(04-23-2011, 08:24 PM)AhmedTarek كتب:  

اقتباس:أنا عاوز أشوفها بتتغير , منى عينى أشوفها بتتغير , لكن الواقع الحالى والشواهد بتقول أنها مش هتتغير

أنت لخصت في جملتك مشكلة الجيل والعقلية التي تنتمي إليها، أعني بالجيل هنا حزمة من الأفكار فنحن تقريباً من نفس الجيل عمرياً،
عايزها تتغير ببلاش....متخيل مثلاً إن الثورة أعادت برمجة عقل المصري...ومش عاجبك الشعب زي متكون إتفاجئت مثلاً..
يعني لا دم ولا تعب ولاعرق ولا حتى صبر و خوف مستمر من خسائر المستقبل..بس "نفسك ومنى عينك تتغير" وعندما لا تتغير لمصلحتك تثور وتحط رجل على رجل وتشرب شاي وتقول بلطجية وإستقرار وفئوية والبلد وقفت وبتفلس وكأننا كنا سويسرا أو كأننا نجمع مرتباتنا من على الأشجار...تنظير بقى بايخ سامحني يا عاشق ...
دي ثورة ...مثلها مثل الحرب..كيف تحارب الأمم وفي قلوبها وهن وضعف هكذا...الإنجليز نزلوا المخابيء 6 سنوات ولم ينحنوا ولم يهزموا وإنتصروا ...أه من وهن القلب..

الشباب اللي مش عاجبينك يا عاشق لا ينامون ...يعملون في أعمالهم اليومية العادية لتعويض فترة لم يبارحوا فيها الميدان ...لأنهم شباب ولا يملكون "مدخرات" ولا يصرف عليهم أهلهم..ثم بعد الدوام وفي الأجازات ينظمون الفعاليات ويلفون القرى و ينشئون حياة حزبية حرة من لاشيء..ويتظاهرون في التحرير وفي ماسبيرو و لنصرة ثورة ليبيا وسوريا ...يغيرون....لأن "نفسهم ومنى عينهم تتغير"...... وللأحسن..

أولا وعلشان نحط النقط على الحروف ,,, من أين جئت بانطباع أن الشباب دول مش عاجبنى ؟ يعنى أنت مثلا أحد المشاركين فى تلك الثوره من بدايتها لنهايتها ومن خلال ما أعلمه عنك من معلومات متواضعه ومن خلال أخلاقياتك العاليه وأدبك الجم فأنت على راسى من فوق وتملى عين الباشا , ولو كل الشباب المصرى زيك مكنش أصبح عندى أى ذره خوف من المستقبل .

أنا مش عارف ليه دايما احنا هنا فى نادى الفكر بننسى مواقف بعضنا البعض ولازم دايما الواحد يعيد التأكيد على مواقفه ومبادئه ؟ هل نذكر على سبيل المثال موضوع خالد سعيد ومشاركاتى فيه؟

ياعم أحمد الى زيك واللى زى شباب التحرير اللى بدأو فاعليات الثوره نسبتهم كام % من شعب مصر ؟ على سبيل المثال المظاهرات الفئويه التى انطلقت عقب الاطاحه بمبارك مباشره للحصول بسرعه على مكاسب وامتيازات ماديه وأدبيه بحجه أنه اذا لم يحصلوا عليها الأن فلن يحصلوا عليها مستقبلا , هل كان أصحابها يقدرون الموقف تماما وهل هم من تعول عليهم فى قضيه التغيير ؟ طيب هل تعتقد أن هناك شىء كان يحدث قبل الثوره وتغير بعدها ؟ على سبيل المثال أنا فقدت عملى وحاليا أبحث عن عمل وأتعرض عليا أن أدفع 15 ألف جنيه فى مقابل الحصول على فرصه عمل فى شركه بترول , المتغير الوحيد أن المبلغ قبل الثوره كان 35 ألف وبعد الثوره تم تخفيضه على استحياء الى 15 ألف , قبل الثوره كان الطلب علنى ومفيش حياء , بعد الثوره الطلب يتم فى الخفاء مع التبيه بعدم افشاء هذا السر لأحد !

الخلاصه أن مصر مش هتتغير بالدم ولا التعب ولا العرق , منا كنت بشتغل وبتعب وبعرق فى قطاع الاستثمار اللى مبيرحمش وفى الأخر كان ناتج مجهودى بيروح لغيرى ومكنش في شىء عائد على البلد , مصر مش هتتغير غير لما أخلاقنا تتغير وده من رابع المستحيلات لأن من شب على شىء شاب عليه , مش ممكن واحد منافق يبطل نفاق لأن محطه ON TV جايبه واحد رافع يافطه مكتوب عليها لا للنفاق , ولا واحد مرتشى هيبطل يرتشى علشان سمع أن مصر بتتغير واحنا كمان لازم نتغير , مصر مش هتتغير غير مع جيل جديد ومناهج تعليم جديده تحض على الأخلاق والشرف والمثل العليا يتم تلقينها للأطفال فى صغرهم ويشبون عليها , لكن الجيل ده ايدك منه والأرض .