موضوع صلاة التهجد اليومين دول بجد تعبني جدا، خصوصا وإني مش لاقي مسجد أصلي فيه صلاة تهجد أحاول من خلالهم أخطف لحظتين صعب إني ألاقيهم في أيام تانية غير شهر رمضان.
تعبان لأن المظاهر البايخة اللي مع التهجد اللي بتحصل في المساجد خصوصا وقت الدعاء حاجة بقت سمجة أوي، وزادت عن الحد!
أنا هابين لحضراتكم لأن الموضوع بقي واخد الشكل التالي:
الزبيبة المفاجئة!
الشيخ عندنا اللي مش بنشوفه أساسا إلا في صلاة العشا وبيجي علشان "الإمضا" في الدفتر، وضاربها طناش طول السنة
فجأة بينزل عليه هدى ربنا في شهر رمضان، وسبحان الله نلاقي زبيبة طلعت في راسه، ويتكلم بصوت واطي خافت، ويعيش في دور الشيخ "صلاح الجمل" ويلبس الجلابية المزخرفة والعباية الملونة، ويبدأ قراءة في التهجد ويتعمد إنه ييجي متأخر حبتين علشان الناس تشتاق وتسأل!
وبعد ما يدخل يبدأ القراءة يجي عند آيتين أو حتة في الدعاء بيتكلموا عن النار أو الجنة،
نلاقيه مرة واحدة حصل في صوته حشرجة ويبدأ يدخل في دور مش بكاء، بتبقي باينة خالص
حاجة أشبه بالبكاء بنسميها "شحتفة" ودي إشارة للإخوة المصلين والبنات اللي فوق البنات اللي كل واحدة شايلة خمس علب "فلورا" علشان لحظة البكاء والتأوه واللي مش بتعيط إنسانة حاجة – يع - مش عندها قلب!
ويبدأ البكاء بصوت عالي جدا، ممكن في الأغلب بتوصل لصوات وآنين من الشباب والبنات
شغل تمثيليات ، ناقصها بس موسيقي تصويرية أو الأخ أحمد الحجار وهو ماسك العود وبيغني "عووووود ..عوود ..عووود عود عود" والحاج أبو أحمد قاعد بيعيط، وجنبه علي الحجار وهو متأثر وبيهز في شعره الطويل علشان يبين لخلق الله قصة شعره الجديدة!
دعاء جامد جداً
فكرت إني في النهاية أني أقضيها في البيت من الآخر، وأدعي دعاء أنا حاسس بيه، لناس قريبين مننا أحسنوا لينا أو على ناس مطلعين عنين أهالينا
هادعي إن ربنا يرحم أستاذنا المسيري،
إن ربنا يرحم الغلابة اللي اتهدت عليهم بيوتهم في "الدويقة"،
إنه يكون في عون الموظفين اللي مش لاقيين ياكلوا.. اللي اتكووا من الأسعار وغيرهم نايمين مبسوطين في "الربوة" و"سان ستيفانو" و"مدينتي" و"الرحاب"،
إننا نشرب مية نضيفة بلاش مية معدنية يا عم،
وناكل أكل مش مسرطن فول وعدس وكوسة والله مش مايونيز وباتون ساليه ولحمة باردة.
هادعي إن ربنا يهد الإستبداد اللي في البلد،
ويخرب بيت اللي باع المصانع وشرد العمال ورفع أسعار الحديد..
هادعي إن الأحزاب في مصر تصحى من موتها وإن ربنا يبدلنا بالدرويش أحمد الصباحي ورفعت السعيد ومحمود أباظة وموسي مصطفي موسي وفيروس الأحزاب رجب حميدة أقواما زي أبو العلا ماضي وحمدين صباحي وأمين اسكندر وكمال خليل.
يارب أبو الفتوح وحشمت!
هادعي ربنا إن السلفيين يفهموا حاجة في عيشتهم، والإخوان ربنا يرزقهم أبو الفتوح مرشدا والزعفراني نائبا وجمال حشمت متحدثا.
هادعي ربنا إن الأهلي يبطل هزيمة في الزمالك.. وإن الأهلي يتغلب لله مرة..
وإن نانسي وهيفاء وكل الفاتنات القادمات اللبنانيات أو المتلبننات يتهدوا ويريحونا ويكملوا ربع الإكمام اللي بيلبسوها..
هادعي إن يسرا وإلهام شاهين ونادية الجندي وفيفي عبده وغيرهن يبطلوا عمليات شد الوش،
وربنا يرزقهم قعدة في البيوت أبد الدهر، وكسر نفس عن التمثيليات، وان يحرمنا الله من طلاتهم لعمر مديد.
يارب كفاية شوبير
وان العيال سواقين الميكروباصات يبطلوا يقطعوا المواصلات، ويحطوا أربعة في الكرسي اللي ورا، ويبطلوا يذلونا بنواح المعلم مصطفي كامل، وخناق الأسطي عبد الباسط حمودة..
هادعي ربنا ان أحمد شوبير يبطل هو ومدحت شلبي نفاق في الريس ولو أحسن يبطلوا أصلا شغل فضائيات ويكتفوا بالمناصب اللي واخدينها ويوسعوا لغيرهم.
هادعي ربنا إن الريس هو وصفوت الشريف يبطلوا يصبغوا شعرهم
وإن التليفزيون المصري يولع وخصوصا القناة التالتة وإن الاتنين المذيعين اللي اسمهم تامر أمين وعمرو عبد السميع وهما نازلين من التليفزيون يكون واحد معفن واكل موز راح رمى القشر أمام ماسبيرو عدل يتزحلقوا في الموز يقعوا..
تامر أمين تنكسر راسه وعمرو عبد السميع تنكسر رقبته.
يارب دول يروحوا موزمبيق
يارب شعبان عبد الرحيم وطارق الشيخ وعماد بعرور وسعد الصغير ومصطفي كامل وعبدالباسط حمودة وكل الإخوة الميكانيكيين والحلاقين والمكوجية اللي قلبوا مغنيين يروحوا يحيوا فرح في موزمبيق تتحرق بيهم الطيارة.. يخرجوا منها مولعين.. يقعوا في محيط يغرقوا.. تلاقيهم سمكة قرش تكسر عضمهم.. يطلعوا برة المحيط وهم غارقانين ومولعين وعضمهم متكسر.. تيجي عربية لوري محملة زلط ورمل تدوسهم ما تخليش فيهم فتفوتة..
الهي يارب يارب محمد سعد يبطل تمثيل هو وكل الجيل المقرف اللي قرفونا في عيشتنا بكلامهم المهبب
يارب تامر حسني يقفل قميصه ويبطل يتباهي بشعر صدره
يارب الأزهرية يحسوا إنهم عايشين في القرن العشرين ويبطلوا الكلام اللي نصفه شعر محفوظ ونصفه التاني خطب للشيخ كشك....
قولوا آآآآآآآمين.....
بحث
قائمة الأعضاء
التقويم
وثائق المساعدة
