ايوة الاسكندريه برضو
فى سيدى جابر حضرتك

ماهو اللى حصل للباعه الجائلين كان الضرر عام علشان كدا وقفوا مع بعض
لكن خالد امره يخوف
واحد حوالى 50 واحد يقول لك وقفوا 20 دقيقة
تــــــــــــــــــــــــلت ساعه
يشوفوا الولد بيتقتل و محدش يتحرك
دا مؤشر مهبب بستين نيله
افتكر موقف تانى كمان كويس و ايجابى حصل بعد وفاه خالد الله يرحمه بايام بسيطه
الناس اتحركوا فيه فى الاسكندريه برضو بسبب موت واحد تحت عجلات اتوبيس سياحى كان بيتهرب من لجنة مرور الناس قطعوا فيه الطريق و اتهجموا على اللجنه على ما اعتقد لأنها مش اول حادثة و سببها بيكون ان اللجان دى بتطلب رشاوى من الناس علشان تسيبهم
دا موقف كمان كويس
بس برضو بعد اكتر من حادثه
هو احنا يعنى لازم نتحرك لما تحصل مصيبه او تتكرر الحوادث

بس موقف خالد يجنن
يخالى الواحد يلف حوالين نفسه من السلبيه و العنف و الرعب مش بس الخوف من الشرطه و كلابها السعرانة

ربنا يستر

على فكره نقدر و عندى احساس ان 2011 مش هتعدى على خير
تعرف ان الشرطه فى مظاهرات اول امبارح فى الاسكندريه حسب اقوال الناس لأول مره ما تحتكش بيهم و المظاهره خلصت على خير؟
مش عارفه دا من خوفهم و لا مجرد بيهدوا اللعب لحد ما الموضوع يهدى بين الناس؟
اللى عجيبنى ان الشباب كل يوم هيعملوا مظاهره لحد ما حق خالد يرجع
اعتقد الفكره دلوقتى مش بس حقه لكن حق كل واحد اتهان من البقر دول
الله يهدهم بقا