لا لديكتاتورية مبارك ... ولا لديمقراطية أمريكا المزعومة



مازالت الامبريالية الآمريكية تنسج خيوطها حولنا حاملة شعار الديمقراطية المعادية شكلا وموضوعا لمصالح شعوبنا.



انها أمريكا ذات التاريخ الأسود التي طالما ساندت ديكتاتوريات العالم بما فيهم نظام مبارك الذي قمع المعارضة الوطنية طوال فترة حكمه راكعا أمام مطالبها.

انها أمريكا التي بنت بدماء فقراء العالم امبراطورية القطب الواحد ...



أمريكا التي تعتقل الآلاف من المناهضين لسياساتها في سجون جوانتنامو وأبو غريب وغيرها، وتمد سلاخانات أجهزة الأمن المصرية بأحدث أدوات التعذيب وتدرب جلاديها على أبشع الطرق لاستخراج المعلومات بل وترسل معتقليها ليتم تعذيبهم في مصرهي نفسها التي ترسل لنا الآن وزيرة خارجيتها في محاولة لخداعنا بأنها راعية الديمقراطية في العالم، وكأن الشعب المصري غافل عن جميع جرائمها.



اننا اذ نعلن رفضنا لسياسات النظام المباركي التي أفقرتنا وقمعتنا طوال 24 عاما، نتصدي أيضا لأي وهم يجعل من الاستعمار الأمريكي لشعوبنا رمزا للحرية والديمقراطية التي نناضل من أجل سقوط مبارك لتحقيقها في وطننا مصر.



ان مبارك الذي دأب على اتهام جميع معارضيه بالعمالة لجهات أجنبية، هو نفسه الذي يعلن ارتباطه بالادارة الأمريكية ارتباطا وثيقا، ويرحب الآن بأحد رموز ادارة بوش الامبريالية (كونداليزا رايس) لعقد واحدة من صفقاتهم المشبوهة التي لا تخدم سوى المصالح الأمريكية والنخب الحاكمة المستبدة.



اننا نرفض التدخل الأمريكي في شؤوننا الداخلية والخارجية ونطالب بالافراج عن كافة المعتقلين من سجون مصر وجوانتنامو وأبو غريب وأخيرا برحيل الديكتاتوريات التي تدعمها الامبريالية الأمريكية وعلى رأسها النظام المصري.



لا للتمديد ... لا للتوريث ... لا للتدخل الأجنبي



" كفاية "

شباب من أجل التغيير

(f)(f)(f)

سؤال سببه الفضول... ما هى الديمقراطية التى تدعوا لها "حركة كفاية" ؟ وما هو الإختلاف بينها و بين ما تدعو له الإدارة الأمريكية؟

:what:

على مقهى التهييس السياسى
نرمين خفاجي



بعد يوم مليان سياسة وفن واصحاب ورفاق ،الصبح عند النائب العام للمطالبة بالافراج عن الرفاق المعتقلين احمد سعد ومحمد شفيق ونظرا اننا ملطشة الحكومة الايام دى "والنائب العام ابن بار للحكومة" قعدنا على بابه نستجدى الافراج عن الشباب وبصراحة الجو قصاد باب السيد النائب كان لطيف وطرى بسب الاسقف العاليه والجو برة كان نار فقلنا اهى قاعدة ومش ماشيين لحد على الاقل مانعرف مصير الشباب . لكن الظاهر ان قاعدتنا ما عجبتش سيادة النائب العام وطلب عبر مندوب طبعا " لانه مش ممكن ينزل لمستوانا" اننا نمشى ونيجى كمان ساعتين والاهايجبلنا الامن يطردنا برة . عنها هو قال كدة والناس سخنت وجعرنا كلنا بالصوت الحيانى معتصمون لحد ما ييجى المعتقلون ويبدو والله اعلم ان الراجل اتخض من اصواتنا وبعد اقل من 5 دقايق لاقيناه بيرد علينا عبر وسيط كالعادة بمعلومات عن المقبوض عليهم وانهم اتعرضوا على نيابة امن الدولة ورقم القضية وانهم اخدوا 15 يوم على ذمة التحقيق . المهم ما كدبناش خبر ومشينا عشان نشوف احنا ممكن نعمل ايه عشانهم ورحنا على نقابة المحامين اللى كانت منظمة مؤتمر عن المعتقلين السياسيين .وبعد المحامين قلنا نحضر حفل احياء ذكرى الشيخ امام بنقابة الصحفيين . المهم غنينا واتبسطنا واتفقنا على خطط مظاهرات واعتصامات كتيير عشان نقرف الحكومة اللى ذللانا ومسلطة علينا البلطجية يقطعولنا هدومنا ويضربونا وينتهكوا ادميتنا .

قلنا بقى نروح ننام ونستريح عشان نعرف نغلس ونقرف الحكومة كوييس فى الايام الجاية . ونظرا لاننا بنمشى مع بعضينا يعنى كل شوية اصحاب بيمشوا مع بعض لان زى ما احنا عارفيين ان فى الايام الجميلة دى" ازهى عصور المش عارف ايه .." ممكن يعنى لاقدر الله ان حد يتخطف اويضرب الخ ...من حد مزقوق من حكومتنا المصحصحة والملحلحة والمشخلعة واللى مراقبة التليفونات والموبايلات ويمكن كمان الحمامات.

المهم اتفقت انا وضيا ووائل نروح سوا وفى اخر شارع مجلس الامة فى عابدين وعلى مشارف السيدة تخيلوا وقعنا وقعة سودة...

شفنا ناس قاعدين على قهوة وواحد واقف بيخطب فيهم "مؤتمر سياسى يعنى" الشيطان قالنا نروح نسال ونسمع ايه الموضوع

سالنا واحد واقف على جنب مين الناس دول ياعم ؟ قال دة واحد من حركة كفاية " على الراجل اللى بيخطب فى الناس واللى هانطلق عليه ابو شنب" ولقينا الناس بتدعونا بتصميم نقعد ونسمع ابوشنب وبصراحة احنا استفتينا فضولنا وقولنا نتوكل على الله ونقعد نشوف الناس دى بتقول ايه .
ما تتخضوش حركة كفاية ما تقدرش تعمل كدة لان الحكومة مش هاتسمحلهم بالمساحة دى وطبعا من اول كلمة اتضح انهم حزب وطنى ويبدو والله اعلم ان الحزب اياه نظم دورات تدريبية لتحفيظ حلقات مسلسل عماد الدين والرئيس السحرى لما عماد الدين قعد يدعك يدعك فى الرئيس السحرى عشان يطلع منه اى مارد لكن فى الاخر ما طلعش سحرى ولا حاجة ...

ابو شنب : الرئيس حسنى مبارك هو قائد الضربة الجوية وجمال عبد الناصر قاله انت ايه اللى مقعدك هنا انت لازم تبقى قائد القوات الجوية والسادات كمان اختاره النائب بتاعه معنى كدة ان الراجل كويس وما فيش خلاف عليه كمان هو بقاله 24 سنه فى الحكم واحنا جربناه واحنا عايزينه مدى الحياة لانه انسان محترم

تصفيق حاد ... يقف رجل فى العقد السابع من عمره يهتف

حسنى حسنى حسنى حسنى

ترديد

سرور سرور سرور سرور

ترديد

ابو شنب : نييجى بقى نتكلم عن انجازات الرئيس مبارك البنيه التحتية شبكة الصرف والتليفونات فى ناس تقولك طب ليه ما صرفش الفلوس على الاقتصاد ارد عليه واقوله وهو فى اقتصاد من غير بنية تحتية

تصفيق حاد ... يقف نفس الرجل يهتف

حسنى حسنى حسنى حسنى

ترديد

سرور سرور سرور سرور

ترديد

ابو شنب : فى ناس تقولك لا احنا عايزين تغيير وكفاية كدة واحنا سمعنا عن حركة كفاية وبقولكوا ان المعارضة مطلوبة لازم يا جماعة المعارضة تنبتلها اظافر لان المعارضة فى احيان كتيير بتكون بناءة وبتساهم فى مسيرة الاصلاح بجد .

يتنرفز الرجل اللى بيهتف ويتشنج فى حركة تمثيلية ويقول معارضة ايه وكفاية ايه دول ماجورين وبياخدوا فلوس من الخارج وكلنا عارفين سعد الدين ابراهيم ومركز ابن خلدون وحكايته.

الناس تشده وتهديه ويكمل ابو شنب : انا اقصد المعارضة الوطنية البناءة مش العميلة وانت كلامك مهم وكويس عشان نعرف نوع المعارضة اللى بقصدها انا باقصد احزاب المعارضة الموجودة والى هما شخصيات شريفة وموجودين فى مجلس الشعب آه هما ممكن ينتقدوا الحكومة لكن من اجل المزيد من التقدم مش عشان يوقفوا المسيرة ... ياجماعة احنا لسه هانشوف على ايدين الرئيس مبارك ايام اجمل من اللى فاتت لان رئيسنا عاقل طب شوفوا صدام عمل فى شعبه ايه احنا رئيسنا العالم كله مجمع على احترامه وفى عصره تم اختيار 3 مصريين فى مناصب دوليه مهمة جدا عندك الدكتور فتحى سرور دة قانونى على اعلى مستوى ما فيش زيه ودكتوراه فى القانون استاذ يعنى وعشان كدة اختاروه رئيس برلمانات العالم

تصفيق حاد ....هتاف نفس الراجل

سرور سرور سرور سرور

ترديد

فيه كمان عمرو موسى "رئيس جامعة الدول العربية" دة برضه منصب دولى مهم وفى كتيير غيرهم العالم بيختارهم وقبل العالم ما يختارهم اخترهم الرئيس مبارك بعقله الواعى ونظرته اللى ما تغلطش

هتاف " نفس الهتاف السابق بنفس الشخص "

يجلس ابو شنب بعد التصفيق ويقوم اخر " ابو نضارة " ليتكلم مكانه .

ابو نضارة : انا عايز اضيف على الكلام دة ان الحزب الوطنى مفتوح للنقاش مع كل اطراف المعارضة وبيقبل الراى الاخر ومش صحيح ان احنا بلطجية كل دة تلفيق

يتشنج واحد بانفعال شديد ويقوم يقول حسبى لله ونعم الوكيل فيهم الصورة اللى ظهرت للبت وعليها الرجالة دى صورة متصورة فى اودة ومتلفقه دى صورة سكس يا اساتذة دى مش متصورة فى الشارع حسبى الله ونعم الوكيل فيهم دى ناس سفلة يقطعوا هدمهم ويقولوا الحزب الوطنى انتهكنا فى الشوارع استغفر الله العظيم

الناس تهديه ويجلس ليكمل ابو نضارة كلامه .

ابو نضارة :هما بيقولوا علينا بلطجية واحنا بنقلهم لا احنا بنسمع الراى الاخر وبنرد عليه بالكلمة لان ما فيش اقوى من الكلمة

والكلمة الحقيقية قالها الريس لما طلب من مجلس الشعب يعدل الدستور عشان يرد على الناس اللى قالت احنا عايزين انتخاب بين اكتر من مرشح .

هتاف نفسه بنفس الشخص

بارمى عينى على اخونا ضياء لاقيته رافع ايده وطالب الكلمة "يانهارك اسود مش هانروح النهاردة " نسيت اقولكم ان القهوة بعد ما قعدنا بدات تترشق خلق من عينة سلومة لاقرع اللى مابيرحمش وكانوا بييجوا بالتدريج قال يعنى ماشيين ولاقوا ناس بتتكلم فاجم يسمعوا ومنهم واحد عليه دراع غريب جدا شكله يخوف ولافف عليه من فوق شىء ما مداريه بكم التى شيرت ومش كده وبس دول نفس الخلق اللى بييجوا فى المظاهرات المؤيدة لمبارك لما تكون حركة كفاية عاملة مظاهرة وغالبا كدة هما شموا من اشكالنا اننا بتوع " كفايه" لان كل ما اجى اقوم يمسكوا فينا جامد مصممين اننا نسمع الكلام للاخر كمان صمموا يجبولنا كركديه ساقع واننا لازم نشرب لدرجة انى افتكرت نجمة ابراهيم ومش هاتكلم عن الهلع بالذات بعد ما سلومة لاقرع ما اتحرك ووقف ورايا انا كنت قاعدة على كرسى جنب ر اجل كبير فى السن واول ما سلومة اتحرك حصلت منى نفضة لاارادية بتوضح انى متوترة الراجل قالى ماتخافيش يابنتى احنا هنا نشيلك فى عيونا ما حدش يقدر يعملك حاجة احنا نحميك

قولتله "من تحت ضرسى" انا واثقة من كدة انتوا ولاد بلد وباين على وشوشكم الطيبة والجدعنة .ناس طيبين صحيح !

المهم ضيا المجنون هايرمى نفسه ويرمينا معاه ارجع يا مجنون كفاية حرام يالا نروح .. ما فيش فايدة دة مصمم يتكلم يا رب استرها بدات استعرض جغرافية الشارع وبابص على العمارة اللى فى ضهرى اكتشفت انى اعرف المصوراتى اللى فى الدور الارضى يا ترى لسه فاتح الساعة كانت 12 ونص او واحدة طب ولو فاتح هايحمينا ولا هايستندل ربنا يستر

كل الناس قالت لابو نضارة الاستاذ عايز يسال خاليه يقوم

وقام ضيا منتفضا ومكشرا عن انيابه وقال ... " تعاليلى يابطة وانا مالى هة " ها ها ها

طبعا محصلش كدة انا بس بعمل فاصل غنائى

وقف ضيا وعلى وشه ابتسامة عريضة وقال كل الكلام اللى اتقال دة كلام جميل جدا جدا " نفس عميق وارتياح ضيا قرر يروش الحمد لله " وانا سعيد انى الاقى الناس على القهوة بيتكلموا فى سياسة البلد كل دة جميل بس انا عندى سؤال مهم .تتتتا ............ اظلام

لسه ما اتضربناش بس دى دماغى اللى عملت الصوت دة

بس قبل ما اسال عايز اوضح نقطة مين هيه حركة كفايه

حركة كفاية مكونة من عدد من الشخصيات اللى فى احزاب المعارضة من ناصريين واشتراكيين واسلاميين وبعضهم اعضاء فى مجلس الشعب الناس انتخبتهم يعنى مش عملا ولا حاجة اما بالنسبة لسعد الدين ابراهيم فهو مش فى حركة كفايه

السؤال هو ليه الريس غير الدستور بعد شهر من تاكيده فى التصريحات ان الدستور مش هايتغير هل ده حصل بسبب ضغط من امريكا ؟

بعد السؤال حصل بلبلة فى القاعدة وبدا البلطجيه يغيروا فى اماكنهم والوجوه تجهمت ولا مؤاخذة وتقدم ابو شنب للاجابة على السؤال بينما نحن نزداد توجسا

ابو شنب : الريس ما بياخدش اى اوامر من امريكا ومواقفه كلها واضحة سواء على مستوى القضايا الخارجية او الداخلية وهو لما لقى فى ناس بتطالب بانتخاب الرئيس بين اكتر من مرشح ولانه ديمقراطى قام طلب من الدكتور فتحى سرور انه يعدل الدستور يا جماعة احنا مش لازم ننسى ان فى عصر الرئيس مبارك لم تغلق جريدة ولم يقصف قلم ولم يسجن احد بسبب اختلافه فى الراى مع الحكومة ولولا ديمقراطية الريس ما كناش سمعنا عن حركة كفاية او ايمن نور او غيرهم ادينا كلنا قاعدين اهو ناس من الشارع وما فيناش واحد بس امن دولة الجيل اللى طلع فى عصر مبارك دة عايش احسن مننا الف مرة انا بعد ما اتخرجت قعدت ادور على شغل اربع سنين لحد ما حفيت فى حد فى الجيل دة حصلوا كدة بسبب الامن والديمقراطية والانجازات الاقتصادية ما بقاش فى حد بيتخرج وما بيلاقيش شغل اوعوا تفتكروا انى الحزب الوطنى او الدكتور فتحى سرور بي قدمولى اى خدمات شخصية عشان كدة انا باييد الحزب الوطنى لا انا باقول كلمة هما يستحقوها ودى كلمة حق لازم تتقال .

هتاف مع تحركات مش طبيعيه خلت ابو نضارة يبادر بانهاء القاعدة قبل ما سلومة لاقرع يرمى كرسى فى الكلوب او فيينا
قصره لمينا بعض احنا التلاتة بسرعة وتقدم مننا الاعضاء الموقرون وسلموا عليه بلطف عشان يثبتولى انهم ناس مهذبيين ومش بلطجية اما ضياء فبعد التعليق والسؤال اتعرض للكزات وسلامات من تحت الدرس ونفس السلامات الباردة والنظرات الخبيثة كانت من نصيب وائل وعنها وطلعنا طيران جبال تشيلنا ووديان تحطينا لحد ما حسينا ان احنا مش متراقبين من اى سلومة كل واحد روح على بيته مع الاتفاق على ان كل واحد يكتب اللى حصل على طريقته

وربنا ما يكعبلكوا ابدا فى قهاوى التهييس السياسى

نرمــــــــــــــــــو


ملحوظات من وائل عباس:

- قبل ما نقعد انا ظنيت انه مجلس عرفي لحل بعض الخلافات في الشارع او شيء من هذا القبيل
- لما سالنا عن المتكلم قالولنا ده المهندس كذا رئيس حركة كفاية ...
- سبحان الله مافيش امن مركزي محاوطهم ولا حاجة قلت ده حلم ولا علم ازهى عصور الديمقراطية اتحقق فجأة كده
- الحقيقة يا جماعة انا كنت قاعد باصفق وباهز راسي لزوم الكاموفلاج يعني والتمويه علشان كنت اهبل وفاكر انهم مش عارفين احنا مين ... لكن للاسف طلعنا اشهر مما نتوقع وهما كانوا عارفين من الاول بالضبط احنا مين وانا بهبالتي كنت لابس نفس التي شيرت بتاع كنس السيدة
ولو اني ما كنتش عارف اني هاروح السيدة تاني بس الله يسامحك يا نرمو
- كمان لما قالوا ان فيه ناس مسكت مناصب دولية انا زودتلهم من عندي مجاملة يعني لقعدة التهييس دي بطرس غالي واحمد زويل
- المهم انا سايب العالم اللي بتخطب دي ورامي ودني وسط الحضور حسيت ان فيه ناس فاهمة الليلة بس اهي قاعدة وبتتريق بس فيه شوية تعليقات برضه اعتقد انها مهمة
- شباب قاعد كاوا بيقولوا ان كفاية دي شباب خنافس مربية شعرها وبنات بطنها باينة وبتشرب سجاير يعني تبع امريكا ... ودي ها اسيبهالكم انتم تعلقوا عليها
- المهم جابولنا احنا التلاتة كركديه ساقع مخصوص وانا من كتر البارانويا قلت اشفط شفطة الاول واشوف الطعم لو فيه حاجة غريبة ولا لا ... بصراحة مش انا لوحدي ده كان شعورنا احنا الثلاثة ان محطوط لنا سم مثلا او مخدر او منوم او حاجة زي كده ... واعتقد انتم في موقف زي ده وبعد اللي شفتوه بعينكم يوم الاستفتاء ها تعذرونا
- لما ضياء بقى قام يتكلم انا قلت اوبا الواد ده ها يضيعنا ... ابتدا يتكلم في اللذيذ والتهييس وهوب لقيته قلب على موضوع حسني مبارك وتصريحه على سلم الطيارة لما كان رايح معرفشي فين ... قلت بس ... ضعنا والحمد لله ... ضياء حزب عمل يعني اسلامي يعني من بتوع العمليات الانتحارية ... وهو خلاص قرر يستشهد الليلة ويستشهدنا معاه ...
- المهم عدت على خير وضياء خلص كلام والساعة كانت اتناشر نص الليل وقاعد انا ونرمين على اعصابنا ونرمين عاوزة تمشي وعاوزين نستاذن من الناس ... وخلاص قررنا نبيع ضياء لانه باعنا وفتح بقه ... بس كان قاعد جنبنا راجل معلم جزار قعدت اقول له نرمين بنت لازم تروح واهلها ها يقلقوا وماعرفشي ايه ... بس طلع الراجل اصيع مني ... قاللي صاحبك طلب الكلمة واحنا سمعناه فلمن الذوق انكم تسمعوا ردنا عليه ... صايع مش كده ؟؟؟ واحنا رايحين نبيع المية في حارة السقايين ...
- المهم عدت على خير برضه ونلنا قسطا وافرا من الابتسامات الصفراء والسلامات والاحضان وكاننا كنا في ثار واصطلحنا ... كانت قيادات الوطني الكبيرة بتسلم علينا وتبوسنا والشباب بتوعهم وربما منهم من البلطجية بتوع الاستفتاء بيزقونا بخبث من ظهورنا وينغزونا ويلكزونا حتى اني قاربت ان انكفيء على وجهي ...
- واحد من الشباب وانا ماشي قال لي : ابقوا ارفعوا المقشات اعلى شوية ...
- سلكنا نفسنا في النهاية وامنا ضهرنا وابتدينا نتوه بعيد عنهم كما حكت نرمين
بلاد تشيلنا وبلاد تحطنا ...

بقلم عماد الدين حسين
دمقراطية "عبده بلاطه"
الملاحظة المثيرة في حركات الاحتجاج الشعبية في عواصم
عربية عدة في الفترة الأخيرة هي أن الحكومات لم تجد ما
تواجه به هذه الحركات سوى «استئجار متظاهرين» وتلقينهم
الشعارات وإعطائهم اللافتات.

قبل ذلك كان سلاح الحكومات الرئيسي هو الأمن، لكن الآن
هناك فيتو أميركي معلن بعدم استخدام هذا السلاح يشكل
سافر، لأنه يتناقض شكلاً مع الشعارات الأميركية، كما أن
السلاح الآخر وهو «حشر الموظفين في حافلات عامة». لم يعد
يجدي إلا مرة واحدة كل بضعة سنوات خلال موسم الانتخاب أو
الاستفتاء.

ما يلفت النظر أكثر في ظاهرة «التظاهرات المدفوعة سلفا»
هو نوعية المتظاهرين... صحافي عربي راقب إحدى هذه
التظاهرات وتمكن من محاورة متظاهر... الأخير قال ببراءة
وبوضوح.

انه حصل على حوالي 4 دولارات و«المعلم» الذي استأجره
يحصل على اقل من دولار عن كل رأس... المعلم يدعى حسب
المتظاهر «عبده بلاطة» ولقبه «أبو سنجتين»، والسنجة لمن
لا يعرف، هي أشبه بسكين طويل يستخدم في الخناقات
والمعارك الشعبية خصوصاً بين البلطجية.

يقول الصحافي ان هؤلاء البلطجية وخريجي السجون والمعدمين
والمشردين الذين استأجرتهم الحكومة هم أصلاً ضحايا
سياسات الحكومة نفسها.. لكنهم لا يدركون ذلك، ويضيف
ساخراً أنه يتمنى أن تستمر هذه الظاهرة، فهي ستكرس
مناخاً ديمقراطياً، والأهم أن الغلابة سيتمكنون من
الحصول على بعض النقود من الحكومة وبالتالي قد يتمكنون
من مواصلة حياتهم القاسية».

وبعيداً عن هذه الكوميديا السوداء فإن الخطأ في كل ذلك
لا يتحمله سوى بعض الحكومات العربية، فهي تجني ما زرعته
سلفاً.. معظم الحكومات حققت نجاحاً منقطع النظير في قمع
واقتلاع وإفساد كل المعارضات المدنية والسلمية، وحولتها
إلى دكاكين أو منابر فردية، وعندما جد الجد.

وبدأت المسرحية الديمقراطية الأميركية الأخيرة، فوجئت
هذه الحكومات بالتيار الديني فقط في الساحة وبضعة حركات
معارضة صغيرة، وفي اللحظة التي أعطت فيها واشنطن وأوروبا
الضوء الأخضر للمعارضة كي تتظاهر وفي مقدمتها التيار
الديني، لم تجد هذه الحكومات التي لا تملك شعبية حقيقية
سوى «عبده بلاطة» وأمثاله.

عبده بلاطة خيار قاتل لمن يستأجره، فهو يهتف فقط لمن
يدفع له، ثم أنه قد يسيء «للمعلم الكبير» عندما يفلت من
عقاله وياتي بافعال مخجلة لسيده من قبيل التحرش
بالمتظاهرات في الطرف المعارض، وقبل ذلك وبعده قد يفيق
في لحظة ما ليدرك أن «مستأجره» هو عدوه الرئيسي.

وحتى عندما تدرك أمثال هذه الحكومات أن الرهان على «عبده
بلاطة» هو خطأ قاتل لن تجد في الساحة سوى معارضين على
النمط الأوكراني، مستعدون لبيع جلود أمهاتهم قبل أوطانهم
إلى «المعلم الأكبر» من أجل الكرسي.. إذن ألا يوجد خيار
آخر أمام هذه الحكومات كي تصحح خطأها القاتل؟!
الخيار المتاح والوحيد والمنطقي تقريبا هو ان تصالح مثل
هذة الحكومات شعبها وتحتكم الي ارادته وتتوقف عن
معاملته.!!! باعتباره قطيع من العبيد......لكن هل سيصفح
الشعب عنها....اشك كثيرا


عماد الدين حسين

إدي مبارك فيزا وخديه يا كوندليزا
:lol::lol::lol:

الجمهوريات الملكية



من أطرف القصص ما فعله الجنرال فرانكو بعد أن وصل إلى السلطة ..

إذ انه بعد أن خاض المعارك الشرسة دافعا عن "الملكية" بوجه "الجمهوريين" وإنتصر؛ فإنه وضع الملك العتيد على الرف وأعلن الجمهورية ..منصبا نفسه رئيسا لمدى الحياة ..

والجديد في ما فعله فرانكو هو أنه إخترع "جمهورية" لها كل معالم وسمات الملكية عدا التاج والملك ..

وفي آخر أيام حكمه المديد كأن "ينقل السلطة لوريث العرش" حين تتدهور صحته، ثم لا يلبث أن يستعيدها حين يستعيد نشاطه من جديد ..

الجنرال فرانكو هو الأب الروحي والملهم لكل "الجمهوريات الملكية" القائمة في بلادنا اليوم ..

على أن هناك فارق واحد كبير وهام وهو أن فرانكو لم "يورث" السلطة لأبنه أو حفيده بل أعاد العرش إلى "السلالة" التي تحكم إسبانيا اليوم ..

ليس هذا نوعا من الدفاع الملتوي عن الملكية ..

بل إنه تعرية لنظم جاهرت بالدفاع عن الشعوب وحرياتها بوجه الملكية؛ وعندما ركبت حصان السلطة جعلت الشعوب العربية تترحم على ما فات من نظم ملكية ..

لا حاجة لإعطاء الأمثلة لكونها بارزة للعيان من حولنا ..

وجاءت العمة العزيزة أميركا "تزرع الديمقراطية" بإستخدام الهيليكوبتر !

والقصة وما فيها أن السلطة في أميركا اليوم ممسوكة من قبل التيار الأشرس في نشر الإستعمارالإقتصادي الخالي من أي ملمح من ملامح الإنسانية ..

وحكاية نشر الديمقراطية أكذوبة خالية من خفة الدم ..

فبين من "منحوا شهادات حسن السلوك الأميركية " أنظمة غارقة في الفساد حتى أذنيها، ومظاهر الترف والبذخ في شخص الحاكم وعشيرته تجرح عين المراقب ..

المقياس الأميركي ل"حسن السيرة" مرتبط بالإنصياع الأعمى لرغباتها الجامحة لسرقة خيرات الشعوب ..

وفي سبيل الوصول إلى ذلك فلا بأس من أن يقتات الحاكم "حسن السيرة" هو وذريته الكريمة على بعض الفتات ..



باحث عن الحقيقة
quest_4_facts

عزيزتى نسمة عطرة
رغم انى اؤيد تماما حركة كفاية واؤيد تظاهرتها ضد نظام الحكم الديكتاتورى لكن اعترض تماما على اللهجه العدائيه للولايات المتحده
فأنى اعتقد جازما انه لولا وجود الولايات المتحده فى العالم حاليا لما جرؤ شخص واحد من كفايه او من غير كفايه على التظاهر ضد الحاكم فى مشرقنا العربى التعيس .فكل من يتظاهر يعلم فى قرارة نفسه حتى ويتجاهل ذلك انه فى امان نسبى بسبب وجود امريكا ومن بعدها اوروبا ولن يستطيع النظام ان يتوحش على المتظاهرين خشيه من الغرب.
اقسم بالله لو ان الغرب قد اختفى من الوجود فجأه حاليا وبقينا نحن فقط وقتها فقط ستشعروا جميعا بأهميه وجوده هذا الغرب الذى تنقمون عليه.وقتها سترون همجيه القرون الوسطى من الحكام واساسا لن يحاول انسان من كفايه وغير كفايه التلفظ بحرف واحد ضد الحكم وسنعود جميعا فى لحظه واحده الى عصر مسرور السياف .
ارجوكم لا تكونوا ناكرين للجميل فكل نعمه نعيش فيها جميعا حاليا مصدرها الغرب وكل نقمه نعيش فيها مصدرها شرقنا التعيس .
كم انت مظلوم ايها الغرب بعدما ارتقيت بالبشريه الاف السنين للامام يأتى هؤلاء الهمج (هذه الكلمه ليست لك المقصود المتخلفين فى مشرقنا العربى ) ويصبوا عليك كل انواع اللعنه . انهم فقط لا يستطيعوا ان يلعنوا سواك لانك انت الغرب الذى يمتلك القلب الرحيم . وكلنا يعلم تماما ما الفرق بين النظم الغربيه ونظمنا المتوحشه .
انظروا فى تاريخ مصر تجد ان الشعب المصرى ذاق الذل والمراره على مدى تاريخه ولم يتحرك ولم يستطع ان ينطق حرفا ضد طغاته بينما هذا الشعب انتفض كالمارد وعمل فيها شجيع السيما فقط على الفرنسيين وعلى الانجليز رغم انهما الاحتلالان اللذان دفعا مصر الى الامام وعلم منها المصريون معنى احترام الانسان .
هناك شىء فى الجينات العربيه تكره وبعنف الرقى والتحضر الغربى رغم اننا داخليا واثقين ان هذا الغرب اكثر تحضرا وعداله ورقيا منا ولكن نكره الغرب مع ذلك بكل ضمير.
المشكله جينيه ياساده

اقتباس:  مسلم رغم انفه   كتب/كتبت  
انظروا فى تاريخ مصر  تجد ان الشعب المصرى ذاق الذل والمراره على مدى تاريخه  ولم  يتحرك ولم يستطع ان ينطق حرفا ضد طغاته  بينما هذا الشعب انتفض كالمارد  وعمل فيها شجيع السيما  فقط  على الفرنسيين  وعلى الانجليز  رغم انهما الاحتلالان اللذان دفعا مصر الى الامام  وعلم منها المصريون معنى احترام الانسان .

:devil: :devil: :devil: :devil: :devil: :devil:

أول مرة أشوف واحد يقول الاحتلال هو الذي يدفع الدول إلى الامام

فلتسقط الحرية إذا جاءت على يد المحتل ولنعش تحت ظل أي ديكتاتور بأختيارنا أفضل مائة مرة من الحياة في ظل محتل حتى لو كان سيدفعنا للأمام :lol2:

عزيزى ماس
بمنطقك هذا ارجو ان اسمع منك جمله فليسقط الاحتلال العربى الاسلامى لمصر الذى احتل مصر مئات السنين . ولا دلوقت هنرجع نكيل بمكيالين ؟؟ لو سمعت منك هذه الجمله استطيع بعدها ان اتناقش معك والا فلا فائده من النقاش