حتى أنت يا فودكا؟!

يعني بجد مصدقين قصة الإمارات السلفية هاي؟ هاي إشاعة مخابراتية سورية .. لك بالقصة الرسمية السورية لقطوا أمير إمارة حمص بيشوفر بهيلوكوبتر.
كنت رح حطلكم كذا مسخرة من مساخر الإعلام السوري الذي يروج للإمارات السلفية والكذب المفضوح من موقع "المندسة السورية"
http://the-syrian.com/

بس مخترقينو لليوم الثاني عالتوالي، ومعطلينو ..
شلون بدنا نعمل لتطمئن الأقليات بسوريا؟
يعني قبل وصول الأسد للحكم كانوا السنة نازلين تنكيل وقتل وتشنيع بالأقليات مثلاً؟
شو الحل لهالاستعصاء .. هل هو بالإصلاح البطيء كما يقول المقال أعلاه؟ في أبطأ من هيك أصلاً؟ كم جيل بدنا نستنى لكي ننال حريتنا، ويبطل أصغر عنصر أمن حقير "يخرا" عأكبر راس فينا؟
بصراحة بالثورة مافي طبطبات، وتطمينات ممكنة، الكل مدعو للمشاركة لانتزاع حريته. طول عمرنا بنتعلم أن الحرية تؤخذ ولا تعطى .. ليش وقفت عنا وصارت من كرامات الرئيس ومن عطاءات القائد الفذ الضرورة.
بس لأنو عنا تنوع طائفي يعني؟؟؟ بعدين كل ثورات العرب البقية انطلقت من الجوامع، ليش وقفت علينا وصرنا كخة، وصار غير مقبول ثورتنا تنطلق ببعض مظاهراتها من الجوامع؟
مهاي بمصر اللي فيها مسيحية وإسلام انطلقت من الجوامع ووصلت ميدان التحرير، وشفنا فيها حماية المسيحيين لصلوات المسلمين ..
نحنا عنا ما خلوا الناس تقدر تعتصم بساحة .. وهاي اليوم طلعوا بدرعا وبكذا مكان بدون صلاة بجوامع. وهاي عمبتطلع مظاهرات ليلية بدون أي صلاة.
شو الحل بس فهموني؟
إذا بدكم الناس ترجع لبيوتها، فقولوها بدون حجج.
وإذا إنتو مع الحرية ومع هالثورة، فقولوا لنا كيف يجب توجيهها لكي ترضيكم.
صرت أتساءل، هل التنوع الطائفي تبعنا نعمة، أم نقمة؟؟؟؟!!!!