‏‫كلنا خالد سعيد‬‏ ‫أنا مصري عايش في مارسيليا .. أنا كنت معاكم في الوقفة .. بقلبي وبعقلي .. ويا رب نجيب حقنا كلنا‬




الوقفة الصامتة فى بنى سويف

انا اسمى خالد محمد سعيد‏ وقفه خالد سعيد 010 9/7/2 روحنا اماكن كتير ملقيناش حد ...كوبري القصر العيني ...كورنيش العجوزه ...كوبري اكتوبر مكان المره الي فاتت ...كان في امن كتير علي الكباري دي فضلنا ماشيين لحد ملقينا حوالي 15 او 20 واحد وقفنا معاهم ولقينا بثينه كامل هناك و اتصلت بالجزيره وجم صورونا







كلنا خالد سعيد‏ ضابط قابلني وأنا ماشي وقال لي ارجع بيتك يللا بسرعة .. صممت وقدرت اوصل لكوبري قصر النيل ووقفت بس للأسف لوحدي




مظاهرات في عدة محافظات تتضامن مع "خالد سعيد" وتندد بالتعذيب



Fri, 09/07/2010 - 18:28
مُحدث
«تايــم» : «الفيس بوك» ساهم في بدء التحقيق في قضية «خالد سعيد»
بسنت زين الدين
المصور:
other, archive

خالد سعيد ، شاب الأسكندرية الذي قتل علي يد مخبرين...



اهتمت مجلة تايم الأمريكية بفعالية وتأثير «الشبكات الإجتماعية» مثل الفيس بوك، وتويتر، ويوتيوب، في موقفها من قضية مقتل « خالد سعيد» على يد مخبرين من شرطة الإسكندرية، مضيفةً أن تلك المواقع ساهمت في تنظيم مسيرات ووقفات عديدة في مختلف المحافظات بمصر أدت إلى بدء التحقيقات في القضية.

وقالت المجلة، في تقرير فيديو أذاعته اليوم على موقعها الإلكتروني، إن مصر تحتل المرتبة الأولى في عدد مستخدمي الفيس بوك على مستوى العالم العربي وفي المرتبة الثالثة والعشرون على مستوى العالم، مشيرةً إلى أن الجيل الحالي ينمو تحت ظل «لفيس بوك».

ورأت المجلة أن الصور المنشورة لـ «خالد سعيد» قد تكون صور أي شخص من الجيل الحالي بسبب نظام الرئيس حسني مبارك، مضيفةً أن مصر ظلت تحت تأثير قانون الطوارئ لمدة 28 عاماً إلى درجة جعلت النشطاء يطلقون عليها لقب "الدولة الأمنية".

وأوضحت المجلة أن هناك الآلاف من التسجيلات المرئية والصوتية التي توضح ممارسات التعذيب في أقسام الشرطة يتم بثها على الشبكة الالكترونية، مضيفةً أن هناك خط ساخن للتبليغ عن تلك الممارسات وتقديم بعض الدروس لتجنب التعذيب في أي مكان.

وانتهى التقرير إلى أنه على الرغم من محاسبة الشرطيين وبدء التحقيق ومقاضتهما بالفعل، إلا أنهما سيقضيان بعض من الوقت في السجن ثم يعودان إلى ممارسة عملهما من جديد.

اقتباس:انا كنت فى التمشيه الصامته انهارده بالمعادى انا واصحابى وقابلنى عقيد واتنين ظباط وكلمونا بادب وقالولنا بطايق قلنالهم اتفضلو وقالولنا بتعملو ايه هنا قولنالهم واقفين على الكورنيش هو فى حاجه حضارتكو حصلت ولا ايه قالك اه فى ناس عاملين شغب وممنوع الوقوف هنا قلنالهم بس مفيش نشره اتقال فيها الكلام ده اتمنع ازاى ولا يافطه بتقول ممنوع الوقوف قالك اكتر من 5‬ يبقى تجمهر قلتلو يعنى اما اطلع رحله نطلع اربعات علشان ابقى فى السليم وبعدين احنا تبع الواقفه الصامته حضرتكو شوفتو حد عمل شغب ولا حاجه غلط قالى لا بصراحه بس اعذرونا غصب عننا قلتلو ممكن اقول لحضرتك كلمتين قالى اتفضل قلتلو انت ممكن تبقى اخو صاحبى او ابن عم صاحبى او اخو زميلتى يعنى فى الاخر احنا واحد مش اتنين فياريت منبقاش فريقين واتقو الله لان كلنا هنموت ومحدش من اللى بيديكو الاوامر دى هيتحاسب لكو يوم القيامه قالى ربنا يكرمك واوعدكو منتعرضش لحد بسوء

(07-09-2010, 09:12 PM)-ليلى- كتب:  حمد لله على السلامة عزيزى تسلم رجليك
يمكن فى نظرهم انهم منعونا و نجحوا
بس فى نظرى هما خسروا كتير و الوقفه رغم كل شىء نجحت
للاسف الاخبار من كل مكان نفس الشىء
التواجد الامنى كان كثيف انهارده بشكل ملفت
ماكنتش اعرف اننا بنخوف كدا

تسلمى وتسلم مصر بأولادها.

فعلا كلامك صحيح هما خافوا ولكن هم اخواننا وقد لمحتها فى عين بعض كبار الضباط ، شعرت انهم يشعرون بالخزى.

واضح جدا ان غالبية الشعب يرغب فى التغيير حتى أبناء الشرطة أنفسهم ، فقد لمست اليوم للمرة الأولى فى حياتى شعور بعض رجال الشرطة بأنهم مكسوفين من نفسهم.

ويمكن نجحنا فى تكليف الداخلية ملايين الجنيهات بسبب الوقفة ولكنها كانت من اموالنا.

ولكن لا أعرف لماذا منذ ان عدت الى المنزل وأنا أرغب فى البكاء ، ليس بكاء حزن ولكن بكاء محبة لمن شاهدتهم وأحببتهم وأمتن بهم قلبى من أهل مصر ، فلم يكونوا شبابا فقط بل رأيت رجال ونساء وآسر يجتازون الطريق ولا يستطيعون الوقوف ولكن نالهم شرف المحاولة.

اليوم احسست ان لى عائلة كبيرة ولست بمفردى وتسلم مصر بأبنائها.

ولكى خالص الشكر على المجهود وللزميل بلودياموند ولكن من ساهم وشجع أخيه على أن يرفع رأسه.

الحمد لله
كلامك كله صحيح
احنا مش بننزل علشان نحارب حد احنا بننزل علشان كل حر فى مصر يقول للظلم لاء
انا حسيت بنفس الشىء مع الظابط اللى كلمنى
حوارنا كان بسيط لكن محترم جداً
هحكيه حسب ما هفتكر الحوار و اتمنى اكتبه باللفظ و بالحرف
هو: مساء الخير
انا: مساء النور
هو : ممكن اشوف اوراق حضرتك
أنا : ليه خير؟
هو: دواعى أمنية
طلعت له الباسبور الغير مصرى الخاص بيا
هو: حضرتك معاكيش اى إثبات مصرى؟
انا: معايا اكيد
هو : يا ريت اشوفه
طلعته و اخده و اداه لواحد ينقل البيانات اللى فيه
و فضل يقرا فى الباسبور بعدين ابتدى يتكلم
هو: ممنوع الوقوف هنا دلوقتى
انا : خير ليه؟
هو : حضرتك شايفه الناس اللى واقفين دول كلهم
انا : أيوه
هو : لابسين اسود
انا : ايوة
هو : ليه
أنا : علشان خالد سعيد( بصراحه قلتها بكل فخر و حسيت انه معانا)
هو : هز راسه بالموافقه
انا: احنا مش بنعمل اى شىء غلط و كل الحكاية اننا بنقراقرآن او بندعى
هو: ممنوع لازم تخدوا تصريح
انا: حضرت احنا مش بنتظاهر احنا بس واقفين و محدش فينا يعرف التانى
هو: ماهو المشكلة انه فى اى وقت ممكن يحصل اى تحركات( او اشتباكات مش متأكده قال ايه هو شىء بالمعنى دا)
انا: احنا ما نعرفش بعض
هو: ماهو فى المظاهرات محدش بيعرف حد و بعدين بيحصل قلق
هو:حضرتك بتشتغلى
انا : لاء
هو : أستاذه ليلى لازم تصريح علشان تقدروا تقفوا هنا
انا: ماهو حضراتك بتشوف اللى بيحصل فى المظاهرات من ضرب للناس اللى بتاخد تصريح
هو: لا مفيش اى ضرب
بعدين بص تانى للباسبور و حاول يقرا فيه
و رجع تانى سألنى
هو: استاذة ليلى حضرتك بتشتغلى؟
انا : لاء
هو: طيب لو سمحتى تعدى الناحية التانية و ماتقفيش هنا دلوقتى
انا : حاضر مفيش مشكلة
بنتى كانت قعده على الصور فنزلت و قالوا لها انزلى براحه اوعى تقعى
و فى مخبر حاول يساعدها فى النزول
طلب منهم يجيبوا بطاقتى بسرعة
بعدين طلب من مخبر تانى انه يوصلنى للرصيف التانى
وقف لى العربيات و عدينا

لحد هنا كنت بتعامل مع انسان محترم جداً
بينت له انى بطالب بالحق و هو كان عارف ان طلبى مشروع لكن زى ما بيقولوا الروتين و التعليمات العليا
للاسف
وقتها جات بنت كانت معانا فى الوقفة الاولى و ما كنتش عايزاهم يخدوا بطاقتها لأنها جات تشوف ايه بيحصل معايا
فاخدتها بسرعه علشان محدش يسألها اى حاجه و عدينا الشارع
فضلنا واقفين نراقب اللى بيحصل
اعتقد نفس الشىء مع الظابط دا لأنه فعلا كان محترم
لكن بعدها ابتدى الوش التانى يظهر من ظباط تانين على نفس الرصيف بتاعى
كانك واقف مع ناس عايزه تنقض عليك باى شكل
بس حسيت فى عيونهم هما الخوف والله
رغم الشكل و الرتب و العدد لكن لما كنت ابصلهم احس انهم هما اللى خايفين مش انا
و محدش قالى لى يالا امشى او هددنى غير اللهم واحد قال لى يالا امشى يا بت
و برضو قالها و هو اللى مشى مش انا ههههههههههههههههه
لكن للاسف بمسافة صغيره كان الوضع مختلف شوية و انا كتبت الحوار اللى حصل على لسان باقى الشباب من شوية
و للاسف كان فى ناس محبطه
والله مفيش اى داعى للاحباط
زى ما قلت على الكريم الواحد بيطلع من الوقفات دى بروح جميلة جداً
اننا كلنا لنا ضهر نتسند عليه و كلنا لبعض و مصر فعلا عمرانه بالخير فى ناسها
بس فى ناس عايزه بس شوية التراب اللى عليها يتنضف مش اكتر

---

كلنا خالد سعيد‏ العساكر دول قالولنا والله انتو جدعان واحنا لولا الجيش كان زمنا معاكو ..سارة .. شاهدة عيان عن اللي حصل النهاردة في اسكندرية بتحكي القصة بتاعتها

شاهدة عيان تحكي أحدث وقفة اسكندرية
Jul.09, 2010 الوقفات الصامتة

سارة محمد بنت عمرها ٢١ سنة بتحكي اللي حصل معاها في اسكندرية

بصراحة من يوم حادثة خالد وانا نفسي انزل بس للأسف كان والدي بيمنعني وانهاردة وبعد محاولات كتيير اوي وافق اني انزل مع زميلاتي
الساعة 6 بالظبط لبست ونزلت زيي زي اي حد كان بستعد للنزول وحطيت المصحف في شنطتي
ركبت الميكروباص اللي كان فيه 3 غيري لابسين اسود واكيد كنا كلنا هدفنا واحد
نزل شاب عند المحروسة ونزلوا التانيين عند كوبري ستانلي ونزلت انا عند مكتبة اسكندرية
في البداية كنا بالظبط 4 بنات و5 شباب وقفنا في صمت نقرأ في كتاب ربنا
وبعد عشر دقايق جالي مخبر وقالي \ يا انسة اتفضلي امشي من هنا ممنوع الوقفة دلوقتي وممنوع اي تجمع
قولتله اني مش حتحرك ومفيش حاجة تمنعني اني اقف علي البحر واقرا قران واعمل اللي انت عايزه انا مش حتحرك
وساعتها تدخل راجل كده فوق الخمسين وقاله احنا مش حنتحرك ومفيش قانون يمنعنا
وكان عددنا بدأ يزيد اوي
ولما لقينا الضغط شديد اوي من المخبرين ورجال الامن اضطرينا نمشي في صف واحد كلنا ورا بعض وبرده في صمت من دون اي هتاف او حتي همس
مشينا من مكتبة اسكندرية لحد قبل سيدي جابر (عند بيت خالد) بشوية صغيرين
وفجأة لقينا الشباب وقفوا واتلموا حوالين بعض وبدأ صوتهم يعلي
وجاتلنا بنت تصوت وتقول يبنات عدوا الناحية التانية ضربونا وبهدلونا
ساعتها لقيت كل البنات حتي زميلاتي عدوا البحر في فزع وخوف من شكل البنت دي وبعد ما استوعبنا الموقف ولقينا الامن بيجري وري الشباب قولنا احنا مش حنسيبهم لاننا معاهم ورجعنا تاني علي الكورنيش
وحوطنا الامن المركزي بكورديون وكان بيمشي اي حد بره الكورديون ده ولو مرضاش يتحرك بينضرب سواء بنت او ولد
فضلنا نهتف شوية ونرفع المصاحف شوية
وصلينا المغرب جماعة واللي مكنش متوضي تيمم من الصخر
بعديها فضلنا قعدين علي الارض وقولنا مش حنتحرك لو موتنا ودفنتونا هنا مش حنقوم وحق خالد واي حد اتظلم في البلد دي احنا حنجيبه
وبعد الهتاف الكثير والصمت القليل جالنا حد كبير كده من البوليس لابس بدلة بيضة وخواتم في ايديه وشكله غريب
اتفاهم مع الشباب وقالهم ممكن تمشو في صمت زي ما كنتو ماشيين ومحدش حيتعرضلكوا
وفعلا عساكر الامن المركزي فتحولنا الطريق ورجعنا للطريق اللي كنا ماشيين فيه ولكن عكس الاتجاه وابتعدنا عن بيت خالد سعيد
بعدها بعشر دقايق لقينا عساكر الامن المركزي بيجروا علينا وحوطونا تاني بس كان عددنا ااقل من المرة الاولي
ومحدش راضي يكلمنا
وبدات اختلافات الرأي بينا
اللي يقول نهتف ونقول اللي عايزينه
واللي يقول الواقفة صامته والمفروض نلتزم بالتعليمات
واللي يطلع يقول احنا في ارض الجهاد وحنموت هنا وحنحارب ويقولوا عليه من الاخوان
واللي يهتف ويقولوا متترددوش وراه لان ده من الامن ومدسوس وسطينا
واللي يحاول يتكلم مع عساكر الامن المركزي ويفهمهم الوضع
وبعد ساعة من الوقوف في الحصار ولا كأننا يهود او ارهابيين محاصرينهم بعساكر امن مركزي عددهم يفوق عددنا بخمس مرات
وبعد كده جالنا شاب من الشباب بيقولو اننا المرة الجاية حناخد تصريح بالوقفة وحنقف برده في صمت ومش حنهتف ومحدش حيتعرضلنا وان مفيش حد اتقبض عليه ودي اشاعات
وبداو يخرجونا زي الحرامية تلاتة تلاتة
وقولنا ان مينفعش البنات تخرج والشباب يستنوا يخرجوا في الاخر لان في كليتنا بيعملوا معانا كده وبعدين يقبضوا علي الشباب وميخرجهومش
فقرروا ان كل بنتين يخرج معاهم شاب من الشباب
واحنا خارجين في منتهي الذل اللي يقولك امشي يا انسة واتلحلحي
واللي يقول انتو ايه اللي جابكوا انتو مش خايفين علي نفسكو
وعساكر الامن المركزي اللي كانو جوه العربيات منزلوش ( 6 عربيات امن مركزي مليانة عساكر ده غير الاعداد المهولة اللي كانت محوطانا) العساكر دول قالولنا والله انتو جدعان واحنا لولا الجيش كان زمنا معاكو

الكلمة دي بجد اثلجت صدري وحسستني اننا عملنا حاجة
ولكن الغريب والي يجهله امننا القومي المصون اننا بجد وبقولها بكل ثقة لو حنقرر ننزل كل يوم جمعة ولحد خمسين سنة ادام احنا حننزل معاكو
لانهم كل اما يعاندونا ويهينونا احنا حنزداد اصرار وعزيمة ودفاع عن حقوقنا وحقوق المظلومين حتي لو بالصمت

سعيده اوي يا ادمن(كلنا خالد سعيد) باللي انت عملته وانك حركت الشباب وبقولك استمر وبجد احنا معاك مهما يعملوا فينا

الحمد لله نفس الاحساس عند كل اللى شاركوا فى الوقفة التالتة
المشكلة ان حكومتنا للاسف ما بتتعلمش
القمع عمره ما هيولد غير مقاومة و بقوة اكبر

كلمات لبنت بعد رجوعها من الوقفة:

اللى شوفتوا النهارده على كورنيش النيل ما يتصدقش كميه الامن اللى لو كنت عشت عمريين على عمرى ما كنتش هشوف قدها بجد اثبتولنا ان فى صمتنا قوه...خايفين من صمتنا امال لو اتكلمنا هتعملو ايه ؟؟و شعب مصر ماخفش ده كمل و اتحدى فعلا عمار يا مصر ...بجد الواحد دلوقتى يكمل بقلب و مايخفش عشان لو حصله اى حاجه حقه مش هيروح هدر ال 80 مليون هيجابوله حقه هيبقو ايد واحده ...كلنا مصر...كلنا خالد سعيد
دلوقتى اتاكدت اننا صح و لينا حق و هنخده ... ماضيقتش من وقاحتهم معانا فرحت اننا كنا صامديين ماتراجعناش و مخفناش منهم ....و لسه هنورنهم وشنا التانى....احنا فوقنلكوا و هنخليكوا تلفوا حاوالين نفسكوا

---

انا اسمى خالد محمد سعيد‏
تحيه لأبطال اسكندريه
فيديو وقفه على كورنيش اسكندريه

---

حتى العصافير شاركتنا وقفتنا انهارده
الله يرحمك يا خالد و يحسن اليك
صحيت ناس كتير من نومها

موش عاوز احبطك يا ليلى
بس انا موش متفائل
بعد كل الحملات الإعلاميه علي الفيس بوك ومواقع الإنترنت ووسائل الإعلام
كان لازم النهارده يبقي فيه طوفان من البشر وموش لازم كوبري قصر النيل تحديدا
القاهره اللي عدد سكانها ١٦ مليون لو خرج فيها ١٠٠ الف من اللي بيروحوا ماتش الأهلي والزمالك لأصبح ذلك هو العنوان الرئيسي لكافة القنوات الإخباريه ووكالات الأنباء في كل أنحاء العالم
لكن أستطيع وبكل ثقه أن أقول لك أن عدد من خرجوا في القاهره لا يتجاوز ٢٠٠٠ شخص في أفضل تقدير

علي من يضار من قانون الطوارئ أن يأخذ حقه بيده
لو كان خالد سعيد أخي
لأصبح قسم سيدي جابر كوم رماد ولو بعد حين

كذلك ثأر محمد صلاح يقع علي أهله

لماذا لا تحدث تجاوزات من الشرطه في الصعيد
لأن كل عائله هناك تملك سلاح وتستطيع أن تقدم متطوعين للثأر ويعلم ضباط الشرطه تماما من صغيرهم وكبيرهم أن قتله من أسهل ما يمكن لو تجاوز حدوده وخاصة في قنا و سوهاج و اسيوط

تحضرني قصه حدثت في مركز البداري في أسيوط
تتلخص في أن ضابط شرطه من نوعية هشام بيه ( أحمد زكي في فيلم زوجة رجل مهم )
قام بتعذيب متهم في قسم الشرطه وحتي شارف علي الموت وحمله في السياره وأعاده إلي أهله و توفي الرجل بعدها بيومين وكان مستضعفا وليس له عصبه
وكان ابنه لا يزال مراهقا بعمر ١٤ عام
لكنه أخذ بثأر أبيه
وضع مسدس في قفه صغيره ووضع فوقه خبز وغطاه بشال و دخل قسم الشرطه ودخل علي الظابط في مكتبه واخرج السدس واطلق عليه النار وأرداه قتيلا

لا يفل الحديد إلا الحديد

اتمنى ان الوضع يتعدل من غير العنف
لكن للاسف كلامك صحيح
لو فضل الناس بالشكل دايبقا قدمنا شويه كتيره لسه
تعرف يا فارس ان فى ناس لحد دلوقتى فى القاهرة مش عارفه ايه اللى بيحصل اصلاً
تخيل!!!!!!!!!!!!
احنا علشان متابعين الموضوع على النت فكل صغيرة و كبيرة عارفينها بالصور و بالصوت و الصورة
لكن من روايات امبارح و من تجربتى الشخصية
الناس مش عارفه اللى بيحصل حواليها و الالعن بقا ان فى ناس مصدقة الافلام الهندى بتاعة تصريحات الدخلية أو عايزة تصدقها علشان مش عايزه تتحرك و لسه رجليها مغروزة فى الطين زى راسها بالظبط
هى دى المشكلة
لو شفت الصور لكل الوقفات هتلاقى اللى واقفين يا شباب صغير او سيدات و انسات و اطفال
نفسى افهم حاجه فين رجالة مصر اللى بين الاربعين و الخمسين
ليه عددهم قليل فى الوقفات؟
ليه صوتهم واطى
ليه اقرا ان اب وافق بناته تنزل و هو قعد فى البيت؟
جميل انه وافق على نزولهم
بس هو ايه اللى بيدور فى راسه؟
ليه فضل مستخبى؟
اتزرع فى نفوس الناس دى شىء واحد بس
انه مفيش فايدة و انه هنعمل ايه
انا مش محبطه يا فارس بالعكس
احنا بنحاول بكل الطرق نجيب حقوقنا كلنا و بنبتدى بالطرق السلمية
و للاسف كل يوم بتثبت الحكومة المصرية انه للاسف القمع هو الرد الوحيد اللى تملكه
و دى صفة انسان او منظومة فيها فساد كبير بإعتراف افعالها و فيها ضعف اكبر
دا بيولد يوم بعد يوم غضب اشد
العدد هيبقا فى زيادة انا متأكدة
و زى ما بيقولوا مشوار الالف ميل بيبتدى بخطوة
لسه فى ناس كتير حتى من اللى تعرف الحقيقة خايفين او متشأمين او سلبيين
دول محتجين واحد من اتنين
يا يخدوا على دماغهم علشان يفوقوا و لما يتوجعوا هيتحركوا
او محتاجين قبل ما يتخدوا فى الرجلين انهم يصحوا شوية و يتحركوا بشكل سلمى قبل ما الطوفان يجى و كل شىء يتغير بشكل لا تحمد عقباه
لكن التغيير اكيد جاى جاى
امتى؟؟ فدا فى علم الغيب
لكن كل المظاهر بتقول انه خلاص على الابواب
بس دا للى بيفهم و بيشوف بعقله قبل عينيه

http://www.bbc.co.uk/arabic/middleeast/2..._tc2.shtml


viva bbc

استفتاء
https://www.survs.com/survey/KWCW3W05CR

فكرة الكتابة على مليون ورقة فلوس

زميل لينا في الجروب إسمه سعيد بعد الوقفة ومنعه من حضورها .. رجع البيت متضايق وقرر يكتب على أكبر ورقة فلوس معاه .. ١٠٠ جنيه كتب عليها لا للتعذيب لا للطوارئ .. البلد دي بلدنا

الفكرة مجنونة ولو عملناها ممكن يوصل صوتنا لكل الناس لأن الفلوس أي حد بيتعامل بيها ونسبة المخاطرة تكاد تكون معدومة .. ونقدر نكتب على العملات الصغيرة بس عشان لو حصل مشكلة ورفضوا الفلوس.

فيه ناس اعترضت في الجروب وقالت إنها مش فكرة حضارية لأنها بتبوظ العملة وبتفتح المجال لكل واحد يكتب اللي هو عايزه وإن أكيد عندنا طرق أقوى من كده للتعبير عن رأينا.

قررت أعمل استطلاع رأي واللي هيطلع من الاستطلاع أول ما ينتهي عدد المشاركين فيه لـعدد كبير هننفذه

---

خبر صحفي: الوقفة الصامتة الثالثة نجاح رغم المضايقات الأمنية
Jul.10, 2010 "كلنا خالد سعيد" في الإعلام


http://elshaheeed.org/wp-content/uploads...165312.jpg


نجح مئات المصريين من تنفيذ الوقفة الاحتجاجية الصامتة بالملابس السوداء مساء اليوم، في 14 محافظة من أبرزها الإسكندرية والقاهرة والدقهلية والبحيرة والإسماعيلية وطنطا وبورسعيد والسويس ودمياط والشرقية والغربية..

جدير بالذكر أن قوات الأمن في محافظات مصر حاولت إجهاض الوقفة بعد نزول آلاف المواطنين خاصة في محافظتي القاهرة والإسكندرية إلى الشارع للمشاركة في وقفة صامتة بالملابس السوداء حدادا على روح الشهيد خالد سعيد، وتعبيرا عن رفضهم أسلوب التعذيب الممنهج الحاصل في أقسام الشرطة في مصر. وكانت صفحة كلنا خالد سعيد على موقع الفيس بوك والذي يقدر عدد أعضاؤها بأكثر من ١٨٥ ألف مشترك قد دعت لتنظيم هذه الوقفة من الساعة السادسة والنص وحتى السابعة والنصف وانتشرت الدعوة في كافة الصفحات والمجموعات المصرية على الإنترنت. وتسبب نجاح الوقفتين الأولى والثانية في حالة من التربص الأمني بالوقفة الثالثة ومحاولة إجهاضها خاصة بعد اشتراك مجموعة كبير من السياسيين والقوى الناشطة في المجتمع حيث شوهد المئات من رجال الشرطة على الكورنيش في الإسكندرية والقاهرة ومدرعات الأمن المركزي المحملة بالجنود والعديد من ضباط الشرطة بملابس مدنية. كما شهدت بعض المحافظات تواجدا رفيع المستوى بحضور لواءات وعمداء.

وفي القاهرة استطاع عشرات الشباب اختراق الكردونات الأمنية التي تم نصبها في مداخل كوبري 6 أكتوبر وكوبري قصر النيل بمحافظة القاهرة والوقوف لفترات قصيرة قبل أن تتمكن قوى الأمن من طردهم بدعوى مرور شخصيات هامة على الكباري، فيما نجح ناشطين سياسيين من إقامة وقفة احتجاجية أمام نقابة الصحفيين في وسط البلد بعد محاولاتهم المستمرة للالتزام بالوقفة الصامتة على الكورنيش.

وحدثت بعض المناوشات بين المتظاهرين وبعض أفراد الداخلية. وفي مشهد يشبه لحد كبير مشاهد حصار المتظاهرين في غزة تم حصار عشرات الشباب والفتيات المشاركين في الوقفة بالإسكندرية في منطقة كليوباترا حيث تم عمل طوق أمني ومنع الشباب من الحركة لمدة أكثر من ساعة. وفي ذات الوقت تعرضت مراسلة مجلة التايمز الأميركية أبيجال هوسلونير للضرب أثناء تغطيتها للوقفة الاحتجاجية الصامتة وتم التحفظ على جهاز الكمبيوتر الخاص بها إلا انها حصلت عليه بعد أن التعرف على هويتها كما تم الاعتداء على مصور جريدة النيويورك تايمز الأمريكية بالضرب ومصادرة الكاميرا الخاصة به بعد تصويره لبعض رجال الشرطة يتعاملون بقسوة مع المتظاهرين.

وتحفظت قوات الأمن في عدة محافظات على كروت الذاكرة الخاصة بكاميرات العديد من المشاركين وقاموا بمسح الصور من على أجهزتهم المحمولة. وشارك في وقفة اليوم شخصيات رفيعة من النخبة المصرية كجورج اسحاق وحسن نافعة ومحمد غنيم وبثينة كامل والفنان خالد أبو النجا.

والجدير بالذكر أن هذه الوقفة يشارك فيها بصفة رئيسية العديد من الشباب والفتيات المتعاطفين مع قضية خالد بالدرجة الأولى والذين هالهم صورته بعد وفاة جراء التعذيب من قبل مخبرين في الداخلية المصرية. والعديد منهم يشارك ولأول مرة في أنشطة من هذا القبيل.

وقد شارك أكثر من ١٠٠ مصري مقيمين بإنجلترا في وقفة صامتة هي الأولى من نوعها في أحد ميادين العاصمة لندن للمطالبة بالقصاص من قتلة الشاب خالد سعيد ووقف تطبيق قانون الطوارئ والتوقف عن تعذيب المواطنين في الأقسام المصرية. كما نظم عشرات المصريين وقفة صامتة أمام السفارة المصرية بواشنطن يوم الأربعاء الماضي في نفس وقت إقامة السفارة لحفلها السنوي للاحتفال بعيد الثورة.

لمشاهدة بعض الصور الخاصة بالوقفة: http://www.facebook.com/album.php?aid=5917&id=104224996294040

للتواصل ولمعرفة المزيد عن صفحة كلنا خالد سعيد

http://www.facebook.com/elshaheeed
http://www.elshaheeed.org
http://www.twitter.com/elshaheeed
elshaheeed@gmail.com

---

إسلام علي: من اتخاذ القرار لحد الرجوع للبيت
Jul.10, 2010 "كلنا خالد سعيد" في الإعلام

بداية تفكير
من اول ما بدأت حكاية الشهيد خالد سعيد وانا مش عارف افكر يا ترى اكون مع الناس دي ولا لأ وبصرااحة فكرت كتير اوي.. لقيت ان احسن حل اني احاول اساعدهم بس من بيتي.. لأسباب كتيرة منها ان اهلي مش موافيقن.. وان والدي مش مقيم معانا هنا في مصر.. وان اهلي خايفين عليا وكلام كتير من دة.. واني خلاص ريحت دماغي وقلت ماليش دعوة تولع البلد واللي فيها.. انا هضيع نفسي علشاان بلد ما تستاهلش وحكوومة زي الزفت..

الاحساس بالمسؤولية

بصراحة انا قعدت افكر شوية.. طيب يا ترى انا فرحان بنفسي كدة وانا قاعد اكتب على الفيس بوك بس.. ويا دوب بشتم في الحكومة وما عملتش اي حاجة ايجابية.. ف بجد قررت اني انزل واقف في الوقفة الصامتة واعبر عن كل اللي جوايا…

قرار النزول للوقفة

اول ما قلت اني هنزل.. قررت الكلام دة اول امبارح بليل..
اول حاجة كلمت واحد صاحبي هوا نزل في الوقفتين اللي فاتوا وعارف الدنيا ماشية ازاي…
شجعني جدا.. وقالي ايه سر التغيير المفاجئ دة وانك قررت تنزل وكدة قلتله كل الكلام اللي فات…
بعد كدة بدأت ابص على الفيس بوك وعرفت اماكن الوقفات وكدة.. وخلاص قمت البس وبدأت اجهز هدومي..

ماما وما ادراك ما ماما

ماما انا عاوز القميص الاسود.. ايه انت رايح فين.. انا نازل الوقفة.. نعم وقفت ايه انت مجنوون.. اسلام ابوك مش هنا واحنا مش ناقصين.. انا مش مستعدة اخسرك… بداية بالكلام الهادي.. وبعد كدة زعييق وعياااط وهيستيريا… وقلتلها انتي عارفاني هنزل يعني هنزل
المهم انا لسة جايب كاميرا من اسبوع وبدأت اتعلم احتراف تصوير.. وكنت ناوي آخدها معايا علشااان اصور وكدة.. بدأت ماما تزعق جامد وتعيط.. وتقولي بلاش ولأ وارجوووك وكلام من دة كتير..
لدرجت انها كلمت اعز اصدقائي وقالتله وقعد يقنع فيها.. بلا فايدة.. وفي الآخر هوا اللي قالي ما تنزلش بعد ما كان قاعد يقولي انزل وانت قاعد في بيتك بتتكلم وبس..
في الآخر سبت الكاميرا.. هيا كان اعتراضها على الكاميرا اني هلفت الانتباه اكتر ليا..
وطبعا اخدت شوية دعاوي زي الفل.. يا رب ما تلحق.. ان شاء الله مش هتلاقي حاجة تركبها..

في الطريق الى الوقفة

لبست ونزلت الحمد لله.. كانت الساعة 6 وربع انا ساكن في النزهة.. مصر الجديدة.. يعني الطريق لرمسيس حوالي ساعة الا ربع لو مافيش زحمة..
المهم ركبت في اقل من دقيقة.. ووصلت رمسيس في اقل من ربع ساعة.. بجد ما كنتش مسدق نفسي.. ايه دة دا انا بروح بالعربية في ربع ساعة بالعافية… كل دة اداني اندفااع اكتر.. واحساااس ان ربنا معايا بجد, واني بعمل حاجة صح..
اخدت المترو للتحرير.. اول ما نزلت المترو لقيت الناس بتبص عليا بغراابة شديدة ولا كأنهم عارفين كلهم وعاوزين يقولولي بلاش بلاش.. بالظبط زي ما قلت لصاحبي.. ولا اكني مشجع زملكاوي قاعد في الدرجة التالته شمال.. المهم وصلت التحرير..

الوقفة وكل اللي حصل

اول ما طلعت سألت العسكري اروح ازاي قصر النيل.. لأني ما اعرفش كويس اوي في مصر.. انا ما كملتش سنة عايش هنا.. المهم قالي من الطريق دة..
بصراحة كان قلبي بدأ يدق اكتر واكتر وبدأت اقلق مش عارف ليه..
لقيت شوية بنات وشباب واقفين مع بعض كدة ولابسين اسود.. بس كله كان خايف يتكلم مع اي حد.. قلت جوا نفسي لأ خليني اروح قصر النيل احسن.. عديت الشارع وفي شارع هيطلعني على قصر النيل.. لقيت تلاته متخلفين.. ” متخلفين = مخبرين ” بينادو عليا..
انت يا ابني رايح فين ..
انا وبكل برود رايح اتمشي..
لأ مافيش تمشيا النهاردة..
ليه هيا اتمنعت..؟؟
انت هتستظرف.. امشي من هنا احسنلك وبالأدب..
بصرااحة مشيت وقلت جوا نفسي مش هتعملك مشكله وتضرب على الفاضي.. استنى شوية المشاكل جاية جاية..
فضلت استنى كتير اوي.. وزهقان جدا.. وتليفونات لصاحبي.. وبردة مش عارف اعمل ايه وفجأة لقيت حوالي 30 واحد راجعين من نفس الشارع… وكلهم لابسين اسود.. ماشيين اتنين اتنين..
ف رحت واقف معاهم ومشيت معاهم بدون ولا كلمة..
وبدأت اسألهم قالولي احنا اتمنعنا من الوقوف على قصر النيل وفي بعضنا تعرض للضرب..
تعالى احنا رايحين شارع شريف..

بداية المظاهرة

اخدنا بعض وكان في قائد ولد كدة عندة 25 سنة تقريبا هوا اللي بينظمنا.. لحد ما دخلنا شارع من شوارع وسط البلد.. وفجأة اتعمل علينا كوردوون كبير قوي عسااكر امن مركزي ومخبرين.. وبدأت المشاحنات والمشادات.. بس يا دوب زق وضرب في الكتف وكدة.. وجه لواء اتكلم معانا بكل سخافة..
انتوا نازلين من بيوتكم النهاردة ليه..؟؟
رد القائد بتاعنا.. بكل بروود.. عادي بنتمشي..
بتتمشوا ولابسين اسود ليه..
قاله عادي بنحب اللون دة..
راح المخبر زعق فيه وقاله اتكلم عدل يا روح امك..
هنا انا اتدخلت.. مش عارف ايه اللي خلاني اتدخل.. بس بصراحة حسيت اني مش قادر اسكت اكتر من كدة..
وبقوله يعني فكرك بنتمشي ليه فاضيين.. وبعدين اتكلم بالراحة شوية ما تزعقش..
راح اللواء وجهلي الكلام وقالي.
يب انتوا بتعملوا كدة ليه علشاان خالد سعيد ..؟؟
قلتله يعني تقريبا.. خالد سعيد حرك حجات كتير كانت جوانا..
راح قايلي طيب هوا مات ازاي انتوا مش عارفين انه كان بيتاجر في الحشيش..
رد الولد اللي معايا.. طيب والنبي لو في عندك حشيش هاتلي لحسن الحشيش شاحح اوي..هههههه
وكمل كلامه.. يا باشا الولد دة اتقتل..
قاله اتقتل ازااي ومين قالك انه اتقتل..
قاله الدنيا كلها… عارفة..
قاله مين اللي قتله..
رد الولد وبكل انفعااال اتنين مخبرين.. اتنين كلاااااااااب..
راح المخبر اتعصب اوي..
رحت انا شديد الولد لوا لأن الموضوع كان هيبدأ ضرب بجد بقا..
وانا ما كنتش عاوز الموضوع يوصل للمرحله دي.. بصراحة مش علشاان خايف على نفسي.. بس بدأت احس بالبنات اللي ماشيين معانا دول..
المهم في آخر الكلام توصلنا انهم هيسيبونا نمشي بس بشرط نمشي تلاته تلاته..
المهم الولد جة وظبط معانا كلنا واتفقنا على اننا نروح على نقابة الصحفيين.. وبين كل اتنين بيخلي واحد عارف الطريق كويس ويقود المجموعة.. وبالفعل .. بس هما كانوا بيسيبوا بين كل تلاته وتلاته دقيقتين ولا حاجة..

الى نقابة الصحفيين

مجموعتي كنا اربعة.. انا وولد وصحفية في النيويورك تايمز.. والمساعد بتاعها..
بصراحة كنت حاسس باطمئنان على نفسي لأن الولد اللي كان معايا طلع امريكي الجنسية.. والصحفية كذلك…

نقابة الصحفيين

اول مرة اشوف مظااهرة بجد.. ناااس كتير حوالي 200 واحد جوا النقابة.. نطيت السور وبدأت اهتف معاهم.. هتافات بكل حاجة كل اللي نفسك فيه اي حاجة عاوز تقولها قولها… حاوطونا بكردوون عساااكر كبير بردة.. وفجأة قناة العربية جت تصور.. واكتر من صحفي وصحفية تصوير وموبيلات وكاميرات.. وناس كتير اتعاطفت معانا وبدأت تصورنا..
وكل دة ومحدش فينا اتلمس..
بس مافيش حد قادر يخرج.. ولا حد قادر ينضم لينا..
فضلنا على الحال دة لحد ما المغرب اذن.. ومن هنا بدأنا جوا نفسنا نخاف.. لأن اللواء كان خلى القناة والمصويرن يمشوا واغلبية الصحفين كانوا مشيوا خلاص..
والليل هيليل والضرب هيشتغل..
المهم معرفش ليه وفجأة اتنسق مع الناس اللي معانا.. انهم يسيبونا نمشي وفي حالنا.. مش عارف ليه بصراحة.. علشااان الجنسيات الاخرى اللي معانا ولا علشاان المصورين..
وفعلا مشينا تلاتات بنفس الطريقة.. وبكل احتراااام ومفيش اي حد اتعمل فيه اي حاجة…

روحت البيت… وانا كلي فخر… بجد حسيت اني عملت حااجة.. بجد مبسوووووط جدا جدا

بعد كل الكلام اللي انا كتبته بجد عاوز اقول حاجة واحدة..
اي حد خايف ما يخااافش احنا اقوى مما تتخيلوا..
بجد البلد دي هتتغير على ايدينا…

خالص تحياتي
اسلام علي

كلنا خالد سعيد‬‏ ‫بجد حرام شباب زي ده يتحاصر .. إحنا في غزة؟ والله بجد حسبنا الله ونعم الوكيل

---

طالما بيحاولوا يضطهدونا حتى في صمتنا .. هنتكلم على ورق الفلوس اللي بتطير بين الناس .. رسالتنا هي: لا للطوارئ .. لا للتعذيب ... البلد دي بلدنا ... ولازم نقدر نكتب على مليون ورقة .. كل واحد يكتب على ١٠٠ ورقة معاه .. ويبدأ ينشرها .. اكتب على الجنيه والخمسة جنيه والعشرة جنيه .. عشان تتداول أكتر ويشوفها الناس





‫فكرة الكتالة على الفلوس: نتيجة الاستطلاع خلاص مش بتتغير .. ١٨٠٠ واحد شاركوا ومنهم ١٨٪ بس معترضين عليها .. أعتقد كده نقدر نبدأ ننفذها .. عايزين نعمل مشروع مليون ورقة .. ونبدأ من بكره نكتب: لا للطوارئ لا للتعذيب ... البلد دي بلدنا ... هل نقدر نكتب فعلا على مليون ورقة فلوس؟‬