر داخل وعيك , فالمسلمين لا ينحصرون فى تلك النماذج والتيارات الثلاثه فقط , وليسوا جميعا يعانون من وضاعه ونفاق بالسليقه والجينات الوراثيه , ولا كلهم علمانيون من المنصوره ولا كلهم يتبعون الفكر الوهابى الأصولى , هناك تيارات عديده لا تلقى أنت لها بالا .

وكل عام وأنت بخير

وعدت الأخ أرامند بالرد على تساؤله عن وجود نموذج آخر من الإسلام يقدر يكون جزء من الحضارة اللي الناس عايشاها ، و يسمح لي أرامند و تسمحوا جميعكم لي بالرد على هذه الجزئية بلغة أيضا بسيطة جدا .
لما نبص دلوقت على الإسلام اللي منتشر حوالينا هنشوف 2 إسلام ، اسلام شيعي أصبح له مركز واحد في إيران و له رئيس أعلى اسمه الولي الفقيه يعني مرجع للشيعة كلهم في أمور الدين و الدنيا ، يعني الشيعة يقت مش بس مذهب إسلامي (ع العين و الراس طبعا) ، و لكن برضه جماعة سياسية واحدة منظمة لها رئيس كلمته أوامر ربانية ، ودي مسألة مش مفروض تكون ع العين و الراس ، و لكنها موضوع سياسي فيه خلاف زي أي موضوع سياسي تاني ، ناس معاه و ناس متقبلوش . خلينا من حكاية الشيعة دي شوية لأنها أولآ تخص الشيعة بالأساس ، و ثاني حاجة الشيعة قفلوا على نفسهم خلاص ، و من سابع المستحيلات أنك هتلقى واحد شيعي يقبل مناقشة ( التشيع السياسي ) و سامحوني على التعبير الفني ده .. بشكل هادئ و بالعقل و المنطق ، ولو اعترضت حتى على زيادة وزن حسن نصرالله هيمسحوا باللي خلفوك البلاط ، و هتلقى نفسك عميل و خائن و من دول الإنبطاح و شقع بقع يا ديل الفار ، عندهم كل حاجة دين و المهدي قرب يظهر و همه وراه حتى يظهر الحق و طبعا هيبديونا كلنا بصفتنا الباطل و قتلة آل البيت .. إزاي قتلنا آل البيت اللي بعضنا منه معرفش ؟!..
طيب نشوف السنة اللي على قدنا ، و اللي لسه معندهمش ولي فقيه يقدسونه زي الأنبياء ، هنلقى زي ما قلت فيه مجموعة من المسلمات و الأفكار أصبحت كلها من صميم الدين و كلها ( معلوم من الدين بالضرورة منكرها كافر) يعني إيه ؟ . الشيوخ بتوع السنة دلوقت شدوا حيلهم ،وزي ما الشيعة بتفسق و تكفر اللي ميؤمنش بمعتقداتهم و لا بالولي الفقيه ، هما كمان مش أقل منهم و بيكفروا اللي يناقش مسلماتهم ، طيب و منين جابم تلك المسلمات ، هنلقى 90% منها أحاديث منسوبة للنبي و البعض اجتهادات لفقهاء بيقولوا عنها إجماع الفقهاء ، برضه إزاي اجمعوا و إمتى ؟ محدش عارف ، لأن كل مجموعة من الفقها بتقول عن أفكارها هي أنها معلوم من الدين و عليها إجماع و كل من ينكرها كافر . يعني احنا بقينا ملطشة لشوية فقها سنة و شيعة و دول ميعرفوش حاجة عن الدنيا حفظوا كلمات و بيتاجروا بيها و السلام . و لو دققنا شوية هنلقى ما يعرضه فقهاء السنة سواء رسميين زي بتوع السعودية ، أو شعبيين زي الشيخ حسان و الشيخ زفتان ينتمي لمذهب بعينه هو المذهب السلفي الوهابي، اللي شيوخه أحمد بن حنبل و ابن تيمية و ابن القيم و محمد بن عبد الوهاب ،وهو مذهب ضعيف كان معزول في نجد حتى جه ابن سعود و خلفائه و دعموه بأموال البترول فانتشر حتى أصبح نمرة واحد اللي بيكسب و يغني و يفقر و يميت و يحي . بقى إن الوهابية المنتشرة اليومين دول ما كنتش أبدا هي الإسلام ، و الغريب إن المتطرفين و المتعصبين و المستشيخين بتوع الدقون و النقاب أصبحوا يؤكدون إن ده بس صحيح الإسلام ، و الأغرب ان اللي بيكره الإسلام و ميحبوش لسبب أو آخر يؤكد هوه كمان أن النموذج الوهابي المنتشر اليومين دول هوه بس الإسلام ،و غير كده تجميل و كذب ع الدقون ، و النتيجة ان عندنا دلوقت أبشع نموذج للإسلام في تاريخه كله ، و ان الثقافة الإسلامية متخلفة و فيها العبر كلها ، ودا طبيعي جدا فالنموذج الموجود الأن هو نموذج صحراوي نشأ بعيد عن الحضارة و هوه بيكرها لأن الإنسان عدو ما يجهل ،ودا برضه اللي خلاني أكتب الموضوع ده .
هنا عندنا سؤال فين بقى الإسلام الحقيقي ؟، وهل قبل ظهور فكرة الولي الفقيه و هي فكرة مش قديمة قوي كان الشيعة مش مسلمين ،و هل قبل ظهور الوهابية كان السنة كفرة ؟.وهل دول بس أشكال الإسلام أو ما أقول عنه ( نماذج الإسلام ) . يعني إيه الحكاية بالضبط ؟.
الحكاية مش سهلة و عايزه شوية تركيز .
فيه حركات فكرية و عقائد كبرى عرفها الجنس البشري ، منها بل على رأسها الأديان زي المسيحية و الإسلام و البوذية و الهندوسية و .... . دي كيانات ضخمة جدا و زي الكائن الحي مظهرتش مرة واحدة كاملة النمو ،و لكنها ظهرت صغيرة و بعدين نمت و كبرت ، طيب ناخذ المسيحية هنلقاها ظهرت صغيرة و سرية و أخذت 300 سنة تنمو حتى و جدناها تبقى دين أكبر إمبراطورية وقتها هي الإمبراطورية الرومانية ، المسيحية . لما نمت تغير شكلها و بنقول عنها ( أعيد إنتاجها ) و دا كمان مكانش في شكل واحد ،و لكنها بدأت تتفرع ، بعض الفروع كبر و البعض بقى صغير ة البعض مات ، دلوقت بقى عندنا تنوعات كبيرة من المسيحية ، مختلفة في كل شيء فقط بتؤمن بشخص اسمه يسوع الناصري إنه هو المسيح ، هو الإله او ابن الإله أو كلمة الإله و لكن كل دول حاجة واحدة و ... الخ . عندنا دلوقت نماذج مسيحية زي الرومان الكاثوليك و الأرثوذكس و البروتسانت ودول متعددين جدا ، أنجليكان ولوثريين و كالفن و إيفانجيلكان و شهود يهواه و ... . كل واحد يدعي انه الممثل الأصدق لرسالة المسيح و دينه . الإسلام برضه نفس الشيء ، فالإسلام نمى و انتشر خلال قرون طويلة و بين شعوب كثيرة جدا ، كثير من هذه الشعوب كان لها ثقافتها و حضارتها الخاصة قبل الإسلام زي الفرس و الرومان و الهنود و المصريين و ... كثير قوي ، كل واحد فهم الإسلام بعقله هوه و فكره ، و النتيجة الطبيعية أن يتغير شكل الإسلام و يتطور و يصبح ثقافة كونية كبيرة و النتيجة الثانية الطبيعية ظهور مذاهب و حركات و نحل كثيرة جدا كل منها يصبح بعد فترة نموذج يدعي انه هو وحده المعبر عن الإسلام . الخلاف داخل الإسلام كان حتى أكبر من غيره لأنها خلافات دينية و برضه سياسية ، خلافات ارتبط فيها الدين بالسياسة بالتحزب ب .... ، يعني لخبطة كبيرة ، و لو جه النهاردة حد يقولك أن ده هوه الإسلام و الباقي غلط متصدقوش ، معظم أو حتى كل المذاهب دي كانت مخلصة في اجتهادها ،و كلها كانت تعتقد أنها وحدها الفئة الناجية اللي بيقولوا عليها الفقهاء .
المسلمون اختلفوا بعد موت النبي على طول و الصحابة حاربوا بعض و كفروا بعض ،و 3 من خلفاء النبي ال4 ماتوا مقتولين و كلهم قتلهم مسلمين ،ومنهم 2 قتلهم مسلمين عرب . يعني الخلاف ليس جديد ولا دليل كفر ولا بسبب البعد عن الإسلام ، الخلاف طبيعي جدا . طيب نسيب السياسة و نرجع للدين ، برضه هنشوف مذاهب بلا عدد ولا حصر ، الشيعة مذاهب كثيرة منها الإمامية زي شيعة ايران و العراق ،و الزيدية في اليمن و الإسماعيلية في الهند و غيرها دا غير مذاهب اختفت كان لها اتباع زمان ، و السنة مذاهب كثيرة جدا ، فيه مذاهب اختفت و مفيش لها أتباع دلوقت زي المعتزلة و المرجئة و الجهمية ،و بالمناسبة لو كنا بنعيش دلوقت في زمن المأمون كنا بقينا معتزلة ، لأنه كان مذهب الخليفة و الدولة ، فيه الخوارج ودول اختفوا مبقاش منهم غير جماعة في عمان هي الأباضية ، و طبعا أهل الجماعة من حنفيين و مالكيين و شوافع و حنابلة ، ودول طبعا انقسموا ، فيه غيرهم علويين و دروز و .... كثير كثير ، فيه كتب للي عاوز يقرأ في المذاهب منها " الملل و النحل " للشهرستاني و فيه كتاب لمصطفى الشكعة هو " إسلام بلا مذاهب " و غيرهم كتير . طيب مين يعبر عن الإسلام الصحيح ؟. عشان خاطر النبي والولي محدش يقول لي إن مذهبه هوه اللي بيعبر عن الإسلام ، يعني دا كلام يقوله عيال دراويش ميفهموش ، رأيي المتواضع إن كل دول بيعبروا عن الإسلام ، الإسلام ماعدش حاجة بسيطة واحدة زي ايام النبي ، و لكنه زي ما بنقول ثقافة مركبة من " تقاليد " كثيرة .
فيه نماذج إسلامية محترمة معظمها من التاريخ ،و منها برضه المعاصر، و عندها المقدرة على التطور زي المعتزلة زمان ، و ليه أروح بعيد ، فيه كاتب اسمه برنارد لويس بيكره الإسلام ، رغم كده بيقول انه كان دين متسامح ،و ضرب مثل بنظام أهل الملة التركي و كان بيشوفه رائع جدا . في الوقت اللي كان فيه الكاثوليك بيحاربوا البروتسانت في أوروبا كان الإثنين عايشين بامان في الإمبراطورية العثمانية ، يعني المشكلة مش هيه الإسلام و لكنها الطريقة اللي بنفكر بيها . و فيه حتى نماذج معاصرة زي الإسلام المصري قبل غزو البترول و فلوسه ، يعني ناس راقية عندها حسن ظن بالله ،و بتركز على الأخلاق و التسامح ، ناس نفسها حلوة و عشان كده ما بتشوف غير الحاجات الطيبة ، يعني لما كان غبي من 40 سنة في مصر يخطر في باله حاجة زي الحجاب أو النقاب كان الشيخ يقوله حديث عن النبي عن أبي هريرة: قال رسول الله : (( إن الله لا ينظر إلى أجسادكم , ولا إلى صوركم , ولكن ينظر إلى قلوبكم ))، شايف الفكر النضيف الراقي ، دلوقت الشيخ اللي عاكم كام دولار يصور لك الله تافه لا يشغله غير الحجاب و النقاب و هدوم الستات و بيقضي كل وقته بيلاحق الستات بشريط القياس ، يعني عيب قوي حد يقول ده دين الإسلام ، و لكن شيوخ الوهابية و اللي وراهم ناس تافهة فعلا ،و اللي بيقلدوهم أتفه منهم . عرفنا في مصر زمن عبد الناصر اسلام بيعطف ع الفقرا و بيقول عن النبي زي أحمد شوقي ما قال ( الإشتراكيون انت إمامهم ) ، و لا يضطهد المسيحي ولا حتى اليهودي ، كان المسيحي يروح معانا الجامع و يستنى بره حتى نصلي عادي جدا ،و كنا بنروح الكنايس عادي برضه ، و نسكن مع بعض و نحتفل باعياد بعض ،و حتى دلوقت بحتفل بشجرة الكريسماس زي العيد الكبير و العيد الصغير . ولو حد فكر يقول الجزية و غيرها ، كان بيلقى اللي يقوله من رجال الدين إن ده في زمن كان المسيحي مش من الدولة اللي كانت اسلامية ،و لكن دلوقت بحمد الله أصبحنا بنعمته إخوانا و الدولة مصرية و المسيحي بيحميها و يدافع عنها قبل المسلم ، يبقى جزية ايه بقى ، الدين لله و الوطن للجميع ، دا كان ترتيب مؤقت معدش له لوزوم ، و بطلوا كلام زي السعوديين ، دول لسه عايشين في الصحرا بعيد عن العالم ، علموهم الحضارة بدل ما تتعلموا منهم تقفيل المخ و فقه العميان .
ليه ميكونش الإسلام ضمن الحضارة .. ليه يعاديها ؟ ، هيطلع لي واحد و يقول لي النصوص ، كويس النصوص لها أسباب و لما تنتهي الأسباب تنتهي الأحكام ، هناك حاجة اسمها ( الإنتقاء ) يعني نطنش حاجة و نركز على حاجة ، التطنيش مش عيب لأن فيه حاجات انتهى زمانها فعلا ، يعني لما ابنك يكبر تفضل برضه تكلمه عن غسيل اسنانه قبل النوم ،ولا تكلمه عن حاجات بتاعة سنه ؟ . هوه سعد زغلول ولا النحاس ولا جمال عبد الناصر ماكنوش مسلمين ؟، الإسلام مش ضد الوطنية إلا عند الإنسان المشوش المتخلف ، مصر لازم تكون حتى قبل الإسلام ، لأن الإسلام دين محله القلب ومش محتاج حد ، و لكن مصر كيان مادي تحتاج أولادها يحموها و يعمروها عشان نعيش فيه حياة إنسانية ولو .
يمكن يكون لنا عودة .

(09-01-2010, 03:22 AM)بهجت كتب:  ( مترجم من الثقافية إلى العامية بواسطة بهجت ) .

عزيزي بهجت :
حقيقة لقد كنت غير موفقاً في هذه الحركة على الأقل بالنسبة لي ...
هذا يعني بشكل أو بآخر أنك تقر -ولو بشكل ضمني- بانفصالك عن الواقع العربي في أسلوب الخطاب .
لن أتدخل وأملي عليك طريقة الكتابة التي تحبذها أو التي تمليها عليك الظروف .
نعم لا بأس من العامية هنا أوهناك ، لكن أكثر ما يقتل التواصل الفكري هو تخصيص نص فكري بلهجة بلد معين . هذا يؤدي إلى الانحدار بمستوى النص إلى المصطلحات العامية وأنت تعرف معنى هذا ، فالانحدار بلهجة التخاطب سوف يؤدي عاجلاً أم آجلاً إلى الانحدار بالمستوى الفكري المطروح وهذا ما يعرفه البعض (وأنت منهم) ويجهله البعض الآخر .
عندما أقرأ مداخلتك أو مداخلات البعض بالعامية أشعر نفسي في منتدى للتواصل الاجتماعي أو نادي لمحبي السيارات مثلاً ، وبالتالي يفقدني التركيز على الفكرة لتصبح بؤرة التركيز على اللهجة التي لا أتقنها ..!!

آسف على التدخل في خياراتك ... لكن إذا كنت تخشى من صعوبة التواصل مع بعض الأعضاء فإني أطمئنك أنا واحد من الأعضاء "الجاهلين والغير مثقفين" ومع ذلك لم أجد صعوبة في فهم طرحك بالفصحى .

لا تدع البعض يملي عليك طريقة الخطاب ، فإذا كان الشعب "الأمي" يريد الثقافة عليه أن يتعلم لغة الثقافة لا ان ينزل المثقف ليتكلم بلغة الأميين ...
ودعك من مخاطبة البعض بإسلوبه أسلوب "الهجايص والكلام الشِعبي " سعيد صالح - مسرحية العيال كبرت .

ملاحظة : مداخلتك الأخيرة لم أستطع أن أكملها ....

المعذرة ... وتحياتي

:

اقتباس:the holy man كتب : آسف على التدخل في خياراتك ... لكن إذا كنت تخشى من صعوبة التواصل مع بعض الأعضاء فإني أطمئنك أنا واحد من الأعضاء "الجاهلين والغير مثقفين" ومع ذلك لم أجد صعوبة في فهم طرحك بالفصحى .

هذا ماكان في نفسي ...وتمنيت لو جاء من يقوله .بالاصالة والنيابة!

وها...قد جاء الزميل هولي ...فقال هو ...وارتحت أنا !
لكن لماذا انتظرت من يريحني ...باعتراض مهذب كما فعل الزميل هولي مان؟

لاأدري!!
ربما هي رهبة التلميذ من استاذه..
ود.بهجت ليس اي استاذ..بالنسبة لي ...فرغم بلادتي وضعف تفاعلي
الا اني مازلت مصرا على نفس الكرسي في اول المدرج في مختبر
الدكتور بهجت منذا مايقرب من 9 سنوات ...

*ببساطة ...في هذا المختبر ..تم إعادة تشكيل عقلي ...
لذلك ...جفل هذا العقل..وارتج ..حين قرر د. بهجت تغيير الموجه

اخي هولي مان ..لا اتفق معك ...حسب ...بل اقف واصر
على مؤازتك ...عمليا لو احببت!
هذا لو اصر استاذي العزيز د. بهجت ...على نسخته الشعبية
حينئذ تكون المؤازرة العملية حلال ...
طبعا حلال بالاجماع (الوهابي والشيعي)!
ضدان لدودان !..صحيح! ..

لكن ..لأول مرة في التاريخ سيتفقان..!!
فالعدو هنا ليس اي عدو..... انه علماني وينقط علمانية في حي شعبي
بالتأكيد يدركون جيدا (عميان الرياض وعمائم طهران ) مالذي يعنيه
هذا بالضبط !!
اول خطوة ــ في خطوات المؤازرة ـ سأنسخ المداخلة الشعبية لـ د. بهجت
وانقلها لمنتدى جزائري لي فيه اصدقاء كثر ...سأطلب منهم
ترجمة النص الى الامازيغية ...!
ثم ..أرسل نسخة بالفاكس الى هيئة كبار العلماء بالرياض
واخرى الى مجلس تشخيص النظام في طهران ..
مشفوعا بعبارة واضحة : بهجت شطب على احياء القاهرة ..
انه الآن في وسط الاحياء الشعبية في الجزائر يحرض الجميع
هناك حتى البربر !
حينئذ....سيعلم الذين ظلموا اي منقلب ينقلبون !!


استاذي د.بهجت... ...اعتذر ان كنت تسببت في اي تشويش
ضر...او على الاقل لم يقدم مايفيد...في موضوع حيوي بحق .
عاطر التحية

الزميل هولي اكرر شكري ..

بالعكس بقى انا مصري ولما اقرأ للاستاذ بهجت بعاميتي احس انه زيه زينا ويدخل اكتر من 90% من كلامه داخل قلبي مصدقا ومقتنعا ومطمئنا لاني اشعر انه المثقف الكبير مثله مثلنا ولا يحفظ من خطب رنانة وشعارات منبرية كالوهابية مثلا وهما كلمتين حافظهم ومش فاهمهم وبيرددهم زي الببغاء , وبعدين الراجل بقاله 8 سنين بالفصحى في اكثر من 3000 مشاركة ما جتش على موضوع يتيم يمكن هو اللي اطلع بيه مستفيد من المنتدى .

احب اقول للاخ هولي مان ما حدش بيملى على الاستاذ بهجت طريقة كلامه لا افهم من اين جئت بنظرية من نزل بطريقة كلامه الى العامة نزل بالتبيعة فكره !!!! بل بالعكس الاستاذ بهجت قال ان هذه العملية اصعب مما يقوم بها لانها تعبر على فهم شديد .

تحياتي لصاحب الموضوع

تحياتى للزميل بهجت على مداخلته الأخيرة ، وإن كنت اختلف معه فى التوجه الفكرى ولكنى متفق معه تماما فى مداخلته الأخيرة