حبيبتى نسمه
انا مش محبطه انا مدبوحه اننى لحد دلوقتى بسمع اللى يقول لى مفيش فايدة
بالنسبة لى شخصياً كل شدة و كل ظلم بيقوينى اكتر
و بفرح لأن الفرج قرب و الناس مش ساكته
بكره ان شاء الله هنوريهم مين الشعب المصرى
بكره هتبقا بهدوء
بعد بكره ان شاء الله هيتشالوا شيل من الدنيا كلها
لأنهم معندهمش ضمير
من ساعه ما قريت كلامك و عماله افكر فى ميت حاجه
ليه المره دى عملوا كدا و ليه بالسذاجه و الخيابه دى فضحوا نفسهم
ما ظباط كتير قبل دول اتحاكموا و الدنيا هديت
دا لو كان دليل على شىء فدليل ان الفساد وصل للقمة للى لسه مش شايف دا و القمة لازم تتشال بقا
و هتتشال قريب ان شاء الله
مصر كلها بتغلى
كل يوم اضرابات
كل يوم قتيل
كل يوم فساد
اهمال اهدار اموال عامه
امراض فقر جهل
بقينا ملطشه للكل بره مصر و جوا مصر
لا عارفين ندافع عن اهلنا بره ولا جوه
قتيل لبنان طلع برىء
عمل لنا ايه مبارك؟
اخد حقه؟
لا الباشا بس شاطر يروح يفقع مرارته فى المانيا و جيمى الحبوب يروح يجيب عيال فى لندن
لما كبراااااااااااااات البلد مش واثقين و مرعوبين كدا على نفسهم فى البلد فمالهاش غير تفسير واحد
انهم عارفين ان نهايتهم قربت

لكن ارجع و اقول احنا السبب
احنا اللى قتلنا خالد و احنا اللى هنرجع له حقه ان شاء الله
كل حرف بيتقال بيفتح عينينا بيوجع بس بيقوى

من شويه قريت فى المدونه اللى حطيت اللينك بتاعها التالى

انتو عارفين ... احنا اللي قتلنا خالد سعيد

خالد سعيد شاب مصري زي ملايين الشباب المصري البسيط ، بيدخل علي الانترنت وبيتفسح مع صحابه وبيعيش زي ما احنا عايشين كل يوم ، خالد واحد مننا احنا ، نظام حياته زي نظام حياتنا ، لم يكن مجرم او بتاع مشاكل ، شاب مصري عادي جدا

فجأة خالد ألقي به القدر في يد هؤلاء المجرمين القتلة ..... 20 دقيقة فقط ... انتهت بسحل وقتل خالد لأنه رفض انهم يفتشوه بالطريقة المهينة دي وانهم يسبوا امه وابوه بالالفاظ الجارحة دي

خالد مات .. عارفين ليه .... عشان في ناس كتير بيحصل معاهم زي اللي بيحصل مع خالد وبيسكتوا خايفين ، عشان في ناس كتير قبل خالد اتقتلت ومحدش طالب بالقصاص ليهم ومحدش دور علي حقهم ، وفي ناس كتير اتقتلت قبل كدا بنفس الطريقة ومحدش حس بيهم

دلوقتي الفضيحة بانت والجريمة مكتملة الأركان ، دلوقتي كل واحد فينا ممكن يبقي خالد ، محدش فينا في امان ، محدش فينا ممكن يتخيل ان دا بعيد عنه ، دا قريب وقريب جدا ، خالد هو واحد مننا ، انا وانت .... لازم نصحي كفاية خلاص ، الجريمة يجب الا تمر

عشان نحمي نفسنا وولادنا واخواتنا واهلنا ان دا ما يحصلش ليهم ، لازم نقف وقفة بجد ، تخلي المجرمين تخاف ، احنا 80 مليون مصري وهما قلة بتسيطر علينا ، لازم نقولهم اننا مش هنخاف ، بعد النهاردة احنا مش خايفين ، وهما اللي لازم يخافوا مننا ، لأننا هنطالب بحقوقنا ومش هنسيب اي مجرم يفلت من العقاب
دم المصريين مش رخيص ، دم خالد في رقبة كل مصري ، لينا تار مش هيسقط مع المجرمين

عشان دم خالد وعشان حياتنا واماننا وكرامتنا

مش هنسكت
بعلو الصوت هنتكلم
وان شاء الله نموت
هنتكلم


_____________________________

اللى مطمنا يا نسمه ان لو اللى جوا مصر سكتوا ، و دا بقا اصلا خلاص شىء مستحيل، المصرى اللى بره مش هيسكت ان شاء الله