والله ياجماعة أنا شايف إن جماعة الإخوان والرئيس مرسي في قمة الضعف السياسي والفكري..هما مش قادرين حتى يفسروا اللي بيحصل حواليهم..

وزي ما قلت قبل كده إن الإخوان انتهوا عملياً كفكرة..والمصريين استعادوا دينهم من تُجاره، وشعبية التيار الإسلامي كله بتروح كل يوم عن التاني..وان الإخوان اللي موجودين دلوقتي هما (مُجرد سُلطة) هتاخد عمرها الافتراضي يوم اتنين ..سنة سنتين..المهم هي مجرد سلطة ومجموعة مناصب.

المطلوب دلوقتي حاجتين اتنين:

1-بذل الجهد في التوعية في الشارع وفي كل مكان..(أحياء شعبية-قُرى وكفور-مُدن جديدة وقديمة-مواصلات-في الشُغل)..لازم يكون فيه كلام وحوار عشان الناس تعرف إيه اللي بيجرى في البلد...منها تكون المعارضة قريبة من الشارع وتلحق تزيل أي شبهات حواليها يزرعها المتأسلمين، ومنها تدعي الناس وتنور عقولهم وتعرفهم يعني إيه دين ويعني إيه سياسة وازي نعرف مصلحة البلد..

2-مظاهرات لا تكل ولا تمل حتى لو أقيمت الانتخابات..اللي بيحصل دلوقتي انتفاضة حقيقية ضد حُكم الإخوان..ومش هاتبقى ثورة أو عصيان مدني إلا ببقاء الحالة الثورية في الشارع أطول وقت ممكن...وقتها الناس اللي وقفوا ضدك أو كانوا حياديين زمان..النهاردة هايكونوا معاك..لأن الإخوان ماعندهومش ثقافة التواصل مع الناس، وهما بيصطدموا مع الجميع من غبائهم وسذاجتهم.

صحيح هما الإخوان بيراهنوا على فقر وجهل الناس اللي هايعطوا لهم أصواتهم في الانتخابات..ولكن خلي بالكم إن الشريحة اللي بيراهن عليها الإخوان دي هي اللي انتخبت مبارك ووقفته على رِجليه وبعدين سابته لما وقع في الأزمة.. الإخوان في الصعيد ماكانوش بيتحصلوا على خمس مقاعد على بعض..والقضاء كان هو اللي بيشرف على الانتخابات يعني كانت انتخابات نزيهة.>>أفهم من كده إن اللي صوت لحسنى مبارك زمان في الصعيد هو هو اللي بيصوت للإخوان دلوقتي هناك...ودي المفروض انه يشجّع المعارضة على التحرك لأن النظام السياسي القائم بيتحرك بنفس الاستراتيجية بتاع زمان.

المهم لازم يكون فيه أمل على طول..ولازم يكون فيه طموح بيتجدد وأفكار جديدة كل ساعة..مش كفاية نقعد نتابع اللي بيحصل ..دي مصلحة بلدنا ومستقبل أجيالنا واحنا المسئولين.