* سوري ويانيالي (3)

موقع أخبار الشرق – الخميس 28 حزيران/ يونيو 2007

سوري ويا نيالو: أشرف المقداد

أي وين صرنا؟.. اه أي انه قديش انو نحنا محظوظين انو نكون سوريين وقديش النا الشرف يكون عنَّا هيك رئيس وحكومة(اسما الله حولن وحاواليهن)

وانو قديش نحنا شعب نقاق وما بننعطى وش وانو شو ما عمل رئيسنا العبقري والدولة الأعبقر منو منظلّْ ما بيعجبنا العجب ولا الصيام برمضان ولا برجب.

شوفوا مثلاً الكهرباء.. على ايش النق وأكل الهوى.. طيب عم تنقطع الكهرباء بشكل يومي ولساعات طويلة أي وين المشكلة؟

أي هي مثل واضح من عبقريات رئيسكن يخزي العين عنو

وعن انو قديش بيحبكن (حبكن برص)

يعني اذا ما قطلعكن الكهربا كل ليلة شو رح تسووا؟

يا اما رح تقعدوا قدام التلفزيون أو يا اما رح تقعدوا تتسهوروا وتعلكُوا وتعجنوا وهذا "غلط" وطبعاً منشانكن سيادة الرئيس عم يقطعلكن الكهرباء والأسباب كما تلي:

1- حرصاً على الصحة العامة التي رئيسنا الحنون بشار الأسد مؤتمن عليها القعدة قدام التلفزيون بتضِّر بعيونكن الكواحل ومنشان صحتكن وهالعيون عم يقطعها.

2-حرصاً منه على صحتكم الدماغية والنفسية.

لأنو بيعرفكن انو كيف انتوا ما بتحبوا الثقافة الوطنية والقومية وما بتابعوا البرامج المهمة والممتعة جداً مثل برامج الفلاحين والشبيبة والطلائع والعمال واتحاد النساوين وعم بتحطوا على برامج غير موثوقة عم بتخربلكن دماغكن (مثل يللي على الفضائيات الغير سورية) وعم بتخليكن تتفتحوا على شغلات بتضر صحتكن متل "انتخابات"، "ديمقراطية"، "حرية"،"معارضة" ومتلها من الحكي الفاضي.

3-حرصاً على صحتكن البدنية منشان تروحوا على النوم بكير وترتاحوا وتريحوا

4-حرصاً على الانتاج الوطني (للتبزير) لكان كيف رح تخلفوا وتتكاثروا

وخاصة انه ماظل عنا صاحب وعنا الف حرب وحرب منشان مصلحتكن الكبرى والتي هي الحفاظ على نظام رئيسكن أحسن رئيس بالعالم بشار الأسد. لكان حبيبي الناس كلا حاسدينكن عليه وبدن يشلحوكن اياه

وهو ما بدو لعيونكن الكواحل والله.

فهمتوا عليه لرئيسنا الملهم؟ بري عليكن

يقبرني فهمكن ودرس بكرة رح يكون عن ما يسمى" بالفساد"

وانو قديش انتوا محظوظين فيه