وعدت الأخ أرامند بالرد على تساؤله عن وجود نموذج آخر من الإسلام يقدر يكون جزء من الحضارة اللي الناس عايشاها ، و يسمح لي أرامند و تسمحوا جميعكم لي بالرد على هذه الجزئية بلغة أيضا بسيطة جدا .
لما نبص دلوقت على الإسلام اللي منتشر حوالينا هنشوف 2 إسلام ، اسلام شيعي أصبح له مركز واحد في إيران و له رئيس أعلى اسمه الولي الفقيه يعني مرجع للشيعة كلهم في أمور الدين و الدنيا ، يعني الشيعة يقت مش بس مذهب إسلامي (ع العين و الراس طبعا) ، و لكن برضه جماعة سياسية واحدة منظمة لها رئيس كلمته أوامر ربانية ، ودي مسألة مش مفروض تكون ع العين و الراس ، و لكنها موضوع سياسي فيه خلاف زي أي موضوع سياسي تاني ، ناس معاه و ناس متقبلوش . خلينا من حكاية الشيعة دي شوية لأنها أولآ تخص الشيعة بالأساس ، و ثاني حاجة الشيعة قفلوا على نفسهم خلاص ، و من سابع المستحيلات أنك هتلقى واحد شيعي يقبل مناقشة ( التشيع السياسي ) و سامحوني على التعبير الفني ده .. بشكل هادئ و بالعقل و المنطق ، ولو اعترضت حتى على زيادة وزن حسن نصرالله هيمسحوا باللي خلفوك البلاط ، و هتلقى نفسك عميل و خائن و من دول الإنبطاح و شقع بقع يا ديل الفار ، عندهم كل حاجة دين و المهدي قرب يظهر و همه وراه حتى يظهر الحق و طبعا هيبديونا كلنا بصفتنا الباطل و قتلة آل البيت .. إزاي قتلنا آل البيت اللي بعضنا منه معرفش ؟!..
طيب نشوف السنة اللي على قدنا ، و اللي لسه معندهمش ولي فقيه يقدسونه زي الأنبياء ، هنلقى زي ما قلت فيه مجموعة من المسلمات و الأفكار أصبحت كلها من صميم الدين و كلها ( معلوم من الدين بالضرورة منكرها كافر) يعني إيه ؟ . الشيوخ بتوع السنة دلوقت شدوا حيلهم ،وزي ما الشيعة بتفسق و تكفر اللي ميؤمنش بمعتقداتهم و لا بالولي الفقيه ، هما كمان مش أقل منهم و بيكفروا اللي يناقش مسلماتهم ، طيب و منين جابم تلك المسلمات ، هنلقى 90% منها أحاديث منسوبة للنبي و البعض اجتهادات لفقهاء بيقولوا عنها إجماع الفقهاء ، برضه إزاي اجمعوا و إمتى ؟ محدش عارف ، لأن كل مجموعة من الفقها بتقول عن أفكارها هي أنها معلوم من الدين و عليها إجماع و كل من ينكرها كافر . يعني احنا بقينا ملطشة لشوية فقها سنة و شيعة و دول ميعرفوش حاجة عن الدنيا حفظوا كلمات و بيتاجروا بيها و السلام . و لو دققنا شوية هنلقى ما يعرضه فقهاء السنة سواء رسميين زي بتوع السعودية ، أو شعبيين زي الشيخ حسان و الشيخ زفتان ينتمي لمذهب بعينه هو المذهب السلفي الوهابي، اللي شيوخه أحمد بن حنبل و ابن تيمية و ابن القيم و محمد بن عبد الوهاب ،وهو مذهب ضعيف كان معزول في نجد حتى جه ابن سعود و خلفائه و دعموه بأموال البترول فانتشر حتى أصبح نمرة واحد اللي بيكسب و يغني و يفقر و يميت و يحي . بقى إن الوهابية المنتشرة اليومين دول ما كنتش أبدا هي الإسلام ، و الغريب إن المتطرفين و المتعصبين و المستشيخين بتوع الدقون و النقاب أصبحوا يؤكدون إن ده بس صحيح الإسلام ، و الأغرب ان اللي بيكره الإسلام و ميحبوش لسبب أو آخر يؤكد هوه كمان أن النموذج الوهابي المنتشر اليومين دول هوه بس الإسلام ،و غير كده تجميل و كذب ع الدقون ، و النتيجة ان عندنا دلوقت أبشع نموذج للإسلام في تاريخه كله ، و ان الثقافة الإسلامية متخلفة و فيها العبر كلها ، ودا طبيعي جدا فالنموذج الموجود الأن هو نموذج صحراوي نشأ بعيد عن الحضارة و هوه بيكرها لأن الإنسان عدو ما يجهل ،ودا برضه اللي خلاني أكتب الموضوع ده .
هنا عندنا سؤال فين بقى الإسلام الحقيقي ؟، وهل قبل ظهور فكرة الولي الفقيه و هي فكرة مش قديمة قوي كان الشيعة مش مسلمين ،و هل قبل ظهور الوهابية كان السنة كفرة ؟.وهل دول بس أشكال الإسلام أو ما أقول عنه ( نماذج الإسلام ) . يعني إيه الحكاية بالضبط ؟.
الحكاية مش سهلة و عايزه شوية تركيز .
فيه حركات فكرية و عقائد كبرى عرفها الجنس البشري ، منها بل على رأسها الأديان زي المسيحية و الإسلام و البوذية و الهندوسية و .... . دي كيانات ضخمة جدا و زي الكائن الحي مظهرتش مرة واحدة كاملة النمو ،و لكنها ظهرت صغيرة و بعدين نمت و كبرت ، طيب ناخذ المسيحية هنلقاها ظهرت صغيرة و سرية و أخذت 300 سنة تنمو حتى و جدناها تبقى دين أكبر إمبراطورية وقتها هي الإمبراطورية الرومانية ، المسيحية . لما نمت تغير شكلها و بنقول عنها ( أعيد إنتاجها ) و دا كمان مكانش في شكل واحد ،و لكنها بدأت تتفرع ، بعض الفروع كبر و البعض بقى صغير ة البعض مات ، دلوقت بقى عندنا تنوعات كبيرة من المسيحية ، مختلفة في كل شيء فقط بتؤمن بشخص اسمه يسوع الناصري إنه هو المسيح ، هو الإله او ابن الإله أو كلمة الإله و لكن كل دول حاجة واحدة و ... الخ . عندنا دلوقت نماذج مسيحية زي الرومان الكاثوليك و الأرثوذكس و البروتسانت ودول متعددين جدا ، أنجليكان ولوثريين و كالفن و إيفانجيلكان و شهود يهواه و ... . كل واحد يدعي انه الممثل الأصدق لرسالة المسيح و دينه . الإسلام برضه نفس الشيء ، فالإسلام نمى و انتشر خلال قرون طويلة و بين شعوب كثيرة جدا ، كثير من هذه الشعوب كان لها ثقافتها و حضارتها الخاصة قبل الإسلام زي الفرس و الرومان و الهنود و المصريين و ... كثير قوي ، كل واحد فهم الإسلام بعقله هوه و فكره ، و النتيجة الطبيعية أن يتغير شكل الإسلام و يتطور و يصبح ثقافة كونية كبيرة و النتيجة الثانية الطبيعية ظهور مذاهب و حركات و نحل كثيرة جدا كل منها يصبح بعد فترة نموذج يدعي انه هو وحده المعبر عن الإسلام . الخلاف داخل الإسلام كان حتى أكبر من غيره لأنها خلافات دينية و برضه سياسية ، خلافات ارتبط فيها الدين بالسياسة بالتحزب ب .... ، يعني لخبطة كبيرة ، و لو جه النهاردة حد يقولك أن ده هوه الإسلام و الباقي غلط متصدقوش ، معظم أو حتى كل المذاهب دي كانت مخلصة في اجتهادها ،و كلها كانت تعتقد أنها وحدها الفئة الناجية اللي بيقولوا عليها الفقهاء .
المسلمون اختلفوا بعد موت النبي على طول و الصحابة حاربوا بعض و كفروا بعض ،و 3 من خلفاء النبي ال4 ماتوا مقتولين و كلهم قتلهم مسلمين ،ومنهم 2 قتلهم مسلمين عرب . يعني الخلاف ليس جديد ولا دليل كفر ولا بسبب البعد عن الإسلام ، الخلاف طبيعي جدا . طيب نسيب السياسة و نرجع للدين ، برضه هنشوف مذاهب بلا عدد ولا حصر ، الشيعة مذاهب كثيرة منها الإمامية زي شيعة ايران و العراق ،و الزيدية في اليمن و الإسماعيلية في الهند و غيرها دا غير مذاهب اختفت كان لها اتباع زمان ، و السنة مذاهب كثيرة جدا ، فيه مذاهب اختفت و مفيش لها أتباع دلوقت زي المعتزلة و المرجئة و الجهمية ،و بالمناسبة لو كنا بنعيش دلوقت في زمن المأمون كنا بقينا معتزلة ، لأنه كان مذهب الخليفة و الدولة ، فيه الخوارج ودول اختفوا مبقاش منهم غير جماعة في عمان هي الأباضية ، و طبعا أهل الجماعة من حنفيين و مالكيين و شوافع و حنابلة ، ودول طبعا انقسموا ، فيه غيرهم علويين و دروز و .... كثير كثير ، فيه كتب للي عاوز يقرأ في المذاهب منها " الملل و النحل " للشهرستاني و فيه كتاب لمصطفى الشكعة هو " إسلام بلا مذاهب " و غيرهم كتير . طيب مين يعبر عن الإسلام الصحيح ؟. عشان خاطر النبي والولي محدش يقول لي إن مذهبه هوه اللي بيعبر عن الإسلام ، يعني دا كلام يقوله عيال دراويش ميفهموش ، رأيي المتواضع إن كل دول بيعبروا عن الإسلام ، الإسلام ماعدش حاجة بسيطة واحدة زي ايام النبي ، و لكنه زي ما بنقول ثقافة مركبة من " تقاليد " كثيرة .
فيه نماذج إسلامية محترمة معظمها من التاريخ ،و منها برضه المعاصر، و عندها المقدرة على التطور زي المعتزلة زمان ، و ليه أروح بعيد ، فيه كاتب اسمه برنارد لويس بيكره الإسلام ، رغم كده بيقول انه كان دين متسامح ،و ضرب مثل بنظام أهل الملة التركي و كان بيشوفه رائع جدا . في الوقت اللي كان فيه الكاثوليك بيحاربوا البروتسانت في أوروبا كان الإثنين عايشين بامان في الإمبراطورية العثمانية ، يعني المشكلة مش هيه الإسلام و لكنها الطريقة اللي بنفكر بيها . و فيه حتى نماذج معاصرة زي الإسلام المصري قبل غزو البترول و فلوسه ، يعني ناس راقية عندها حسن ظن بالله ،و بتركز على الأخلاق و التسامح ، ناس نفسها حلوة و عشان كده ما بتشوف غير الحاجات الطيبة ، يعني لما كان غبي من 40 سنة في مصر يخطر في باله حاجة زي الحجاب أو النقاب كان الشيخ يقوله حديث عن النبي عن أبي هريرة: قال رسول الله : (( إن الله لا ينظر إلى أجسادكم , ولا إلى صوركم , ولكن ينظر إلى قلوبكم ))، شايف الفكر النضيف الراقي ، دلوقت الشيخ اللي عاكم كام دولار يصور لك الله تافه لا يشغله غير الحجاب و النقاب و هدوم الستات و بيقضي كل وقته بيلاحق الستات بشريط القياس ، يعني عيب قوي حد يقول ده دين الإسلام ، و لكن شيوخ الوهابية و اللي وراهم ناس تافهة فعلا ،و اللي بيقلدوهم أتفه منهم . عرفنا في مصر زمن عبد الناصر اسلام بيعطف ع الفقرا و بيقول عن النبي زي أحمد شوقي ما قال ( الإشتراكيون انت إمامهم ) ، و لا يضطهد المسيحي ولا حتى اليهودي ، كان المسيحي يروح معانا الجامع و يستنى بره حتى نصلي عادي جدا ،و كنا بنروح الكنايس عادي برضه ، و نسكن مع بعض و نحتفل باعياد بعض ،و حتى دلوقت بحتفل بشجرة الكريسماس زي العيد الكبير و العيد الصغير . ولو حد فكر يقول الجزية و غيرها ، كان بيلقى اللي يقوله من رجال الدين إن ده في زمن كان المسيحي مش من الدولة اللي كانت اسلامية ،و لكن دلوقت بحمد الله أصبحنا بنعمته إخوانا و الدولة مصرية و المسيحي بيحميها و يدافع عنها قبل المسلم ، يبقى جزية ايه بقى ، الدين لله و الوطن للجميع ، دا كان ترتيب مؤقت معدش له لوزوم ، و بطلوا كلام زي السعوديين ، دول لسه عايشين في الصحرا بعيد عن العالم ، علموهم الحضارة بدل ما تتعلموا منهم تقفيل المخ و فقه العميان .
ليه ميكونش الإسلام ضمن الحضارة .. ليه يعاديها ؟ ، هيطلع لي واحد و يقول لي النصوص ، كويس النصوص لها أسباب و لما تنتهي الأسباب تنتهي الأحكام ، هناك حاجة اسمها ( الإنتقاء ) يعني نطنش حاجة و نركز على حاجة ، التطنيش مش عيب لأن فيه حاجات انتهى زمانها فعلا ، يعني لما ابنك يكبر تفضل برضه تكلمه عن غسيل اسنانه قبل النوم ،ولا تكلمه عن حاجات بتاعة سنه ؟ . هوه سعد زغلول ولا النحاس ولا جمال عبد الناصر ماكنوش مسلمين ؟، الإسلام مش ضد الوطنية إلا عند الإنسان المشوش المتخلف ، مصر لازم تكون حتى قبل الإسلام ، لأن الإسلام دين محله القلب ومش محتاج حد ، و لكن مصر كيان مادي تحتاج أولادها يحموها و يعمروها عشان نعيش فيه حياة إنسانية ولو .
يمكن يكون لنا عودة .