الكريم فارس كل اللى انت بتقوله هو شعور كل مصرى دلوقتى
و دا اللى الكل خايف منه
هتبقا فوضى و عنف مالوش مقابل غير عنف مضاد يردعة و هنخلص كدا كلنا و اللى عليهم العين هيكونوا سافروا على اول طيارة لبره
للاسف الظلم بيولد قهر و بيولد جيل هياخد حقه بايده و دا بيحصل بالفعل دلوقتى
كل يوم بنشوف ناس بتقطع الطريق علشان حوادث بسبب اهمال حكومتنا المبجلة بانها الفلوس اللىبدل ما تصلح بيها حالنا بتحشرها فى كرشها
انا متوقعه مصيبه كبيرة لو فضل الحال على ما هو عليه
مبارك و جمال لو مش هما السبب ورا اللى بيحصل فهما شايفين و ساكتين و راضين
و لو مش راضين يبقا الاتنين زى قلتهم و ما ينفعوش يمسكوا حارة مش دولة
و ايوه كلنا سبب فى اللى بيحصل فى بلدنا لأننا كلنا شاركنا فى الفساد
شاركنا فيه بكل الطرق
بالسكوت و بالرشاوى و بالمحسوبية و بالواسطة و بالجهل و بالسلبية و بالاهمال
اختلف معاك ان ربنا مش موجود
لاء موجود و ادانا عقل نفكر بيه
لو كانت الدنيا جنه يبقا عقلنا دا لزمته ايه؟
و الضمير لزمته ايه؟
هو خلق الخير و احنا اللى خلقنا الشر لما مشينا فى طريق تانى
انا مش عايزه امشى اقتل الناس فى الشوارع
كل اللى عايزينه اننا نتعدل بقا كلنا فى كل حاجه
كل واحد يراعى ضميره فى شغله
اللى يشوف الغلط ما يقولش و انا مالى
لو لحقنا الغلط من اوله ما كناش وصلنا للى" هما" عايزينا وصله دا
الناسمش هتهدى غير لما يبقا فى عدل و الفاسد فى كل مكان يتحاكم
من الزبال اللى مش شايف شغله للكبير اللى قاعد بيستجم فى شرم الشيخ لحد دلوقتى
من الموظف اللى قاعد يشرب شاى و يقرا الجرنان و سايب شغله
للوزير اللى مش مراعى ضميرة و سايبها فوضى
من كل واحد مش شايف شغله كويس
لما تعلم ابنك انه كرامته و حقه فوق كل شىء و انه يطالب بيهم و ما يخافش
وقتها اللى بيغلط هيخاف من الفضيحه
لحد ما نعدل المايله دى لازم كل واحد يعدل نفسه
كان فى قصة حقيقية لواحد كان بيعذب الناس على ايام جمال عبد الناصر
للاسف مش فاكره اسمه بس هى دليل ان عدل ربنا بيطبق على الارض على كل ظالم حتى لو فلت من حكم القانون
قصته انه حصلت له حادثة و اتهشمت راسه و اتكسرت ميت حته فى حادثة عربية
و جمجمته حاليا معموله طفايات للسجاير
زى ما كان بيطفى السجاير بتاعتها فى ادمغه الناس زمان
و فى احصائية معروفه جدا اتعملت على كل واحد اتخصص فى تعذيب الناس
ملخصها ان البشر دول كل واحد فيهم بلا استثناء بيموت فى اخر ايامه من الخوفو بيجيله هلاوس ان الكل عايز يقتله
علشان كدا بيزيد عنفه
هو فى الاصل انسان جبنان و بيدارى خوفه بالعنف

و قصص نهاية الظالمين فى التاريخ كتيره اوى

الحل اننا نتصلح و نصلح البلد دى قبل ما كلنا نغرق اكتر من كدا

---

ما تخالوناش ننفذ لهم اجندتهم بنفسنا
ال فوضى خلاقة ال
هو احنا عمرنا ما هنتعلم ما نقعش فى الفخ
شوفوا اليابان و شوفوا تاريخها
من دوله اتحطمت من الحرب العالمية التانيه لدولة من اكبر الدول المتحضره
حتى الاوروبين نفسهم مش قادرين يوصلوا للى وصلت له اليابان
اتمنى نقرا التاريخ و ما ننجرفش ورا الغضب
محدش هيتضر غيرنا و المستفيد الاول هو اللى عايز مصر تبقا فوضى