من صفحات عبيد ‬عائلة الأسد‫
يتساءلون : ليش منموت ببلاش؟
==================
السيد الرئيس، رئيس الجمهورية العربية السورية، الدكتور بشار الأسد
هذا أنا المواطن السوري عيد كوسى ينقل إليك قهر أحد العسكريين في معلولا.
سيدي الرئيس، فكرت كثيراً بأن أخاطبكم باللغة الفصحى، ولكن بطل من أبطال الجيش العربي السوري حدثني بالعامية..كيف أحرّف بكلام الرُسل؟!
سامحني أيها المفدّى، سأنقل لك ما قاله لي، ليكون بين يديك تفعل به ما تريد..
بتاريخ ٢/١٠/٢٠١٣
اتصلت به وعند رده هو من بدأ الحديث بضحكة واتبع:
- لك الله يسعدلي هالصباح، ولا حقير أنا مشتقلك، كيفك؟ طمني عنك؟ شو أخبارك؟
+ أنا مشتقلك أكتر، وينك أنت بعدك بالقطيفة؟
- لا والله منحرر معلولا.
+ أووف، ع أساس اتحررت!!
- لك والله يا عيدو أبعرف شو بدي قلك، ليك ابدي ازعجك، أنت خيو انبسط ولا ع بالك بال.
+ يا زلمي أنا بعرف من تاني يوم أنو اتحررت!!
- خيو بالمختصر:
يوم اللي دخلو هالكلاب عمعلولا فجرو حاجز القوس والحاجز التاني دخلو عليه بسبب الإهمال والله يا عيدو ستة من رفقاتي اللي عشت وأكلت معون بياخدو العقل صفوهن عالحيط وقوصوهن براسون، اجتنا الأوامر بأنو نتحرك باتجاه معلولا، ع أساس متل العادة، رايحين نحررها ونرجع، لبسنا تيابنا وطلعنا وفعلا وصلنا ع معلولا، ليك معلولا عبارة عن طبقتين طبقة تحت السفير وطبقة فوق السفير وخانق ضخم فوق منون ومعلولا محاوطة من جبلين، المهم فعلا بتلت ساعات وصلناع السفير واجا التلفزيون صور انو محررة، هالمصورين راحو واجا امر الانسحاب،!! على كل الوحدات المقاتلة الانسحاب فورا،!! انسحبنا ع طراف معلولا، ورجعو المسلحين، ليش هل الانسحاب ما حدا مننا عرف، ورجعو المسلحين وأخدو لعند السفير وهالجبال، قتلو مننا كتير، بتعرف منموت هون ببلاش ومحي سئلان فينا، اول عشر تيام يا عيدو كنا ننام ع الارض ونتغطى بالبطانية، أساسا نحنا مو مننام، لك والله الصبح يجي العقيد يدور علينا بالرفش، بس هلق جابولنا خيمة، اصلن ابتسترجي تنام، مو خوف ع القائد، خايف ع حالك، ليكني انا محكيك هلق ومعرض للقنص افي مجال عندك تتخبا غير ورا هالدبابة، أبعرف شو ناطرين، نحنا منموت هون بدون سبب، شو ناطرين أبعرف، والله ما عاد فارقة، هلق بفوت بهالدبابة وبموت لك بعد اللي منشوفو ما عاد فارقة، رفقاتنا متموت بدون سبب، بتعرف، من يومين بس كنت انا متت، أنا بالدبابة قلتلو لهالسائق روح مشي، وحدّي تماما دبابة رفيقي مطفية، والله يا عيدو والله الصاروخ الحراري كان مستهدفني انا، بنفس اللحظة اجا شغّل رفيقي دبابتو، واجا الصاروخ فيا ليكو إسا لهلق فيا، شايف الدبابة لهون، وهداك اليوم أجت أوامر بتحرك دبابتين ع وسط معلولا، شو بدون يعملو دبابيتين؟ بدون يحرروها؟ والله بعتوهن ع الموت ولهلق محي رجع منون، كل يوم ميموت حدا فينا، أبعرف شو بدي قلك.. آخ آخ.. ومعلولا لم تحرر وأفي نيّة.. الجيش قوي وشباب متل الورد متموت بدون سبب.. والله يا عيدو شباب مالك قلب تضربون بوردة ميروحو ببلاش، والله مو فارق معون، كلو فدا هالتراب، بس ليش ميخلوهن يقتلونا هيك؟ أبعرف !!
سيدي الرئيس أنا لم أجيبه بغير دمعتين على الخدين، وقهر، لا أعرف اساسا بما أجيب هذا الرسول، ولكن ارجوك لا تدع الأبطال "تموت ببلاش"..

المواطن السوري الباقي على العهد / عيد كوسى
منقول